ΙΚΑ-NAPULO'G-DUHA NGA DOMINGGO

ΙΚΑ-NAPULO'G-DUHA NGA DOMINGGO

A. Unang Basahon

Job 38:1,8-11

Ang pagbasa gikuha gikan sa basahon ni Job.

Unya diha sa bagyo miingon ang Ginoo kang Job, "Kinsa may nagtak-op sa mga ganghaan aron pagpugong sa dagat, sa dihang mibuhagay kini gikan sa kahiladman sa yuta? Ako ang nagpandong sa dagat pinaagi sa mga panganod, ug giputos ko kini sa kangitngit. Gibutangan ko'g utlanan ang dagat, ug gialihan ko kini ug gitrangkahan ang mga ganghaan. Giingnan ko kini, 'dinhi ka ra gayod kutob! Anhi ra kutob ang dagko mong mga balod."

Mga igsoon, ang Pulong sa Ginoo.

B. Salmo Responsoryo

Salmo 107:23-24,25-26,28-29,30-31

Tubag (R) - Pasalamati ang Ginoo, kay ang iyang gugma way katapusan.

Sila nga nagawahig sa kadagatan diha sa mga sakayan, nga nagapatigayon diha sa kalawran, sila nakakita sa mga buhat sa Ginoo ug sa iyang mga katingalahan diha sa kahiladman. (R)

Nagpakitabang sila sa Ginoo diha sa ilang kalisdanan, sa ilang katalagman giluwas niya sila. Gipahilom niya ang unos ngadto sa usa ka mahinay nga huyohoy, ug ang mga balod sa kadagatan iyang gilinaw. (R)

Nalipay sila nga sila gilinaw ug gidala sila niya ngadto sa gipangandoy nilang dunggoanan. Pasalamata sila sa Ginoo tungod sa iyang kaayo ug sa iyang katingalahang mga buhat ngadto sa mga anak sa katawhan. (R)

C. Ikaduhang Basahon

2 Corinto 5:14-17

Ang pagbasa gikuha gikan sa ikaduhang sulat ni San Pablo ngadto sa taga- Corinto.

Kami giharian sa gugma ni Kristo kay nasayud kami nga may usa ka tawo nga mamatay alang sa tanan, ug kini nagpasabot nga ang tanang mga tawo nakaambit sa iyang kamatayon. Namatay siya alang sa tanang mga tawo aron ang mga buhi dili na magkinabuhi alang sa ilang kaugalingon, kon dili kaniya nga namatay ug gibanhaw tungod kaniya.

Busa karon dili na kami maghukom kang bisan kinsa pinaagi sa tawhanong sukdanan. Kaniadto among gihukman si Kristo sa tawhanong sukdanan, apan karon dili na namo buhaton kini. Kay bisan kinsa nga nahiusa kang Kristo, bag-o na siyang binuhat; ang daan miagi na ug miabot na ang bag-o.

Mga igsoon, ang Pulong sa Ginoo.

D. Ebanghelyo

Marcos 4:35-41

Ang pagsangyaw sa Maayong Balita sumala ni San Marcos.

Sa pagkagabii niadtong adlawa, giingnan ni Jesus ang iyang mga tinun- an, "Manabok kita sa Lanaw." Busa gibiyaan nila ang panon sa katawhan ug ang mga tinun-an misakay sa sakayan nga gisakyan ni Jesus, ug siya gidala nila. May ubang mga sakayan usab didto. Unya mihuros ang kusog nga hangin ug hisabwan ang sakayan sa balod ug hapit kini mapuno sa tubig. Apan natulog si Jesus nga nag-unlan didto dapit sa ulin. Ug gipukaw siya sa mga tinun-an nga nag-ingon, "Magtutudlo, wala ka ba mabalaka nga hapit na kita malunod?"

Mibangon si Jesus ug iyang gipahunong ang hangin, ug ang mga balod iyang giingnan, "Hunong!" Ug mihunong ang hangin ug mibanos ang kalinaw.

Unya miingon si Jesus kanila, "Nganong nalisang man kamo? Wala ba kamoy pagsalig?" Apan nangahadlok sila ug nagpangutan-anay, " Kinsa man kining tawhana nga bisan gani ang hangin ug mga balod motuman kaniya?"

Mga igsoon, ang Maayong Balita sa atong Ginoo.

E. Komentaryo

Tema: Pagmalig-on kamo sa inyong pagtoo ug paghigugma kang Kristo.

Sa atong paglawig niining kinabuhia, dili nato malikayan ang mga unos nga moabot sa atong kinabuhi. Dili usab nato malikayan nga usahay kita mahimong huyang sa pag-atubang niining mga unos nga modangat sa atong kinabuhi ug mapuno na kita sa kabalaka nga kini dili na nato masagubang. Apan, kung kita nakabaton og kinabuhi nga nagsubay sa kabubut-on sa Ginoo, kining tanan nga unos nga modangat sa atong kinabuhi lumalabay lamang ug kini maoy mahimong paagi sa atong tiunay nga gugma ug hingpit nga pagsalig sa Ginoo.

Ang atong mga pagbasa karon nagpahinumdom kanato sa dakong gugma sa Ginoo alang kanato. Ang unang pagbasa, naghatag kanato og kalig-on diin gipakita sa Ginoo kang Jacob nga ang tanang unos adunay utlanan. Ang Ginoo naghatag og kasegurohan kanato nga siya mismo ang nagpugong ug naghatag og utlanan sa mga unos niining kinabuhia. Sa mensahe nga atong nadungog, makapamalandong kita nga ang Ginoo dili motugot sa mga pagsulay nga labaw pa sa atong makaya. Kung moabot man ang mga pagsulay kanato, kita makaamgo nga kini makaya nato inubanan sa atong lig-on nga pagtoo sa atong Ginoo.

