Dominggo sa Pentekostes

 DOMINGGO SA PENTEKOSTES

A. Unang Basahon

Buhat 2:1-11

Ang pagbasa gikuha gikan basahon sa Buhat sa mga Apostoles.

Sa pag-abot na sa adlaw sa Pentekostes, ang tanang magtotoo nagtigom sa usa ka dapit. Ug sa kalit may dahunog gikan sa langit, sama sa kusog nga huros sa hangin, ug milukop kini sa tibook balay nga ilang gitigoman. Unya nakakita sila'g daw mga dila nga kalayo nga nanugdon diha sa matag usa kanila. Silang tanan napuno sa Espiritu Santo ug misulti sa nagkalainlaing pinulungan sumala sa gipasulti kanila sa Espiritu.

Sa Jerusalem may mga Judeo nga relihiyoso kaayo nga gikan sa nagkalainlaing nasud sa kalibutan. Sa pagkadungog sa mga tawo sa kabanha, nanugok sila ug hilabihan nilang katingala kay ang tagsatagsa ka magtotoo nagsulti man sa tagsatagsa ka pinulungan sa mga namati. Busa sa dakung katingala miingon sila, "Dili ba taga-Galilea man kining mga tawhana? Nganong nakasulti man sila sa atong tagsatagsa ka pinulungan? Dinhi kanato may taga-Partia, Media, Elam, Mesopotamia, Judea, Capadocia, Ponto, Asia, Frigia, Panfilia, Ehipto, ug sa mga dapit sa Libya duol sa Cirene; ang uban kanato taga-Roma nga mga Judeo ug dili Judeo nga nakabig sa tinuohan sa mga Judeo; ug may pipila pa kanato nga taga-Creta ug Arabia - apan bisan pa niini, kitang tanan nakadungog kanila nga nagsulti sa atong tagsatagsa ka pinulungan mahitungod sa katingalahang butang nga gibuhat sa Dios."

Mga igsoon, ang pulong sa Ginoo.

B. Salmo Responsoryo

Salmo 104:1,24,29-30,31,34

Tubag (R) - Ginoo, ipadala ang imong Espiritu, ug bag-oha ang nawong sa yuta.

Dayga ang Ginoo, kalag ko! O Ginoo, akong Dios, daku gayud ikaw! Gisul-oban ikaw sa kahalangdon ug himaya, gibistihan diha sa kahayag ingon og usa ka kapa. (R)

Pagkadaghan sa imong mga buhat, O Ginoo! Diha sa kaalam gibuhat mo silang tanan, puno ang yuta sa imong mga binuhat; Dayga ang Ginoo, O kalag ko! (R)

Ang tanang mga binuhat nagapaabot kanimo nga imo silang hatagan og pagkaon sa igong panahon. Sa imong paghatag kanila niini, nagatigom sila; sa imong pagbukhad sa imong kamot, nabuhong sila sa mga maayong butang. (R)

Kun imong kuhaon ang ilang gininhawa, mangamatay sila ug mobalik ngadto sa abog. Sa imong pagpadala sa imong Espiritu, magama sila, ug mabag-o nimo ang nawong sa yuta. (R)

C. Ikaduhang Basahon

1 Corinto 12:3-7,12-13

Ang pagbasa gikuha gikan sa unang sulat ni San Pablo ngadto sa mga taga-Corinto.

Walay makasulti nga si Jesus mao ang Ginoo, gawas kun mandoan siya sa Espiritu Santo.

May mga nagkalainlaing hiyas nga espirituhanon, apan mao rang espirituha ang naghatag niini. May nagkalainlaing paagi sa pag-alagad, apan mao rang Ginooha ang gialagaran. May nagkalainlaing katakus sa pag- alagad, apan usa ra ka Dios ang naghatag og katakus sa tagsatagsa alang sa tanang pag-alagad. Ang matag usa gihatagan og pipila ka ilhanan sa presensiya sa Espiritu alang sa kaayohan sa tanan.

Kay si Kristo sama sa usa ka lawas nga may daghang bahin apan usa ra ka lawas bisan kun nagkalainlain ang mga bahin niini. Sa samang pagkaagi, kitang tanan, mga Judeo ug dili mga Judeo, mga ulipon ug dili ulipon, gibunyagan diha sa usa ra ka lawas, pinaagi sa mao gihapong Espiritu, ug gipainom kitang tanan sa usa ka Espiritu.

Mga igsoon, ang pulong sa Ginoo.

D. SEKWENSIYA

Umari ka, O Espiritu Santo, ug ibanwag ang langitnong silaw sa imong kahayag. Amahan sa mga kabus, tighatag sa mga gasa, sa mga kasingkasing masiga nga kahayag. Ikaw mao ang maglilipay nga labing hingpit, sa kalag kalan-ong tam-is. Binating dinapit pahuluyanan ka dinhi sa tanang kahago. Sa kainit tigbugnaw, sa kagul-anan tiglipay.

