KASAULOGAN SA PULONG

DOMINGGO SA EPIPANIYA SA GINOO

a. BASAHON I

Isaias 60:1-6

Kinutlo gikan sa basahon ni Propeta Isaias.

Tindug, padan-ag, O Jerusalem! Kay miabot na ang imong kahayag ug ang himaya sa Ginoo misubang diha kanimo. Kay ania, mitabon sa yuta ang kangitngitan ug ang kangiub milukop sa kalungsoran; apan diha kanimo mosubang ang Ginoo ug ang Iyang himaya diha kanimo magapakita. Ug maglakawlakaw ang kanasuran diha sa imong kahayag ug ang mga hari diha sa kasanag sa imong pagsubang.

Iyahat paglibot ang imong mga mata ug tan-aw: Kining tanan nagkapundok, nanganhi kanimo; ang imong mga lalaking anak mangabut gikan sa layo ug ang imong mga anak babaye manindog gikan sa imong kiliran. Unya makakita ikaw ug magsidlak, matingala ug mokuba ang imong kasingkasing, ibubo nganha kanimo ang kadato gikan sa dagat, ang kabahandianon sa mga nasud dad-on nganha kanimo. Ang panon sa mga kamelyo magpuno kanimo, mga tuling kamelyo sa Madyan ug Epa. Ang tanan mangabot gikan sa Saba, dinala ang bulawan ug insenso ug magmantala sa pagdayeg sa Ginoo.

Ang Pulong sa Ginoo.

b. SALMO RESPONSORYO

Salmo 72:1-2,7-8,10-11,12-13

Tubag (R) - Ginoo, ang tanang nasud sa yuta magsimba Kanimo.

O Dios, togahi ang hari sa Imong panghukom ug sa Imong katarong, ang anak sa hari; Magmando Siya nga matarong sa Imong lungsod ug hukman Niya ang mga nag-antos. (R)

Ang katarong molambo sa Iyang mga adlaw ug ang halawom nga kalinaw hangtod nga mawala nay buwan, Magmando unta Siya gikan sa dagat ngadto sa dagat ug gikan sa Suba ngadto sa kinatumyan sa yuta. (R)

Ang mga hari sa Tarsis ug ang mga pulo magdala og mga gasa: ang mga hari sa Arabia ug Seba magdala og mga halad. Ang tanang mga hari magsimba Kaniya, ang tanang mga nasud mag- alagad Kaniya (R) 

Kay magluwas Siya sa kabus kon magsangpit Siya ug nag- antus diha nga walay motabang Kaniya. Malooy Siya sa ubos ug sa kabus; luwason Niya ang mga kinabuhi sa kabus. (R)

c. BASAHON II

Efeso 3:2-3, 5-6

Kinutlo gikan sa sulat ni San Pablo ngadto sa taga Efeso.

Sa walay duhaduha nakadungog kamo nga ang Dios, pinaagi sa Iyang grasya, naghatag kanako niining buhata alang sa inyong kaayuhan. Gibutyag ug gipadayag sa Dios kanako ang Iyang tinago nga laraw sumala sa gisulat ko na kaninyo sa daklit.

Kaniadto wala kini ibutyag ngadto sa mga tawo, apan karon gipadayag na kini sa Dios pinaagi sa Espiritu ngadto sa Iyang balaang apostoles ug mga propeta. Ang tinago mao nga pinaagi sa Ebanghelyo ang mga dili Judio, sama sa mga Judio, makadawat usab sa mga panalangin sa Dios. Mga bahin sila sa usa lamang ka lawas, ug makaambit sa saad sa Dios pinaagi kang Kristo Jesus.

Ang Pulong sa Ginoo.

d. EBANGHELYO

Mateo 2:1-12

Ang Santos nga Ebanghelyo sumala ni San Mateo.

Si Jesus natawo sa lungsod sa Bethlehem, sa yuta sa Judea. sa panahon ni Hari Herodes. Unya may pipila ka tawo nga nagtuon sa mga bituon nangabot sa Jerusalem gikan sa sidlakan ug nangutana: "Hain man ang bata nga natawo nga maoy mahimomg Hari sa mga Judio? Nakita namo ang Iyang bituon sa pagsubang niini didto sa sidlakan, ug ania kami aron pagsimba Kaniya." Sa pagkabati niini ni Hari Herodes, wala siya nahimutang ingon man sa tibuok Jerusalem. Iyang gitigom ang mga pangulong pari ug mga magtutudlo sa Balaod ug nangutana siya kanila, "Asa man matawo ang Mesiyas?" Sila mitubag: "Sa lungsod sa Bethlehem sa Judea. Mao kini ang gisulat sa propeta:

"Ikaw, Bethlehem, sa yuta sa Juda, Dili mao ang labing diyotay sa mga nagmando sa Juda; Kay magagikan kanimo ang usa ka pangulo nga maoy mag-atiman sa akong katawhan, ang Israel."

Busa gipatawag ni Herodes ang mga dumuduong nga gikan sa sidlakan alang sa usa ka tigom nga tinago ug gikan kanila iyang nasayran ang untop nga oras sa pagsubang sa bituon. Unya iyang gipadala sila ngadto sa Bethlehem ug giingnan: "Lakaw kamo ug pangitaa ninyo pag-ayo ang bata, ug sa makaplagan na ninyo Siya, pahibaloa ako aron moadto ug mosimba usab ako Kaniya." Unya nanlakaw sila. Samtang nagapanaw sila hikit-an nila ang bituon ang mao gihapong bituon nga nakita nila didto sa sidlakan ug nag-una kanila hangtod nga miabot kini ug mihunong ibabaw sa dapit nga nahimutangan sa bata. Nalipay sila pag-ayo sa pagkakita nila sa bituon! Unya misulod sila sa balay ug ilang nakita ang bata uban sa iyang inahan nga si Maria. Sila nanluhod ug misimba Kaniya; unya ilang giablihan ang gisudlan sa mga gasa ug sila mihalad Kaniyag bulawan, insenso, ug mirra.

