IKALIMANG DOMINGGO SA PAGKABANHAW

IKALIMANG DOMINGGO SA PAGKABANHAW

A. Unang Basahon

Buhat 9:26-31

Ang pagbasa gikuha gikan sa mga Buhat sa mga Apostoles

Miadto si Saulo sa Jerusalem ug misulay siya pagpakig-uban ug pagpakigtipon sa mga tinun-an. Apan wala sila motuo nga usa na siya ka tinun-an, busa nangahadlok silang tanan kaniya. Unya gitabangan siya ni Bernabe ug gidala ngadto sa mga apostoles. Gisaysayan sila ni Bernabe mahitungod sa pagkakita ni Saulo sa Ginoo didto sa dalan. lya usab silang gisuginlan sa kaisog ni Saulo pagwali sa ngalan ni Jesus didto sa Damasco. Busa mitipon si Saulo kanila ug misuroy siya sa tibuok Jerusalem, nga maisogong nagwali sa ngalan sa Ginoo. Nakigsulti ug nakiglantugi usab siya sa mga Judio nga Griego og pinulongan, apan nangita sila'g paagi sa pagpatay kaniya. Sa pagkasayud niini sa mga kaigsoonan, gidala nila si Saulo ngadto sa Cesarea ug gipaadto sa Tarso.

Ug mao nga ang simbahan sa tibook Judea ug sa Galilea ug sa Samaria nakabaton og kalinaw. Nalig-on ang simbahan ug midaghan pinaagi sa panabang sa Espiritu Santo, ug nagkinabuhi sila nga mahadlokon sa Ginoo.

Mga igsoon, ang Pulong sa Ginoo.

B. Salmo Responsoryo

Salmo 22:26-27,28-30,31-32

Tubag (R) - Dayegon ko ikaw, Ginoo, diha sa pundok sa imong katawhan.

Tumanon ko ang akong mga panaad atubangan kanila nga mahadlokon sa Ginoo. Ang mapaubsanon mokaon hangtud mabusog; sila nga nangita sa Ginoo magdayeg kaniya. "Magsadya unta kanunay ang inyong mga kasingkasing." (R)

Ang tanang kautlanan sa yuta mahinumdom ug modangop sa Ginoo; ang tanang kabanayan sa mga nasud mohapa sa iyang atubangan. Kaniya lamang mohapa ang tanan nga nangamatay dinhi sa yuta; atubangan niya moduko ang tanan nga molusad ngadto sa abog. (R)

Ug ngadto kaniya mabuhi ang akong kalag; ang akong mga anak mag-alagad kaniya. Ang umaabot nga kaliwat suginlan unta bahin sa Ginoo aron magsangyaw sila ngadto sa katawhan nga wala pa matawo sa katarong nga iyang gipakita. (R)

C. Ikaduhang Basahon

1 Juan 3:18-24

Ang pagbasa gikuha gikan sa unang sulat ni San Juan.

Mga anak, kinahanglan nga matuod gayud ang atong gugma ug dili sa pulong lamang; ipakita ta kini sa mga maayong buhat.

Niini maila nato nga kita iya sa kamatuoran ug nga may pagsalig kita atubangan sa Dios. Kon sudyaan kita sa atong konsensiya, labaw pang mosudya kanato ang Dios nga nasayod sa tanan. Busa, mga igsoon, kon wala magsudya kanato ang atong konsensiya, masaligon kita nga moatubang sa Dios. Ug atong madawat gikan kaniya ang bisan unsa nga pangayoon nato, kay gituman man nato ang iyang mga sugo ug gibuhat ang makapahimuot kaniya. Ang gisugo niya mao nga motuo kita sa ngalan sa iyang Anak nga si Jesukristo ug maghigugmaay sumala sa sugo ni Kristo. Ang nagtuman sa mga sugo sa Dios anaa sa Dios, ug ang Dios anaa kaniya. Ug masayran nato nga ang Dios ania kanato pinaagi sa Espiritu nga iyang gihatag kanato.

