IKA-NAPULO'G-UPAT NGA DOMINGGO

 IKA-NAPULO'G-UPAT NGA DOMINGGO

A. Unang Basahon

Ezequiel 2:2-5

Ang pagbasa gikuha gikan sa basahon ni Propeta Ezequiel.

Sa pagkadungog nako niini, misulod kanako ang espiritu sa Dios ug gipatindog niya ako. Unya miingon ang tingog kanako, "Ipadala ko ikaw ngadto sa katawhan sa Israel, katawhan nga masupilon. Sila ug ang ilang mga katigulangan nag nagmasupilon kanako. Mga gahi sila'g ulo, ug way tahod kanako. Busa ipadala ko ikaw ngadto kanila, ug ingna sila nga kini ang gisulti sa Ginoong Dios. Sa ingon masayod sila nga aduna diay propeta diha kanila, motuo sila'g dili.

Mga igsoon, ang Pulong sa Ginoo.

B. Salmo Responsoryo

Salmo 123:1-2,2,3-4

Tubag (R) - Nagatutok ako sa Ginoo ug nangaliyupo sa iyang kalooy.

Kanimo giyahat ko ang akong mga mata, kanimo nga nagalingkod sa trono diha sa kalangitan maingon nga ang mga mata sa mga sulugoon nga lalaki nagabantay sa mga kamut sa ilang mga agalon. (R)

Maingon nga ang mga mata sa sulugoon nga babaye nagabantay sa mga kamut sa iyang agalon nga babaye. Sa ingon usab ang atong mga mata nagatutok sa Ginoo nga atong Dios hangtud nga malooy siya kanato. (R)

Kaloy-i kami, O Ginoo, kaloy-i kami kay natagbaw na kami sa mga pagtamay. Ang among mga kalag gipuno pag-ayo sa bugalbugal sa mapahitas-on sa pagtamay sa tawong garboso. (R)

C. Ikaduhang Basahon

2 Corinto 12:7-10

Ang pagbasa gikuha gikan sa ikaduhang sulat ni San Pablo ngadto sa taga- Corinto.

Apan aron dili ako magmapahitas-on tungod sa daghang katingalahang mga butang nga akong nakita, gihatagan ako'g sakit nga gigamit ni Satanas aron paghasol kanako aron dili ako magpagarbo. Sa makatulo nag-ampo ako sa Ginoo nga iyang kuhaon kining sakita, apan ang iyang tubag mao kini, "Igo kanimo ang akong grasya kay mosamot kalig-on ang akong gahum kon luya ka." Busa gikalipay ko pag-ayo ang pagpagarbo sa akong mga kahuyang aron maangkon ko ang gahum ni Kristo. Gikalipay ko ang mga kahuyang, mga panamastamas, mga kalisdanan, mga paglutos, ug ang mga kakulian tungod kang Kristo. Kay kon huyang ako, nan, lig-on ako.

Mga igsoon, ang Pulong ang Ginoo.

D. Ebanghelyo

Marcos 6:1-6

Ang pagsangyaw sa Maayong Balita sumala ni San Marcos.

Si Jesus mibiya niadtong dapita ug mipauli sa Nazaret nga iyang lungsod, ug mikuyog kaniya ang iyang mga tinun-an. Sa Adlawng Igpapahulay miadto siya sa sinagoga ug nagtudlo sa mga tawo. Daghan ang mga tawo didto, ug sa ilang pagkadungog kaniya, nahibulong silang tanan. Busa nangutana sila, "Diin man niya hikat-oni kining tanan? Unsa mang matanga sa kaalam kining naangkon niya? Ug giunsa man niya paghimo'g mga milagro? Dili ba siya mao man ang panday nga anak ni Maria, ug igsoon nila Santiago, ni Jose, ni Judas, ug ni Simon? Dili ba ang iyang mga igsoong babaye ania man dinhi magpuyo?" Tungod niini wala sila motuo kaniya.

Ug miingon si Jesus kanila, "Ang propeta gitahod sa tanang dapit gawas sa iyang kaugalingong lungsod, sa iyang mga kadugo ug sa iyang banay."

Wala siya makahimo'g milagro didto gawas sa pagtapion sa iyang mga kamot niadtong pipila ka masakiton ug naayo sila. Natingala siya pag-ayo nga wala sila motoo.

Mga igsoon, ang Maayong Balita sa atong Ginoo.

E. Komentaryo

Tema: Disipulo ni Jesukristo sa pagtoo, pulong ug buhat.

Ang atong kasinatian kung aduna kitay mga paryente, mga suod nga higala nga milangyaw sa laing dapit, ato gayod nga paaboton ang ilang pagbalik. Ilabina kung ang ilang pagbalik nagdala og kadungganan, kadaugan ug kalampusan. Mangandoy gayod kita sa ilang pagbalik ug mobati kita og dakung kahinam nga ato na usab silang makauban.

Sa atong mga pagbasa karon ilabina sa Ebanghelyo, gipadayag dinhi ang pagbalik ni Jesus sa iyang kaugalingong lungsod. Apan ang mga tawo nga iyang katagilungsod wala mohinangop kaniya. Dili sila interesado sa paghibalik ni Jesus sa iyang pinuy-anan. Bisan sa iyang gihimo nga mga milagro wala motuo ang mga tawo kaniya. Daghang mga maayong butang nga gihimo si Jesus sa iyang kaugalingong lungsod apan wala sila motuo ug mosalig kaniya. Mas mitoo pa ang taga laing lugar kaniya diin siya nagtudlo ug nagbuhat og mga milagro kay sa mga tawo sa iyang kaugalingong lungsod. Sa ilang pagkadungog sa mga pagtulun-an nga gitudlo ni Jesus, nahibulong sila pag- ayo sa iyang kaalam ug kahibalo ug natingala sila ug nakapangutana sa ilang kaugalingon: "Diin man niya nakat-onan kining mga butanga nga anak lang man siya sa usa ka panday ug anak ni Maria?" Unsa man tuod ang anaa kang Jesus nga anak lamang sa usa ka panday? Ubos kaayo ang ilang pagtan-aw kang Jesus kay lagi anak lamang siya sa usa ka panday.

