IKA-KAWHAA'G-USA NGA DOMINGGO

IKA-KAWHAA'G-USA NGA DOMINGGO

A. Unang Basahon

Josue 24:1-2,15-17,18

Ang pagbasa gikuha gikan sa basahon ni Josue.

Gitigom ni Josue ang tanang banay sa Israel didto sa Siquem. Gitawag niya ang mga pangulo, ang mga kadagkoan, ang mga maghuhukom, ug ang mga opisyal sa Israel, ug nanuol sila sa atubangan sa Dios. Giingnan ni Josue ang tanang katawhan, "Mao kini ang giingon sa Dios sa Israel, Kaniadto ang mga katigulangan ninyo nagpuyo sa tabok sa Suba sa Eufrates, ug nagsimba sa laing mga dios. Usa kanila mao si Tera, amahan ni Abraham ug ni Nahor. Kon dili kamo andam pag-alagad sa Ginoo, pagpili karong adlawa kon kinsay alagaran ninyo, ang mga dios ba nga gialagaran sa inyong mga katigulangan didto sa Mesopotamia, o ang mga dios ba sa mga Amorihanon dinhi sa yuta nga gipuy-an ninyo karon. Apan alang kanako ug sa akong pamilya, mag-alagad kami sa Ginoo."

Ang mga tawo mitubag, "Dili gayud kami mobiya sa Ginoo ni moalagad sa laing mga dios! Ang Ginoo nga atong Dios nagluwas sa atong mga katigulangan ug kanato sa kaulipnan sa Ehipto, ug nabuhat niya. Gilikay kita niya sa kadaotan bisan diin kita paingon taliwala sa tanang kanasuran nga atong giagian."

Mga igsoon, ang Pulong sa Ginoo.

B. Salmo Responsoryo

Salmo 34:2-3,16-17,18-19, 20-21,22-23

Tubag (R) - Tagamtama ug sinati-a ang kaayo sa Ginoo.

Dayegon ko ang Ginoo sa tanang panahon ang iyang pagdayeg maani- a kanunay sa akong baba. Pahimaya-a ang akong kalag diha sa Ginoo; ang mapaubsanon makadungog kanako ug malipay. (R)

Ang Ginoo nagatan-aw sa matarong ug nagapatalinghog sa ilang mga singgit. Ang Ginoo nagasudya sa mga nagbuhat og dautan, aron dili na sila hinumduman sa yuta. (R)

Sa pagsangpit sa matarong, namati kanila ang Ginoo, ug sa tanan nilang mga kasakit giluwas niya sila. Ang Ginoo haduol sa gisulay nga tawo; ug sila nga naguol sa espiritu may among giluwas may among Daghan ang mga kaguol sa tawo nga matarong apan niining tanan ang Ginoo nagapalingkawas kaniya; nagabantay siya sa tanan niyang kabukogan; ug walay usa kanila nga mabali. (R)

Ang dautang mga buhat nagapatay sa dautang kaaway sa matarong nagabayad sa ilang kalapasan. nagaluwas sa kinabuhi sa iyang mga sulugoon; ug kalapasan kanila nga nagadangop kaniya. (R) tawo, ug ang mga Apan ang Ginoo walay mahulog sa

C. Ikaduhang Basahon

Efeso 5:21-32

Ang pagbasa gikuha gikan sa sulat ni San Pablo ngadto sa taga-Efeso.

Tungod kang Kristo pagtinahoray kamo. Mga asawa, tahora ug sunda ninyo ang inyong bana sama nga nagtahod ug nagsunod kamo sa Ginoo. Kay ang bana mao ang ulo sa iyang asawa ingon nga si Kristo maoy ulo sa iglesia; ug si Kristo mismo mao ang Manluluwas sa iglesia nga mao ang iyang lawas. Busa kinahanglan motahod ug mosunod ang mga asawa sa ilang bana ingon nga ang iglesia nagatahod ug nagasunod kang Kristo.

Mga bana, higugmaa ang inyong asawa ingon nga gihigugma ni Kristo ang iglesia ug gitugyan ang iyang kinabuhi alang niini. Gihimo kini aron paghalad sa iglesia ngadto sa Dios pinaagi sa iyang pulong, human niya kini hugasi sa tubig. Sa ingon niini, ikatugyan niya ang iglesia alang kaniya mismo diha sa bug-os niya nga kaanyag, putli ug walay ikasaway, walay buling og kunot, o bisan unsang apan. Kinahanglan nga ang mga bana mahigugma sa ilang asawa ingon nga nahigugma sila sa ilang kaugalingong lawas. Ang bana nga nahigugma sa iyang asawa nahigugma usab sa iyang kaugalingon. Walay nasilag sa kaugalingon ni yang lawas; hinonoa, pakan-on niya kini ug atimanon sama sa gibuhat ni Kristo sa iglesia, kay mga bahin man kita sa iyang lawas. Sumala sa giingon sa Kasulatan, "Tungod niini ang lalaki mobiya sa iyang amahan ug inahan ug motipon sa iyang asawa, ug silang duha mahimong usa." May dakong kamatuoran kining bahina sa Kasulatan, ug sa akong hunahuna nagpasabot kini kang Kristo ug sa iglesia.

