Ikakawhaag-upat nga Domingo Sulod sa Tuig

Ikakawhaag-upat nga Domingo Sulod sa Tuig

PASIUNA

SEPTEMBER 15, 2024

Maayong buntag/hapon mga igsuon diha ni Cristo.

Ania na kita sa ikakawhaan ug upat nga Domingo sa Ordinaryong Panahon. Karong Domingoha mao ang National Catechetical Month.

Ang unang pagbasa gikuha gikan sa Basahon ni Propeta Isaias. Siya miingon kanila, "Gitudloan ako sa Ginoong Dios sa angay kong isulti aron mahitabo akong modasig niadtong gikapuyan."

Ang ikaduhang pagbasa gikuha gikan sa Sulat ni Santiago. Siya miingon kanila, "ingon niini ang pagtoo, patay kini kon dili ubanan sa buhat."

Ang Ebanghelyo gikuha gikan sa Balaan nga Ebanghelyo sumala ni San Marcos. Dinhi atong madungog si San Pedro sa mipadayag nga si Jesus mao ang Cristo.

Palihug manindog alang sa pagsugod sa Santos nga Eyukaristiya.

Salmo Responsoryo:

Maglakaw ako sa atubangan sa Ginoo sa yuta sa mga buhi.

Katilingbanong Pag-ampo:

Ginoo, dungga kami.

BASAHON I

Is. 50:4-9

KINUTLO GIKAN SA BASAHON NI PROPETA ISAIAS

Gitudloan ako sa GINOONG DIOS sa angay kong isulti aron mahibalo akong modasig niadtong gikapuyan.

Matag buntag gidasig niya ako sa pagpaminaw sa buot niyang itudlo kanako.

Giablihan sa GINOO ang akong salabutan, ug wala ako mosupil ni mobiya kaniya.

Gipatara ko ang akong likod niadtong buot mohampak kanako, ug ang akong aping ngadto sa mga milagnot sa akong bungot; wala ko ilingiw ang akong nawong sa nagbugalbugal ug nagluwa kanako.

Kay mitabang man kanako ang GINOONG DIOS, busa wala ako maunsa; ug gitaon ko ang akong nawong ingon sa batong bantilis, ug nasayod ako nga dili gayod ako maulawan; ang molaban sa akong katungod ania sa akong duol.

Kinsay makig-away kanako?

Magdungan kita pag-adto sa hukmanan.

Kinsay akong kaaway? Paduola siya kanako.

Mitabang kanako ang GINOONG DIOS,

kinsay moingon nga sad-an ako?

Mangadunot silang tanan sama sa bisti; ug kutkoton sa tangkob.

ANG PULONG SA GINΟΟ.

SALMO RESPONSORYO

Ps. 116:1-2, 3-4, 5-6, 8-9

R. Maglakaw ako sa atubangan sa Ginoo, sa yuta sa mga buhi.

Gihigugma ko ang Ginoo tungod kay namati siya sa tingog sa akong pangaliya,

Tungod kay gipaabong niya ang iyang dalunggan kanako sa adlaw nga ako nagsangpit.

R. Maglakaw ako sa atubangan sa Ginoo, sa yuta sa mga buhi.

Ang mga bugkos sa kamatayon nagalibut kanako; ang mga lit-ag sa kahiladman nagagunit kanako; nahulog ako sa kaguol ug kasakit, Ug misangpit ako sa ngalan sa Ginoo, "O Ginoo, luwasa ang akong kinabuhi."

R. Maglakaw ako sa atubangan sa Ginoo, sa yuta sa mga buhi.

Mahigugmaon ang Ginoo ug matarong; Oo, ang atong Dios maluluy-on. Ang Ginoo nagabantay sa mga gagmay; napukan ako, ug iya ako nga gitubos.

R. Maglakaw ako sa atubangan sa Ginoo, sa yuta sa mga buhi.

Kay giluwas niya ang akong kalag sa kamatayon, ang akong mga mata sa mga luha, ang akong mga tiil giluwas sa paghisukamod.

Maglakaw ako atubangan sa Ginoo sa yuta sa mga buhi.

R. Maglakaw ako sa atubangan sa Ginoo, sa yuta sa mga buhi.

BASAHON II

Jas. 2:14-18

KINUTLO GIKAN SA SULAT NI SANTIAGO

Mga igsuon, unsay kapuslanan kon ang usa ka tawo moingon nga siya may pagtuo apan wala siyay mga maayong buhat? Makaluwas ba kaniya ang iyang pagtuo? Dili gayod! Pananglit may mga kaigsuonan nga nagkinahanglan ug bisti ug walay igong pagkaon, magpulos ba ang inyong pag-ingon kanila, "Panalanginan unta kamo sa Dios! Pagsinina kamo ug kaog maayo!"-kon dili ninyo sila hatagan sa ilang gikinahanglan? Ingon niini ang pagtuo: patay kini kon dili ubanan sa buhat.