O bulahang kahayag, pun-a ang kasingkasing sa imong katawhan nga nagatoo kanimo. Kun ang tawo wala sa imong grasya, kawad-an siya'g kaputli, mawala siyay bili. Hugasi ang mahugaw, ug ang mamala bisbisi, ug unya ang tanang nasamdan tambali. Ang nahisalaag tultoli, ang gahi humoka, ug ang nagmabugnawon nga kalag inita.

Ihatag sa nagatoo kanimo ang pito ka gasa nga sagrado. Gantihi sila tungod sa mga buhat nga maayo. Hatagi sila sa kamatayon aron masiguro ang ilang kaluwasan. Igasa kanila ang langitnong kabulahanan nga nagalungtad hangtud gayud sa kahangturan. Amen. Alleluya.

E. Ebanghelyo

Juan 20:19-23

Ang pagsangyaw sa Maayong Balita sumala ni San Juan.

Sa pagkagabii na niadtong Dominggoha, nagtigom ang mga tinun-an didto sa lawak ug gitrangkahan nila ang pultahan kay nahadlok man sila sa mga kadagkoan sa mga Judeo. Unya mitungha si Jesus sa ilang taliwala ug miingon, "Mainyo unta ang kalinaw." Human siya makasulti niini, gipakita niya kanila ang iyang mga kamot ug ang iyang kilid. Nalipay pag-ayo ang mga tinun-an sa ilang pagkakita kang Jesus. Unya si Jesus miingon kanila pag-usab. "Mainyo unta ang kalinaw. Ingon nga ako gipadala sa Amahan, ako usab magpadala kaninyo." Gisulti niya kini kanila ug unya gihuypan niya sila ug giingnan, "Dawata ninyo ang Espiritu Santo. Kun pasayloon ninyo ang mga sala sa mga tawo, gipasaylo kini; kun ang ilang mga sala dili ninyo pasayloon, dili usab kini pasayloon."

Mga igsoon, ang Maayong Balita sa atong Ginoo.

F. Komentaryo

Tema: Padilaaba ang mga Gasa sa Espiritu Santo.

Adunay panahon sa atong kinabuhi nga makasinati kita og panagbulag nga daw dili lalim ug lisod gayod dawaton. Pananglitan kung namatyan kita sa usa sa miyembro sa pamilya o kaha, panagbulag sa relasyon tali sa magtiayon o manag-uyab nga dugay nang nag-uban. Kung kini mahitabo, nga daw muondang na pagtuyok ang kalibutan tungod kay nawad-an na og gana ug paglaum diha sa pagpadayon sa unahan. Lisod pagpuyo sa kinabuhi kung mawala na sa kiliran ang pinakamahinungdanong tawo nga maoy naghatag og inspirasyon aron maningkamot sa pagpakabuhi dinhi sa kalibutan.

Mao usab kini ang gibati sa napulog-usa ka mga apostoles, sa dihang miingon si Kristo nga mobalik na Siya sa gingharian sa Iyang Amahan. Gibati nila ang kahadlok, pagduha-duha, kaguol ug kamingaw tungod kay mawala naman ang Ginoo sa ilang taliwala. Nasayod gayud Siya sa tanan nilang kahingawa busa mipasalig Siya diha sa pag-ingon nga Iyang ihatag kanila ang laing Manlalaban, nga maoy maglig-on kanila diha sa pagbarog ug pagsaksi sa kamatuoran.

Ug wala gayud gipakyas ni Jesus ang Iyang saad kanila, ug mao kini ang maayong balita nga atong nadungog karon diha sa atong mga pagbasa. Sulod sa balay, mikunsad sa mga apostoles ug kang Maria ang Espiritu Santo nga daw dila, ug daw kalayong napikaspikas. Ug diha-diha, nadawat nila ang mga gasa sa Espiritu Santo ug misugod dayon silag sulti og lain-laing pinulungan. Ug mao kini ang adlaw sa Pentekostes nga nakapausab gayud sa kinabuhi sa mga apostoles. Ang daang kinabuhi nga puno sa kabalaka ug pagduha-duha, nausab kini diha sa kinabuhi nga maisogon ug puno sa paglaum sa pagsangyaw sa ngalan ni Kristo. Wala na sila nagtago-tago tungod sa kahadlok sa mga igsoong Judeyo, hinonoa, maisogon silang nagsangyaw sa bag-ong pagtuo diha sa nabanhawng Ginoo. Busa, gidawat ni San Esteban ug sa unang mga Kristiyano ang kamatayon aron lang sa pagmantala ug pagsaksi sa bag-ong pagtuo. Ang Espiritu Santo mao gayod ang naghatag kanila og kusog ug kaisog aron mahimo nila ang misyon nga gisangon ni Kristo, "Ingon nga ako gipadala sa Amahan, ako usab nagpadala kaninyo sa pagsangyaw sa maayong balita". Kini gayud nagpamatuod nga dili kita pasagdan sa atong Ginoong Jesus, tungod kay Siya maga-uban kanato sa tanang panahon. Ug tungod niini, nagpadayon gihapong naglawig ang atong simbahan bisan pa sa mga hulga ug problema nga muabot kaniya.

