IKAUPAT NGA DOMINGGO SA KWARESMA

IKAUPAT NGA DOMINGGO SA KWARESMA

A. Unang Basahon
2 Cronicas 36:14-17,19-23

Ang pagbasa gikuha gikan sa Ikaduhang Basahon sa Cronicas.

Ang mga pangulo sa Juda, mga pari ug ang katawhan misamot pagkamasupilon sa Ginoo. Gisunod nila ang tanang salawayong buhat sa kanasuran, ug gihugawgugawan nila ang Templo sa Ginoo nga gibalaan niya didto sa Jerusalem.
Ang Ginoo, ang Dios sa ilang katigulangan, nagsigi'g pahimangno kanila pinaagi sa iyang mga alagad, kay nahingawa man siya sa iyang katawhan ug sa iyang Templo, apan nagpadayon sila pagbugalbugal sa mga alagad sa Dios. Gitamay nila ang iyang mga pulong, ug gibugalbugalan ang iyang mga propeta ug dili na kini mapuypoy. Busa nasuko ang Ginoo sa iyang katawhan.
Ang hari sa Babilonia giaghat sa Ginoo sa pagsulong kanila ug gipamatay sa mga taga-Babilonia ang ilang mga batan-ong anak pinaagi sa giyera didto sa Templo sa Ginoo. Wala niya sila kaloy-i, batan-on ug tigulang. Gitugyan niya silang tanan ngadto sa hari sa Babilonia.

Gisunog nila ang Templo, ug gigun-ob ang kota sa Jerusalem ug gisunog ang mga palasyo ug gigubalaing gigun-bangkotaan. Gibihag sa hari ngadto sa Babilonia kadtong wala mamatayng ggiyera ug gihimo sila nga sulugoon niya ug sa iyang mga anak hangtud nailog sa Persia ang iyang gingharian. Nahitabo kini aron matuman ang pulong sa Ginoo pinaagi kang Jeremias, "Hangtud nga ang yutaan ang pahimulos sa mga Tuig nga Igpapahulay. Sa panahon nga gipamihag ang katawhan sa Juda nakapahulay ang yuta sulod sa 70 ka tuig sumala sa gitagna ni propeta Jeremias.

Sa unang tuig ni Ciro, hari sa Persia, natuman ang pulong sa Ginoo pinaagi kang Jeremias. Gidasig sa Ginoo si Ciro sa paghimo niining kasugoan sa tibuok niyang gingharian. Nag-ingon si Ciro: 'Ang Ginoo, ang Dios sa langit, naghatag kanako sa tanang gingharian sa kalibotan ug gisugo niya ako pagtukod og usa ka templo alang kaniya didto sa Jerusalem nga sakop sa Juda. Bisa'g kinsa sa iyang katawhan makahimo pagpauli sa Juda ug mag-uban kaniya ang Ginoo."

Mga igsoon, ang Pulong sa Dios.

B. Salmo Responsoryo

Salmo 137:1-2,4-5,6

Tubag (R) - Pahiloma ang akong dila, O Ginoo, kun ugaling ako mahikalimot kanimo.

Sa dapit sa mga suba sa Babilonia nagalingkod kami ug nagahilak sa among paghinumdum sa Sion. Didto sa mga kahoy niadtong yutaa gisab- ong namo ang among mga alpa. (R)

Bisan ang mga mananakop kanamo nagahangyo nga isulti namo ang mga titik sa among mga awit, ug ang among mamimihag nag-awhag kanamo nga maglipay: "Awiti kami sa mga awit sa Sion." (R)

Unsaon man namo pag-awit sa usa ka awit sa Ginoo diha sa yuta nga langyaw? Kon hikalimtan ko ikaw, O Jerusalem, hikalimtan unta ang akong tuong kamot. (R)

Dili unta molihok ang akong dila kon mahikalimot ako kanimo; kun dili ko palabihon ang Jerusalem labaw sa akong kalipay. (R)

C. Ikaduhang Basahon

Efeso 2:4-10

Ang pagbasa gikuha gikan sa sulat ni San Pablo ngadto sa taga- Efeso.

Apan hilabihan kadako ang kaluoy ug gugma sa Dios alang kanato, nga bisan pa gani sa patay pa kita sa espiritu tungod sa atong pagkadautan, gibanhaw kita niya uban kang Kristo. Naluwas kamo tungod sa grasya sa Dios. Ug sa atong pagkahiusa kang Kristo Jesus gibanhaw kita niya uban kaniya didto sa kalangitan. Gibuhat kini niya aron pagpakita alang sa umaabot nga mga panahon sa nanghingapin niyang grasya diha sa gugma nga iyang gipakita kanato pinaagi kang Kristo Jesus. Kay pinaagi sa pagtuo naluwas kamo tungod sa grasya sa Dios. Dili kini inyong buhat kondili gasa sa Dios. Busa walay makapasigarbo niini sanglit dili man kini bunga sa inyong mga paningkamot. Kita mga binuhat sa Dios, ug gibuhat kita niya diha kang Kristo Jesus aron magbuhat kita'g maayo nga maoy iyang tuyo alang kanato.

