MISA SA TUNGANG-GABII
MISA SA TUNGANG-GABII
KINUTLO GIKAN SA BASAHON NI PROPETA ISAIAS
Ang katawhan nga kaniadto naglakaw sa kangitngit nakakitag dakong kahayag; ang nagpuyo sa mangiob nga dapit gisidlakan na sa kahayag.
Gipadaghan mo ang molupyo sa nasod, GINOO, nagmaya sila diha sa imong atubangan; sama sa pagmaya sa mga tawo inigkating-ani ug ingon nga maglipay ang mga tawo inigbahin-bahin nila sa ilang inilog.
Kay gigupok mo sama sa nahitabo sa Midian ang yugo nga iyang gisangon ug ang karga nga iyang gipas-an ug ang garoti sa nagdaugdaog kaniya.
Kay natawo alang kanato ang usa ka bata, gihatag kanato ang usa ka anak lalaki; ug siya ang magmando sa tanan, ug nganlan siyag "Maalamong Magtatambag," "Dios nga Gamhanan," "Walay Katapusang Amahan," "Prinsipe sa Pakigdait" Walay katapusan ang pag-uswag sa iyang pagmando ug molungtad usab ang kalinaw, diha sa trono ni David ug sa gingharian niini, ug lig-onon niya kini ug palungtaron uban sa hustisya ug sa katarong sukad karon hangtod sa kahangturan. Himoon gayod kini sa GINOO nga Labing Gamhanan.
ANG PULONG SA GINOO.
Ps. 96:1-2, 2-3, 11-12, 13
R. Karong adlawa natawhan kita og manunubos, si Cristo ang Ginoo.
Awiti ang Ginoo og usa ka bag-ong awit; awiti ang Ginoo, kamong tanang mga yuta. Awiti ang Ginoo; dayga ang iyang ngalan.
R. Karong adlawa natawhan kita og manunubos, si Cristo ang Ginoo.
Ipahibalo ang iyang kaluwasan sa tanang adlaw. Iasoy ang iyang himaya diha sa kanasuran; Diha sa tanang katawhan, ang iyang katingalahang mga buhat.
R. Karong adlawa natawhan kita og manunubos, si Cristo ang Ginoo.
Paglipay mga langit ug pagsadya yuta:palanoga ang kadagatan ug ang nagpuno niini; Maglipay ang kapatagan ug ang tanan nga anaa kanila! Unya manlukso sa kalipay ang tanang kahoy sa kalasangan.
R. Karong adlawa natawhan kita og manunubos, si Cristo ang Ginoo.
Unya manlukso sila sa kalipay atubangan sa Ginoo kay miabot siya. Kay niabot siya aron maghari sa kalibutan. Handoman niya ang kalibutan sa iyang katarong ug ang katawhan sa iyang kamakanunayon.
R. Karong adlawa natawhan kita og manunubos, si Cristo ang Ginoo.
Ti. 2:11-14
KINUTLO GIKAN SA SULAT NISAN PABLO NGADTO KANG TITO
Kay nagpadayag ang Dios sa iyang grasya alang sa kaluwasan sa tanang mga tawo. Ang maong grasya nagtudlo kanato pagbiya sa kinabuhing dautan ug sa kalibutanong kailibgon ug sa pagkinabuhi nga mapinugnganon sa kaugalingon, matarong ug diosnon, samtang nagpaabot kita sa bulahang Adlaw nga atong gilauman inigpadayag na sa himaya sa atong gamhanang Dios ug Manluluwas nga si Jesucristo. Gitugyan niya ang iyang kaugalingon aron pagluwas kanato sa tanang pagkadautan ug paghimo kanato nga putling katawhan nga iyaha ra gayod, ug masibuton pagbuhat sa maayo.
ANG PULONG SA GINOO.
Lk. 2: 1-14
Kinutlo gikan sa Balaan nga Ebanghelyo sumala ni Lucas
Niadtong mga adlawa migula ang usa ka mando gikan kang Cesar Augusto nga irehistro ang mga lumolupyo sa tibuok kalibutan. Kining unang talaan nahitabo sa dihang si Quirino mao ang gobernador sa Siria. Ug nangadto ang tanan aron magparehistro sa ilang tagsatagsa ka dapit nga natawhan.
