IKANAPULO NGA DOMINGGO

 IKANAPULO NGA DOMINGGO

A. Unang Basahon

Genesis 3:9-15

Ang pagbasa gikuha gikan sa basahon sa Genesis.

Human si Adan ug si Eba makakaon sa bunga sa kahoy nga gidili kanila sa Dios, ang Ginoo mitawag kang Adan ug nangutana kun mikaon ba siya. Apan ang lalaki mitubag, "Nadungog ko ang imong paglakaw sa tanaman ug giabot ako'g kahadlok ug mitago ako kay hubo man ako."

"Kinsay nagsulti kanimo nga hubo ka?" nangutana ang Dios. "Mikaon ka ba sa bunga sa kahoy nga gidili ko kanimo?"

Ang lalaki mitubag, "Ang babaye nga gihatag mo kanako maoy naghatag kanako sa bunga sa maong kahoy ug mikaon ako niini."

Ang Ginoong Dios nangutana sa babaye, "Nganong gibuhat mo man kini?" Ang babaye mitubag, "Gilingla ako sa bitin, busa mikaon ako niini."

Ug ang Ginoong Dios miingon sa bitin, "Tungod niini silotan ka; ikaw lamang sa tanang mananap ang mahiagom naiining tungloha: sukad karon magkamang ka na pinaagi sa imong tiyan, ug magkaon ka na'g abog, sa tanang adlaw sa imong kinabuhi.

Himoon kong magdinumtanay ikaw ug ang babaye; mahimong kaaway ang bitin, ug mahimong kaaway ang imong kaliwat ug ang iyang kaliwat. Dugmokon niya ang imong ulo ug paakon mo usab ang iyang tikod."

Mga igsoon, ang Pulong sa Ginoo.

B. Salmo Responsoryo

Salmo 130:1,2,3-4,5-6,7-8

Tubag (R) - Anaa sa Ginoo ang kalooy ug ang kapuno sa kaluwasan.

Gikan sa kahiladman nagatuwaw ako kanimo O Ginoo. Ginoo patalinghogi ang akong tingog. Abliha ang imong mga dalunggan sa akong tingog sa pagpangamuyo. (R)

Kon ikaw, O Ginoo, magtimaan sa mga kalapasan. Ginoo, kinsay makalahutay? Apan diha kanimo anaa ang pasaylo aron ikaw pagatahuron. (R)

Nagasalig ako sa Ginoo; ang akong kalag nagasalig sa iyang pulong. Labaw sa mga guardiya nga nagpaabot sa kaadlawon. Papaabota ang Israel sa Ginoo. (R)

Kay diha sa Ginoo anaa ang kalooy, ug diha kaniya ang kapuno sa kaluwasan. Ug iyang luwasaon ang Israel sa tanan niyang kadautan. (R)

C. Ikaduhang Basahon

2 Corinto 4:13-5:1

Ang pagbasa gikuha gikan sa ikaduhang basahon ni San Pablo ngadto sa taga-Corinto.

Ang kasulatan nag-ingon, "Misulti ako tungod kay mituo man ako." Sa samang diwa sa pagtuo, misulti usab kami tungod kay mituo kami. Kay nasayud kami nga ang Dios nga nagbanhaw sa Ginoong Jesus, magbanhaw usab kanamo uban kang Jesus, ug iya kaming dad-on uban kaninyo ngadto sa iyang atubangan. Gibuhat kining tanan tungod kaninyo ug sa makadaghan ang mga tawo nga makadawat sa grasya sa Dios, molabi kadaghan ang ilang mga pag-ampo sa pasalamat alang sa himaya sa Dios.

Tungod niini wala gayud kami kawad-i og kasibot. Bisa'g nag-anam na og kaluya ang among lawas, ang among espiritu gilig-on adlaw-adlaw. Ug kining gamay ug lumalabay nga kasamok nga among giantus naghatag kanamo'g labihang kadako ug walay katapusang himaya nga labaw kaayo kay sa mga kalisdanan. Kay wala kami magtan-aw sa mga butang nga makita, kondili sa mga butang nga dili makita; kay ang mga butang nga makita dili molungtad og dugay, apan ang mga butang nga dili makita walay

katapusan.

Kay nasayod kita nga inigkatun-as na niining atong yutan-ong puloy- anan nga mao ang atong lawas, hatagan kita sa Dios og puloy-anan didto sa langit usa ka puloy-anan nga walay katapusan ug siya gayud ang nagbuhat.

Mga igsoon, ang Pulong sa Ginoo.

D. Ebanghelyo

Marcos 3:20-35

Ang pagsangyaw sa Maayong Balita sumala ni San Marcos.

