IKA-KAWHAA'G-SIYAM NGA DOMINGGO

IKA-KAWHAA'G-SIYAM NGA DOMINGGO

A. Unang Basahon

Isaias 53:10-11

Ang pagbasa gikuha gikan sa basahon ni Propeta Isaias.

Ang Ginoo nag-ingon, "Maoy akong kabubut-on ang pagpaantos ug pagsakit kaniya; sa dihang gihimo niya ang iyang kaugalingon ingon nga halad alang sa sala, makita niya ang iyang mga kaliwat ug makabaton siya'g taas nga kinabuhi; ug pinaagi kaniya matuman ang laraw sa Ginoo.

Inigkatapos sa iyang mga pag-antos, malipay na usab siya ug masayud siya nga wala makawang ang iyang mga pag-antos. Siya ang matarong kong alagad ug siya maoy mopas-an sa silot sa katawhan aron mahimo silang matarong.

Mga igsoon, ang Pulong sa Ginoo.

Salmo Responsoryo

Salmo 33:4-5,18-19,20-22

Tubag (R) - Ginoo, kaloy-i kami, samtang kami nagasalig kanimo.

Matarong ang pulong sa Ginoo, ug ang tanan niyang mga buhat kasaligan. Nahigugma siya sa husto ug matarong; puno ang yuta sa kalooy sa Ginoo. (R)

Tan-awa ang mga mata sa Ginoo anaa kanila nga mahadlokon kaniya, kanila nga nagalaum sa iyang kaayo, aron pagluwas kanila gikan sa kamatayon ug pag-amping kanila sa panahon sa gutom. (R)

Ang among kalag nagapaabut sa Ginoo nga mao ang among hinabang ug among panalipod, maania unta kanamo, O Ginoo, ang imong kalooy kami nga nagalaum kanimo. (R)

C. Ikaduhang Basahon

Hebreo 4:14-16

Ang pagbasa gikuha gikan sa sulat ngadto sa taga-Hebreo.

Busa lig-onon ta ang atong pagtuo kay duna kitay Pangulong Pari nga halangdon nga atua na sa presensiya sa Dios - si Jesus, ang Anak sa Dios. Ang atong Pangulong Pari dili sama sa ubang pari nga dili mobati'g kalooy sa atong mga kahuyang. Hinonoa, usa siya ka Pangulong Pari nga gitintal sa tanang paagi sama kanato, apan wala gayud makasala. Busa magmasaligon kita ug moduol sa trono sa Dios diin atua ang grasya aron madawat nato ang kalooy ug ang grasya nga atong gikinahanglan.

Mga igsoon, ang Pulong sa Ginoo.

D. Ebanghelyo

Marcos 10:35-45 or 10:42-45

Ang pagsangyaw sa Maayong Balita sumala ni San Marcos.

Unya si Santiago ug si Juan, mga anak ni Sebedeo, miduol kang Jesus ug miingon, "Magtutudlo, aduna kami ipabuhat kanimo."

"Unsa may ipabuhat ninyo kanako?" nangutana si Jesus kanila.

Mitubag sila, "Kon molingkod ka na unya sa imong trono didto sa imong gingharian nga mahimayaon, palingkora kami uban kanimo: ang usa sa imong tuo ug ang usa sa imong wala."

Miingon si Jesus kanila, "Wala kamoy kalibutan sa inyong gipangayo. Makainom ba kamo sa kupa sa pag-antus nga akong imnan? Makapabunyag ba kamo sa paagi nga ako bunyagan? Apan wala akoy katungod sa pagpili kon kinsa ang palingkuron sa akong tuo ug sa akong wala. Ang Dios mao ang mohatag niining mga dapita ngadto sa gitagan-an niini."

Sa pagkabati niini sa napulo ka tinun-an, nangasuko sila kang Santiago ug kang Juan. Tungod niini, gipaduol silang tanan ni Jesus ug giingnan, "Nasayud kamo nga ang mga punoan sa mga tawo naghari kanila, ug ang mga pangulo nagmando kanila; apan kaninyo dili kini mao ang paagi. Kon usa kaninyo buot madakong tawo, kinahanglan nga mag-alagad siya sa tanan. Kay bisan gani ang Anak sa tawo wala moanhi aron alagaran, kondili sa pag- alagad ug paghatag sa iyang kinabuhi aron pagtubos sa daghang mga tawo."

Mga igsoon, ang Maayong Balita sa atong Ginoo.

E. Komentaryo

Tema: Mapaubsanong pagpangalagad sa Dios ug sa katawhan.

Ang atong Ebanghelyo nagpadayag diha sa tinuoray nga pag-alagad sa Dios ugsaatongisigkaingon. Si Jesus nag-ingon kang Juan ug Santiago nga "Ang Anak sa Dios moanhi aron dili alagaran kondili sa pag-alagad ug paghatag sa iyang kinabuhi aron sa pagtubos sa daghang mga tawo," Iyang gipaubos ang iyang kaugalingon alang sa iyang pinalanggang katawhan.

