IKADUHANG DOMINGGO SA PAGKABANHAW

IKADUHANG DOMINGGO SA PAGKABANHAW

A. Unang Basahon

Buhat 4:32-35

Ang pagbasa gikuha gikan sa basahon sa mga buhat sa mga Apostoles.

Ang pundok sa mga magtotoo usa ra sa hunahuna ug kasingkasing. Ug wala kanilay miingon nga siya ray tag-iya sa iyang kabtangan, kondili nag- ambitay silang tanan sa mga butang nga ilang gihuptan. Uban sa dakong gahum, ang mga apostoles nagsaksi sa pagkabanhaw sa Ginoong Jesus, ug ang Dios nagpanalangin pag-ayo kanilang tanan. Walay usa kanila nga nakulangan. Kadtong may mga uma o mga balay nagbaligya niini, ug ang halin gitugyan nila sa mga apostoles; gibahinbahin kini sa mga apostoles sa tagsatagsa kanila sumala sa ilang gikinahanglan.

Mga igsoon, ang Pulong sa Ginoo.

B. Salmo Responsoryo

Salmo 118:2-4,13-15,22-24

Tubag (R) - Pasalamati ang Ginoo kay siya maayo, ang iyang gugma way katapusan.

Pasultiha ang balay ni Israel, "Ang iyang kalooy nagalungtad sa kahangturan." Pasultiha ang balay ni Aaron, "Ang iyang kalooy nagalungtad sa kahangturan." Pasultiha sila nga mahadlokon sa Ginoo, "Ang iyang kalooy nagalungtad sa kahangturan." (R)

Nagkalisod ako ug nasukamod apan gitabangan ako sa Ginoo. Ang akong kusog ug akong kaisog mao ang Ginoo, ug siya kanhi ang akong manluluwas. Ang malipayong singgit sa kadaugan mabati diha sa mga tolda sa matarong. (R)

Ang bato nga gisalikway sa mga magtutukod nahimong batong patukuranan. Sa Ginoo gihimo kini; kahibulongan kini atubangan sa atong mga mata. Mao kini ang adlaw nga gihimo sa Ginoo; maglipay kita ug magsadya dinhi niini. (R)

C. Ikaduhang Basahon

1 Juan 5:1-6

Ang pagbasa gikuha gikan sa Unang Sulat ni San Juan.

Ang nagtuo nga si Jesus mao ang Kristo, Anak sa Dios; ug ang nahigugma sa usa ka amahan nahigugma usab sa iyang anak. Maila nato nga nahigugma kita sa mga anak sa Dios kon higugmaon nato ang Dios ug tumanon ang iyang mga sugo. Kay ang ilhanan nga gihigugma nato ang Dios mao nga gituman nato ang iyang mga sugo; kay ang tanang anak sa Dios makabuntog sa kalibutan, ug gidaog nato ang kalibutan pinaagi sa atong pagtuo. Mao ray makabuntog sa kalibutan ang mituo nga si Jesus mao ang Anak sa Dios.

Ang mianhi mao si Jesukristo ug nailha nang iyang pag-anhi pinaagi sa tubig sa pagbunyag kaniya ug sa dugo sa pagkamatay niya, ug dili sa tubig lamang, kondili sa tubig ug sa dugo. Ang Espiritu mismo misaksi nga matuod kini, kay ang Espiritu kamatuoran man.

Mga igsoon, ang Pulong sa Ginoo.

D. Ebanghelyo

Juan 20:19-31

Ang pagsangyaw sa Maayong Balita sumala ni San Juan.

Sa pagkagabii na niadtong Dominggoha, nagtigom ang mga tinun-an sulod sa usa ka kwarto ug gitrangkahan nila ang pultahan kay nahadlok man sila sa mga kadagkoan sa mga Judio. Unya mitungha si Jesus sa ilang taliwala ug miingon, "Mainyo unta ang kalinaw." Human siya makasulti niini, iyang gipakita kanila ang iyang mga kamot ug ang iyang kilid. Nalipay pag-ayo ang mga tinun-an sa ilang pagkakita sa Ginoo. Unya si Jesus miingon kanila pag-usab, "Mainyo unta ang kalinaw. Ingon nga gipadala ako sa Amahan, ako usab nagpadala kaninyo." Gisulti niya kini ug unya gihuypan niya sila ug giingnan, "Dawata ninyo ang Espiritu Santo. Kon pasayloon ninyo ang mga sala sa mga tawo, gipasaylo kini; kon ang ilang mga sala dili ninyo pasayloon, dili usab kini pasayloon."