Mga kaigsoonan, ang mga pagbasa karon nagpadayag kon unsa kita kamatinud-anon diha sa pag-ila ug pagtagad sa atong isigkatawo. Kita taas ang atong pag-ila kang Jesus kay sayod man kita nga siya ang atong Ginoo ug Manunubos. Apan alang niadtong atong mga kaigsoonan nga wala nato hiilhi ang ilang matuod nga pagkatawo dali ra ang atong paghusga kanila. Kasagaran mao kini ang atong bation ilabina kon wala kita makaila kanila. Apan kon ato na silang mailhan kon unsa ang ilang pagkatawo diha pa kita magpakita sa atong pag-ila kanila.

Kung atong susihon ang atong kaugalingon, kasagaran kanato wala makasubay sa mga pagtulun-an nga gihatag ni Kristo kanato. Ang atong buhat sukwahi sa Pulong sa Ginoo nga atong nadungog ug natun-an. Adunay mga panahon nga wala nato gipuy-an ug gibuhat ang pagtulun-an nga atong nadungog.

Wala mahiuyon ang atong mga lihok sa atong gisulti.

Mosulti kita og maayo apan wala kini mohaum sa atong gibuhat. Sama pananglitan diha sa atong pamilya, kita miangkon nga usa ka Katoliko apan wala kita motahod sa dignidad sa atong isigkatawo, wala kitay pagrespeto sa kasagrado sa kinabuhi sa tawo kay daghan pa kanato ang migamit og mga "contraceptives" o pagpugong sa pagmabdos nga dili sa natural nga paagi. Dinhi sa atong katilingban daghan kanato ang wala magpakabana sa kalihokan sa atong GKK kay gipalabi nato ang mga bisyo sama sa paghubog-hubog, pagsugal, mga pagpanikas ug uban pang mga dautang buhat. Mao ba kini ang hustong ehemplo nga atong ipasunod sa atong mga kabataan karon? Makaingon kita nga sama usab kita sa mga katagilungsod ni Jesus nga misalikway kaniya. Wala motuo kaniya kay nagpadayon pa man kita sa atong mga hiwi nga binuhatan.

Isip mga Kristiyanos ug mga disipulo ni Kristo, kita gihagit sa kanunay sa pagtuman sa iyang mga pagtulun-an sa pulong ug sa buhat. Ato kining batonan ug huptan sa kinasingkasing gayod. Ang Simbahan kanunay nga nagtudlo niini. Dili kini sayon buhaton, apan atong paningkamotan nga atong mapuy-an ang mga pagtulon-an nga gihatag kanato ni Kristo. Bisan aduna kitay mga limistasyon ug mga kahuyang sa gihapon kita kanunay abli sa atong kaugalingon sa pagdawat sa grasya sa Dios nga maoy mohulip sa atong mga kakulangan.

Sa katapusan, kita gihagit sa pagpamalandong kanunay aron motuhop ang mga Pulong ug mensahe sa Ginoo diha sa atong kinabuhi aron mamunga kini og mga maayong bunga.

Giya alang sa Pamalandong:

1. Isip mga disipulo ni Kristo nagpadayag ba og maayong buhat ang mga pulong nga atong gilitok?

2. Nagmatinud-anon ba kita ngadto sa atong isigkatawo?

F. Katilingbanong Pag-ampo

Pangulo: Puno sa pagsalig ug pagtoo atong sangpiton ang Langitnong Amahan nga paminawon Niya ang atong mga pag-ampo nga atong ihalad karón. Sa matag pangamuyo kita motubag: 

GINOO, DUNGGA ANG IMONG KATAWHAN.

1. Alang sa atong Santo Papa, mga Obispo ug kaparian, lig-onon unta sila kanunay sa Ginoo aron sa pag-atubang sa daghan kaayong mga pagsulay ug hagit sa ilang kinabuhi. Mag-ampo kita.

2. Alang sa mga pangulo sa atong nasud ug sa tanang tinugyanan sa panggamhanan nga unta ang diwa sa Ebanghelyo maoy maghari diha sa ilang tagsa tagsa ka kasingkasing alang sa hapsay ug matinud- anon nga pagpangalagad. Mag-ampo kita.

3. Alang sa matag Kristohanong katilingban nga taliwala sa nagkakusog nga materyalismo, malig-on unta ang ilang pagsalig sa Ginoo nga maoy tinubdan sa tanang kaayo ug gugma. Mag-ampo kita.

4. Alang sa tanang nag-antus sa kawad-on sa kinabuhi nga dili sila mawad-an sa paglaum ug pagsalig sa Dios ang bugtong makahatag og kahupayan sa mga pag- antus ug mga kalisdanan. Mag-ampo kita.

5. Alang sa matag usa kanato mamahimo unta kitang giya ug sumbanan sa atong mga kaigsoonan nga nagpangita pa sa kamatuoran. Mag-ampo kita.

6. Alang sa atong kaugalingon nga katuyuan, ato kining ihalad diha sa kahilum.

Pangulo: Mahigugmaon ug maloloy-on nga Amahan, dungga ang mga pag-ampo sa Imong mga anak kinsa nangandoy sa Imong kalooy ug grasya. Itugot nga amo na kining madawat pinaagi ni Kristo among Ginoo Imong Anak ug among Ginoo. Amen.