IKA-KAWHAA'G-UPAT NGA DOMINGGO

IKA-KAWHAA'G-UPAT NGA DOMINGGO

A. Unang Basahon

Isaias 50:4-9

Ang pagbasa gikuha gikan sa basahon ni Propeta Isaias.

Gitudloan ako sa Ginoong Dios sa angay kong isulti aron mahibalo akong modasig niadtong gikapuyan. Matag buntag gidasig niya ako sa pagpaminaw sa buot niyang itudlo kanako. Giablihan sa Ginoo ang akong salabotan, ug wala ako mosupak ni mobiya kaniya. Gipatara ko ang akong likod niadtong buot mohampak kanako, ug ang akong aping ngadto sa mga milagnot sa akong bungot; wala ko ilingiw ang akong nawong sa nagbugalbugal ug nagluwa kanako. Kay mitabang man kanako ang Ginoong Dios, busa wala ako maunsa; ingon sa batong bantili, ug nasayod ako nga dili gayud ako maulawan; ang molaban sa akong katungod ania sa akong duol. Kinsay makig-away kanako? Magdungan kita pag-adto sa hukmanan. Kinsay akong kaaway? Paduola siya kanako. Mitabang kanako ang Ginoong Dios, kinsay moingon sad-an ako? Mangadunot silang tanan sama sa bisti; ug kutkoton sila sa anay.

Mga igsoon, ang Pulong sa Ginoo.

B. Salmo Responsoryo

Salmo 116:1-2,3-4,5-6,8-9

Tubag (R) -Magalakaw ako atubangan sa Ginoo, diha sa yuta sa mga buhi.

Gihigugma ko ang Ginoo tungod kay namati siya sa tingog sa akong pangaliya, tungod kay gipaabong niya ang iyang dalunggan kanako sa adlaw nga ako nagasangpit. (R)

Ang mga bugkos sa kamatayon nagalibot kanako; ang mga lit-ag sa kahiladman nagagunit kanako; nahulog ako sa kaguol ug kasakit, ug misangpit ako sa ngalan sa Ginoo, "O Ginoo, luwasa ang akong kinabuhi." (R)

Mahigugmaon ang Ginoo ug matarong; Oo, ang atong Dios maloloy- on. Ang Ginoo nagabantay sa mga gugmay; napukan ako, ug iya akong gitubos. (R)

Kay giluwas niya ang akong kalag sa kamatayon, ang akong mga mata sa mga luha, ang akong mga til giluwas sa paghisukamod. Magalakaw ako atubangan sa Ginoo sa yuta sa mga buhi. (R)

C. Ikaduhang Basahon

Santiago 2:14-18

Ang pagbasa gikuha gikan sa sulat ni Santiago.

Mga igsoon, unsay kapuslanan kon ang usa ka tawo moingon nga siya may pagtoo apan wala siyay maayong buhat? Makaluwas ba kaniya ang iyang pagtoo? Dili gayud! Pananglit may mga kaigsoonan nga nagkinahanglan og bisti ug walay igong pagkaon, magpulos ba ang inyong pag-ingon kanila, "Panalanginan unta kamo sa Dios! Pagsinina kamo ug kao'g maayo!"-kon dili ninyo sila hatagan sa ilang gikinahanglan? Ingon niini ang pagtoo: patay kini kon dili ubanan sa buhat.

Apan dunay moingon, "Ikaw may pagtoo ug ako may mga buhat." Ang ikatubag ko mao kini, "Pakit-a ako sa imong pagtoo nga walay buhat ug pakit- on ko ikaw sa akong pagtuo pinaagi sa akong mga buhat."

Mga igsoon, ang Pulong sa Ginoo.

D. Ebanghelyo

Marcos 8:27-35

Ang pagsangyaw sa Maayong Balita sumala ni San Marcos.

Unya si Jesus ug ang iyang mga tinun-an miadto sa mga balangay sa Cesarea Filipo. Ug samtang nanglakaw sila, iyang gipangutana ang iyang mga tinun-an, "Kinsa man kuno ako, sumala sa mga tawo?"

