[Solemnidad ni Kristo, Hari sa kalibutan]

 IKA-KATLOA'G-UPAT NGA DOMINGGO [Solemnidad ni Kristo, Hari sa kalibutan]

A. Unang Basahon

Daniel 7:13-14

Ang pagbasa gikuha gikan sa basahon ni Propeta Daniel.

May mga butang pa gayud nga akong nakita sa akong panan-awon. Ug nakita ko uban sa mga panganod sa langit ang daw usa ka tawo, ug miduol siya sa Walay Katapusan, ug gipadala siya kaniya. Ug kaniya gihatag ang gahum ug ang himaya ug ang gingharian, aron alagaran siya sa tanang katawhan, walay pagkatapos ang iyang gahum, kay dili man malaglag ang iyang gingharian.

Mga igsoon, ang Pulong sa Ginoo.

B. Salmo Responsoryo

Salmo 93:1.1-2,5

Tubag (R)-Ang Ginoo hari; gibistihan siya sa kahalangdon.

Ang Ginoo hari, gibistihan siya sa kasanag; gibistihan ang Ginoo ug gibaksan sa gahum. (R)

Ug gibuhat niya nga malig-on ang kalibutan; nga dili gayud matarog. Ang imong trono nagabarog nga malig-on sukad pa sa karaan; sukad sa kahangturan mao na ikaw, O Ginoo. (R)

Ang imong mga balaod takus gayud nga kasaligan; ang kabalaan angay sa imong balay; O Ginoo, sa tanang mga adlaw. (R)

C. Ikaduhang Basahon

Gipadayag 1:5-8

Ang pagbasa gikuha gikan sa basahon sa Ang Gipadayag.

Gikan kang Jesukristo, ang kasaligang saksi, ang unang gibanhaw, nga mao usab ang nagmando sa mga hari sa kalibutan. Gihigugma kita niya ug pinaagi sa iyang kamatayon giluwas kita niya sa atong mga sala, ug gihimong usa ka gingharian sa mga pari aron mag-alagad sa iyang Dios ug Amahan. lya ni Jesukristo ang dungog ug gahum nga walay katapusan! Amen.

Moanhi siya uban sa mga panganod, ug makita gayud siya sa tanan lakip sa naglansang kaniya. Maghilak sa kaguol ang tanang katawhan sa yuta tungod kaniya. Tinood gayud kini! Amen.

"Ako ang Alpa ug ang Omega," nag-ingon ang Ginoong Dios nga Labing Gamhanan, ang Dios karon, kaniadto, ug ang moanhi.

Mga igsoon, ang Pulong sa Ginoo.

D. Ebanghelyo

Juan 18:33-37

Ang pagsangyaw sa Maayong Balita sumala ni San Juan.

Unya mibalik si Pilato pagsulod sa palasyo ug gitawag niya si Jesus ug gipangutana, "Ikaw ba ang hari sa mga Judio?"

Si Jesus mitubag, "Imo ra ba gayud kining pangutana o gisultihan ka ba hinoon sa uban mahitungod kanako?"

Si Pilato mitubag, "Judio ba gud ako? Ang imong kaugalingong katawhan ug ang mga kadagkoan sa mga pari ang nagtugyan kanimo ngari kanako. Unsa bay imong nabuhat?"

Si Jesus mitubag, "Ang akong gingharian dili iya niining kalibutana; kon ang akong gingharian iya pa niining kalibutana, ang akong mga sakop makig-away na unta aron dili ako ikatugyan ngadto sa mga Judio. Apan lagi, ang akong gingharian dili iya niining kalibotana!"

Tungod niini nangutana si Pilato kaniya, "Hari ka ba diay?" Si Jesus mitubag, "Nag-ingon ka nga hari ako. Tungod niini natawo ug mianhi ako sa kalibutan alang sa usa lamang ka tuyo nga mao ang pagsaksi sa kamatuoran. Ang anaa sa kamatuoran mamati kanako."

Mga igsoon, ang Maayong Balita sa atong Ginoo.