Si Tomas nga ginganlag Kaluha, usa sa dose ka tinun-an, wala mahiuban kanila sa pag-anha ni Jesus. Busa gisuginlan siya sa ubang mga tinun-an, "Nakita namo ang Ginoo!"

Si Tomas miingon kanila, "Gawas kon makita ko ug ikasoksok ang akong tudlo sa inagian sa mga lansang diha sa iyang kamot, ug mahikap ko ang samad sa iyang kilid, dili ako motuo."

Human molabay ang usa ka semana, nagtigom na usab ang mga tinun-an sulod sa maong kwarto, ug nahiuban na kanila si Tomas Gitrangkahan nila ang mga pultahan, apan mitungha si Jesus ug mibarog sa ilang taliwala ug miingon, "Mainyo unta ang kalinaw." Unya miingon siya kang Tomas, "Tan-awa ang akong kamot ug hikapa kini; hikapa usab ang samad sa akong kilid. Tuo ug ayaw na pagduhaduha!"

Si Tomas miingon kaniya, "Ginoo ko ug Dios ko!"

Unya miingon si Jesus kaniya, "Mituo ka ba tungod kay nakakita ka kanako? Bulahan kadtong mituo bisan wala makakita kanako!"

Ug daghan pang mga milagro ang gibuhat ni Jesus sinaksihan sa iyang mga tinun-an nga wala mahisulat niining basahona. Apan gisulat kini aron kamo motuo nga si Jesus mao ang Mesiyas, ang Anak sa Dios, ug pinaagi sa maong pagtuo makabaton kamo og kinabuhi diha sa iyang ngalan.

Mga igsoon, ang Maayong Balita sa atong Ginoo.

E. Komentaryo 

Tema: Hugot nga Pagtoo sa Ginoo ug Paghigugma sa Isigkatawo.

Ang Ginoo naghagit kanato kanunay sa paghigugma sa atong isigkatawo. Unsaon man nato pagpakita sa atong gugma sa atong isigkatawo?

Sa atong mga basahon sa Buhat sa mga Apostoles ug sa unang sulat ni San Juan, nagpakita sa tinuoray nga gugma alang sa usag-usa ug nagpadayag sa kaanindot sa kinabuhi, nga adunay panaghinigugmaay sama sa mga disipulo ni Kristo, nga nag-inambitay sa halin sa ilahang mga kabtangan aron sa pagtabang sa mga nanginahanglan ug sa pagbahin-bahin niini. Kini usab, nagdasig kanato sa pagpakita sa atong gugma sa atong isigkatawo ug angayan natong buhaton nga ikalipay sa uban. Kini isip usa ka sumusunod ni Kristo sa pagtabang sa mga nanginahanglan ug sa mga kabos pinaagi sa atong ginagmay nga sakripisyo aron mahimamat nila dinhi kanato ang presensya sa Ginoo nga naghari sa atong kasingkasing ug sa tanang katawhan. Atong paningkamutan nga ang kahakog masalikway dinhi sa atong kinabuhi ug ang gugma ni Jesus unta ang maghari. Pananglitan sa atong paghatag ug pagtabang sa mga nabiktima sa mga kalamidad. Pinaagi sa paghatag sa ginagmay nga salapi ug mga sinina aron sa paghupay sa kasakitan ug kaguol-anan sa atong mga kaigsoonan nga nawad-an sa ilang mga kabtangan, aron makapadayon sila sa pagpakabuhi.

Pinaagi sa pagsunod nato sa mga sugo ug mando sa Ginoo, kini dili lamang nagpadayag nga kita nahigugma Kaniya ug sa atong isig-katawo, kun dili nagpakita usab kini sa atong hugot nga pagtoo diha Kaniya. Nga kung kinsa kadtong mosalig ug motoo kaniya makabaton sa kinabuhing dayon. Apan unsaon man nato pagpadayag sa atong pagtoo diha kaniya? Diha sa Ebanghalyo ni San Juan nagpakita sa kulang nga pagtoo ni Tomas nga ang Ginoo nabanhaw na.