Mga igsoon, ang Pulong sa Ginoo.

D. Ebanghelyo

Juan 15:1-8

Ang pagsangyaw sa Maayong Balita sumala ni San Juan.

Si Jesus miingon sa iyang mga tinun-an, "Ako ang matuod nga punoan sa paras, ug ang akong Amahan maoy tig-atiman. Putlon niya ang tanang sanga nga dili mamunga ug pul-ongan niya ang tanang sanga nga mamunga aron kini mahinlo ug mamunga'g daghan. Nahinlo na kamo

pinaagi sa mga pulong nga akong gisulti kaninyo. Pabilin kamo kanako ug ako magpabilin kaninyo. Gawas kon magpabilin kanako dili kamo makabunga, ingon nga ang usa ka sanga dili makabunga gawas kon magpabilin kini sa punoan."

"Ako ang punoan sa paras, ug kamo ang mga sanga. Ang magpabilin kanako ug ako diha kaniya mamunga'g daghan; kay kon wala ako wala kamoy mahimo. Ang dili magpabilin kanako mahisama sa usa ka sanga nga ibalibag ug malaya; pamutlon kini ug daoban. Kon magpabilin kamo kanako ug ang akong mga pulong magpabilin kaninyo, makapangayo kamo'g bisan unsa ug madawat ninyo kini. Sa inyong pagpamunga'g daghan kapа- sidunggan ang akong Amahan, ug sa ingon niini kamo mahimong akong mga tinun-an.

Mga igsoon, ang Maayong Balita sa atong Ginoo.

E. Komentaryo

Tema: Pagmabungahon diha sa Dios.

Walay ginikanan nga maghunahuna og kadaot sa iyang mga anak. Ug gani, atong nasayran nga ang mga ginikanan daghan kaayo og mga pahimangno sa ilang mga anak kon molakaw kini sa ilang balay. Sama sa pag-eskwela ug pagpanarbaho sa laing lugar. Kasagaran atong madungog nga mga pahimangno mao kini: "pagtarong baya didto ha,ayaw pagbinuang sa imong pag-eskwela o pagtrabaho. O dili ba, ayaw sa pag-uyab-uyab samtang nag-eskwela pa, asa ra man na pag nahuman na ka. O, eskwela baya gayod anak para dili ka mapareha kanamo nga imong mga ginikanan, nag-antos sa kalisod, ug daghan pa nga mga nagkalainlaing pahimangno. Tingali ang uban niini nga mga pahimangno adunay sakit paminawon. Dili gayod ikalipay sa ginikanan kon ang ilang mga anak dili magmalampuson sa ilang kinabuhi. Siguradong bation gayod nila ang kasubo ug kaguol tungod sa pagkaguba sa ilang mga maayong pangandoy.

Mga igsoon, karong Dominggoha ang atong mga pagbasa nagpadayag sa maayong pagpuyo dinhi sa kalibutan. Dinhi sa atong unang pagbasa nagsaysay sa pagkahimong tinun-an ni San Pablo. Gikan sa iyang pagkamanglulutos sa mga Kristiyanos nahimo siyang usa ka sumusunod ni Kristo. Sa atong ikaduhang pagbasa usab, naghisgot sa pagsunod sa sugo sa Dios pinaagi sa paghigugma atong isigkatawo. Ug sa atong sa atong Ebanghelyo, nagpadayag kini sa pagkapunoan ni Kristo sa paras, ug kita ang mga sanga. Si Kristo ang tinuod nga punoan sa paras, kay kita isip mga sanga, kon magpabilin Kaniya, makabaton kita og bunga kay ang Iyang Amahan maoy mopalambo niini. Apan kadtong mopahilayo Kaniya, putlon kini ug sunugon.

Nasayod si Jesus, unsay dangatan sa mga tawong magtuman sa iyang gusto, o masinupakon sa sugo sa Dios. Nagpakita ang atong Ginoong Jesus sa usa ka amahanong pagpahimangno isip Iyang mga anak. Usa ka Amahan nga naglantaw sa maayong ugma sa iyang mga anak nga namulong, "Pabilin kamo kanako ug mamunga kamo." Naghatag Siya kanato og giya kon asa kita paingon ug unsay atong dangatan. Ang pagpabilin kaniya isip punoan, mao ang pagpamunga apan ang pagpahilayo kaniya mao ang pagkawalay nahot.