E. Komentaryo

Tema: Pag-alagad: Kahulogan sa Misyon sa Pagkahari

Ang mga pagbasa karon, klaro ug tataw kaayo nga nagpadayag sa pagkahari ni Jesus. Sa pagpangutana ni Pilato kang Jesus kung siya ba hari, si Jesus wala modirekta og tubag nga siya hari. Kondili iya hinuon gitubag si Pilato sa pag-ingon, "Nag-ingon ka nga hari ako." Apan sa wala pa si Pilato mangutana sa pagkahari ni Jesus, siya sa dili direkta nga pagkasulti miangkon nga siya hari. Siya miingon, "Ang akong gingharian dili iya niining kalibutana; kon ang akong gingharian iya pa niining kalibutana, ang akong mga sakop makig-away unta aron dili ako ikatugyan sa mga Judio. Apan lagi ang akong gingharian dili iya niining kalibutana."

Karon gisaulog nato ang Solemnidad sa pagkahari ni Kristo. Sa Kalendaryo sa Simbahan (liturgical calendar) ang Solemnidad sa Pagkahari ni Kristo mao ang katapusan nga solemnidad nga saulogan sa simbahan. Apan atong hinumduman nga gisugdan nato ang tuig pinaagi sa pagsaulog sa Pasko sa Pagkatawo ni Kristo, nga mao ang iyang unang pag-anhi sa kalibutan. Sa laing bahin ang pagsaulog nato sa pagkahari ni Kristo nagpunting usab kini sa iyang ikaduhang pagbalik o Parousia. Mao nga giila nato siya nga Alpa ug Omega, nagpasabot kini og ang sinugdan ug ang katapusan. Tinuod si Kristo ang Hari sa tanang panahon ug tanang binuhat.

Ang Pagkahari ni Kristo dili sama sa atong naandan nga pagsabot sa usa ka hari, nga anaa nagpuyo sa palasyo sinilbihan sa mga suluguon ug igo lang nga momando sa iyang ginsakupan alang sa kalambuan sa iyang gingharian. Si Kristo sa iyang Pagkahari, nag-alagad sa tanan diha sa pagkamapaubsanon ug pagkamatinumanon sa kabubut-on sa iyang Amahan. Sa Iyang pagpangalagad wala siyay gipili. Iyang gialagaran ang tanan: pobre, datu, igo-igo lang nga estado sa kinabuhi, batan-on, tigulang, may sakit o wala, siya nag-alagad ug nagasangyaw sa maayong balita. Bisan tuod siya adunay katungod nga magbuot sa iyang gusto, apan iya gayud nga gituman ang kabubut-on sa iyang Amahan. Ug hangtud sa katapusan sa iyang kinabuhi diha sa krus siya nagmasinugtanon sa kabubut-on sa iyang Amahan. Iyang gitugyan ang iyang kaugalingon ngadto sa iyang Amahan aron ang tanan makabaton og kaluwasan.

Kita sa atong bahin isip Kristiyanos miambit kita sa misyon ni Kristo. Ang misyon ni Kristo nabahin sa tulo; pagkahari, pagkapropeta, ug pagkapari. Ug karon sa atong pagsaulog sa Pagkahari ni Kristo gipahinumduman kita sa pagpuyo niini matag adlaw sa atong kinabuhi kay basin og nahikalimot na kita sa atong tahas isip mga binunyagan. Mao nga gihagit kita karon sa pagpamalandong niini. Sa inadlaw - adlaw natong pagkinabuhi ato bang napuy-an ang atong harianong misyon nga mao ang pag-alagad sa atong isigkatawo diha sa mapaubsanon nga paagi? Sa atong pagmata sa buntag hangtod sa atong pagkatulog sa gabii, si Kristo ba ang sentro o ang naghari sa atong kaugalingon?

