SOLEMNIDAD SA PAGSAKA SA GINOO SA LANGIT

SOLEMNIDAD SA PAGSAKA SA GINOO SA LANGIT

A. Unang Basahon

Buhat 1:1-11

Ang pagbasa gikuha gikan sa Buhat sa mga Apostoles.

Minahal kong Teofilo: Sa una kong sulat gihisgutan ko ang tanang butang nga gibuhat ug gitudlo ni Jesus sukad sa pagsugod niya sa iyang buluhaton hangtud sa adlaw nga siya gibayaw ngadto sa langit. Sa wala pa siya bayawa, gipahimangnoan niya pinaagi sa Espiritu Santo ang mga tawo nga iyang gipili nga mga apostoles. Sulod sa kwarenta ka adlaw human siya namatay, mipakita siya kanila sa makadaghan, sa mga paagi nga nagmatuod nga buhi gayud siya. Nakita siya nila ug nakigsulti siya kanila mahitungod sa paghari sa Dios. Ug samtang si Jesus uban pa kanila, gitugon niya sila, "Ayaw una kamo pagbiya sa Jerusalem; hulata ninyo ang gasa nga gisaad sa akong Amahan, sumala sa gisulti ko kaninyo. Kay si Juan namunyag pinaagi sa tubig, apan pipila na lamang ka adlaw gikan karon bunyagan kamo pinaagi sa Espiritu Santo."

Sa pagkatigom na nila, gipangutana nila si Jesus, "Ginoo, tukuron mo ba pag-usab niining panahona ang gingharian sa Israel?" Si Jesus mitubag kanila, "Ang mga panahon ug mga adlaw gitagana nang daan sa akong Amahan; dili kamo angay magpakisayod kun kanus-a kini mahitabo. Apan kun mokunsad na kaninyo ang Espiritu Santo, makadawat kamo'g gahum ug mahimo kamong akong mga saksi sa Jerusalem, sa tibook Judea ug Samaria, ug sa tibook kalibutan." Human niya isulti kini, gibayaw siya ngadto sa langit samtang nagtan-aw sila kaniya, ug siya wala na nila makita kay gisalipdan man siya'g panganod.

Samtang nagtutok sila sa langit sa pagkayab ni Jesus, may duha ka tawo nga nagbisti'g puti nga mitungha pagkalit ug mibarog tupad kanila. Miingon sila, "Mga taga-Galilea, nganong nagtindog man kamo dinha ug nagsigi'g hangad sa langit? Si Jesus nga gibayaw ngadto sa langit mobalik sa samang paagi sa iyang pagkayab ngadto sa langit."

Mga igsoon, ang pulong sa Ginoo.

B. Salmo Responsoryo

Salmo 47:2-3,6-7,8-9

Tubag (R) - Misaka ang Dios sa iyang trono uban sa mga singgit sa kalipay, usa ka tingog sa mga trumpeta ipalanog alang sa Ginoo.

Kamong tanang mga tawo, pamakpak kamo, singgit kamo ngadto sa Dios og mga singgit sa kalipay; Kay ang Ginoo, ang labing halangdon, ang katingalahan, dakung hari sa tibook kalibutan. (R)

Pag-awit og mga pagdayeg ngadto sa Dios; awiti'g mga pagdayeg ang atong hari. Kay ang Dios hari sa tibook kalibutan; dayga siya pinaagi sa mga awit! (R)

Kay hari sa tibook yuta ang Dios; awiti siya'g mga imno sa pagdayeg. Maghari ang Dios diha sa kanasuran, magalingkod ang Dios diha sa iyang balaang trono. (R)

C. Ikaduhang Basahon

Efeso 1:17-23

Ang pagbasa gikuha gikan sa sulat ni San Pablo ngadto sa mga taga- Efeso.

Naghangyo ako sa Dios sa atong Ginoong Jesukristo, ang gamhanang Amahan, nga hatagan unta kamo sa Espiritu nga maghimo kaninyong maalamon ug magpadayag sa Dios kaninyo aron makaila kamo kaniya. Naghangyo usab ako nga malamdagan unta ang inyong salabutan aron masayud kamo unsa ang paglaum nga alang niini gitawag kamo. Ug hinaut usab unta nga masayud kamo sa kahupong sa mga panalangin nga gisaad niya sa iyang katawhan. Dugang pa niini, gipanghinaut ko nga masayran ninyo ang kadako sa iyang gahum nga ania kanato nga nagtuo kaniya. Kining gahoma nga ania kanato mao ang gigamit niya pagbanhaw kang Kristo, ug pagpalingkod kaniya sa iyang tuo didto sa langit. Didto naghari si Kristo labaw sa tanang mga hari, ug sa mga anaa sa gahum ug sa mga punoan, ingon man sa mga kaginoohan; labaw siya sa tanan bisan unsa pa ang ilang katung-danan niining kalibutana ug sa sunod.

