IKA-KAWHAA'G-UNOM NGA DOMINGGO

IKA-KAWHAA'G-UNOM NGA DOMINGGO

A. Unang Basahon

Numeros 11:25-29

Ang pagbasa gikuha gikan sa basahon sa Numeros.

Unya mikunsad ang Ginoo diha sa panganod ug misulti kaniya, ug gikuha sa Ginoo ang ubang bahin sa espiritu nga diha kang Moises ug gihatag kini sa sitenta (70) ka pangulo sa Israel. Sa diha na kanila ang espiritu, nanagna sila, apan sa hamubo lamang nga panahon.

Duha sa sitenta (70) ka pangulo nagpabilin didto sa kampo; ang usa si Eldad ug ang usa si Medad, ug mikunsad usab kanila ang espiritu; ug apil sila niadtong gipanglista apan wala sila makaadto sa Tolda, busa nanagna sila didto sa kampo. Unya usa ka batan-on midagan ngadto kang Moises ug miingon, "Si Eldad ug si Medad nanagna didto sa kampo."

Ug si Josue nga anak ni Nun, alagad ni Moises ug usa sa iyang mga sinaligan miingon, "Sir, santaa sila."

Apan si Moises miingon kaniya, "Nasina ka ba tungod ug alang kanako? Kaayo unta kon ibutang sa Ginoo ang iyang espiritu nganha sa iyang katawhan ug silang tanan mahimo nga propeta!"

Mga igsoon, ang Pulong sa Ginoo.

B. Salmo Responsoryo

Salmo 19:8,10,12-13,14

Tubag (R) - Ang mga balaod sa Ginoo nagalipay sa akong kasingkasing.

Ang balaod sa Ginoo hingpit, nagalipay sa kalag; ang kasugoan sa Ginoo kasaligan, nagahatag og kinaadman sa tawo nga yano. (R)

Ang kahadlok sa Ginoo malinis, nagalungtad sa kahangturan. Ang mga gimbut-an sa Ginoo matuod, silang tanan matarong. (R)

Bisan ang imong sulugoon nagabantay kanila, makugihon kaayo sa pag-amping nila, apan kinsay makasusi sa mga nakulang? Linisa ako sa akong mga kalapasan nga tinagoan. (R)

Sa sala sa pagpagarbo santaa ang imong sulugoon; ayaw kini pahari-a kanako. Unya walay ikasangpit kanako ug malingkawas ako sa bug-at nga sala. (R)

C. Ikaduhang Basahon

Santiago 5:1-6

Ang pagbasa gikuha gikan sa sulat ni Santiago.

Kamong mga dato, panghilak ug pagminatay kamo tungod sa mga kagul- anan nga modangat kaninyo. Ang inyong mga bahandi nangadunot, ug ang inyong mga bisti gipangutkot sa anay. Gitay-an na ang inyong bulawan ug salapi ug ang taya niini mahimong saksi batok kaninyo ug sama sa kalayo magaut-ot sa inyong lawas.

Niining katapusang mga adlaw nagtigom kamo'g mga bahandi. Pamati-a ninyo ang tuwaw sa suhol sa mga nagtrabaho sa inyong kaumahan nga wala ninyo ihatag. Ang mga mulo sa naty-ani sa inyong mga abot nadungog sa Dios, ang Ginoo nga labing gamhanan! Dinhi sa kalibutan luho kaayo ang inyong pagpuyo ug nagpatuyang kamo sa kahilayan. Gipatambok ninyo ang inyong kaugalingon tagana sa adlaw sa pag-ihaw. Gisilotan ug gipatay ninyo ang tawong walay sala; wala siya mosukol kaninyo.

Mga igsoon, ang Pulong sa Ginoo.

D. Ebanghelyo

Marcos 9:38-43,45,47-48

Ang pagsangyaw sa Maayong Balita sumala ni San Marcos.

Si Juan miingon kang Jesus, "Magututudio, nakakita kami'g tawo nga naghingilin og mga yawa sa imong ngalan, ug sanglit dili man siya kauban nato, gibadlong namo siya."

Si Jesus mitubag, "Ayaw ninyo siya pagdid-i, kay walay tawo nga maghimo'g milagro sa akong ngalan nga makasultig' daotan bahin kanako.

Kay ang dili batok kanato dapig kanato. Timan-i ninyo kini: ang mopainom kaninyo'g tubig tungod kay kamo iya nako, makadawat gayud og ganti. Kun ang usa mo ka tiil maoy makapahimulag kanimo gikan kanako, putla usab kini! Mas maayo pa kanimo nga mosulod ka sa kinabuhi nga usa ray tiil, kay sa sangkap ka'g tiil apan itambog ka sa impiyerno. Ug kon ang usa ka mo ka mata maoy makapahimulag kanimo gikan kanako, lugita kini! Mas maayo pa kanimo nga mosulod ka sa Gingharian sa Dios nga usa ray mata, kay sa sangkap ka'g mata apan itambog sa impiyerno. Didto dili mamatay ang ilang mga ulod ug dili mapalong ang kalayo.

Mga igsoon, ang Maayong Balita sa atong Ginoo.

E. Komentaryo

Tema: Pagbuhat og maayo alang sa tanan.