Niadtong tuig 1988 gideklara ni Santo Papa Juan Pablo II si Parde Miguel Agustin Pro, SJ isip usa ka beato ug martir. Siya usa ka pari nga giakusahan sa usa ka diktador sa gobyerno nga siya adunay kalambigitan sa plano nga pagpatay sa presidente nga si Alvaro Obregion. Sa wala pa siya patya siya maisogon nga miatubang sa iyang kamatayon ug atubangan sa mga sundalo nga nagtindog, Iyang gidupa ang duha niya ka kamot sama sa porma sa krus nga gihuptan ang rosaryohan ug ang krus sa matag kamot. Siya misulti atubangan sa mga mopusil kaniya nga sila iyang gipasaylo ug sa katapusan misulti siya sa makusog, "Viva! Cristo Rey". Kon sa ato pa. "Mabuhay! Si Kristo ang Hari!"

Sa katapusan kita nga nakaambit sa pagkahari ni Kristo moalagad sa tinuoray gayud ug puno sa gugma nga andam mohatag sa tanan hangtud sa katapusang pitik sa atong kasingkasing. Sama kang Beato Miguel Agustin Pro kita mapasigarbohong mosinggit, "Mabuhay! Si Kristo ang hari!"

Giya alang sa Pamalandong:

1. Si Kristo ba ang naghari sa tagsatagsa nato ka kasingkasing?

2. Nabuhat ba nato ang usa sa tulo ka misyon ni Kristo nga atong naambitan atong bunyag nga mao ang pagkahari o pag-alagad?

F. Katilingbanong Pag-ampo 

Pangulo: Niining pagsaulog nato sa Solemnidad ni Kristo ang Hari sa kalibutan, ato usab ihalad ang atong mga pag- ampo ug mga panginahanglan uban sa hingpit nga pagsalig ug paglaum. Sa matag pag-ampo kita motubag: GINOO SA KAGAHUMAN, DUNGGA ΚΑΜΙ.

1. Bulahan Ikaw, Hari sa kalibutan kinsa mianhi aron paghatag og kalingkawasan sa tanang katawhan. Lig-ona ang nagdumala sa Imong Simbahan aron makapadayon sila sa pagsangyaw sa buhing kamatuoran nga Imong gibilin kanila. Kami nagaampo...

2. Bulahan Ikaw, Hari sa kalibutan kinsa mianhi aron pagdala sa gugma ug kalinaw sa tanang katawhan. Giyahi ang nangulo sa tanang nasud nga magmatinud-anon ang ilang pag-alagad sa Imong katawhan ilabina sa nanginahanglan. Kami nagaampo...

3. Bulahan Ikaw, Hari sa kalibutan kinsa mianhi aron paghatag og panig-ingnan sa kahiusahan ug matinud-anon nga pag-alagad. Dasiga ang mga lideres sa matag katilingban aron molahutay sila sa pagtahan sa ilang kinabuhi diha sa pagserbisyo sa Imong katawhan. Kami nagaampo...

4. Bulahan Ikaw, Hari sa kalibutan nga mianhi aron paghimo kanamo nga maalagaron sa Imong katawhan, lig-ona ang tagsa tagsa namo ka kaugalingon nga bisan pa sa mga pagsulay nga among mahiaguman, sa gihapon magpabilin ang among pagtoo ug pagsalig Kanimo. Kami nagaampo...

5. Bulahan Ikaw, Hari sa kalibutan, nga mianhi aron mahimo kaming katawhan nga malaumon. Dasiga ug lig-ona ang among mga kaigsoonan nga nag-antus sa ilang balatian nga Ikaw gayud ang makahatag kanila og hingpit nga kahupayan. Kami nagaampo...

6. Bulahan Ikaw, Hari sa kalibutan kinsa naminaw kanunay sa among mga kaugalingon nga panginahanglan nga among gihalad diha sa kahilum.

Pangulo: Ginoo among Dios, diha Kanimo among gihalad ang among mga pag- ampo. Malaumon kami nga Imo kining hatagan og katumanan kon nahiuyon kini sa Imong kabubut- on ug paagi. Kini among gipangayo pinaagi ni Kristo among Ginoo ug Manluluwas. Amen.