Mga igsoon, ang Pulong sa Ginoo.

D. Ebanghelyo

Juan 6:60-69

Ang pagsangyaw sa Maayong Balita sumala ni San Juan.

Daghan sa iyang mga tinun-an nakadungog niini ug miingon, "Lisod kaayong dawaton kining pagtulon-ana. Kinsa bay makasabot niini?"

Bisag walay nagsulti kaniya, nahibalo si Jesus nga nagbagulbol ang iyang mga tinun-an bahin niini; busa giingnan niya sila, "Nakapabugnaw ba kini sa inyong pagtuo kanako? Pananglit makita ninyo ang Anak sa Tawo nga mokayab balik sa iyang gigikanan, mabugnaw ba lang gihapon kamo? Ang naghatag og kinabuhi mao ang Espiritu; dili kini mahimo sa tawo. Ang mga pulong nga akong gisulti kaninyo - Espiritu ug kinabuhi; apan pipila kaninyo wala manuo." Nahibalo si Jesus sukad pa sa sinugdan kinsay dili motoo, kinsay magbudhi kaniya. Ug midugang siya sa pag-ingon, "Mao man gani nga gisultihan ko kamo nga walay makaari kanako gawas kon itugot kini sa Amahan."

Tungod niini daghan sa iyang mga tinun-an mibiya ug wala na gayud mokuyog kaniya, Busa miingon si Jesus sa dose ka tinun-an, "Ug kamo, mobiya ba usab kamo kanako?"

Si Simon Pedro mitubag kaniya, "Ginoo, kinsa may among kapaingnan? Anaa kanimo ang mga pulong nga nagahatag og kinabuhing walay katapusan. Nagtuo kami ug nasayod nga ikaw mao ang Balaan sa Dios."

Mga igsoon, ang Maayong Balita sa atong Ginoo.

E. Komentaryo

Tema: Ang Kinabuhing matoohon diha kang Kristo.

Napamalandungan na ba nato kon unsa ang kinaiya sa usa ka bata? Mga igsoon, ang bata bulahan kay anaa kaniya ang mga maayong kinaiya nga matuohon ug masaligon. Ang atong Ginoong Jesukristo karon naghatag og dakong gimbug-aton niini diha sa atong mga pagbasa karon.

Ang kinaiya sa bata maoy gihatagan og dakung bunting karon sa atong pamalandong. Anaa sa usa ka bata ang kinaiya sa pagkamatoohon. Dili ikalimod nga ang bata kanunay nagsalig sa iyang ginikanan. Kanunay siya nagatoo kanila kay sila lang ang makahatag sa iyang mga panginahanglan sama sa pagkaon, sanina ug uban pang butang nga makahatag kaniya og kalipay. Nakahibalo ang bata nga ang iyang ginikanan mohatag gayod og unsay makaayo kaniya. Bisan pa og kasab-an ang usa ka bata kung makabuhat siya'g sayop o sala dili mawala ang iyang pagtoo kanila. Moduol gihapon siya kanila kay sila lamang ang gisaligan sa bata. Alang sa usa ka bata, ang ilang ginikanan lamang ang makahatag sa iyang panginahanglan ug kalipay. Mao kini ang kinabuhi sa usa ka bata, simple ug yano lamang.

Kung atong tukion kining atong mga pagbasa karon, ang Ginoo, pinaagi kang Josue, nagpadayag sa iyang pagkaubos sa mga Israelita. Gani Iya silang gipapili kung kinsa ang ilang toohan o simbahon. Ang dios-dios ba o ang Ginoo nga nagbuhat sa kalibutan ug nagbuhat sa tawo pinaagi sa iyang dagway ug kasamahan? Sa pagkatinuod bulahan kaayo kitang mga tawo kay gihimo kita sa Dios nga labaw sa tanan Niyang binuhat. Siya atong Amahan nga nagpangga ug nahigugma kanato. Ang Ginoo nga sa tanang higayon atong masangpit ug andam sa pagtabang kanatong lyang mga anak.

Kay ang Ginoo mao man ang atong Langitnong Amahan, angay lamang nga ato Siyang balusan sa atong paghigugma pinaagi sa pagtuman kaniya. Nga kita isip iyang mga anak magpadayag usab sa atong gugma ug pagtoo Kaniya. Sama usab sa usa ka Imagtiayon nga gisaysay kanato ni San Pablo ngadto sa taga- Efeso, nga kinahanglan maghigugmaay ug mosalig gayod sila sa usag-usa. Ingon niini kasayon ang gipangayo sa atong Ginoo nga ang atong matinud- anon nga paghigugma kaniya.