Sa atong paglawig niining kalibutana, ato gayud nga nasinati diha sa atong isigkatawo ang pagpaningkamot aron molambo ang atong pagtoo diha kang Kristo. Anaa usab uban kanato nga naningkamot aron mahingpit ang pagtoong Kristiyano ug mahimong bahin niining atong katilingban. Kita isip mga binunyagan, aduna kitay mga katungdanan aron molambo ug mahingkod ang atong pagtoo aron ato kining ikapaambit ngadto sa atong mga kaigsoonan. Apan usahay kita mismo wala maningkamot nga mahingkod ang atong pagtoo ug kontento na kita sa atong pagka-katoliko sa pulong lamang ug wala sa buhat. Kasagaran kanato walay pagpakabana ngadto sa uban basta maayo lang ang atong kaugalingon. Nahikalimot kita nga ang atong mga kaigsoonan ug kita usa lamang tungod kay gihiusa man kita sa gugma ni Kristo. Dili ikalimod nga anaa kitay mga kaigsoonan sa atong katilingban nga nanginahanglan sa atong tabang aron mahibalik sila sa kahiusahan sa pagtoong katoliko, apan wala kitay panahon nga gigahin alang kanila.

Sa unang pagbasa diha sa libro sa Numeros, gipakita nga adunay mga tawo nga gihatagaan og Espiritu sa Dios aron sa pagsangyaw sa kaayo sa Dios. Apan bisan pa og ilang nadawat ang maong gasa wala sila magpakabana sa pagtuman sa ilang kaakuhan sa pagsangyaw kay gipalabi lamang ang ilang kaugalingon. Mao nga sa ikaduhang pagbasa ug ilabina diha sa Ebanghelyo, si Kristo nagpahinumdum kanato nga kita moalagad gayod diha sa atong katilingban ilabina sa atong mga kaigsoonan nga nanginahanglan sa atong panabang nga ilang madunggan ang mga Maayong Balita mahitungod kang Jesuskristo. Si Kristo miingon: "Pasagdi sila kay ang dili batok kanato, atoa". Busa giawhag kita kanunay nga unta dili kita maoy mahimong babag sa kalamboan sa pagtoo sa atong mga kaigsoonan. Kita unta maoy mahimong instrumento nga sila mahiduol kang Kristo. Ang pagbuhat og maayo walay pagpihig kon dili alang sa tanan natong mga kaigsoonan. Mao nga sa kanunay gihagit kita sa pagbuhat og maayo alang sa atong mga kaigsoonan aron kitang tanan mahiusa kang Kristo.

Konkreto nato kining ikapadayag diha sa atong matag katilingban diin anaa ang mga nagkalainlaing ministriya nga maoy naglihok ug nagdumala sa mga nagkadaiyang buluhaton. Ang atong tahas mao ang pagdala og kahiusahan sa matag miyembro sa maong katilingban aron mahiusa kita sa Ginoo. Busa isip mga Kristiyano, gitawag kita aron sa pagpalambo sa atong katilingban ug dili ang pagguba niini. Ang kalamboan sa atong tagsatagsa ka katilingban naa sa matag usa kanato diin anaa ang makanunayong pagtinambayayongay alang sa kahiusahan sa katilingban. Dili unta kita maoy mahimong babag sa kalamboan sa matag usa kanato ug diha sa atong tagsatagsa ka katilingban. Anaa unta kanato ang makanunayong pagpaningkamot sa pagtahan sa atong kaugalingon diha sa pagpangalagad nato sa atong isigkaingon. Hinaut pa unta.

Giya alang sa Pamalandong:

1. Nakabuhat ba kita og maayo alang sa uban?

2. Migahin ba kita og panahon nga makaalagad diha sa atong katilingban?

F. Katilingbanong Pag-ampo

Pangulo: Sa tumang pagsalig ato karong ihalad sa Makagagahum nga Amahan ang atong mga pag-ampo ug pangi- nahanglan kinsa kanunay nga naga- atiman kanato. Sa matag pangamuyo kita motubag:

GINOO, DUNGGA ANG AMONG PAG-AMPO.

1. Alang sa nangulo sa atong Simbahan, makita ug mabati unta sa katawhan ang ilang matinud-anon nga pagtahan sa ilang kinabuhi isip mga alagad sa Dios. Mag- ampo kita.

2. Alang sa gitahasan sa pagdumala sa atong nasud, kinasingkasing unta nilang hatagan og dakung pagpakabana ang mga panginahanglan sa bagang pundok sa katawhan kinsa nangandoy nga makalingkawas sa gibating kalisod sa kinabuhi. Mag-ampo kita.

3. Alang sa atong mga kaigsoonan ngamihalad sa ilang kaugalingon sa pag-alagad sa Dios isip pari ug relihiyoso, dasigon unta sila sa Espiritu Santo aron molahutay sila sa ilang gipili nga bokasyon. Mag-ampo kita.

4. Alang sa matag Kristohanong pamilya, nga - ang diwa sa pagpaubos, pagsinabtanay ug paghigugma maoy maghari sa usa'g usa aron mahimo silang sumbanan sa usa ka sulondon nga pamilya diha sa katilingban. Mag-ampo kita.

5. Alang sa atong mga kaigsoonan nga mihalin na ngadto sa laing kalibutan, ila na untang maangkon ang kapasayloan sa ilang mga sala nga nabuhat sa buhi pa sila ug ila nang madawat ang ganti sa pagpakighiusa sa Dios ngadto sa paraiso diin lunlon kalipay ang ilang matagamtaman hangtud sa kahangturan. Mag-ampo kita.

6. Alang sa atong personal nga katuyuan, ato kining ihalad diha sa kahilum.

Pangulo: Amahan, patalinghugi ang mga pag-ampo nga among gihalad karon ug tuguti nga amo na kining maangkon kon wala man kini mahisupak sa Imong kabubut-on ug paagi. Kini among gipangayo nga puno sa pagtoo diha Kanimo pinaagi ni Jesukristo among Ginoo ug Manluluwas. Amen.