IKA-NAPULO'G-TULO NGA DOMINGGO

IKA-NAPULO'G-TULO NGA DOMINGGO

A. Unang Basahon

Kinaadman 1:13-15,2:23-24

Ang pagbasa gikuha gikan sa Kinaadman.

Ang Dios wala magmugna sa kamatayon, ug kon ang buhi nga mga binuhat mamatay, dili siya malipay niini. Gibuhat niya ang tanan aron magpadayon kini ug ang tanang buhat nga iyang gihimo, hingpit ug maayo. Walay makamatay nga hilo diha kanila. Ang kamatayon dili maoy nagmando sa kalibutan, kay ang hustiya sa Dios dili man mamatay.

Sa pagbuhat sa Dios kanato, dili niya tuyo nga kita mamatay; gibuhat kita niya sama sa iyang kaugalingon. Ang kasina sa yawa mao ang nagdala sa kamatayon dinhi sa kalibutan, ug sila nga iya sa yawa mao ang mangamatay.

Mga igsoon, ang Pulong sa Ginoo.

B. Salmo Responsoryo

Salmo 30:2,4-,5-6,11,12,13

Tubag (R) - Dayegon ko ikaw, O Ginoo, kay imo akong giluwas.

Ibayaw ko ikaw, O Ginoo kay imo akong gigakus pag-ayo ug wala ka motugot nga ang akong mga kaaway malipay bahin kanako. O Ginoo, gikuha mo ako gikan sa kinahiladman sa kalibutan ug gipalingkawas mo ako gikan kanila nga nagadulong sa kahiladman. (R)

Dayega ang Ginoo, kamong matinumanon kaniya, ug pasalamati ang iyang santos nga ngalan. Kay ang iyang kasuko molungtad sa makadiyot lamang apan ang iyang maayong kabubut-on sa tibook nga kinabuhi. Sa gabii mosulod ang paghilak apan sa kaadlawon, ang pagsadya. (R)

Pamati, O Ginoo, ug kaloy-i ako; Ginoo, pagpakahimong akong magtatabang, gibalhin mo ang akong pagbangotan ngadto sa pagsayaw, O Ginoo, akong Dios, hangtod sa kahangturan pasalamatan ko ikaw. (R)

C. Ikaduhang Basahon

2 Cor. 8:7-8,13-15

Ang pagbasa gikuha gikan sa ikaduhang sulat ni San Pablo ngadto sa taga- Corinto.

Kamo mga dato kaayo sa pagtoo, sa panulti, sa kahibalo, sa inyong tinguha sa pagtabang, ug sa inyong paghigugma kanamo. Busa buot kami nga magmahinatagon usab kamo niining pag-alagad sa gugma.

Wala ako maghimo'g bisan unsang mga lagda. Apan pinaagi sa pagpakita sa tinguha sa uban sa pagtabang, buot kong masayran kon tinuod ba gayud ang inyong gugma. Kay nasayud kamo sa grasya sa atong Ginoong Jesukristo, nga bisan siya dato, nagpakakabus siya tungod kaninyo aron madato kamo pinaagi sa iyang kakabus.

Dili ko tuyo nga kuhaon ang palas-anon sa uban aron ipapas-an kaninyo; apan sanglit hamugaway man kamo niining panahona, makatarunganon gayud nga tabangan ninyo kadtong nagkinahanglan. Unya kon kamo na usab ang magkinahanglan ug sila ang hamugaway, motabang usab sila kaninyo. Niining paagiha magkatinabangay kamo. Sumala sa giingon sa Kasulatan, "Ang dagha'g tinigom wala masobrahi, ug ang diyotay'g tinigom wala makulangi."

Mga igsoon, ang pulong sa Ginoo.

D. Ebanghelyo

Marcos 5:21-24,35-43

Ang pagsangyaw sa Maayong Balita sumala ni San Marcos.

Unya mibalik si Jesus pagtabok sa lanaw ug didto may dakong panon sa kataw han nga mialirong kaniya. Ug miabot ang usa ka pangulo sa sinagoga niadtong dapita nga gihinganlag Jairo. Sa pagkakita niya kang Jesus, mihapa siya sa iyang tiilan, ug nagpakilooy pag-ayo nga nag-ingon, "Ang akong gamayng anak nga babaye nasakit ug naglisod na. Adto-a intawon siya ug hikapa aron mamaayo."

Ug mikuyog si Jesus kaniya. Daghan kaayong mga tawo miuban kaniya ug tungod niini nagdasok sila libot kaniya.

Dihay usa ka babaye nga gitalinug-an ug nag-antos niini sulod na sa napulo'g- duha ka tuig bisan pa'g gitambalan na siya sa daghang doktor. Nahurot na lang ang iyang salapi, apan wala gayud moarang-arang ang iyang kahimtang; migrabe na hinoon. Nakadungog siya mahitungod kang Jesus, busa misuotsuot siya sa katawhan ngadto sa luyo ni Jesus. Unya nakaingon siya sa iyang kaugalingon, "Kon mahikap ko bisan lamang ang iyang bisti, mamaayo gayud ako."