Gibutang sa Dios ang tanan ubos sa pagmando ni Kristo, ug alang sa iglesia gihimo siyang pangulo labaw sa tanan. Ang iglesia mao ang lawas ni Kristo, ang kahingpitan niya nga mao ang naghingpit sa tanang butang.

Mga igsoon, ang pulong sa Ginoo.

D. Ebanghelyo

Markos 16:15-20

Ang pagsangyaw sa Maayong Balita sumala ni San Marcos

Si Jesus mipakita sa iyang mga apostoles ug miingon, "Panglakaw kamo sa tibuok kalibotan ug isangyaw kining Maayong Balita ngadto sa tanang mga tawo. Ang motuo ug magpabunyag, maluwas, apan ang dili motuo, silotan. Ug kini ang mga timaan sa gahum nga maangkon nila nga motuo: sa akong ngalan maghingilin sila'g mga yawa ug manulti sila'g lainlaing mga sinultihan; kon makagunit sila'g mga bitin o makainom sila'g hilo, dili sila maunsa: itapion nila ang ilang mga kamot sa mga masakiton ug mangaayo sila."

Human makigsulti kanila ang Ginoong Jesus, gidala siya ngadto sa langit ug milingkod sa tuo sa Dios. Ug nanglakaw ang mga tinun-an ug nagsangyaw sa Maayong Balita sa tanang dapit. Ang mitabang gayud kanila mao ang Ginoo, ug midason sa katinuod sa ilang giwali pinaagi sa paghatag kanila sa mga timaan sa gahum.

Mga igsoon, ang Maayong Balita sa atong Ginoo.

E. Komentaryo 

Tema: Pagsaksi ug Pagpuyo sa Kamatuoran.

Daghan kita og mga kasinatian nga ang usa sa mga miyembro sa atong pamilya, barkada ug mga hinigugma natong mga higala nga mobiya kanato. Apan sa ilang pagbiya daghan sila og mga pulong nga gibilin kanato, sama sa atimana ang imong mga igsoon, imong inahan o amahan, pag-ayo-ayo mo, kanunay ninyo akong iampo, mingawon ko ninyo, gihigugma ko kamo ug daghan pang nagkadaiyang panultihon. Kita nakahibalo nga kining mga pulonga mahinungdanon alang kanila, ug nanghinaut usab sila nga ato kining hatagan og dakung pagtagad. Kini nagpakita sa atong pagkasuod ngadto kanila ug ato kining hatagan og bili ang atong pagpakighigala kanila. Tungod niini dili sayon alang sa atoa nga sila mobiya kanato. Makasinati usab kita'g kamingaw, ilabi na gayod kay masakitan kita sa ilang pagbiya kanato.

Kini usab ang mga kasinatian sa mga Apostoles ni Kristo, nga sa dihang nahibaloan na nila nga si Kristo mobiya na nila, kay Siya mobalik na sa Iyang Amahan. Mibati gayud sila og kamingaw ni Kristo, kay sulod sa pipila ka tuig nakig-uban sila Kaniya ug nasuod usab sila ni Kristo. Apan daghang mga pulong ang nahitisok sa mga kasingkasing sa mga Apostoles nga kanunay nilang mahinumduman si Kristo. Kining pagbiya ni Kristo wala nagpasabot nga gitalikdan na sila niya kay sa pagkatinuod si Kristo kanunay makig-uban kanila. Dili na nila makita ang lawas niya apan ang Iyang Balaang Espiritu kanunay makig-uban kanila aron mohatag kanila og kabaskog ug mogiya kanila sa ilang pagpadayon sa misyon nga gibilin ni Kristo kanila. "Apan ang Espiritu Santo mokunsad na kaninyo, kamo makadawat og gahom ug mahimo kamo nga akong mga saksi, sa Jerusalem, sa tibuok Judea ug Samaria, ug sa tibuok kalibutan".