Diha sa atong tagsatagsa ka kinabuhi, nasinati nato ang mga daghang klase sa pagpangalagad diha sa atong mga igsoon ug ilabina diha sa Dios. Dunay pag-alagad nga nahisubay sa kabubut-on sa Dios ug andam kita diha sa pagsakripisyo sa atong kaugalingon nga wala magpaabot og balos. Nasayod kita inubanan sa atong dakong pagtoo nga ang Langitnong Amahan nakahibalo unsay gitagana alang kanato. Bisan pa man sa mga pagsulay, pag-antos, ug kapait sa pag- alagad, kon ang atong pagpangalagad nakasentro sa Dios ug nga kinasingkasing nato kining gihalad, masinati nato nga duna kini kahulogan sa atong kinabuhi. Ang matuod nga pagpuyo dinhi sa yuta mao ang pagpangalagad ug paghigugmaay.

Mga igsoon, gitawag kita sa Dios diha sa pagpangalagad. Kini usa sa mga hagit kanato isip usa ka kristiyano nga adunay katungdanan sa katilingban. Dili nato hunahunaon kung unsay atong nahimo nga maayo sa uban kay ang mahigugmaon ug manggihatagon natong Amahan nasayod sa tanan natong mga binuhatan. Siya nakahibalo kung unsay angay nga iganti kanato kay ang iyang grasya kanunay naa sa atong tagsatagsa ka kinabuhi. Siya ang nakahibalo sa tanan. Mao nga si Jesus mao ang atong modelo sa atong pagpangalagad diha sa simbahan ug katilingban. Kay "Ang Anak sa Dios mianhi sa kalibutan dili aron alagaran, apan mianhi siya aron sa pag-alagad sa tibuok katwahan, ug gihatag niya ang iyang kinabuhi alang sa tanan". Siya usa ka Dios, apan nahimong tawo alang kanato alang sa atong kaluwasan. Iyang gipaubos ang iyang kaugalingon alang kanatong tanan nga iyang gihigugma ug gialagaran sa hingpit.

Isip mga kristiyanos ug katawhan sa Dios, nga nagpuyo sa kristohanong kinabuhi, kita gipahinumduman sa Ginoo sa matinud-anong pagpangalagad ug sa walay pagpaabot sa balos kung kita nagbuhat og maayo. Kini nagpasabot nga ang atong pagpangalagad diha sa Dios ug sa katilingban tinuoray gayud ug kinakasingkasing. Anaa, ang pag-alagad nga walay sukod, ug ang paghatag sa kaugalingon sa mapaubsanong pagpangalagad diha sa atong katilingban.

Andam ba kita sa paghatag sa atong kaugalingon diha sa pag-alagad sa Dios ug sa katawhan nga walay sukod? Andam ba kita sa pag-atubang sa mga pagsulay nga atong mahiaguman diha sa atong pagpangalagad sa atong katililingban? Mga igsoon, kini ang dakung hagit alang kanatong tanan sa pagsagubang sa atong kinabuhi hangtod makab-ot nato ang Gingharian sa Dios nga giandam alang kanatong tanan. Si Jesus nagpahinumdom kanato karon nga kita mag-alagaray ug maghigugmaay sa usag usa.

Giya alang sa Pamalandong:

1. Isip mga Kristiyanos, nabati ba nato ang matuod nga pag-inalagaray sa usag usa?

2. Sa unsang paagi kita nga mialagad sa Dios?

F. Katilingbanong Pag-ampo 

Tema: Mapaubsanong Pagpangalagad sa Dios ug sa Katawhan.

Pangulo: Sa kinasingkasing, ato karong ihalad sa atong Maloloy-on nga Amahan ang atong mga pag-ampo ug panginahanglan kay Siya ra man ang tuburan sa tanang mga kaayohan. Sa matag pangamuyo kita motubag: 

O DIOS, DUNGGA ANG AMONG PAG- AMPO.

1. Nga ang kinatibu-ang Simbahan ilabina sa Santo Papa, mga Obispo ug kaparian, matinud-anon unta silang moalagad sa tanan diha sa pagpatigbabaw sa kaangayan ug kalinaw binasi sa diwa sa Ebanghelyo. Mag-ampo kita.

2. Nga ang mga lideres sa atong nasud magmatinud-anon unta sila sa ilang pag- alagad alang sa tanan ilabina sa mga nanginahanglan natong mga kaigsoonan. Mag-ampo kita.

3. Nga ang matag Kristohanong pamilya, mahimo unta silang sumbanan sa ilang mga anak diha sa pagkamaalagaron sa uban. Mag-ampo kita.

4. Nga ang atong mga kaigsoonan nga mitahan sa ilang kaugalingon alang sa pag-alagad sa uban unta sila madasig ug malig-on bisan pa man og makahimamat sila og mga babag sa ilang kinabuhi diha sa pagserbisyo. Mag-ampo kita.

5. Nga kitang tanan magpakabana unta kita kanunay sa mga panginahanglan sa atong mga kaigsoonan isip kongkretong pagsaksi sa gugma ug kinabuhi ni Kristo. Mag-ampo kita.

6. Nga ang atong kaugalingon nga katuyuan ato kining ihalad diha sa kahilum.

Pangulo: Ginoo among Dios, dungga ang among mga pag-ampo ug tabangi ang matag usa kanamo sa pagsalig sa Imong gahum ug grasya. Kini among gipangayo pinaagi ni Kristo Imong Bugtong Anak ug among Ginoo uban sa Espiritu Santo Dios nga usa hangtud sa kahangturan. Amen.