LENTEN RECOLLECTION

IKATULO NGA DOMINGGO SA PAGKABANHAW

A. Unang Basahon

Buhat 3:13-15,17-19

Ang pagbasa gikuha gikan sa mga Buhat sa Apostoles.

Si Pedro miingon sa katawhan, “Ang Dios ni Abraham, ni Isaac ug ni Jacob, ang Dios sa atong mga katigulangan, nagpagsidungog sa iyang Sulugoon nga si Jesus. Apan inyo siyang gitugyan sa kagamhanan, ug sa atubangan ni Pilato inyo siyang gisalikway bisan kon si Pilato nakahukom nga buhian siya. Siya ang Balaan ug ang Matarong, apan wala ninyo siya dawata ug inyo hinoong gihangyo si Pilato nga maoy iyang buhian ang usa  ka mamumuno ug tulisan. Ug gipatay ninyo ang Tinubdan sa kinabuhi. Apan gibanhaw siya sa Dios ug kamo mga saksi niini."

Ug karon, mga kaigsoonan, nahibalo ako nga wala kamo masayud sa gibuhat ninyo ug sa inyong mga pangulo batok kang Jesus. Dugay na kaayong gipahibalo sa Dios pinaagi sa tanan niyang mga propeta nga  kinahanglang mag-antos ang Mesiyas; ug gituman kini sa Dios niining paagiha. Busa paghinulsol kamo ug balik sa Dios aron papason niya ang inyong mga sala.

Mga igsoon, ang Pulong sa Ginoo.

B. Salmo Responsoryo

Salmo 4:2-4,7-8,9

Tubag (R) - Ginoo, ipadan-ag kanamo ang imong nawong.

Sa akong pagsangpit, tubaga ako, O Dios nga matarong, ikaw nga naghupay kanako sa akong kagul-anan; kaloy-i ako, ug pamati-a ang akong pag-ampo. (R)

Hibalo-i nga ang Ginoo nagabuhat og katingalahan alang sa nagtoo kaniya: ang Ginoo mamati kanako sa akong pagtawag kaniya. (R)

O Ginoo, ipadan-ag kanamo ang imong nawong. Gihatagan mo'g kalipay ang among kasingkasing. (R)

Sa akong paghigda, nakatulog dayon ako nga malinawon, kay ikaw lamang, O Ginoo, nagdala og kasigurohan sa akong puloy-anan. (R)

C. Ikaduhang Basahon

1 Juan 2:1-5

Ang pagbasa gikuha gikan sa unang sulat ni San Juan.

Mga anak, gisulatan ko kamo niini aron dili na kamo magpakasala. Apan kon may makasala, kita may manlalaban nga si Jesukristo, ang matarong, nga maoy mangatubang sa Amahan. Ug si Kristo mismo mao ang halad aron mapasaylo ang atong mga sala, ug dili kay ang ato ra, kondili ang mga sala usab sa tanang tawo.

Kon tumanon nato ang mga sugo sa Dios, mapaniguro nato nga nakaila kita kaniya. Kon may moingon, "Nakaila ako sa Dios," apan wala magtuman sa iyang gisugo, bakakon kanang tawhana ug wala kaniya ang kamatuoran. Apan ang nagtuman sa iyang sugo maoy may hingpit nga paghigugma sa Dios.

Ang Pulong sa Ginoo.

D. Ebanghelyo

Lucas 24:35-48

Ang pagsangyaw sa Maayong Balita sumala ni San Lucas.

Unya gisaysay sa duha ka mga tinun-an ang nahitabo didto sa dalan, ug nga nakaila sila sa Ginoo sa iyang pagpikaspikas sa pan.

Samtang nagsugilon pa sila niini, sa kalit mibarog ang Ginoo sa taliwala nila ug miingon, "Ang kalinaw mag-uban kaninyo."

