ΙΚΑ-ΝAPULO'G LIMA NGA DOMINGGO

ΙΚΑ-ΝAPULO'G LIMA NGA DOMINGGO

A. Unang Basahon

Amos 7:12-15

Ang pagbasa gikuha gikan sa basahon ni Propeta Amos.

¹²Ug si Amasias nga pari ni Betel miingon kang Amos, "Igo na, propeta! Balik ngadto sa yuta sa Juda ug panginabuhi didto pinaagi sa imong pagpanagna. ¹³Ayaw na panagna dinhi sa Betel, kay mao kini ang dapit diin mosimba ang hari ug ania dinhi ang nasudnong templo."

¹⁴Si Amos mitubag, "Dili ako mao ang matang sa propeta nga managna aron suholan. Magbalantay ako sa mga hayop, ug tig-atiman sa mga kahoy nga igera. ¹⁵Apan gikuha ako sa Ginoo gikan sa akong pagkamag balantay sa karnero ug gisugo ako pagsulti ngadto sa iyang katawhan, ang Israel."

Mga igsoon, ang Pulong sa Ginoo.

B. Salmo Responsoryo

Salmo 85:9-10,11-12,13-14

Tubag (R) - Ginoo, pakitaa kami sa imong kaayo, ug hatagi kami sa imong kaluwasan.

⁹Pamation ko ang gisangyaw sa Dios; sa Ginoo - kay nagasangyaw siya sa kalinaw ngadto sa iyang katawhan. ¹⁰Haduol gayud ang iyang kaluwasan alang kanila nga mahadlokon kaniya, ang himaya nagapuyo sa atong yuta. (R)

¹¹Ang kalooy ug ang kamatuoran magtagbo; ang katarong ug kalinaw maghagkanay. ¹²Ang kamatuoran mogitib gikan sa yuta, ug ang katarong modung-aw gikan sa langit. (R)

¹³Ang Ginoo mohatag sa iyang mga kaayohan; ug ang atong yuta mohatag sa iyang abut; ¹⁴ang katarong maglakaw sa iyang atubangan, ug ang kaluwasan diha sa iyang agi-anan. (R)

C. Ikaduhang Basahon

Efeso 1:3-14

Ang pagbasa gikuha gikan sa sulat ni San Pablo ngadto sa taga-Efeso.

³Magpasalamat kita sa Dios ug Amahan sa atong Ginoong Jesukristo nga nagpanalangin kanato sa tanang espirituhanong gasa sa langit diha sa atong pagkahiusa kang Kristo. ⁴Sa wala pa buhata ang kalibutan gipili na kita sa Dios aron maiya diha ni Kristo, aron mabalaan kita ug mawalay sala sa iyang atubangan. ⁵Tungod sa iyang gugma, daan nang gimbut-an sa Dios nga sagupon kita niya nga mga anak pinaagi ni Jesukristo - mao kini ang iyang gikahimut-an ug tuyo. Daygon nato ang Dios tungod sa iyang hilabihang pagtagad kanato pinaagi sa iyang hinigugmang Anak!

Kay naluwas kita tungod sa kamatayon ni Kristo, sa ato pa, napasaylo na ang atong mga sala. Pagkadako sa grasya sa Dios, nga sa walay sukod gihatag niya kanato! Sa tanan niyang kaalam ug kahibalo, gipadayag sa Dios kanato ang tinagong laraw nga iya nang gimbut-an nga tumanon ni Kristo. Ang laraw sa Dios nga tumanon niya inig-abot na sa hustong panahon mao ang paghiusa sa tanang binuhat diha sa langit ug sa yuta ubos sa pagpangulo ni Kristo.

Gibuhat ang tanang butang sumala sa laraw ug pagbuot sa Dios, ug diha kang Kristo gipili kita sa Dios aron maiyang katawhan sumala sa iyang tuyo sukad pa sa sinugdan. Ug maoy iyang pagbuot nga kita, nga maoy unang nagsalig kang Kristo, magdayeg sa himaya sa Dios.