Unya mipauli si Jesus sa ila ug nagkatigom na usab didto ang dakong panon sa katawhan ug tungod niini, si Jesus ug ang iyang mga tinun-an wala na gani higayon sa pagpangaon. Sa pagkasayod niini sa iyang mga kabanay, nangadto sila aron pagkuha kaniya kay ang mga tawo nag-ingon man nga nabuang siya.

Dihay pipila ka mga magtutudlo sa Balaod nga nangabot gikan sa Jerusalem ug sila miingon, "Anaa kaniya si Beelsebul!" Ang uban miingon, "Ang pangulo sa mga yawa maoy naghatag kaniya sa gahum paghingilin sa mga yawa."

Tungod niini gipaduol ni Jesus ang mga tawo ug gisuginlan niya sila'g mga sambingay: "Unsaon man ni Satanas paghingilin kang Satanas? Kon ang mga tawo sa usa ka nasud mag-unay pag-away, mapukan kanang nasura. Kon ang mga sakop sa usa ka panimalay mabahin ug mag-unay pag- away, mabungkag gayud kanang panimalaya. Busa kon ang gingharian ni Satanas magkabahinbahin, dili kini molungtad, kondili mapukan ug matapos hinoon.

"Walay makasulod sa balay sa usa ka tawo nga kusgan ug makakawat sa iyang mga kabtangan gawas kon iya unang gapuson ang tawo nga kusgan; unya makahimo na siya pagkawat sa mga butang sa maong tawo.

"Timan-i ninyo kini: Mapasaylo ang mga tawo sa tanan nilang mga sala ug sa tanang daotan nilang sulti. Apan ang tawo nga nagsulti'g daotan batok sa Espiritu Santo dili gayud mapasaylo, kay nakabuhat man siya'g sala nga dili gayod mapapas. Gisulti kini ni Jesus kay may pipila man god ka mga tawo nga miingon nga siya giyawaan.

Unya miabot ang inahan ug ang mga igsoong lalaki ni Jesus. Didto sila sa gawas sa balay ug nagpasugo nga buot sila makigkita kaniya. "Ang imong inahan ug mga igsoon atua sa gawas ug buot sila makigkita kanimo."

Si Jesus mitubag, "Kinsa ba ang akong inahan ug mga igsoon?" Unya mitan-aw si Jesus sa mga tawo nga nag-alirong kaniya ug miingon, "Ania ang akong inahan ug mga igsoon. Kay ang nagtuman sa bisan unsa nga gisugo sa Dios kaniya maoy akong mga igsoon ug akong inahan."

Mga igsoon, ang Maayong Balita sa atong Ginoo.

E. Komentaryo

Tema: Pagtoo sa Kamatuoran.

Nadunggan nato nga ang mga Pariseo ug mga magtutudlo sa Balaod nahasol pag-ayo sa pagpangabog sa mga yawa kay sa pag-ayo sa mga masakiton.

Busa miadto sila sa mga dapit diin atua si Jesus aron pagsusi mahitungod niini. Sa panahon ni Jesus, ang mga Judeyo nagtoo nga ang mga sakit o balatian sa lawas buhat sa yawa. Ang Beelzebul usa ka ngalan sa karaang diosdios, ang tawag sa mga Judeyo sa yawa. Ang pagtoo sa mga Judeyo, si Jesus gisapian sa demonyo o ni Satanas mao nga nakaingon sila nga si Jesus makaayo sa masakiton tungod sa gahom ni Beelzebul ang prinsipe sa mga demonyo.

Busa si Jesus mitudlo kanila pinaagi sa sambingay, miingon si Jesus kanila: "Unsaon man ni Satanas pagpagawas ni Satanas?" Ang nasod nga mag-unay dili makabarog. Kon ang pamilya dili magkasinabot, dili gayod kini molungtad. Ingon usab niini ang mahitabo kon makigbatok siya sa kaugalingon ug magkabahinbahin sila dili gayod siya makabarog. Gihinginlan ni Jesus ang mga demonyo tungod kay batok siya sa mga demonyo. Tungod sa dakong gugma sa Dios ngadto sa Iyang katawhan, Iyang gihinginlan ang mga demonyo nga nag-ulipon kanila.

Kon atong sabton pag-ayo, si Jesus mao gayod ang makapasaylo sa atong mga sala tungod kay pinangga niya ang tanang katawhan. Tataw kaayo nga kita giawhag ni Jesus nga atong kasilagan ang sala ug dili na gayod magpakasala. Ang magtutudlo nakasala batok sa Ginoo pinaagi sa pagbalibad niya sa presensya sa Ginoo diha sa ilang kaugalingon. Nakasala usab sila sa dili pagtoo sa gahum sa Espiritu Santo, sa mga pulong nga gisulti ug sa mga binuhatan ni Jesus ug sa iyang presensya. Ang Ginoo mopadayon nga magpaila kanato nga Siya mao gayod ang kamatuoran. Busa si Jesus mitugot kanila nga sawayon sa wala makasabot kaniya. Adunay daghang mga Pariseo nga wala makasabot ug naglagot kaniya. Wala kini igsapayan ni Jesus.