Mitubag sila, "Ang uban miingon nga ikaw mao si Juan nga Magbubunyag; ang uban usab miingon nga ikaw mao si Elias; ug miingon pa gayud ang uban nga ikaw usa sa mga propeta."

"Apan kamo, unsá may inyong ikasulti? Kinsa man ako?" nangutana si Jesus kanila. Ug mitubag si Pedro, "Ikaw mao ang Mesiyas."

Unya gidid-an sila ni Jesus sa pagpanugilon kang bisan kinsa bahin kaniya.

Unya gisuginlan ni Jesus ang iyang mga tinun-an nga mag-antus pag- ayo ang Anak sa Tawo ug isalikway sa punoan sa mga Judio ingon man sa kadagkoan sa mga pari, ug sa mga magtutudlo sa Balaod. Patyon siya, apan sa ikatulong adlaw, mabanhaw. Gisulti niya kini sa iyang mga tinun-an sa walay lipodlipod. Tungod niini gipahilayo siya ni Pedro sa uban ug gibadlong. Apan miliso si Jesus ug mitan-aw sa iyang mga tinun-an; unya gibadlong niya si Pedro sa pag-ingon, "Pahawa, Satanas! Ang imong hunahuna, hunahuna sa tawo, dili sa Dios."

Unya gitawag ni Jesus ang katawhan ug ang iyang mga tinun-an, ug miingon siya kanila, "Kon buot ang usa ka tawo mahimo nga akong tinun- an kinahanglan nga kalimtan niya ang iyang kaugalingon, pas-anon niya ang iyang krus, ug mosunod siya kanako. Kay ang buot moluwas sa iyang kaugalingong kinabuhi mawad-an hinoon niini; apan kadtong maghalad sa iyang kinabuhi alang kanako ug sa Maayong Balita, dili mawad-an niini."

Mga igsoon, ang Maayong Balita sa atong Ginoo.

E. Komentaryo

Tema: Saksihi ang imong pagtoo.

Isip mga Kristiyano, aduna kitay duha ka bililhong butang nga angay natong hatagan og dakung pagtagad sa atong pagpamalandong karon. Una ang atong pagtoo ug ang ikaduha mao ang atong mga buhat. Kining duha ka elemento dili gayod angayan nga bulagon. Pinaagi sa pulong kita makapadayag sa atong pagtoo, apan ang atong mga buhat maoy magpamatuod sa katim-os sa atong pagtoo.

Gihatagan gayod ni Santiago og igong gimbug-aton ang atong pagtoo ug mga buhat. Gani siya nagkanayon nga ang pagtoo nga walay buhat, patay.

Walay kapuslanan ang pagtoo kung wala kini ubani sa buhat. Si Propeta Isaias usab konkreto gayod nga naghulagway sa Mesiyas nga taliwala sa iyang mga pag-antos, siya nagpadayon nga nagmatinud-anon sa pagbuhat sa kabubut-on sa Amahan. Misaksi siya sa kabubut-on sa Amahan bisan pa man kon kini nagkahulugan sa iyang pag-antos ug kamatayon.

Diha sa Ebanghelyo, gihulagway ni San Markos ang grasya sa katim-os nga pagtoo ni Pedro ngadto kang Jesus. Nga tungod niini siya nakaila ni Jesus pinaagi sa iyang pag-ingon: "Ikaw mao ang Mesiyas!"

Apan si Jesus mihatag og usa ka kondisyon sa Iyang mga tinun-an: "Bisan kinsa ang buot mahimo nga Akong tinun-an, kinahanglan nga kalimtan niya ang iyang kaugalingon, pas-anon niya ang iyang krus, ug mosunod siya kanako." Nahimo kining dakong hagit alang sa Iyang mga tinun-an. Gani si San Pedro kinsa mipadayag sa iyang pagtoo ni Jesus nga Mesiyas, mipamatuod ug misaksi sa iyang pagtoo pinaagi sa iyang paghalad sa iyang kinabuhi. Mao usab kini ang gibuhat ug gidangatan sa matag sumusunod ni Jesus. Ang ilang pagtoo kang Kristo wala lamang gipadayag pinaagi sa ilang mga matam-is nga pulong, apan labaw sa tanan diha sa ilang mga buhat. Sila nahimong mga matuod nga saksi ni Kristo.