Kon ato usab tan-awon ang atong mga ginikanan naghatag usab sila og mga pahimangno sa ilang mga anak, sama sa pagtinarong kanunay tungod ug alang sa maayong ugma sa ilang mga anak. Ingon usab niini ang Dios, wala gayod Siya nagkulang og pahimangno kanato. "Ako ang punoan sa paras ug kamo ang mga sanga, pabilin kamo kanako ug mamunga kamo." Apan ang kagawasan sa pagtuman niini, naga-agad kanato. Mao nga diha sa atong mga kapakyasan dili kita makabasol sa Dios, ingon man sa atong mga ginikanan. Ang dautang panghitabo nga modangat kanato, dili kini kagustuhan sa Dios. Apan mitugot Siya nga mahitabo kini aron sa pagpahigmata kanato sa dili pagtuman sa atong gusto.

Sa katapusan, sama sa atong mga ginikanan, naglantaw sa maayong ugma sa iyang mga anak, ang Dios usab wala nagkulang kanato sa paghatag og mga pahimangno aron kita mamahimong mabungahon. Kon ang ginikanan gihimo ang tanan tungod ug alang sa kaayohan sa ilang mga anak, unsa pa kaha ang Ginoo nga labaw pang nahigugma kanato?

Siguro makapangutana kita sa atong kaugalingon, nagmasinugtanon ba kita sa kabubut- on sa Dios? Naningkamot ba kaha kita, nga mahiusa kanunay sa Dios pinaagi sa pagbuhat nga wala nahisupak sa Iyang kabubut-on? Ato kining pamalandungan pag-ayo. Hinaut pa unta.

F. Katilingbanong Pag-ampo

Pangulo: Sa hiniusang tingog ato karong ipadangat sa atong Makagagahum nga Amahan ang atong pag-ampo ug mga tinguha sa atong kinabuhi. Sa matag pangamuyo kita motubag: GINOO, DUNGGA KAMI.

1. Alang sa nagdumala sa atong Simbahan, makabaton unta sila og dugang kadasig diha sa ilang pagpaningkamot nga ikapadayag ang panig-ingnan ni Kristo ang matuod nga punoan sa paras ngadto sa tanang katawhan. Mag-ampo kita.

2. Alang sa nagdumala sa atong nasud, mahatagan unta nila og dakung pagtagad ang mga mulo ug nag-unang mga suliran sa katawhan ilabina gayud niadtong nabiktima sa mga nagkalainlaing katalagman. Mag-ampo kita.

3. Alang sa atong mga igsoon nga nag-antus sa mga nagkadaiyang balatian sa lawas, masinati unta nila ang gugma ug presensya sa Dios pinaagi sa tawo nga nag-amoma kanila. Mag-ampo kita

4. Alang sa matag Kristohanong katilingban nga magpasiugda unta kini og mga kalihukan nga makapalambo sa espirituhanong kinabuhi sa matag usa aron mahiusa kita sa Dios kinsa kanunay nga nag-awhag kanato nga mahiusa diha Kaniya. Mag-ampo kita.

5. Alang kanatong tanan nga mamahimo unta kitang buhing saksi sa gugma sa Dios ngadto sa tanan natong mga kaigsoonan. Mag-ampo kita.

6. Alang sa atong kaugalingon nga katuyuan, ato kining ihalad diha sa kahilum.

Pangulo: Ginoong Dios namo, Ikaw ang tuburan sa tanang grasya ug kaayohan. Dungga kaming nangaliyupo kanunay sa Imong panabang kay nasayud kami nga kon wala Ka, wala gayud kami mahimo. Kini among gilauman nga madawat pinaagi ni Kristo among Ginoo ug Manluluwas. Amen.