Pinaagi sa damgo gipahimatngonan sila sa Dios sa dili pagbalik ngadto kang Herodes; busa namauli sila agi sa laing dalan.

Ang Ebanghelyo sa Ginoo.

e. KOMENTARYO

Tema: Ang Kaugalingon maoy Bililhong Gasa.

Ang paghatag og gasa dili sayon. Daghan ta og dapat tan-awon. Sama pananglit kung ganahan ba ang imong hatagan, bagay ba sa iyaha, kaya ba sa "budget", makalipay ba sa iyaha ug uban pa.

Niining atong pagsaulog sa Epipaniya sa atong Ginoo, kita gipahinumduman sa matuod nga gasa. Kini mao ang gasa sa kaugalingon. Ang atong paghatag og regalo dili ingon aron makita kita sa uban nga kita adunahan ug dili aron

makadawat kita og mga pasalamat ug pagdayeg. Kita mohatag og gasa tungod kay gihigugma nato ang atong gihatagan niini. Kining maong gugma wala lang nagpabilin diha sa atong pagbati kondili ato kining gipakita sa buhat. Si Kristo nag-ingon nga walay mas dako nga pagpadayag sa gugma kaysa sa paghatag sa kaugalingon alang sa uban. Kini mao ang matuod nga gasa sa kaugalingon. Gihatagan kita niya og panig-ingnan pinaagi sa iyang pagkamatay diha sa krus.

Ang mga ginikanan naghago sa pagtrabaho alang sa ilang mga anak. Ang mga anak nagtuon pag-ayo alang sa ilang kaugmaon ug sa kaayuhan sa ilang ginikanan. Ang mga propesyonal nagbuhat sa ilang mga katungdanan sa walay pagduha-duha. Kini mao ang mga kongkreto nga paghatag sa kaugalingon. Ang matuod nga gasa sa mga maalamong hari dili mao ang mira, insenso, ug bulawan, kondili ang ilang kaugalingon, ang ilang panahon nga gigahin aron lamang makita ang batang Jesus. Kita usab gitawag sa paghatag sa atong kaugalingon isip bililhong gasa ngadto sa Ginoo ug sa uban.

Giya alang sa pamalandong:

1. Unsa man ang akong gihunahuna nga bililhong gasa nga ihalad ko sa Ginoo? 

2. Andam ba ako sa paghalad sa akong kaugalingon isip gasa ngadto sa uban? 

3.Unsa ang akong gibuhat sa gasa nga gihatag sa Dios kanako?

f. PANGALIYA

Pangulo: Mga igsoon, angayan lamang nga atong daygon ug himayaon ang Dios kinsa mipadayag sa Iyang kaugalingon dinhi kanato pinaagi sa pagpakatawo ni Jesus sa kalibutan. Tungod niini, maghiusa kita karon sa pagpangaliyupo kaniya diha sa pag-ingon: SIMBAHON KA NAMO, O DIOS, UG PATALINGHUGI KAMI.

1. Nangamuyo kami alang sa tanang namunoan sa Simba- hang Katoliko, ilabina ang Santo Papa, Juan Pablo, mga obispo, kaparian ug relihiyoso ug mga layko ug kadtong gitahasan sa pagpatunhay sa liturhiya, nga magma- kugihon silang maningkamot alang sa masabtan, aktibo ug mabungahong pagsimba sa katawhan diha sa diwa sa Espiritu ug kamatuoran. Mag-ampo kita sa Ginoo.

2. Nangamuyo kami alang sa tanang namunoan sa atong nasud nga ang ilang pag-alagad mahisubay sa balaod sa katawhan ug sa Dios nga adunay kaangayan, kalinaw, hustisya ug gugma. Mag-ampo kita sa Ginoo. 

3. Nangamuyo kami alang sa tanang biktima sa nagka- daiyang matang sa kalamidad, natural man o binuhat sa tawo, nga unta magmalig-on ug magmadasigon kanunay sa ilang kinabuhi luyo niining tanan ug ang Dios nga nagpakatawo maghupay unta kanila. Mag- ampo kita sa Ginoo.

4. Nangamuyo kami alang kanamong tanan nga ania dinhi, mosunod unta kami sa kabubut-on sa Dios diha sa makanunayon namong pagsimba ug pagdayeg Kaniya sama sa tulo ka hari nga matinud-anong naningkamot nga misunod sa kahayag sa bitoon. Mag-ampo kita sa Ginoo.

5. Nangamuyo kami nga ...(idugang dinhi ang mga panginahanglan sa katilingban) Mag-ampo kita sa Ginoo.

6. Nangamuyo kami alang sa among mga kaigsoonan nga mihalin na sa laing kalibutan nga makadawat sa gimit- hing pangandoy, ang kinabuhing walay katapusan. Mag- ampo kita sa Ginoo.

7. Nangamuyo kita sa atong kaugalingong mga katuyuan diha sa hilom.

Pangulo: O Dios Amahan, angay ug takus gayud Ikaw simbahon ug daygon namo kay pinaagi sa pag- katawo ni Jesus, gitultolan mo kami sa dalan sa kaluwasan. Nanghinaut kami nga dunggon ug tubagon Mo ang mga pangamuyo nga among gihalad Kanimo. Kini among gipangayo nga puno sa pagtoo ni Jesukristo among Ginoo. Amen.