Mitungas usab si Jose gikan sa Galilea didto sa lungsod sa Nazaret, ngadto sa Judea didto sa lungsod ni David nga gitawag og Betlehem, tungod kay gikan man siya sa balay ug kaliwat ni David, aron magparehistro uban kang Maria nga iyang sinayoran nga nagsabak.
Nahitabo nga samtang didto pa sila, miabot ang adlaw nga siya manganak, ug nanganak siya og lalaki ang iyang unang anak ug iya siya nga giliminan ug gipahiluna sa pasungan tungod kay wala na may luna alang kanila didto sa abotanan sa mga dumuduong.
Adunay mga magbalantay sa karnero niadtong maong dapit nga nagtukaw sa kapatagan ug nagbantay sa ilang mga karnero panahon sa kagabhion. Ug ang anghel sa Ginoo mikalit pag- tungha kanila ug nag- barog; ug ang himaya sa Ginoo midan-ag kanila, ug nalisang gayod sila pag- ayo.
Ug miingon kanila ang anghel, "Ayaw na kamo og kalisang, kay ania nagdala ako kaninyo og maayong balita sa dakong kalipay nga moabot sa tanang katawhan, kay natawo alang kaninyo karong adlawa didto sa lungsod ni David ang Manluluwas nga mao si Cristo ang Ginoo. Mao kini ang timailhan alang kaninyo: makap- lagan ninyo ang bata nga linimisan ug naghigda didto sa pasungan."
Unya sa kalit lang mitungha uban sa anghel ang dakong panon sa mga langitnong kagahuman nga nagadayeg sa Dios ug nagaingon: "Himaya sa Dios sa kahitas-an, ug sa yuta kadait sa mga tawo nga iyang gikahimut-an!"
Ang Ebanghelyo sa Ginoo.
KATILINGBANONG PAG-AMPO
Pasko sa Pagkatawo The Nativity of the Lord (CHRISTMAS) Dec 24, 2022-Midnight Mass
Pari: Mag-ampo kita sa Dios Amahan nga sa iyang dakong ugma, nagpadala sa iyang bugtong Anak aron pagluwas sa kalibutan. Sa matag pangamuyo, kita moingon:
DIOS NGA NAGPAKATAWO, LUWASA KAMI.
1. Alang sa Simbahan ilabina ang atong Santo Papa, Francisco, mga kaobispohan, kaparian ug mga relihiyoso, nga mamahimo unta silang instrumento sa pakigdait sa tanang mga tawo. Mag-ampo kita sa Ginoo.
2. Alang sa mga punoan sa panggamhanan, mamahimo unta silang instrumento sa katumanan sa plano sa Dios. Mag-ampo kita sa Ginoo.
3. Alang sa tanang kabataan, ilabina sa mga gisabak ug bago-ong himogso sa kalibutan, nga makasinati unta sila sa tumang pagpangga ug paghigugma sa Dios pinaagi sa ilang mga ginikanan ug mga higala. Mag-ampo kita sa Ginoo.
4. Alang sa mga kabus, hinikawan, masulub-on ug masakiton, masinati unta nila ang presensiya sa Dios nga nagpakatawo pinaagi sa atong pagtabang ug pakig-unong kanila. Mag-ampo kita sa Ginoo,
5. Alang sa mga nagadayeg ug nagapasalamat sa Dios, ilabina nila magmalipayon unta sila diha sa ilang pagpaambit sa grasya sa Dios ngadto sa uban. Mag-ampo kita sa Ginoo.
6. Alang sa mga nangamatay, ilabina sila makaangkon unta sila og kaluwasan nga gidala ni Cristo sa kalibutan. Mag-ampo kita sa Ginoo.
Pari: Dios Amahan, makabig unta ang tibuok kalibutan tungod sa walay sukod nga gugma nga imong gipakita kanamo pinaagi ni Cristo nga among Ginoo. Amen.
Comments
Post a Comment