Apan dunay moingon, "Ikaw may pagtuo ug ako may mga buhat." Ang ikatubag ko mao kini, "Pakit-a ako sa imong pagtuo nga walay buhat ug pakit-on ko ikaw sa akong pagtuo pinaagi sa akong mga buhat."

ANG PULONG SA GINOO.

EBANGHELYO

Jn. 8:27-35

Kinutlo gikan sa Balaan nga Ebanghelyo sumala ni Marcos

Ug ming-adto si Jesus ug ang iyang mga tinun-an ngadto sa mga balangay sa Cesarea Filipo. Ug sa dalan gipa- ngutana niya ang iyang mga tinun-an sa pag- ingon, "Kinsa man kuno ako sumala sa mga tawo?"

Ug mitubag sila kaniya sa pag-ingon, "Si Juan nga Magbubunyag, sumala sa uban, si Elias, ug sumala pa gayod sa uban, usa sa mga propeta."

Ug siya nangutana kanila, "Apan alang kaninyo, kinsa man ako?"

Mitubag si Pedro ug miingon kaniya, "Ikaw mao ang Cristo."

Ug gipahimangnoan niya sila sa dili pagpanugilon kang bisan kinsa mahitungod kaniya. Ug misugod siya sa pagtudlo kanila nga kinahanglang mag-antos pag-ayo ang Anak sa Tawo ug isalik- way sa mga punoan sa katawhan ug sa mga pangulong pari, ug sa mga Batid sa Balaod ug patyon ug human sa tulo ka adlaw mabanhaw. Ug sa dayag gisulti niya kining butanga.

Ug gidala siya ni Pedro sa daplin, ug misugod siya pagbadlong kaniya. Apan human siya miliso ug mitan-aw sa iyang mga tinun-an. Gibadlong niya si Pedro ug miingon, "Paluyo kanako, Satanas. Kay naghunahuna ikaw dili sa mga butang sa Dios, kondili butang sa tawo." sa mga

Ug human niya matawag ang panon sa katawhan uban sa iyang mga tinun- an miingon siya kanila, "Kon adunay usa ka tawo nga buot mosunod kanako, ilimod niya ang iyang kaugalingon, ug pas-anon niya ang iyang krus ug mosunod siya kanako. Kay kadtong buot moluwas sa iyang kinabuhi mawad-an niini, apan kadtong mawad-an sa iyang kinabuhi tungod kanako ug sa ebanghelyo magluwas niini."

Ang Ebanghelyo sa Ginoo.

Katilingbanong Pag-ampo

September 15, 2024

Pari: Magdungan kita sa pag-ampo sa atong Makagagahum nga Amahan nga nagpanalangin kanato matag adlaw pinaagi ni Jesu- Kristo. Mangayo kita sa lyang tabang alang kanato sa pagpas-an sa atong mga krus uban sa pailub ug gugma. Kita moingon:

GINOO, DUNGGA KAMI.

1. Nga si Papa Francisco, Arsobispo Romulo, mga pari, ug mga diakono, magiyahan sa kaalam sa Ginoo ug mapuno sa Espiritu aron sa paggiya sa mga magtutuo nga may kaisog ug lamdag sa Dios. Mag- ampo kita.

2. Nga ang mga lideres sa atong nasud makadawat sa panan-awon sa paghimo og mga desisyon nga makabenepisyo sa tanan nga mga miyembro sa atong komunidad, sa pagbarug alang sa unsa ang makiangayon sa pagpanalipod sa labing huyang taliwala kanato. Mag-ampo kita.

3. Nga ang tanan natong mga katekista ug ang tanan nga nalambigit sa ministeryo sa katekesis makadawał ug kaalam, pailub, ug kusog samtang sila naggiya ug nagtudlo, nagpaambit sa Pulong sa Dios ug gugma sa uban. Mag-ampo kita.

4. Nga ang mga masakiton ug himalatyon, ug mga tigulang, makadawat og kaayohan, kusog, kaisug, kalinaw ug kahupayan sa ilang kinabuhi. Mag-ampo kita.

5. Nga ang mga magtutuo nga naghalad ug mga pagdayeg ug pagpasalamat sa Dios niining Eukaristiya ilabina nila_____ motubo sa pagtuo ug paglaom sa Ginoo. Mag-ampo kita. 

6. Nga ang mga kalag niadtong nag-una kanato ilabina sila _____mahupay unta sa langitnong bangkete. Mag-ampo kita.

Pari: Makagagahum nga Amahan, gibayaw namo kanimo ang tanan namong mga panginahanglan ug uban sa pagtuo ug pagsalig Kanimo, nagpadayon kami sa paglaum sa Imong walay paglubad nga gugma ug grasya kay among gipangayo kini pinaagi ni Kristo among Ginoo. Amen.