SANTISSIMA TRINIDAD

 SANTISSIMA TRINIDAD

[Dominggo human sa Pentekostes]

A. Unang Basahon

Deuteronomio 4:32-34,39-40

Ang pagbasa gikuha gikan sa basahon sa Deuteronomio.

Si Moises miingon sa katawhan, "Pakisayud kamo karon bahin sa panahon nga nangagi sa wala pa kamo mangatawo, ug sa panahon sukad buhata sa Dios ang tawo, ug pangutana sa tibuok kalibutan kon sukad-masukad may dako bang butang nga nahitabo o gikabalita nga sama niini. May katawhan ba nga nakabati sa tingog sa usa ka Dios nga misulti gikan sa taliwala sa kalayo sama sa inyong nadungog ug buhi pa ba gihapon sila? May Dios ba nga misulay pagkuha sa katawhan gikan sa usa ka nasud aron maiyang katawhan sama sa gibuhat sa Ginoo nga inyong Dios? Busa hibaw-i ninyo ug itanom sa inyong kasingkasing nga niining adlawa ang Ginoo mao ray Dios sa langit ug sa yuta. Busa tumana ang iyang mga balaod ug kasugoan nga gisugo kaninyo niining adlawa, aron walay dautang mahitabo kaninyo ug sa inyong mga anak, ug mabuhi kamo'g dugay sa yuta nga iyang gihatag kaninyo hangtud sa kahangturan."

Mga igsoon, ang Pulong sa Ginoo.

B. Salmo Responsoryo

Salmo 33:4-5,6,9,18-19,20,22

Tubag (R)- Bulahan ang katawhan nga gipili sa Ginoo aron maiyang katawhan.

Matarong ang pulong sa Ginoo, ug ang tanan niyang mga buhat kasaligan. Nahigugma siya sa husto ug matarong; sa kaayo sa Ginoo puno ang yuta. (R)

Pinaagi sa pulong sa Ginoo gibuhat ang mga langit; pinaagi sa ginhawa sa iyang baba ang tanan nilang kagahuman. Kay misulti siya, ug kini nahimo; misugo siya, ug kini mibarog. (R)

Tan-awa, ang mga mata sa Ginoo gitan-aw nganha kanila nga mahadlokon kaniya, kanila nga nagalaum sa iyang kalooy, aron pagpalingkawas kanila sa kamatayon ug pag-amping kanila bisan pa sa gutom. (R)

Ang atong kalag nagapaabot sa Ginoo, nga mao ang atong hinabang ug atong panalipod. Ang imong kalooy, O Ginoo, maania unta kanamo nga nagabutang sa among paglaum diha kanimo. (R)

C. Ikaduhang Basahon

Roma 8:14-17

Ang pagbasa gikuha gikan sa sulat ni San Pablo ngadto sa taga- Roma.

Ang tanang gimandoan sa Espiritu sa Dios, mga anak sa Dios. Kay ang Espiritu nga gihatag sa Dios kaninyo dili maghimo kaninyong ulipon aron mahadlok kamo; hinonoa, ang maong Espiritu maghimo kaninyo nga mga anak sa Dios. Tungod niini makasangpit na kita sa Dios sa pag-ingon, "Amahan ko!" Makighiusa ang maong Espiritu sa atong espiritu ug magmatuod nga mga anak kita sa Dios. Ug sanglit mga anak na man kita niya, makapanag-iya kita sa mga panalangin nga gitagana sa Dios sa iyang katawhan. Dugang pa niana, mahimo kitang isigkam anununod ni Kristo sa tanan nga gitagana sa Dios kang kaniya; kay kun makig-ambit kita sa iyang mga pag-antos, makaambit usab kita sa iyang himaya.

Mga igsoon, ang Pulong sa Ginoo.

D. Ebanghelyo

Mateo 28:16-20

Ang pagsangyaw sa Maayong Balita sumala ni San Mateo.

Ang napulog-usa ka tinun-an miadto sa Galilea, didto sa bungtod nga paadtoan kanila ni Jesus. Ug sa ilang pagkakita kaniya, gisimba nila siya, bisan tuod may pipila kanila nga nagduhaduha. Miduol si Jesus ug miingon kanila, "Gihatag kanako ang tanang gahum sa langit ug sa yuta. Busa panglakaw kamo ngadto sa tanang katawhan sa tibuok kalibotan ug himoa sila nga akong mga tinun-an, ug bunyagi sila sa ngalan sa Amahan, sa Anak ug sa Espiritu Santo, ug tudloi sila pagtuman sa tanan nga akong gisugo kaninyo. Ug hinumdumi! Ako mag-uban kaninyo sa kanunay hangtud sa kataposan sa kalibutan."

Mga igsoon, ang Maayong Balita sa atong Ginoo.

E. Komentaryo 

Tema: Ikaw, Ako, ug ang Ginoo.

Sa kasamtangan, ang nawong sa kalibutan lisod kaayo ihulagway. Bisan kinsa kanato nalibog sa mga panghitabo nga dili angayan mahitabo. Kini atong nasinati sa nagkadaiyang kalamidad nga miabot nga wala damha o dili gayod kapugngan. Kinsa ba gayod ang makapugong sa tsunami, baha, landslide, ug giyera? Kita adunay kalimbigitan niining mga panghitabo kay kita lumolupyo ibabaw niining kalibutana.