Mao usab ang mahitungod kaninyo; sa pagkadungog ninyo sa matuod nga mensahe sa Maayong Balita nga naghatag kaninyo'g kaluwasan, mitoo kamo kang Kristo. Busa gipatikan kamo sa Dios pinaagi sa paghatag kaninyo sa Espiritu Santo nga iyang gisaad, timaan nga kamo iya na. Ang Espiritu mao ang garantiya nga makadawat kita sa gisaad sa Dios sa iyang katawhan, ug nagpasalig kanato nga mohatag ang Dios ug hingpit nga kagawasan kanila nga mga iya. Daygon ta ang iyang himaya!

Mga igsoon, ang Pulong sa Ginoo.

D. Ebanghelyo

Marcos 6:7-13

Ang pagsangyaw sa Maayong Balita sumala ni San Marcos.

⁷Ug gitigom niya ang napulog-duha ka tinun-an ug gipadala sa tinagurha. Unya iyang gihatagan sila sa gahum sa paghingilin sa mga yawa, ⁸ug giingnan sila, "Ayaw kamo pagdala'g pagkaon, ni puntil, ni kuwarta, o bisan unsa, gawas lamang sa sungkod. Pagsandalyas kamo, apan ayaw pagdala'g laing bisti gawas sa inyong gisul-ob." Miingon usab siya kanila, "Sa inyong pag- abot sa lungsod, adto saka sa balay sa nagdapit kaninyo, ug ayaw'g balhin sa laing balay hangtod mobiya kamo nianang lungsora. Kon mahiadto kamo sa usa ka dapit diin walay mamati kaninyo, biya-i kanang dapita ug taktaka ang abog sa inyong tiil. Pasidaan kini alang kanila!"

Busa nanglakaw sila ug nagwali nga ang mga tawo kinahanglan maghinulsol sa ilang mga sala. Ilang gihinginlan ang daghang mga yawa ug gihaplasan nila og lana ug giayo ang daghang mga masakiton.

Mga igsoon, ang Maayong Balita sa atong Ginoo.

E. Komentaryo

Tema: Ako Gitawag sa Pagkapropeta.

Sa wala pa nabuhat ang tawo, ang Ginoo nasayod na kung unsa ang iyang kaugmaon kay Siya makagagahum ug nasayran na Niya kung unsa ang anaa sa hunahuna nianang tawhana. Sa iyang pagkamaayo gigiyahan niya kanunay ang kaugmaon o ang tahas nianang tawhana. Iya gayod pagatawgon ug pahimangnoan ang tawo sumala sa iyang plano ug kagustohan, usa niini mao ang pagtawag sa tawo aron mahimong propeta niya. Makita nato kini pinaagi sa bunyag sa pagka-Kristiyano nga nadawat nato ang gasa sa pagkapropeta.

Sama ni Propeta Amos sa unang pagbasa, giangkon niya nga siya usa lamang ka tigbantay og karnero. Apan gikuha ug gitawag siya sa Ginoo aron mamahimong propeta. Abli gayod ang iyang kasingkasing kay mitoo siya sa mando sa Ginoo.

Nasayran nato nga kining kinabuhi nga pagkapropeta dili gayod sayon. Apan pinaagi sa grasya sa Ginoo, gibuhong kita Niya sa Iyang bahanding langitnon. Kining bahandi nga langitnon mao si Jesukristo nga iyang gipadala aron mamahimo natong giya ug sukaranan sa atong kinabuhi nga haum sa gitudlo sa Iyang Amahan. Ang paghigugmaay usa kini ka bunga nga gipakita ni Kristo kanato isip usa ka propeta. Pinaagi sa atong hugot ug walay paglubad nga pagtoo, masinati nato ang presensya ni Kristo sa Santos nga Misa. Ug pinaagi niini dinhi gitawag kita aron mamahimong iyang propeta. Tungod niini gihagit kitang tanan sa pagkasumusunod ni Kristo nga magpuyo sa kinabuhing pagkapropeta. Ang pulong ug buhat ni Jesukristo mao ang sentro sa atong pagpuyo ug pagsangyaw. Ang pangutana; andam ba kitang mahimong usa ka magsasangyaw? Napuy-an na ba nato ang kinabuhi sa pagkapropeta? Sa unsang paagi nato mapuy-an ug isangyaw ang mga pagtulon-an nga gihatag kanato sa Ginoo?