Busa iyang gihikap ang bisti ni Jesus ug mihunong dayon ang iyang talinugo, ug gibati niya nga naayo siya. Dihadiha gibati ni Jesus nga may gahum nga migula kaniya, busa milingi siya sa mga tawo ug nangutana, "kinsay mihikap sa akong bisti?"

Ang iyang mga tinun-an mitubag, "Nasayod ka na bitaw nga ang mga tawo nagpunsisok kanimo, busa nganong nangutana ka man kon kinsay mihikap sa imong bisti?"

Apan nagpadayon si Jesus paglingilingi aron pagsusi kon kinsa gayud ang mihikap niya. Ang babaye nga nasayod sa nahitabo kaniya, miduol nga nagkurog sa kahadlok, ug mihapa sa tiilan ni Jesus, ug misugilon sa nahitabo. Unya miingon si Jesus kaniya, "Anak, naayo ka gumikan sa imong pagtuo. Pauli nga malinawon ug ayaw na kabalaka."

Samtang nagsulti si Jesus niini, may mga sinugo nga miabot gikan sa balay ni Jairo ug miingon kaniya, "Patay na ang imong anak, busa nganong imo pang samokon ang Magtutudlo?"

Wala tagda ni Jesus ang ilang gisulti kaniya; giingnan hinoon niya si Jairo, "Ayaw kahadlok. Salig lang." Unya wala siyay laing gitugotan pagkuyog kaniya gawas kang Pedro ug sa magsoon nga si Santiago ug si Juan. Pag- abot nila sa balay ni Jairo, nakita ni Jesus ang kaguliyang ug nabati niya ang kusog nga hinilakay ug pagminatay. Midayon siya sa balay ug miingon kanila, Ngano bang nagkaguliyang ug naghilak man kamo? Wala mamatay ang bata; natulog lamang siya!"

Unya gipagula ni Jesus ang mga tawo tungod kay nagbugalbugal man sila kaniya. Ug gidala niya ang amahan ug inahan sa bata ug ang tulo niya ka tinun-an ngadto sa kuwarto nga gihigdaan sa bata. Ug iyang gikuptan ang kamot sa bata ug giingnan, "Talita kumi!" nga sa ato pa, "Inday, bangon!"

Dihadiha ang bata nga nagpanuigon og napulog-duha ka tuig mibangon ug milakaw. Ug hilabihan gayud ang ilang kahibulong sa nahitabo! Apan gipinahan sila ni Jesus sa dili pagsugilon kang bisan kinsa mahitungod niini, ug siya miingon, "Pakan-a ninyo ang bata."

Mga igsoon, ang Maayong Balita sa atong Ginoo.

E. Komentaryo

Tema: Pagsalig diha sa atong Ginoo.

Ang pagtoo maoy usa ka makahatag og kahingpitan diha sa atong kaluwasan. Mao usab kini ang maghatag og kalig-on sa atong kaugalingon alang sa makanunayong pagsagubang sa mga kalisod ug mga pag-antos sa atong kinabuhi. Naghatag kini og kalig- on ug kaisog sa pag-atubang sa atong mga problema sa kinabuhi. Mao usab kini ang makapaaghat sa usa ka tawo sa pagtahan sa iyang kaugalingon ngadto sa pag-alagad sa atong isigkaingon kon mitoo kita nga ang pagtabang nato sa atong isigkatawo sama nga gitabangan nato ang Dios.

Mao kini ang hagit ni San Pablo: "Pagtinabangay kamo". Kay ang Ginoo kanunay nag-atiman kanato ug kanunay nga nangita ug nagtawag niadtong nahimulag Kaniya. Kung ang atong pagtoo matuod kini, dili gayod Siya magmakuli sa pagtabang kanato, kay Siya wala magmugna og mga butang makadaot kanato kon dili nagbuhat Siya sa mga butang nga makaayo sa tanan. Ang Dios sa kanunay naghulat sa makanunayon natong pagsangpit kaniya.

Diha sa atong Ebanghelyo nagpadayag og usa ka hitabo aron malig-on ang atong pagtoo. Nagpakita si Jesus og usa ka milagro diin ang duha ka tawo nangaayo tungod sa ilang hugot nga pagtoo. Usa niini ang babaye nga gitalidug-an sulod sa napulog- duha ka tuig nga diin sa pagkahibalo niya nga nilabay si Jesus, naningkamot siya nga makaduol ni Jesus ug pinaagi sa hugot niyang pagtoo siya nagkanayon: "Kon makahikap lang ako sa Iyang sapot, mamaayo gayod ako!" Ug tuod man sa dihang nakahikap siya diha-diha, naayo siya sa iyang balatian nga dugay na niyang giantus. Sa laing bahin ang batang babaye nga nabuhi tungod kay misalig man sila kang Jesukristo nga Dios.