Kita usab isip mga Kristiyano, aduany dakong kaakuhan sa pagpadayag sa atong pagtoo dili lamang pinaagi sa pulong apan ilabina gayod diha sa mga buhat. Matag Kristiyano moingon man nga siya mitoo gayod kang Kristo, ato ba kaha kining gipamatud-an pinaagi diha sa atong inadlaw-adlaw nga gimbuhaton ug pagkinabuhi?

Mga igsoon, nahimo na ba gayod kita nga matuod nga mga sumusunod ni Kristo? Basin baya kon kutob lang sa pulong ang atong pagka-Kristiyano. Ang atong pagka-Kristiyano wala magpabilin diha sa sulod sa simbahan. Dala nato kini bisan asa kita mopaingon. Dili kita makaingon nga mga Katoliko kita, apan sa atong pagkinabuhi wala mahisubay sa kalagdaan sa atong pagka-Kristiyano. Busa mga igsoon, kita gihagit sa pagsaksi sa atong pagtoo diha sa konkreto nga paagi. Diha sa atong inadlaw-adlaw nga pagkinabuhi, nga kita unta mga sumusunod ni Krsito diha sa pulong ug buhat sa adlaw nga tanan.

Giya alang sa pamalandong:

1. Miangkon kita nga usa ka Kristiyano, gipamatud-an ba nato kini sa buhat?

2. Nakatuman ba kita sa atong mga kaakuhan isip mga Katoliko?

F. Katilingbanong Pag-ampo 

Pangulo: Sa hiniusang tingog ato karong ihalad sa atong Mahigugmaon nga Amahan ang atong mga pag-ampo ug panginahanglan. Sa matag pangamuyo kita motubag: GINOO, DUNGGA ΚΑΜΙ.

1. Alang sa mga pangulo sa atong Simbahan, ang Santo Papa, mga Obispo ug kaparian, nga unta sila magmakanunayon ug matinud-anon sa ilang pag-alagad sa Dios diha sa madasigong pag-alagad sa katawhan. Mag-ampo kita.

2. Alang sa nagdumala sa atong nasud nga unta ang grasya ug panalangin sa atong buhi nga Dios magauban kanunay kanila aron nga sila magmatinud-anon diha sa ilang pagserbisyo sa katawhan. Mag-ampo kita.

3. Alang sa mga misyonero nga anaa nag- alagad sa gawas sa atong nasud, nga unta maanaa kanila ang kadasig ug hugot nga pagtoo sa Makagagahum nga Dios aron malig-on sila sa ilang pagsangyaw sa Maayong Balita sa tanan ilabina sa atong mga kaigsoonan riga nanginahanglan sa Espirituhanong pagtulon-an. Mag-ampo kita.

4. Alang sa atong mga kagisoonan nga nabiktima sa nagkadaiyang katalagman nga unta makabaton sila og kadasig ug dugang kalig-on sa ilang pagtoo sa Dios kinsa maoy tinubdan sa tanang kaayohan. Mag-ampo kita.

5. Alang kanatong tanan, nga makanunayon unta ang atong pagpakabana ngadto sa uban ilabina sa mga sakop sa atong katilingban. Mag-ampo kita.

6. Alang sa atong kaugalingon nga katuyuan, ato kining ihalad diha sa kahilum.

Pangulo: Maloloy-on ug mahigugmaon nga

Amahan, kami naglaum nga Imo nang hatagan og katumanan ang mga pag-ampo nga among gihalad karon subay sa Imong kabubut-on ug paagi pinaagi ni Kristo Imong Bugtong Anak uban sa Espiritu Santo Dios nga usa hangtud sa kahangturan. Amen.