Nakurat sila ug nalisang, ug naghunahuna nga nakakita sila'g espiritu. Apan miingon siya kanila, "Nganong nabalaka man kamo? Nganong nagduhaduha kamo? Tan-awa ninyo ang akong mga kamot ug tiil; Ako gayud kini! Hikapa ako ug makita ninyo kay ang espiritu walay unod ug mga bukog ingon sa nakita ninyo nga ania kanako."

Gisulti niya kini ug iyang gipakita kanila ang iyang mga kamot ug mga tiil. Apan wala gihapon sila makatuo; hilabihan ang ilang kalipay ug kahibulong; busa gipangutana sila ni Jesus, "Duna ba kamoy makaon dinhi?" Ug gihatagan nila siya'g usa ka buok sinugbang isda, ug gidawat kini ni Jesus ug gikaon sa ilang atubangan.

Unya miingon siya kanila, "Kining mga butanga mao gayud ang akong gisuti kaninyo samtang ako uban pa kaninyo; kinahanglan matuman ang tanan nga nahisulat mahitungod kanako diha sa Balaod ni Moises ug sa mga sinulat sa mga propeta ingon man sa mga Salmo."

Unya gipasabot niya sila sa Kasulatan, ug miingon siya kanila, "Kini mao ang nahisulat: nga ang Mesiyas kinahanglan mag-antos ug unya mabanhaw sa ikatulong adlaw, ug nga sa iyang ngalan ang mensahe mahitungod sa paghinulsol ug sa pagpasaylo sa mga sala kinahanglan isangyaw ngadto sa tanang mga nasud, sugod sa Jerusalem. Kamo mga saksi niining mga butanga.

Ang Maayong Balita sa atong Ginoo.

E. Komentaryo 

Tema: Handumanan diha sa Yukaristiya

Nindot handumon ang mga kagahapon ilabina kung kini adunay dakong kalambigitan sa nanghitabo kanato karon. Kini makapabag-o sa atong hunahuna, pagbati ug magdala sa bag-ong kinabuhi.

Si Jesus miingon ngadto sa mga nangahadlok nga mga tinun-an, "Duna ba kamoy makaon dinhi?" Sila mihatag Kaniya og isda; gidawat kini Niya ug mikaon atubangan sa mga tinun-an. Sa laing teksto (Lk. 24:30), si Jesus mipikas sa pan uban sa Iyang duha ka tinun-an didto sa Emmaus, ug sa Juan 21:12, si Jesus nagsugba og isda ug nagdapit sa Iyang mga tinun-an, "Dali ug pangaon kamo!"

Ang pag-inambitay diha sa pagkaon usa ka handumanan uban kang Jesus. Diha sa iyang ministriya, si Jesus nailhan diha sa pagpakig-ambit uban sa pagpangaon. Iyang gitandi ang Gingharian sa Dios sa usa ka kumbira sa kasal. Iyang gibuhat ang iyang unang milagro sa Cana, ang pagbuhat sa tubig ngadto sa lamian nga bino, aron pagluwas sa dungog sa mga kinasal. Iya usab nga gipadaghan ang pan ug ang isda aron sa pagpakaon sa nilibo ka mga tawo. Niambit siya sa pagkaon diha sa balay sa usa ka Pariseo, ug usab ngadto sa mga sinalikway ug mga makasasala.

Kini nga mga kasinatian diha kang Jesus usa ka handumanan nga mahimong makapabag-o sa pagbati ug hunahuna sa mga tinun-an. Gikan sa kahadlok ngadto sa pagkamadasigon. Gikan sa pagkasarado sa kaugalingon ngadto sa pagkaabli alang sa uban. Nahimo kini nga ilhanan sa pag-ila sa nabanhaw'ng Jesus. Sa Emmaus duha ka tinun-an nakaila kaniya, diha sa talad kan-anan sa Iyang pagpikaspikas sa pan ug paghatag niini kanila. Sa baybayon sa Tiberias İyang gidapit ang mga tinun-an sa pagpangaon, sila nakaamgo ug nakaila Kaniya.

