IKAUNOM NGA DOMINGGO SA PAGKABANHAW

IKAUNOM NGA DOMINGGO SA PAGKABANHAW

A. Unang Basahon
Buhat 10:25-26,34-35,44-48

Ang pagbasa gikuha gikan sa Mga Buhat sa mga Apostoles.

Sa dihang mosulod na unta si Pedro sa balay, gisugat siya ni Cornelio, ug mihapa si Cornelio sa iyang tiilan ug misimba kaniya. Apan gitabangan siya pagpatindog ni Pedro ug giingnan, “Tindog, ayaw ako'g simbaha kay tawo lamang ako."

Si Pedro miingon, karon naila ko na nga ang Dios walay pinalabi. Ang mahadlokon kaniya ug nagbuhat sa matarong iyang dawaton sa walay pagsapayan sa bulok sa iyang panit.

Samtang nagsulti pa si Pedro, mikunsad ang Espiritu Santo kanilang tanan nga namati sa mensahe. Ang mga magtutuo nga Judio nga taga-Jope nga kuyog ni Pedro natingala nga ang Dios nagbubo usab sa iyang gasa nga mao ang Espiritu Santo ngadto sa mga dili Judio. Kay nakadungog sila sa mga dili Judio nga nagsulti sa laing mga pinulongan ug nagdayeg sa pagkagamhanan sa Dios. Si Pedro miingon, "Kining mga tawhana nakadawat sa Espiritu Santo, ingon nga kami nakadawat usab. Duna ba kaninyoy makapugong nga bunyagan sila pinaagi sa tubig?" Busa misugo siya nga bunyagan sila sa ngalan ni Jesukristo. Unya gihangyo nila siya nga magpabilin uban kanila sulod sa pipila ka adlaw.

Mga igsoon, ang Pulong sa Ginoo.

B. Salmo Responsoryo

Salmo 98:1,2-3,3-4

Tubag (R)-Gipadayag sa Ginoo ang iyang makaluwasnong gahum diha sa mga kanasuran.

Awiti ang Ginoo og bag-ong awit, kay naghimo siya og katingalanghang mga buhat; ang iyang tuong kamut nakakab-ut og kadaugan alang kaniya, ang iyang balaan nga bukton. (R)

Ang Ginoo nagpadayag sa iyang kaluwasan; sa atubangan sa kanasuran iyang gipadayag ang iyang katarong. Nahinumdum siya sa iyang kalooy ug sa iyang kamatinumanon alang sa balay ni Israel. (R)

Ang tanang kautlanan sa yuta nakakita sa kaluwasan nga gihimo sa akong Dios. Awiti nga malipayon ang Ginoo, kamong tanang kayutaan; singgit kamo sa pag-awit; pag-awit kamo'g pagdayeg. (R)

C. Ikaduhang Basahon

1 Juan 4:7-10

Ang pagbasa gikuha gikan sa unang sulat ni San Juan.

Mga igsoon, maghigugmaay kita kay ang gugma nagagikan sa Dios. Ang nahigugma sa lyang isigkatawo anak sa Dios ug nakaila sa Dios. Ang wala mahigugma sa iyang isigkatawo wala man makaila sa Dios, kay ang Dios gugma man. Gipadayag sa Dios ang iyang gugma kanato pinaagi sa pagpadala sa iyang bugtong Anak nganhi sa kalibutan, aron makabaton kita sa kinabuhing walay katapusan pinaagi kaniya. Ang matuod nga gugma mao kini: dili kita maoy unang nahigugma sa Dios, kondili siya maoy unang nahigugma kanato, ug gipadala niya ang lyang Anak aron pinaagi kaniya mapasaylo ang atong mga sala.

Mga igsoon, ang Pulong sa Ginoo.

D. Ebanghelyo

Juan 15:9-17

Ang pagsangyaw sa Maayong Balita sumala ni San Juan.

Si Jesus miingon sa iyang mga tinun-an, "Nahigugma ako kaninyo ingon nga ang Amahan nahigugma kanako; pabilin kamo sa akong gugma. Kun tumanon ninyo ang akong mga sugo magpabilin kamo sa akong gugma ingon nga ako nagtuman sa mga sugo sa akong Amahan ug nagpabilin sa iyang gugma."

"Gisultihan ko kamo niini aron maangkon ninyo ang akong kalipay ug mahingpit ang inyong kalipay. Kini mao ang akong sugo: paghigugmaay kamo ingon nga ako nahigugma kaninyo. Ang labing dakung gugma mga ikahatag sa usa ka tawo ngadto sa iyang mga higala mao ang pagpakamatay alang kanila. Kamo akong mga higala kun buhaton ninyo ang akong gisugo kaninyo. Dili ko na kamo tawgon nga mga sulugoon, kay ang sulugoon dili makahibalo sa gibuhat sa iyang agalon. Hinonoa, tawgon ko kamo nga akong mga higala kay gisultihan ko man kamo sa tanan nga akong nadungog gikan sa Amahan. Dili kamo maoy nagpili kanako; ako ang nagpili kaninyo, ug gipili ko kamo aron manglakaw ug mamunga'g daghan - mga bunga nga molungtad. Busa, ihatag kaninyo sa Amahan bisa'g unsay inyong pangayoon kaniya sa akong ngalan. Kini mao ang isugo ko kaninyo: paghigugmaay kamo."

Mga igsoon, ang Maayong Balita sa atong Ginoo.

E. Komentaryo 

Tema: "Paghigugmaay Kamo!"