Kadaghanan kanato nawad-an og paglaum. Adunay uban nawad-an og pagsalig sa Ginoo, ilabina kadtong nawad-an og mga hinigugma sa kinabuhi. Nganong ang Ginoo man ang basolon sa mga dili angayang nanghitabo sa atong kinabuhi? Nagkulang ba gayud Siya sa Iyang gisaad kanato nga dili Siya mobiya hangtod sa katapusang takna sa kalibutan?

Dili kita angayan nga mopasangil sa Ginoo. Ang mga kadautan sa kalibutan mao ang bunga sa atong walay pagpakabana sa kinaiyahan ug sa atong isigkaingon. Tinuod, kita tawo lamang. Dili kita hingpit. Apan dili kini maoy igong rason nga kita dili makabuhat og maayo sa atong kaugalingon, sa atong isigkaingon, ug sa kinaiyahan. Matag usa kanato adunay tahas sa pagkapinayalan.

Kining tanan pagsulay lamang. Kini mao ang sukdanan kon unsa kita kalig-on diha sa atong pagsalig ug paglaum sa Ginoo. Ang Ginoo dili maghatag og pagsulay nga dili nato makaya. Sa kanunay siya nagauban kanato. Dili niya kita biyaan. Atong hinumduman sa kanunay nga ang kasakit ug kamatayon sa atong Ginoo maoy nagluwas kanato sa kamatayon. Busa angay lamang nga sa atong mga kasakit ato usab handumon ang kasinatian sa atong manluluwas. Labaw sa tanan, magmalipayon kita tungod kay human sa atong kasakit uban kita kaniya sa kahimayaan.

Ikaw ug ako magtambayayong sa ibabaw niining kalibutan. Magtinabangay kita sa pagbuhat og maayo kay ang matag usa kanato pobre man o datu maghiusa sa atong mga kaakuhan isip mga lumulopyo niining kalibutan. Labaw sa tanan mosalig kita ug molaum sa Ginoo sa bisan unsang mga pagsulay nga modangat sa atong kinabuhi. Ikaw, ako, ug ang Ginoo sa kanunay mag-uban.

Ang kalibutan nagpabiling wala magkahiusa. Bisan pa man niini, ang Ginoo mobag-o sa nawong sa kalibutan. Kini ang Iyang gisaad nga Siya sa kanunay magpabiling uban kanato sa bisan unsang higayon sa atong Kinabuhi.

Giya alang sa Pamalandong:

1. Bisan sa mga nagkadaiyang dagway sa kinabuhi nga atong nasinati, nagpabilin ba ang atong hingpit ug lig-on nga pagtoo sa atong Ginoo?

2. Duna bay mga higayon sa atong kinabuhi nga mibati kita og pagduhaduha sa Dios nga Amahan, Anak ug Espiritu Santo?

F. Katilingbanong Pag-ampo 

Pangulo: Ang Solemnidad sa Santisima Trinidad nagpadayag kanato tulo ka persona sa usa sa ka Dios. Uban sa dakung pagsalig ug pagtoo ato karong ihalad ang atong mga panginahanglan ug mga pag-ampo. Sa matag pangamuyo kita motubag: 

GINOO SA GUGMA DUNGGA KAMI.

1. Alang sa atong Simbahan nga maoy instrumento sa panaghiusa ug gugma mapadayonon unta kining mopaambit sa tibuok kalibutan pinaagi sa mga nagdumala niini, ang Santo Papa, mga Obispo ug kaparian. Mag-ampo kita.

2. Alang sa nagdumala sa atong panggam- hanan moalagad unta sila sa katawhan subay sa panig-ingnan sa pagpangalagad ni Kristo aron ang tanan makapahimulos sa grasya nga gitagana sa Dios sa matag usa. Mag-ampo kita.

3. Alang sa tanang mga nag-antus sa kalisdanan sa kinabuhi nga dili unta sila kawad-an sa paglaum ug pagsalig nga ang Dios kanunay nga nag-atiman kanila. Mag-ampo kita.

4. Alang kanatong tanan nga mapuy-an unta nato ang kamatuoran nga gipadayag sa Balaang Trinidad ug mamahimo kini natong sumbanan sa atong pagpaningkamot sa pag-angkon sa kinabuhing walay katapusan. Mag-ampo kita.

5. Alang sa atong mga mahal sa kinabuhi nga nag-una na kanato ngadto sa laing kalibutan hinaut nga makadayon na sila sa puluy-anan nga gitagana sa mahigugmaong Amahan kanila. Mag- ampo kita.

6. Alang sa atong kaugalingong katuyuan atong i-ampo sa hilum.

Pangulo: Dios sa gugma ug kahiusa, masaligon kami nga Imo nang tubagon ang mga pag-ampo nga among gihalad karon. Sayud kami sa among mga kakulangan diha Kanimo apan sa gihapon mitoo kami nga ang Imong kalooy alang kanamo dili masukod.

Kini among gipangayo pinaagi ni Kristo Imong Bugtong Anak ug among Ginoo uban sa kahiusahan sa Espiritu Santo Dios nga usa hangtud sa kahangturan. Amen.