Sa atong Ebanghelyo karong Dominggoha, ang mga tinun-an nagpabilin sa ilang pagduhaduha human sa pagpadayag sa nabanhaw'ng Jesus ug pagpakita kanila sa mga samad sa Iyang mga kamot ug mga tiil. Hinuon nangayo Siya kanila og makaon. Ug naabli ni Jesus ang ilang mga hunahuna.

Diha sa Santos nga Misa nga atong gisaulog, kita nagkahiusa nga naghandum sa misteryo ni Kristo, nagsaulog pinaagi sa usa ka kasaulogan nga gipangulohan sa pari ang "Alter Christus" nga nagpadayag sa talad sa Dios ngadto sa langit. Karon giambitan nato ang pagkaon ug kasinatian ug presensya sa nabanhaw'ng Jesus nga magdala kanato ngadto sa pagkahiniusang katilingban sa Dios. Ang nabanhaw'ng Jesus naglig-on kanato diha sa makanunayon natong pagdawat sa iyang lawas ug dugo diha sa Santos nga Yukaristiya. Miambit kita sa Iyang talad kan-anan nga madagayaon nga maoy nakapabuka sa atong mga mata ug nakaamgo kita sa tahas sa pagpakig-ambit ngadto sa uban sa pagbag-o ug pagdawat sa kapasayloan sa Dios diha sa atong tagsa tagsa ka kinabuhi.

Giya alang sa Pamalandong:

1. Gihatagan ba nato og bili ang Yukaristiya isip buhing handumanan sa gugma sa Dios kanato?

2. Giunsa man nato kini pagdawat diha sa atong kinabuhi?

F. Pangaliya sa Katilingban

Pangulo: Mag-ampo kita sa atong Langitnong Amahan kinsa puno sa kaaghop alang kanatong Iyang mga anak. Sa tumang pagsalig atong ihalad Kaniya ang atong mga pag-ampo ug panginahanglan. Sa matag pag-ampo kita motubag: GINOO, DUNGGA ANG IMONG KATAWHAN.

1. Alang sa kinatibuk-ang Simbahan ilabina sa nagdumala niini ang Santo Papa, mga Obispo ug kaparian, matinud-anon unta nilang puy-an ang mga mensahe sa Maayong Balita sa kaluwasan. Mag-ampo kita.

2. Alang sa mga tinugyanan sa atong nasud, ila untang hatagan og dakung pagpakabana ang tawag sa Dios sa kaangayan ug paghigugma sa usag usa aron maangkon ang gitinguha nga kauswagan, kalinaw ug kahiusahan sa tanan. Mag-ampo kita.

3. Alang sa matag Kristohanong katilingban, magpatalinghog unta sila sa tawag sa Dios nga mahiusa kanunay Kaniya diha sa makanunayon nga pagpakiglambigit sa espirituhanong kalihukan ilabina sa Kasaulogan sa Pulong ug Santos nga Misa. Mag-ampo kita.

4. Alang sa tanang magtiayon, magmatinud- anon unta nilang puy-an ang ilang. kaakuhan sa usag usa subay sa kabubut- on sa Dios alang sa hapsay ug malinawon nga pagpuyo. Mag-ampo kita.

5. Alang sa matag usa kanato, makighiusa unta kita kanunay ni Kristo diha sa paghatag nato og dakung bili sa Iyang talad sa gugma ang Santos nga Yukaristiya. Mag-ampo kita.

6. Alang sa atong personal nga katuyuan ato kining ihalad diha sa kahilum.

Pangulo: Mahigugmaong Amahan, itugot nga ang nabanhaw Nimong Anak nga si Kristo magpuyo dinhi kanamo aron maoy magdasig sa matag usa kanamo sa pagkinabuhi subay sa Imong kabubut-on. Dungga ang mga pangamuyo nga among gihalad Kanimo ug himoa nga mahiusa kami kanunay Kanimo pinaagi ni Kristo among Ginoo ug Manunubos hangtud sa kahangturan. Amen.