Sama usab sa gipadayag diha sa Ebanghelyo, nga kadaghanan sa mga tinun-an ni Kristo mipahilayo kaniya kay sila wala makasabot ug makadawat sa iyang pagtulun-an. Kalit lang nawala ang pagtoo nila kang Jesukristo. Lisod gayod patuohon ang mga tawo nga adunay daghan nga kaalam. Gani kadaghanan kanato nakalimot ug wala na makasabot sa atong pagtoo kang Kristo. Gamay lang gani nga pagsulay mobiya dayon kita sa Ginoo. Mao nga karong panahona daghang mga pamilya nga nabungkag tungod sa mga magtiayon nga nagkabulag ug daghan ang kagubot, wala nay pagtahod sa tawhanong katungod, wala nay pagrespeto sa kasagrado sa kinabuhi sa tawo. Wala na mobati og kahadlok sa Ginoo. Gipalabi na sa kadaghanan ang paghatag og bili sa mga kalibutanong mga butang inay ang pag-ila ug pagsunod sa kabubut- on sa Dios.

Mga kaigsoonan ko diha ni Kristo, karong adlawa gipahinumduman kita sa Ginoo nga sa kanunay kita mopahiduol kaniya. Sa kanunay kita makighiusa kaniya bisan unsa pa ang modangat nga pagsulay sa atong kinabuhi. Ug nga wala nay lain pang atong kasandigan sa panahon nga moabot sa atong kinabuhi ang mga kasakitan ug mga pag-antos. Mosalig ug motuo unta kita Kaniya sa hingpit. Hinaut unta nga atong himoong ehemplo ang kinaiya sa bata nga sa kanunay nagmatoohon sa iyang mga ginikanan. Nga kita hingpit nga mosalig sa gugma ug pag-atiman sa Dios kanato isip Iyang mga anak. Ang dakong hagit kanato karon mao kini: Magpaduol kita sa Ginoo, sa matag adlaw ug matag oras, maghunahuna ug mag- ampo kita Kaniya. Hinaut unta nga kining maong hagit magdala unta kanato sa kinabuhing matoohoon diha kang Kristo.

Giya alang sa Pamalandong:

1. Nakabaton ba kita og kinaiya nga sama sa usa ka bata?

2. Hingpit ba ang atong pagsalig ug pagtoo sa Dios nga Amahan nga maoy tag-iya kanatong tanan?

F. Katilingbanong Pag-ampo

Pangulo: Mga igsoon, mag-ampo kita sa atong Langitnong Amahan nga maoy tuburan sa kalooy ug panabang. Uban sa masaligong kasingkasing atong ipadangat Kaniya ang atong mga pag-ampo ug panginahanglan. Sa matag pag-ampo kita motubag: GINOO, DUNGGA KAMI.

1. Sa nagdumala sa atong Simbahan, ang Santo Papa, mga Obispo ug kaparian nga sa ilang pagtahan sa ilang kinabuhi diha sa pag-alagad sa katawhan, mapuno unta sila sa Espiritu Santo aron matinud-anon silang mosaksi sa kinabuhi ni Kristo. Mag- ampo kita.

2. Sa mga nagdumala sa atong nasud, ila untang masinati ang matuod nga pagserbisyo nga gipakita ni Kristo aron mahimo nila kining sumbanan diha sa matinud-anon nga pag-alagad sa katawhan. Mag-ampo kita.

3. Sa atong mga igsoon nga nag-antus sa kawad-on, ila untang mahinumduman si Kristo ang tinuod nga kalig-on ug paglaum sa atong kinabuhi ug kanunay nga nag- amoma kanato. Mag-ampo kita.

4. Sa atong tagsa tagsa ka katilingban, mamahimo unta kining giya sa kalig- on ug matinud-anon nga nagsunod sa lakang ni Kristo diha sa malahutayon nga pagpangalagad. Mag-ampo kita..

5. Sa atong mga kaigsoonan nga nag-una na kanato sa laing kalibutan ilabina ang mga sakop ning atong katilingban, nga ila na untang madawat ang ganti nga gitagana sa Dios kanila ang kinabuhing dayon. Mag-ampo kita.

6. Sa atong kaugalingon nga katuyuan ato kining ihalad diha sa kahilum.

Pangulo: Makagagahum nga Dios, sa Imong walay kinutobang gugma dungga ang pag-ampo sa Imong katawhan. Kini among gilauman nga madawat pinaagi ni Kristo among Ginoo. Amen.