IKA-KAWHAA'G-WALO NGA DOMINGGO

IKA-KAWHAA'G-WALO NGA DOMINGGO

A. Unang Basahon

Kinaadman 7:7-11

Ang pagbasa gikuha gikan sa basahon sa Kinaadman.

Sa pagkamatngon ko nga ako usa lamang ka tawo, nag-ampo ako ug gihatag kanako ang pagpanabot. Miabot kanako ang espiritu sa Kaalam. Gimahal ko siya labaw kay sa bisan unsang trono o korona. Walay bali ang bahandi kon itandi kaniya. Ang mahalon nga mga alahas dili makatupong sa iyang bili; kon itupad sa Kaalam ang tanang bulawan sa kalibutan daw usa lamang ka pudyot nga balas, ug ang plata dili mobili labaw sa maayong panglawas ug sa maayong panagway. Iyaha sa Kaalam ang usa ka kasanag nga dili gayud moawop, ug gipalabi ko kini labaw sa bisan unsang kahayag.

Sa pagkunsad sa Kaalam nganhi kanako, miabot uban kaniya ang tanang maayong mga butang. Gidad-an ako niya sa dili ikaasaoy nga mga bahandi.

Mga igsoon, ang Pulong sa Ginoo.

B. Salmo Responsoryo

Salmo 90:12-13,14-15,16-17

Tubag (R) - Pun-a kami sa imong gugma, O Ginoo, ug mag-awit kami tungod sa kalipay.

Tudloi kami sa matarong nga pag-isip sa among mga adlaw, aron makakab-ot kami og kaalam sa kasingkasing. Balik na, O Ginoo, kanus-a pa? Kaloy-i ang imong mga sulugoon. (R)

Pagkabuntag pun-a kami sa imong kalooy, aron mosinggit kami sa kasadya tungod sa kalipay sa tanan namong mga adlaw. (R)

Himoa nga malipay kami, tungod sa mga adlaw nga imo kaming gisakit, tungod sa mga tuig kanus-a nakita namo ang dautan. (R)

Hikit-an unta sa imong mga sulugoon ang imong buhat ug ang imong himaya hikit-an sa ilang mga anak; Maato unta ang mahigugmaong pag- amoma sa Ginoo nga atong Dios; palapuson niya alang kanato ang buhat sa atong mga kamut. (R)

C. Ikaduhang Basahon

Heb. 4:12-13

Ang pagbasa gikuha gikan sa sulat ngadto sa taga-Hebreo.

Kay ang pulong sa Dios buhi ug gamhanan ug mas hait pa kay sa bisan unsang espada nga duhay hait. Modulot kini hangtud sa kinahiladman sa kalag ug sa espiritu, hangtud sa dapit diin nag-abot ang lutahan ug ang kauyokan. Nag-usisa kini sa mga tinguha ug hunahuna sa kasingkasing sa mga tawo. Walay butang matago gikan sa Dios. Ang tanan dayag ug makita sa iyang mga mata ug kitang tanan maghatag kaniya'g husay sa atong binuhatan.

Mga igsoon, ang Pulong sa Ginoo.

D. Ebanghelyo

Marcos 10:17-30 or 10:17-31

Ang pagsangyaw sa Maayong Balita sumala ni San Marcos.

Sa diha nga molakaw na unta si Jesus, may tawo nga midagan ngadto kaniya, miluhod sa iyang atubangan, ug nangutana, "Maayong Magtutudlo, unsa may kinahanglan kong buhaton aron madawat ko ang kinabuhing dayon?"

Nangutana si Jesus kaniya, "Nganong miingon ka man nga ako maayo? Walay maayo gawas sa Dios. Nahibalo ka sa mga sugo: Ayaw pagpatay; ayaw panapaw; ayaw pangawat; ayaw pamakak; ayaw panglimbong; tahora ang imong amahan ug inahan.

Mitubag ang tawo, "Magtutudlo, nagtuman ako niining tanang sugo sukad pa sa akong pagkabat-on."

Mahigugmaon si Jesus nga mitutok kaniya ug namulong, "Usa ra ka butang ang kinahanglan mong buhaton. Lakaw ug ibaligya ang tanan mong katigayonan ug ihatag ang halin ngadto sa mga kabos, ug maangkon mo ang mga bahandi sa langit; unya balik nganhi ug sunod kanako." Sa pagkadungog sa tawo niini, naguol siya ug si Jesus miingon kanila,

"Pagkalisod gayud sa mga dato ang pagsulod sa Gingharian sa Dios!"

Nakugang ang mga tinun-an sa pagkabati nila niini, apan mipadayon si Jesus pagsulti, "Mga anak, pagkalisod gayud ang pagsulod sa Gingharian sa Dios! Mas lisod pa sa usa ka dato ang pagsulod sa Gingharian sa Dios, kaysa usa ka kamelyo paglusot sa lungag sa dagom."

Nahibulong pag-ayo niini ang mga tinun-an ug nagpangutan-anay, "Kon mao kana, kinsa ra man diay ang maluwas?" Mitutok si Jesus kanila ug mitubag, "Dili kini mahimo sa tawo, apan mahimo sa Dios; kay ang tanan mahimo gayud sa Dios."

Unya misulti si Pedro, "Nasayud ka nga gibiyaan namo ang tanan ug misunod kami kanimo."

Miingon si Jesus kanila, "Tinuod kana, ug sultihan ko kamo nga ang mobiya sa iyang panimalay o sa mga igsoon, o sa inahan, o sa amahan, o sa mga anak, o sa mga uma tungod kanako ug tungod sa Maayong Balita, makadawat og labi pang daghan niining kinabuhi-a. Makadawat siya'g ginatos ka mga balay, mga igsoon, mga inahan, mga anak, ug mga uma bisan utoson siya; ug sa umaabot nga kalibutan makadawat siya sa kinabuhing dayon.