Kini naghulagway usab sa atong kulang ug luag nga pagtoo diha Kaniya. Apan ang Ginoo, nagsulti kanato sa atong matag adlaw nga kinabuhi, nga wala-on nato ang pagduha-duha nga siya nabanhaw na kay kini nagpakita lamang sa atong kahuyang sa atong pagtoo. Kinahanglan lig-onon nato ang atong pagtoo diha kang Kristo pinaagi sa pag-alagad ug pagtabang sa atong isigkatawo nga nanginahanglan sa atong tabang. Pinaagi sa atong pagtabang sa atong mga kaigsoonan nga nanginahanglan, kini nagpakita sa atong dako ug hugot nga pagtoo diha kang Kristo. Diha sa tagsa-tagsa kanato anaa ang Ginoo ug nakig-uban kanato. Busa kinahanglan gayod ang paghinigugmaay sa usag-usa ug pagtinabangay taliwala sa kalisod sa kinabuhi. Pinaagi niining tanan, kitang tanan makaambit sa kasakit nga nahiaguman sa atong manluluwas diha sa pagkamatay sa krus ug aron paghatag og kaluwasan sa tibuok kalibutan.

Ang atong kinabuhi, kinahanglan mapuslanon ning kalibutan diha sa pagdayeg sa Ginoo, ug pag- alagad diha sa katilingban. Kinahanglan nga kita magkahiusa sa gugma alang sa paglambo sa atong pagtoo ug sa tanang katawhan. Mao nga importante gayod diha sa atong pagpuyo ang "Hugot nga pagtoo sa Ginoo ug paghigugma sa isigkatawo".

Giya alang sa Pamalandong:

1. Aduna bay mga higayon sa atong kinabuhi nga nagduha-duha kita sa atong pagtoo sa Ginoo?

2. Gipadayag ba nato ang atong paghigugma sa uban pinaagi sa atong pag-alagad kanila?

F. Katilingbanong Pag-ampo 

Pangulo: Puno sa pagsalig, hiniusa natong ihalad sa atong Mahigugmaon nga Amahan ang atong mga pag- ampo kay mitoo kita nga dili gayud kita Niya pasagdan sa atong mga panginahanglan. Sa matag pag-ampo kita motubag: AMAHAN, DUNGGA ΚΑΜΙ.

1. Nga ang atong Santo Papa, mga Obispo ug kaparian, lig-on unta silang mobarog sa kamatuoran nga ang pagtoo sa katawhan sa nabanhaw'ng Kristo naghatag og kabag- ohan sa dagway sa kalibutan. Mag-ampo kita.

2. Nga ang mga pangulo sa nasud makabaton og ligdong ug lig-on nga pagtoo sa nabanhaw'ng Dios nga maoy bugtong sumbanan sa usa ka manggihatagon ug maki-angayon nga pagpangalagad sa tanan. Mag-ampo kita.

3. Nga ang atong mga kaigsoonan nga nabiktima sa nagkalainlaing kalamidad, maghupot og hingpit nga pagtoo sa Dios nga dili gayud Niya ihikaw ang paghatag og kahupayan ug tubag sa ilang panginahanglan pinaagi sa pagpadala og mga instrumento nga maoy makahatag og kasulbaran sa tanan. Mag-ampo kita.

4. Nga ang Kristohanong kalihukan ilabina sa atong GKK magdala unta kini sa kalamboan sa espirituhanong bahin sa kinabuhi sa matag miyembro aron magdala kanila sa aktibo nga pag-apil ilabina diha sa Kasaulogan sa Pulong ug Santos nga Yukaristiya. Mag-ampo kita.

5. Nga ang atong mga kaigsoonan nga nangamatay na makasulod na unta sila sa lawak nga gitagana sa Dios kanila nga ilang pahulayanan diin ilang maangkon ang kinabuhing dayon. Mag-ampo kita.

6. Nga ang atong personal nga katuyuan, ato kining ihalad diha sa kahilum.

Pangulo: Amahan nga mahigugmaon, uban sa dakong pagtoo milaum kami nga Imo nang dunggon ang mga pag-ampo nga among gihalad karon bisan og dili kami takus sa pagdawat sa mga grasya nga Imong gitagana kanamo. Kini among gipangayo ug gilauman nga madawat pinaagi ni Kristo among Ginoo ug Manunubos. Amen.