Karong adlawa mao ang ikaunom nga Dominggo gikan sa pagkabanhaw sa atong Ginoonga si Jesukristo. Diha sa atong Ebanghelyo gipahinumduman kita ug gihatagan sa mando diin ang matag usa kanato giawhag sa paghigugma sa atong isigkaingon. Sama sa paghigugma sa Dios kanato, Iyang gipakita kini pinaagi sa Iyang pagpalansang sa krus aron kita makadawat sa kaluwasan.

Kung kita nagatoo sa Dios, ato kining mabati pinaagi sa atong binuhatan. Kay ang balaang kasulatan nag-ingon nga ang pagtoo kung walay buhat patay. Sama usab sa atong Ebanghelyo karon, kita gi-awhag sa Dios sa paghigugma sa uban. Kini isip pagpadayag nga kita nahigugma gayud Kaniya.

Si Jesukristo sa dinhi pa Siya sa kalibutan, Iyang gipakita ang Iyang gugma kanato pinaagi sa mga paghimo og mga milagro, giayo Niya ang mga masakiton ug kadtong mga nayawaan. Ang Iyang gugma gipadayag sa konkreto nga pamaagi, sa dihang siya gilansang sa krus ug namatay alang lamang sa atong kaluwasan.

Kita, dili na angay magpalansang sa krus aron lamang ipakita nga nagatoo kita ug Dios. Kondili, ipakita nato kini pinaagi sa atong pagdawat sa atong isigkaingon; pag-amoma ug pagtabang kanila, dili lamang sa materyal nga butang, kondili usab sa espirituhanon. Daghan karon sa atong mga katilingban nga naglisod, gihikawan sa hustisya, gibugalbugalan, gipanghimaraot ug gipanamastamasan. Kutob lamang ba kita sa pagtan-aw kanila ug sa pag-ingon og kalooy?

Ang matuod nga pagtoo sa Dios nagdala kini og buhat. Buhat diin atong ikapadayag ang atong pagtoo Kaniya. Tungod kay ang pagtoo sa Dios dili lamang kutob sa pagsimba ug pag-ampo Kaniya diha sa balay alampoanan o simbahan. Kini naglangkob usab sa atong binuhatan diha sa atong pamilya, isigkaingon ug sa atong katilingban. Ang Dios atong masinati diha sa atong pagbuhat og maayo sa atong isigkatawo. Tungod kay mabati nato ang presensya sa Dios diha sa atong pagpakiglambigit diha sa atong katilingban.

Busa, usa ka hagit alang kanato ang pagpadayag sa atong gugma ug pagtoo sa Dios diha sa atong pamilya ug katilingban. Ilabina sa nagkinahanglan natong mga igsoon. Ang atong pagtabang kanila sa ginagmay o dako nga paagi makahatag og kaayo dili lamang sa ila ug sa atong kaugalingon kondili nagpadayag kini nga ang gugma ni Kristo dinhi kanato atong gipaambit sa uban. Ug tungod niini atong himayaon ang Dios sa Iyang paghatag kanato sa iyang grasya nga mao ang tulay aron adunay kalinaw ug pagtinabangay sa usag usa.

Ang pangutana karon mao nga nakita ba nato sa uban ang presensya sa Dios diha sa atong binuhatan? Makaingon ba kaha ang atong isigkaingon nga nakita nila ang gugma sa Dios tungod sa atong taras ug maayong binuhatan samtang kita nakig-uban kanila? Ikaw, kabahin ba sa gugma sa Dios nga imong gipaambit sa uban pinaagi sa imong binuhatan? Hinaut pa unta.

F. Katilingbanong Pag-ampo 

Pangulo: Sa dakung pagsalig, ato karong ipadangat sa atong Langitnong Amahan ang atong mga pag-ampo ug panginahanglan. Sa matag pag-ampo kita motubag: GINOO, DUNGGA ANG IMONG KATAWHAN.

1. Amahan, hiusaha ang Simbahan sa Imong gugma, panalangini ang nagdumala niini ang among Santo Papa, mga Obispo ug kaparian nga ilang isangyaw sa tanang katawhan ang Imong walay tupong ug kinutuban nga gugma. Mag-ampo-kita.

2. Amahan, paamgoha ang katawhan sa Imong dakung gugma ilabina niadtong nangulo sa tanang kanasuran nga hatagan unta nila og dakung bili ang pagserbisyo sa katawhan ilabina sa hinanaling nanginahanglan. Mag-ampo kita.

3. Amahan, hatagi og kalig-on ug kadasig ang among mga kaigsoonan nga mihalad sa ilang kaugalingon nga mahimong usa ka pari ug relihiyoso tungod ug alang sa pagmantala sa Imong Gingharian. Mag- ampo kita.

4. Amahan, panalangini usab ang among mga kaigsoonan nga nag-antus sa kawad-on nga bisan sa ilang nasinati ug nahiaguman, sa gihapon magpabilin nga lig-on ang ilang pagtoo ug pagsalig Kanimo nga maoy bugtong makahatag og kahupayan sa tanang mga kalisdanan sa kinabuhi. Mag-ampo kita.

5. Amahan, dawata na diha sa Imong Gingharian ang among mga mahal sa kinabuhi nga nag-una na kanamo ngadto sa laing kalibutan nga makasulod na sila sa lawak nga Imong gitagana kanila nga pahulayang dayon. Mag-ampo kita.

6. Amahan, diha sa kahilum among ipadayag Kanimo ang among kaugalingon nga katuyuan.

Pangulo: Makagagahum nga Dios, nasayud kami sa Imong walay puas nga paghigugma kanamo. Itugot nga amo nang madawat ang grasya nga Imong gitagana kanamo agi og tubag sa mga pag-ampo nga among gihalad karon diha Kanimo pinaagi ni Kristo Imong Bugtong Anak uban sa Espiritu Santo, Dios nga usa hangtud sa kahangturan. Amen.