Ang Ginoo maoy tinubdan sa tanan, Siya ang atong kinabuhi. Iyang gipaambit kanato ang Iyang kahimayaan. Sa kanunay andam ang Dios nga motabang niadtong mga tawo nga nanginahanglan sa Iyang kalooy. Usahay diha sa atong kinabuhi makalimtan nato ang Dios ilabina kon anaa kita sa kahamugaway ug kahayahay sa atong kinabuhi nga mao kini ang sinugdanan nga kita mahimulag kang Kristo. Kini ang magdala kanato sa kaalautan. Ang paghikalimot nato kang Kristo, maoy sinugdanan sa atong pagpakasala ug mao kini ang makapahimulag nato Kaniya. Ang sala maoy naghatag og kaalaot sa atongkaluwasan. Busa paninguhaon nato nga kanunay kitang mahiusa diha sa atong Ginoo. Maningkamot kita pagpahiduol kanunay sa Ginoo bisan pa og adunay daghan mga babag sa atong pagbuhat niini. Sa atong pagpakabuhi, dili kalikayan ang mga pagsulay nga modangat sa atong kinabuhi apan dili nato kini himoong higayon nga kita mopahilayo sa Ginoo. Kon dili himoon nato kining kabahin sa atong kinabuhi nga diin kita maningkamot sa pagduol Kaniya. Ang buhi ug matuod nga pagtoo makita sa atong binuhatan. Kay si Santiago miingon: "Ang pagtoo nga walay buhat patay". Mao kawang lamang ang atong pagtoo kon kini wala giubanan og buhat. Usa kini ka dakong hagit sa atong kinabuhi isip mga sumusunod ni Kristo.

Ang pagpuyo diha sa atong pagtoo, kinahanglan nga ipakita nato kini uban sa atong mga maayong buhat. Makahibalo kita nga motabang sa atong mga kaigsoonan nga nanginahanglan. Ipaamgo nato sa usag usa kung giunsa kita pagluwas ni Kristo diha sa panahon nga kita nawad-an sa paglaum, paghigugma ug pagtoo. Kita giluwas sa Dios diha sa atong kalisdanan, busa kining tanan atong isalig Kaniya kay wala kitay mahimo kung wala si Kristo sa atong kinabuhi. Angay lamang nga atong daygon ug pasalamatan ang Dios sa kanunay sa Iyang mga kahibulongang mga buhat alang kanato. Busa salig ug laum nga dili kita pakyason sa makagagahum nga Dios.

Giya alang sa pamalandong:

1. Matuod ba ang atong pagsalig sa makagagahum nga Dios?

2. Giunsa man nato pagpakita nga ang atong pagtoo giubanan kini sa atong maayong buhat?

F. Katilingbanong Pag-ampo

Pangulo: Sa tumang pagsalig atong ipadangat sa Amahan ang atong mga pag- ampo ug panginahanglan. Sa matag pangamuyo kita motubag: GINOO, DUNGGA ANG AMONG PAG-AMPO.

1. Alang sa tibuok Simbahan ilabina sa nagdumala niini ang Santo Papa, mga Obispo ug kaparian, sa tumang kaaghop sila magpadayon sa pagmantala sa gimbuhaton ni Kristo ngadto sa tanang katawhan. Mag-ampo kita.

2. Alang sa mga pangulo sa atong nasud makabaton unta sila og kasingkasing nga manggihatagon alang sa tanan ilabina sa hinanaling nanginahanglan. Mag-ampo kita.

3. Alang sa atong mga igsoon nga gitahasan sa pag-atiman sa atong mga igsoon nga nagmasakiton, makabaton unta sila og dugang kalig-on ug magmadasigon sa ilang pag-alagad subay sa gugma ni Kristo. Mag-ampo kita.

4. Alang sa mga pangulo sa matag katilingban nga sa kanunay himoon nilang gabayan si Kristo sa ilang walay puas ug matinud- anon nga pagpangalagad. Mag-ampo kita.

5. Alang sa atong mga mahal sa kinabuhi nga nag-una na kanato ngadto sa laing kalibutan, makadayon na unta sila sa lawak nga gitagana kanila sa Langitnong Amahan. Mag-ampo kita.

6. Alang sa atong kaugalingon nga katuyuan, ato kining ihalad diha sa kahilum.

Pangulo: Ginoo sa gugma ug kalooy, patalinghugi ang mga pag-ampo sa Imong katawhan nga nagsalig kanunay sa Imong panabang. Kay nasayud kami nga diha Kanimo nagagikan ang tanang kaayohan ug grasya. Kini among gipangayo pinaagi ni Kristo among Ginoo ug Manunubos. Amen.

Marcos 5:21-24,35-43