IKAUNOM NGA NOVENA

VIERNES

SA IKAUPAT NGA SEMANA SA KWARESMA

PASIUNA

Marso 15, 2024

Mga igsoon ko diha ni Cristo maayong gabii kaninyong tanan.

Karon Biyernes sa Ikaupat nga Semana sa Kwaresma ug ika-unom nga adlaw sa Novena alang sa atong mahal nga Patron Sr. San Jose esposo ni Maria.

Palihug manindog alang sa pagsugod sa Santos nga Eukaristiya..

Salmo Responsoryo:

"Ang Ginoo haduol sa mahinulsulon og kasingkasing."

Pangaliya sa Katawhan:

GINOO, DUNGGA ANG AMONG PAG-AMPO.

BASAHON I

Kinaadman 2.1.12-22

Kinutlo gikan sa basahon sa Kinaadman.

Miingon ang mga dautan sa ilang paghuna-huna sulod sa ilang kaugalingon: Liputan nato ang matarong, kay wala siyay kapuslanan kanato, ug supak siya sa atong mga buhat. Gisudyaan kita niya sa atong kasal-anan batok sa balaod, ug nagpasangil siya kanato sa mga kalapasan sa atong disiplina. Nagaangkon siya nga duna siyay kahibalo bahin sa Dios, ug naghingalan sa iyang kaugalingon nga anak sa Ginoo. Nahimo siya alang kanato nga tagsaway sa atong mga la- raw. Lisod na alang kanato bisan ang pagtan-aw lamang kaniya, kay lahi man sa uban ang iyang kinabuhi, ug lain ang iyang mga dalan. Daw mga hongog giisip kita niya, ug naglikay siya sa atong mga dalan daw sa mga mahugaw. Giisip niyang bulahan ang kaulahian sa mga matarong, ug gihimaya niya ang paghupot sa Dios nga iyang Amahan. Tan-awon ta kon ang iyang mga pulong matuod ba, ug kitaon ta unsay modangat kaniya. Kon ugaling matuod siya nga anak sa Dios, panalipdan gayod siya niya, ug luwason sa kamut sa mga kaaway. Pinaagig pagtamay ug pagsakit sulayon nato siya, aron masayran nato ang iyang kaaghop ug masuta ang iyang pailob. Kondenahon nato siya sa kamatayon nga makauulaw kay sumala sa iyang mga pulong, ang Dios magbantay kaniya. Kini maoy ilang gihunahuna, apan nangasayop sila; kay gibutaan sila sa ilang kadautan. Wala sila masayod sa mga tinagoan sa Dios ni naghuna- huna sila sa balos sa katarong, ni nagmatngon sa ganti sa mga kalag nga inosente.

Ang Pulong sa Ginoo.

SALMO RESPONSORYO

Salmo 34.17-18.19-20.21.23

R. (19) Ang Ginoo haduol sa mahinulsulon og kasingkasing.

Ang Ginoo nakigharong sa mga nagbuhat og dautan, aron mapapas ang ilang handumanan dinhi sa yuta.

Sa pagtuwaw sa matarong, nagpatalinghog kanila ang Ginoo

ug sa tanan nilang mga kalisdanan giluwas niya sila.

R. Ang Ginoo haduol sa mahinulsulon og kasingkasing.

Ang Ginoo haduol sa mahinulsulon

og kasingkasing; ug luwason niya ang mga naguol. Daghan ang mga kagul-anan sa matarong apan luwason sila niining tanan sa Ginoo.

R. Ang Ginoo haduol sa mahinulsulon og kasingkasing.

Bantayan niya ang tanan niyang mga bukog walay usa kanila nga mabali. Luwason sa Ginoo ang kinabuhi sa iyang mga suluguon; walay makasala kanila nga modangop kaniya.

R. Ang Ginoo haduol sa mahinulsulon og kasingkasing.

EBANGHELYO

Jn. 7. 1-2. 10. 25-30

Ang Santos nga Ebanghelyo sumala ni San Juan.

Human niini si Jesus misuroy sa Galilea. Dili siya buot mosuroy sa Judea, kay ang mga Judio didto nagtinguha man sa pagpatay kaniya. Niadtong higayona hapit na ang Pangilin sa mga Tabernakulo sa mga Judio, Sa nanglakaw na ang iyang mga igsuon ngadto sa pangilin, si Jesus miadto usab; apan wala siya magpasundayag.

Pipila sa mga tawo sa Jerusalem miingon: "Dili ba mao kini siya ang ilang buot patyon? Tan-awa, nagsulti siya atubangan sa kadaghanan, apan walay nagasultig bisan unsa batok kaniya. Tungod ba kaha kay nasayod ang mga pangulo nga siya mao ang Mesiyas? Apan inig-abot sa Mesiyas, walay masayod kon diin siya gikan. Apan kitang tanan nasayod taga diin kining tawhana."

Samtang si Jesus nagtudlo sulod sa Templo, siya miingon sa makusog nga tingog: "Nakaila ba gayod kamo kanako ug nasayod ba kamo kon taga-diin ako? Apan wala ako mo anhi sa akong kaugalingong pagbuot. Ang nag padala kanako matuod. Wala kamo makaila kaniya, apan ako nakaila kay gikan man ako kaniya ug siya man ang nagpadala kanako." Unya misulay sila sa pagdakop kaniya, apan walay nakahimo niini kay wala pa man mo- abot ang iyang panahon.

Ang Ebanghelyo sa Ginoo.

PANGALIYA SA KATILINGBAN

Pari: Sa atong mapadayunong panaw sa kinabuhi, mag- ampo kita alang sa kaisog sa pagsulti ug pagpadayag sa kamatuoran ni Cristo. Sa matag pag-ampo moingon kita: 

GINOO, DUNGGA ANG AMONG PAG-AMPO.

1. Nga ang mga pangulo sa simbahan dinasig sa Balaang Espiritu magma- isugon sa pagpakaylap sa Maayong Balita ni Jesus sa tibuok kalibutan. Mag- ampo kita.

2. Nga ang mga nangalagad sa panggamhan magmakanunayon sa ilang tinguha sa pagdala sa kalinaw ug kaangayan. Mag- ampo kita.

3. Nga ang mga masakiton ug mga kabus makasinati sa makaayo ug mahigugmaong presensiya ni Cristo. Mag-ampo kita.

4. Nga ang mga nagdayeg ug nagapasalamat sa Dios ilabina sila,___ makadawat sa mga grasya sa matag adlaw. Mag-ampo kita.

5. Nga ang mga nangamatay nga magtutuo, ilabina nila, ______ sa katapusan makatagamtam sa kalinaw sa langitnong puloy-anan. Mag-ampo kita.

Pari: Langitnong Amahan, Imong gipadala ang Imong Anak aron sa pagpasakit alang kanamo. Itugot nga pinaagi sa among pagtuo kaniya kami magmalipayon uban kanimo. Kini among gipangayo pinaagi ni Cristo among Ginoo. Amen.