Mga igsoon, ang Maayong Balita sa atong Ginoo.

E. Komentaryo

Tema: Kristo: ang Kinabuhi sa tanan.

Ang atong mga pagbasa karong Dominggoha nagpunting sa usa lamang ka butang. Sama sa gipangutana sa tawo kaniya sa Ebanghelyo karon, "Maayong Magtutudlo, unsa may kinahanglan kong buhaton aron madawat ko ang kinabuhing dayon?" Sama sa gipadayag sa atong Ginoo, usa lang ka butang ang gikinahanglan. Si Jesus miingon kaniya " Lakat ug ibaligya ang imong kabtangan ug ihatag sa kabus, unya balik dinhi ug sunod kanako." Sa pagkadungog niining mga pulong sa atong Ginoo naguol siya ug masulub- ong mibiya kay dili niya makaya nga ipanghatag ang iyang mga katigayonan ngadto sa uban.

Mga igsoon, mao usab kini ang hagit kanatong aguha makit-an nato sa konkreto nga paagi sa atong mga tanan karong adlawa. Pangitaa pag-una ang gingharian sa Ginoo ug kini atong maangkon. Ang gingharian igsoong nanginahanglan, mga kabus, mga piniriso ug ang mga walay tingog sa atong katilingban.

Sa atong paglawig sa atong kinabuhi dinhi sa kalibutan, atong hunahunaon nga si Kristo gayod ang makahatag og katagbawan sa atong espirituhanong nga panginahanglan. Ang Ebanghelyo karong adlawa nagpakita nga ang kalipay makit-an gayud sa mga yano nga butang ug dili sa mga dinagko nga mga butang. Kini atong makita sa mga hulagway sa mga nanginahanglan nga anaa sa atong palibot.

Sama sa gipangayo ni Solomon sa atong unang pagbasa, wala siya mangayo sa mga kabtangan sa kalibutan apan gipangayo niya ang kaalam, kay nakahibalo siya nga kung maiya ang kaalam magamit kini sa mga maayong butang.

Siguro daghan kanato ang gusto mamahimong adunahan, apan wala ba kita makahibalo nga dili nato makita ang tinuod nga kalipay sa bahandi. Magdala kini og kahasol sa atong kinabuhi kay dili na man kita makahigayon sa pag-alagad sa Ginoo. Bisan anaa na kanato ang tanan, bahandi, gahum ug kalampusan sa kinabuhi apan kon wala ang Ginoo kanato wala kini kapuslanan tungod kay mao kini ang magdala kanato sa kaalautan sa espirituhanong bahin sa atong kinabuhi.

Mga igsoon, ang tinuod nga kalipay makit-an gayud diha sa Ginoo. Siya ang tinuod nga kaalam, Siya ang kaalam nga gipangayo ni Solomon sa iyang pagdumala sa iyang nasod. Siya usab ang Ginoo nga atong gikinahanlan aron makakab-ot kita og kalinaw sa atong kaugalingon, sa uban, ug sa mga butang nga gimugna sa Ginoo. Hinaut mag-uban kanato kanunay ang Ginoo.

Giya alang sa Pamalandong:

1. Sa atong kapanahunan karon makagahin pa ba kita og higayon sa pag-alagad sa Ginoo luyo sa nagka-uswag nga haylo sa materyalismo?

2. Kinsa man ang prioridad sa atong kinabuhi karon?

F. Katilingbanong Pag-mpo. 

Pangulo: Puno sa dakung pagsalig, mag-ampo kita sa atong Mahigugmaong Amahan ang tinudbdan sa tanang kaayohan ug gugma. Sa matag pag-ampo kita motubag: GINOO, DUNGGA ANG AMONG PAG-AMPO.

1. Alang sa atong Santo Papa, mga Obispo ug kaparian kinsa nagsangyaw sa makaluwasnong buhat sa Dios, matinud- anon unta silang mosaksi sa mga pulong nga ilang gipaambit sa tanang katawhan. Mag-ampo kita.

2. Alang sa mga pangulo sa nasud, sa kanunay lamdagan sila sa Espiritu Santo aron magmalampuson silang mopakaylap sa tawhanong katungod ug bili sa kinabuhi sa tawo. Mag-ampo kita.

3. Alang sa matag katilingban, mahimo unta kining tulay nga maoy magdugtong alang sa hingpit nga kahiusahan, gugma ug pagsinabtanay alang sa katukuran sa gingharian sa Dios dinhi sa atong taliwala. Mag-ampo kita.

4. Alang sa mga ginikanan nga magpuyo unta sila subay sa Kristohanog pagtulon- an aron magiyahan nila ang ilang mga anak nga magsubay sa hustong dalan inubanan sa makanunayong pag-ampo. Mag-ampo kita.

5. Alang sa atong mga kaigsoonan nga nagpuyo sa kabuhong sa kinabuhi, dili unta sila magmakuli sa pagpaambit niini sa uban ilabina sa nanginahanglan. Mag- ampo kita.

6. Alang sa atong personal nga katuyuan, ato kining ihalad diha sa kahilum.

Pangulo: Makagagahum nga Dios, malaumon kami nga Imong patalinghugan ang among mga pag-ampo. Tabangi kami nga mosunod ug mobuhat kanunay sumala sa Imong kabubut-on. Kini among gipangayo pinaagi ni Kristo among Ginoo ug Manunubos. Amen.