Diha sa atong bunyag ug pagdawat sa sakramento sa Kompirma, ato usab nadawat ang Espiritu Santo sama sa mga apostoles. Ug tungod niini, nahimo kitang mga Kristiyanos, mga sumusunod ni Kristo ug mga sinagop nga anak sa Dios. Apan, subo sud-ongon nga wala nato napadilaab ang mga gasa sa Espiritu Santo diha sa atong kinabuhi. Tungod sa garbo ug personal nga interes, atong gihunahuna lamang ang atong kaugalingon ug nagpakabuta-bungol mga panginahanglanon sa uban. Diha sa sa kinabuhi, mas pilion pa nato nga dauton ang kita sa dungog sa atong igsoon aron lang kita mosikat ug kompetisyon dili malabwan. Lisod na sa uban ang pagpaminaw sa konsiyensya, hinonoa mas hunghong sa panulay diha sa pagbuhat na ang pagpaminaw ug pagsunod gipaminaw pa nato ang simbahan nga protektahan ang kadalaa mga kinabuhi ug pamilya tungod kay mas gipili pa ang kalibutanong gusto ug tinguha. Makapangutana kita: nganong nahimo kini sa tawo taliwala nga gibuhat man siya sama sa panagway sa Dios? Ang tubag niini mao nga nakalimot na ang tawo sa pagpangayo sa lamdag sa Espiritu Santo. Nawala na kaniya ang pagbaton ug kahilom sa iyang kaugalingon aron makapamalandong sa mga butang nga nahitabo sa iyang palibot.

Mga igsoon, madunggan lamang nato ang tingog sa Dios diha sa kahilom ug diha usab sa atong mga pag-ampo. Kay diha sa kahilom, masinati nato ang kalinaw aron madunggan nato ang atong konsyensya nga maoy magagiya kanato sa paghimo og maayong plano ug desisyon sa kinabuhi subay sa kabubut-on sa Dios. Tungod niana, maisogon kitang mosaksi sa kamatuoran ug mobarog sa atong pagtoo nga unang gisangyaw sa mga apostoles ug gipadayon sa atong simbahan karon.

Busa, dili gayud nato hikalimtan ang Espiritu Santo diha sa atong inadlaw-adlaw nga buluhaton. Siya ang presensya ni Jesus nga maghatag kanato og kusog sa pagsangyaw, giya sa matarong nga dalan, panalipod batok sa mga dautan ug inspirasyon sa pagsunod sa kabubut-on sa Iyang Amahan. Siya mao ang mahinungdanong gasa sa Dios kanato aron mamahimo kitang mga sinagop nga mga anak ug motawag sa Dios nga atong Amahan. Hinaut pa unta nga lamdagan kita sa Espiritu Santo sa kanunay. Amen.

Giya alang sa Pamalandong:

1. Giunsa man nato pagpuyo ang gasa sa Espiritu Santo nga atong nadawat?

2. Gipaminaw ba nato ang tingog sa atong konsensya sa pagbuhat og maayo kay sa pagbuhat og dautan?

G. Katilingbanong Pag-ampo

Pangulo: Puno sa dakung pagsalig, hiniusa natong ihalad sa Amahan ang atong mga pag-ampo ug panginahanglan uban sa lamdag sa Espiritu Santo.

Sa matag pangamuyo kita motubag:

DIOS SA GUGMA, DUNGGA KAMI.

1. Nga ang tanang nagdumala sa Simbahan ang Santo Papa, mga Obispo ug kaparian, uban sa lamdag ug giya sa Espiritu Santo mahimo silang matuod nga saksi sa mensahe sa Ebanghelyo nga ilang gisangyaw sa tanang katawhan. Mag- ampo kita.

2. Nga ang nangulo sa nasud mag-agad unta kanunay sa lamdag sa Espiritu Santo aron mahisubay kanunay ang ilang pagpangalagad sa Kristohanong mithi alang sa kabulahanan sa tanang katawhan. Mag-ampo kita.

3. Nga ang matag pamilya uban sa lamdag sa Espiritu Santo magbaton unta og hingpit nga pagtoo sa Dios aron mahimong lig- on ug Kristohanon ang ilang pagkinabuhi matag adlaw. Mag-ampo kita.

4. Nga ang atong mga kaigsoonan nga nagmasakiton, molaum nga ang Balaang Espiritu maoy maggiya ug maglamdag kanila nga ilang maangkon ang matuod nga kahupayan nga ilang giantus. Mag- ampo kita.

5. Nga kitang nagkatigum karon, magmalig- on sa atong pagtoo nga ang Espiritu Santo kanunay nga maglamdag ug maggiya kanato nga mabatukan ug malikayan nato ang mga pagsulay nga kanunay naghulga kanato diha sa atong pagpanaw niining kalibutan sa mga buhi. Mag-ampo kita.

6. Nga ang atong kaugalingon nga katuyuan ato kining ihalad sa Dios diha sa kahilum.

Pangulo: Makagagahum nga Amahán, dungga ang pag-ampo sa Imong mga anak nga gipadayag karon. Tabangi kami nga diha sa among pagkinabuhi sa matag adlaw mosalig kami nga ang tanang grasya ug kaayohan nagagikan gayud Kanimo pinaagi ni Jesukristo Imong Bugtong Anak ug among Ginoo. Amen.