Gibiyaan ni Jesus ang iyang mga paryente, apan nakahimamat siya og bag-ong mga igsoon. Sa dihang mitahan kita sa atong kaugalingon alang sa buluhaton sa Ginoo, makakita kita og bag-ong mga igsoon ug inahan. Sa paghatag o paghalad nato sa atong kaugalingon diha sa pagserbisyo sa atong katilingban, usa kini ka dakong gasa alang kanato gikan sa Ginoo.

Bisan og nagkapuliki kita sa atong mga gimbuhaton nga usahay wala na kitay panahon alang sa atong pamilya, kita mogahin gayod sa atong panahon alang sa pag-alagad sa atong mga igsoon. Magpadayon kita nga mohatag sa atong kaugalingon ngadto sa atong Ginoo ug diha sa atong pag-alagad atong makit-an ang matuod nga paghigugma sa Ginoo.

Sa Daang Kasabotan, atong namatikdan nga si Eba nga mao ang kapikas ni Adan, nakasala batok sa Ginoo. Ang inahan nga mao ang naghatag og dalan sa mga tawo nga makabuhat sa pagsupak sa kabubut- on sa Ginoo. Samtang sa Bag-ong Kasabotan usab, si Maria mao ang inahan sa Manunubos. Ang inahan nga maoy nagtuman sa tanang mga sugo sa Ginoo. Siya ang gipadayag sa Daang Kasabotan nga mao ang magdugmok sa ulo sa bitin. Kini nagsimbolo nga si Maria mao ang babaye nga magdala sa manluluwas sa kalibutan pinaagi sa iyang Anak nga si Jesus.

Sa katapusan, ang mga mensahe karon, naghagit kanato nga makakat-on kita sa mga panghitabo sa Daang Kasabotan ug sa Bag-ong Kasabotan aron mao kini ang magdasig sa atong kaugalingon sa pagpuyo ug pagbuhat og maayo nga sa kanunay nagsunod sa kabubut-on sa Dios. Nga unta kini ang magdasig kanato sa pagpakigbisog nga kita mahalikay kanunay sa mga tentasyon sa dautan aron ang mga maayong buhat maoy mopatigbabaw sa atong kaugalingon. Hinaut pa unta.

Giya alang sa Pamalandong:

1. Makanunayon ba kitang abli sa pagdawat sa mga mensahe nga maoy maggiya kanato sa pagsubay sa kabubut-on sa Dios?

2. Natisok ba kini sa atong tagsa tagsa ka galamhan ug ato ba kining gipuy-an?

F. Katilingbanong Pag-ampo 

Pangulo: Sa tumang pagsalig ato karong ihalad sa Moloy-on nga Amahan ang atong mga pag-ampo ug panginahanglan Sa matag pag-ampo kita motubag. GINOO, DUNGGA KAMI.

1. Nga ang Simbahan ilabina sa nagdumala niini ang Santo Papa, mga Obispo ug kaparian magmatinud-anon sila sa pagtamod sa mga mensahe nga gipadayag sa Ebanghelyo isip sumbanan sa Kristohanong pagkinabuhi. Mag-ampo kita.

2.. Nga ang mga pangulo sa tanang nasud magmugna unta og mga kamanduan nga subay sa kabubut-on sa Dios ug anaa ang matinud-anong pag-alagad sa tanan. Mag- ampo kita.

3. Nga ang matag adlaw nga Dominggo ang Adlaw sa Ginoo, magdala kanato diha sa matinud-anong pagmati sa kabuhong sa Pulong sa Dios aron atong masinati ang Iyang makanunayong gugma ug kalooy. Mag-ampo kita.

4. Nga ang Kasaulogan sa Yukaristiya mahimong tinubdan sa usa ka Kristohanong katilingban nga nagkahiusa diha sa pagpakighimamat sa Dios nga naghatag kanato og kalig-on. Mag-ampo kita.

5. Nga ang mga mahal nato sa kinabuhi nga nag-una na kanato sa laing kalibutan makasulod na diha sa lawak nga gitagana sa Dios kanila nga ilang langitnong puloy- anan. Mag-ampo kita.

6. Nga ang atong personal nga katuyuan ato kining ihalad diha sa kahilum.

Pangulo: Ginoo among Amahan, amo nang gipadayag Kanimo ang among mga panginahanglan. Sa kinasingkasing malaumon kami nga Imo nang dunggon ug kahatagan og katumanan ang among gi-ampo karon pinaagi ni Kristo Imong Anak ug among Ginoo hangtud sa kahangturan. Amen.