Diha sa atong ikaduhang pagbasa, naghatag kini kanato og dugang kusog nga diin ang atong Ginoong Jesukristo mihatag kanato sa iyang kaugalingon pinaagi sa iyang kamatayon ug pagkabanhaw aron kita magkinabuhi nga sama kaniya. Niining paagiha, nakighiusa kita sa kasakit ug kinabuhi ni Kristo dili alang sa atong kaugalingong kon dili alang sa uban apan aron sila usab magmalig-on diha sa pagpakig-uban ni Kristo aron maoy maghari sa atong kasingkasing.

Ang atong Ebanghelyo karon naglarawan sa mga tinun-an nga nangahadlok bisan kauban nila si Kristo. Makita nato nga ang tinun-an mismo ang nagpukaw kang Jesus aron pagtabang kanila. Gani nabati sa mga tinun-an nga wala magpakabana si Jesus sa ilang sitwasyon nga hapit na sila malunod sa kakusog sa hangin kay malinawon man ang paghikatulog si Jesus daw sa walay nahitabo. Apan sa dihang mibangon si Jesus ug gipahunong ang hunos natingala ang mga tinun-an kay dali kaayong mituman ug misunod ang hangin sa mando ni Jesus. Ug nakapangutana si Jesus sa iyang mga tinun-an kon nganong nangahadlok sila ug giingnan sila nga pagka dyutay gayod sa ilang pagtoo.

Kini nga hitabo nagpahinumdum kanato sa atong pagtoo sa Ginoo. Naghatag kini og dakong hagit alang kanato kon tinud-anay ba ang atong pagtoo sa Dios. Misalig ba kita Kaniya sa hingpit? Kay kon mao kini ang atong gihuptan, nan dili kita angay nga mabalaka kon moabot sa atong kinabuhi ang mga pagsulay ug mga pag-antus. Dili kita mobati og pagduha-duha kay sayod man kita nga ang Dios anaa kanunay ug andam sa paghatag sa iyang kalooy ug panabang. Bisan pa og kusokusohon kita sa mga dagkong unos sa atong kinabuhi dili kita angay nga mahadlok ug mabalaka. Ang mensahe karon naghatag kanato og kadasig nga kanunay kitang modangop sa Dios dili lamang sa panahon nga dunay unos sa atong kinabuhi. Usahay dili kalikayan nga mobati kita og kahadlok ug kabalaka sama sa gibati sa mga tinun-an ni Jesus. Apan kon kanunay kitang makighiusa ug makiglambigit sa atong Ginoo diha sa makanunayon natong pag-ampo malig-on ang atong pagtoo ug pagsalig kaniya.

Sa katapusan, hinaut nga kining mensahe nga atong nadungog karon, mahipatik unta kini sa atong tagsa tagsa ka kasingkasing aron sa kanunay magiyahan kita sa pagpahiduol sa Dios kanunay ug mosalig Kaniya sa hingpit. Magsilbi unta kini nga gabayan nga kanunay'ng mopahinumdom kanato nga ang tanang mga unos sa atong kinabuhi adunay utlanan. Kining maong mga unos sa atong kinabuhi mahimo unta kini nga usa ka paagi aron mas molig-on ang atong pagtoo ug sa kanunay atong mabati ang Iyang presensya sa matag usa kanato. Dili unta kita mawad-an sa kadasig sa pagsinati ug pag-ila kaniya. Atong hinumduman nga lig-onon nato kanunay ang atong pagtoo ug paghigugma sa Dios kay Siya man ang unang nahigugma kanato.

Giya alang sa Pamalandong:

1. Sa panahon sa atong mga kalisdanan nagmalig on ba ang atong pagtoo sa Ginoo?

2. Giunsa man nato pagpadayag ang atong paghigugma sa Ginoo?

F. Katilingbanong Pag-ampo

Pangulo: Mga igsoon, uban sa masaligon natong kasingkasing ato karong ipadangat sa Amahan ang tanan natong mga panginahanglan. Sa matag pag-ampo kita motubag:

GINOO, DUNGGA KAMI.

1. Nga ang tanang nagdumala sa Simbahan andam nga motahan sa ilang kaugalingon sa pagsangyaw sa Maayong Balita ngadto sa tanang katawhan inubanan sa kinasingkasing nga pagsaksi sa Pulong sa Dios nga ilang gipaambit. Mag-ampo kita.

2. Nga ang pangulo sa atong nasud ug mga kaubanan nga mga lideres makabaton og lig-on nga pagsalig sa Dios aron magiyahan sila sa ilang matinud-anon nga pag-alagad sa tanan. Mag-ampo kita.

3. Nga ang atong mga kaigsoonan nga nagmasakiton ug nag-antus sa nagkalainlaing kalisdanan sa kinabuhi, hingpit unta silang mosalig sa Dios nga maoy makahatag kanila sa matuod nga kahupayan. Mag-ampo kita.

4. Nga ang tanan nga nagdumala sa matag katilingban madasig kanunay sa pagtahan sa ilang kaugalingon sa pagpangalagad inubanan sa ilang hingpit nga pagsalig sa grasya sa Dios. Mag-ampo kita.

5. Nga kitang tanan nga nagkatigum karon, maisogon unta kitang mosunod ni Kristo bisan pa man sa daghang mga pagsulay nga atong mahimamat. Mag-ampo kita.

6. Nga ang atong personal nga katuyuan ato kining ihalad diha sa kahilum.

Pangulo: Makagagahum ug dalaygon nga Dios, Imong nadungog ang among mga pangamuyo. Malaumon kami nga Imo kining hatagan og katumanan subay sa Imong kabubut-on ug paagi. Kini among gipangayo pinaagi ni Kristo among Ginoo. Amen.