Ang kinabuhing pagkapropeta mao ang hingpit nga pagsalig sa Ginoo ug sa pagpakiglambigit sa bisan unsang klase sa kinaiya sa mga tawo aron atong ikapadayag ang gugma sa Dios ug ang kinabuhing dayon. Andam kita kanunay sa paghalad sa atong kaugalingon diha sa mga buluhaton nga espirituhanon. Ang gugma ni Kristo, ang iyang pagtoo, ang iyang kinaiya ug ang iyang kinabuhi maoy hinoon natong bisti o sapot isip usa ka propeta. Ang iyang kinabuhi mao ang sentro sa atong pagsangyaw. Pinaagi niini makaingon kita nga sama kita ni Propeta Amos ug moingon, "Apan gikuha ako sa Ginoo, gikan sa akong pagkamagbalantay sa karnero ug gisugo ako pagsulti ngadto sa iyang katawhan, ang Israel" (Amos 7:15). Ang kinabuhing pagkapropeta maangkon nato diha sa grasya panahon sa atong bunyag ug labi gayod diha sa Santos nga Misa diin maoy sinugdan ug tuburan sa tanan. Kay kang Kristo man kita gikan, kaniya usab kita modangop ug mobalik. Siya ang atong dalan paingon sa Amahan. Sa walay pagduhaduha, puy-an nato ang kinabuhi sa pagkapropeta aron makasinati kita og gugma, pagtoo ug kinabuhing dayon. Karon makaingon kita nga Imo na ang akong tibuok nga kinabuhi Ginoo, gamita ako aron magdayeg sa imong ngalan karon ug hangtod sa kahangturan.

Giya alang sa Pamalandong:

1. Isip binunyagan ato bang nabuhat ang atong misyon nga atong naambitan nga mao ang pagkapropeta?

2. Giunsa man nako pagpadayag ang akong gimbuhaton isip magsasangyaw?

F. Katilingbanong Pag-ampo 

Pangulo: Puno sa masaligong kasingkasing atong ihalad karon sa atong Mahigugmaong Amahan ang atong mga pag-ampo. Sa matag pangamuyo kita motubag: GINOO, DUNGGA ANG AMONG PAG-AMPO.

1. Alang sa mga pangulo sa atong Simbahan ilabina ang Santo Papa, mga Obispo ug kaparian nga ang ilang kongkreto nga panig-ingnan maghatag og paglaum ug kadasig sa tanang katawhan sa pagsunod sa lakang ni Hesukristo. Mag-ampo kita.

2. Alang sa mga pangulo sa panggamhanan, magpabilin unta silang matinud-anon sa ilang pagpangalagad sa katawhan pinasubay sa Kristohanong diwa. Mag- ampo kita.

3. Alang sa matag Kristohanong katilingban, magbarog unta kini nga lig-on uban sa hingpit nga pagtoo sa panabang sa Ginoo bisan pa man sa atong kapanahunan karon nga kusog kaayo ang hulga sa materyalismo. Mag-ampo kita.

4. Alang sa matag pamilya, sa kanunay magpabilin unta kining lig-on diha sa pag-atubang sa mga pagsulay nga moabot sa ilang kinabuhi uban sa panalangin sa Ginoo. Mag-ampo kita.

5. Alang sa atong mga kaigsoonan nga nag-antus sa tumang kawad-on, dili unta sila mawad-an sa paglaum nga ang Dios kanunay nga magauban ug maghatag kanila sa ilang panginahanglan diha sa hustong panahon. Mag-ampo kita.

6. Alang sa atong kaugalingon nga katuyuan ato kining ihalad diha sa kahilum.

Pangulo: Mahigugmaon nga Amahan, itugot nga Imo nang dunggon ang mga pangamuyo sa Imong katawhan. Himoa kaming angayan sa pagdawat sa grasya nga Imong gitagana sa matag usa kanamo pinaagi ni Kristo Imong Anak uban sa Espiritu Santo Dios nga usa hangtud sa kahangturan. Amen.