Karong adlawa, atong gisaulog ang Solemnidad sa Pagsaka sa Ginoo sa langit. Kini nagpamatuod nga si Kristo nga gikan sa Iyang Amahan, Siya mobalik na Kaniya. Sa iyang pagbalik sa Amahan Iyang gibuntog ang kamatayon ug sala. Siya nagpaila sa Iyang dakong gahum kay sa Iyang pagbalik sa Amahan, Siya magalingkod sa tuo sa Dios.

Sa pagsaka ni Kristo sa Langit, nagpabilin ang Iyang mga maayong buhat nga kanunay nga nagpalig-on sa atong pagtoo, isip mga Kristiyanos. Kanunay natong masinati ang Dios diha sa atong dakong pagtoo Kaniya. Kita mamahimong buhing saksi sa kamatuoran ug kitang tanan gihagit sa pagpuyo niini.

Ang presensya ni Kristo kanunay nagpabilin, labi na gayod diha sa Iyang mga Pulong ug sa Yukaristiya.

Sa atong pagdawat Kaniya, gidawat usab nato ang responsibilidad sa pagsaksi ug pagpuyo diha sa matarong ug ang pagpaambit niini sa uban, ilabina gayud sa atong pagpakigrelasyon diha sa atong pamilya, ug mga miyembro sa atong katilingban.

Hinaut nga magpabiling buhi ang presensya ni Kristo diha sa atong tagsatagsa ka kaugalingon ug sa atong

katilingban. Masinati nato nga buhi ang presensya sa Ginoo diha sa atong katilingban, kung adunay paghinigugmaay, pagbinatiay, pagpinasayloay ug kahiusahan.

Usa ka dakong hagit kanatong tanan ang pagpuyo diha sa kamatuoran, ug gugma sa Dios sa pagsaka ni Kristo sa Langit. Kitang tanan gitahasan sa pagpaambit sa Iyang mga pulong ug maayong buhat sa atong mga kaigsoonan. Kita mamahimong mga saksi ni Kristo kung ang tanan Niyang gitudlo kanato, ato kining pagapuy-an. Hinaut pa unta.

Giya alang sa Pamalandong:

1. Isip binunyagan, unsa man ang tahas o misyon nga atong naambitan?

2. Gituman ba nato ang atong mga kaakuhan sa pagsaksi ug pagpuyo sa kamatuoran?

F. Katilingbanong Pag-ampo

Pangulo: Puno sa pagsalig, atong ipadayag karon sa atong Mahigugmaong Amahan ang atong mga panginahanglan atol niining pagsaulog nato sa Pagsaka sa Langit sa atong Ginoong Jesukristo. Sa matag pag-ampo kita motubag: GINOO, DUNGGA KAMI.

1. Alang sa atong Santo Papa, mga Obispo ug kaparian, sa kanunay giyahan sila sa gahum sa Espiritu Santo aron molahutay sila sa ilang pag-alagad sa tanang katawhan. Mag-ampo kita.

2. Alang sa mga namunoan sa atong nasud nga ang mga pagtulon-an ni Kristo maoy mopatigbabaw sa ilang kaugalingon aron moalagad sila sa tanang katawhan sa diwa sa paghigugma ug panagdait. Mag-ampo kita.

3. Alang sa mga batan-on nga madasig unta sila nga mopaambit sa ilang kaugalingon alang sa kalamboan sa katilingban. Mag- ampo kita.

4. Alang sa atong mga igsoon nga midawat sa kaakuhan sa pagkamagsasangyaw sa Pulong sa Dios nga sa kanunay madasig ug molahutay sila bisan pa sa mga pagsulay nga ilang mahiaguman. Mag-ampo kita.

5. Alang sa mga ginikanan, nga unta sila maoy maghatag og kadasig ug maayong panig-ingnan sa ilang mga anak aron magkinabuhi sila 'subay sa kabubut-on sa mahigugmaon nga Amahan. Mag-ampo kita.

6. Alang sa atong kaugalingon nga katuyuan ato kining ihalad diha sa kahilum.

Pangulo: Ginoo, masaligon kami nga Imong dunggon ang among mga pag- ampo nga among gihalad Kanimo karon. Malaumon kami nga amo kining madawat pinaagi ni Kristo nga mahimayaong misaka sa langit. Amen.