LENTEN RECOLLECTION

PASIUNA

MARSO 30, 2025

Maayong buntag mga igsuon diha ni Cristo.

Ania na kita sa Ika-Upat nga Domingo sa Kwaresa.

Karong Domingoha gitawag usab nga Laetare Sunday.

Ang unang pagbasa gikan sa Basahon ni Josue nagsaysay nga ang mga Israelita nagsaulog sa pangilin sa pagsaylo.

Ang ikaduhang pagbasa gikuha gikan sa Ikaduhang Sulat ni San Pablo ngadto sa taga-Corinto. Gipasiugda ni San Pablo ang inisyatiba sa Diyos sa buhat sa pagpasig-uli.

Ang ebanghelyo sumala ni San Lukas nagsaysay mahitungod sa nahisalaag nga anak lalaki.

Palihug manindog alang sa pagsugod sa Santos nga Eyukaristiya.

Salmo Responsoryo:

Tagamtama ug tan-awa unsa kamaayo ang Ginoo.

Katilingbanong Pag-ampo:

Maluluy-ong Amahan, dungga kami.

KATILINGBANONG PAG-AMPO

MARSO 30, 2025

Pari: Mga igsuon, modangop kita karon sa Amahan alang sa atong mga pag-ampo ug panginahanglan uban sa dakung pagsalig sa iyang panabang ug grasya. Sa matag pag-ampo kita moingon:

MALULUY-ONG AMAHAN, DUNGGA KAMI.

1. Alang sa atong Santo Papa, mga obispo, kaparian, diyakono ug mga relihiyoso, mamahimong instrumento sa pagkighiuli sa tanang nagkabingkil nga katawhan. Mag-ampo kita sa Ginoo.

2. Alang sa mga lideres sa atong nasud, masinati unta nila ang pasaylo sa Amahan ug magpuyo diha sa lyang gugma ug paglaum. Mag-ampo kita sa Ginoo.

3. Alang sa mga ginikanan ug mga magtutudlo, makabaton og pagsalig sa gugma ug pasaylo sa Dios diha sa amoma sa ilang mga anak ug mga estudyante. Mag-ampo kita sa Ginoo.

4. Alang sa mga kabatan-onan karon, sama sa anak diha sa Ebanghelyo, maabli unta ang ilang kasingkasing sa pagdangop sa Langitnong Amahan sa tanang mga adlaw sa ilang kinabuhi ug magpuyo nga mahigugmaon ug mapasayloon. Mag-ampo kita sa Ginoo.

5. Alang sa mga masakiton, tigulang, himalatyon, makasinati sa kaayohan ug kahupayan pinaagi sa mga tawo nga nag-amoma kanila. Mag-ampo kita sa Ginoo.

6. Alang sa mga midayeg ug mipasalamat sa Dios niining Eyukaristiya ilabina nila magpuyo nga may malinawon ug malipayon nga kasingkasing. Mag-ampo kita sa Ginoo.

7. Alang sa mga kalag sa mga magtutuong nangamatay na ilabina sila makaambit na sa Langitnong kumbira. Mag-ampo kita.

Pari: Maluluy-ong Amahan, dungga kining among mga pangaliyupo sumala sa Imong kabubut-on aron mamahimo kaming angayan nga mouli diha sa imong Gingharian. Kini among gipangayo pinaagi ni Cristo among Ginoo. Amen.