Mga igsoon, ang pulong sa Ginoo.

D. Ebanghelyo

Juan 3:14-21

Ang pagsangyaw sa Maayong Balita sumala ni San Juan

Ingon nga gipataas ni Moises didto sa kamingawan ang bitin nga tumbaga nga gibutang sa tukon nga kahoy, ang Anak sa Tawo kinahanglan nga ipataas usab, aron ang tanan nga motuo kaniya makabaton og kinabuhing walay katapusan. Kay gihigugma pag-ayo sa Dios ang kalibutan ug tungod niini gihatag niya ang iyang bugtong Anak, aron ang tanang motuo kaniya dili mamatay, kondili makabaton hinoon sa kinabuhing dayon.

Kay wala ipadala sa Dios ang iyang Anak dinhi sa kalibutan aron pagsilot kondili aron pagluwas niini. Ang tanan nga motuo sa Anak dili silotan, apan kadtong dili motuo kaniya gisilotan na, kay wala man siya motuo sa bugtong Anak sa Dios. Ug kini mao ang silot: Ang kahayag mianhi sa kalibotan, apan gipalabi sa mga tawo ang kangitngit kay sa kahayag, tungod kay dautan man ang ilang binuhatan. Ug ang tanan nga nagabuhat og daotan dili gusto sa kahayag ug dili makasukol niini, kay dili siya buot nga mabutyag ang iyang dautang binuhatan. Apan ang magbuhat sumala sa kamatuoran moduol sa kahayag aron makita nga nagmatinumanon siya sa Dios.

Ang Ebanghelyo sa Ginoo.

E. Komentaryo

Tema: Higugmaa ang Kahayag.

Ang atong mga pagbasa naglarawan kanato sa dakong gugma sa Dios alang kanato bisan pa sa atong mga kahuyang ug mga kasal-anan o kagahi sa atong mga ulo.

Sa unang pagbasa atong nadungog kung giunsa paghugawhugaw sa mga katawhan sa Dios ang Iyang balaang Templo ug giunsa nila pagbugalbugal ug pagtamay ang pulong sa Dios ug sa Iyang mga propeta. Busa gisilotan sila sa Ginoo pinaagi sa pagbuntog kanila sa mga taga Babilonia. Diha usab sa ikaduhang pagbasa, si San Pablo nagsaysay sa mga taga Efeso kung unsa ka dako ang gugma sa Dios kanato, ilabi na sa pagpadala Niya sa Iyang bugtong Anak sa kalibutan. Kita naluwas pinaagi sa dakong gugma sa Dios dili lamang tungod sa atong mga pagpaningkamot.

Kining tanan atong masumada diha sa atong Ebanghelyo nga nagkanayon nga gipadala sa Dios ang Iyang bugtong Anak sa kalibutan. Ato usab nadungog sa atong Ebanghelyo nga si Kristo ang Kahayag. Unsa ba ang atong gipalabi? Kahayag o kangitngit?

Ang atong tema naghagit kanato sa paghigugma sa kahayag nga mao si Kristo. Isip mga Kristiyano, ang atong pagtuo nagpadayag kanato nga unang nahigugma ang Ginoo kanato ug ang atong gugma Kaniya agi og tubag lamang sa gugma sa Dios kanato. Sa atong panahon karon, unsaon ba nato pagpakita nga nahigugma kita sa kahayag ug dili sa kangitngit?

Diha sa atong mga balay kon makasinati kita og "brown out" murag mawad-an na og kinabuhi ang atong panimalay. Dili moandar ang atong TV, dili kita maka-charge sa atong cellphone, walay kahayag ug mawad-an kita og gana sa pagpadayon sa atong mga gimbuhaton. Sama usab kini sa atong Kristohanong kinabuhi nga kon mawala si Kristo, wala nay bili ang atong kinabuhi. "Without Christ, I am nothing". Ang kahayag sama usab sa gugma nga naghatag og bili sa atong kinabuhi. Si Mother Teresa usa ka ehemplo alang kanato. Ang iyang gugma kang Kristo naghimo kaniya og kahayag alang sa mga tawong anaa sa kangitngit pinaagi sa iyang pag-alagad kanila bisan pa og wala silay ikahatag agi og balus kang Mother Teresa.

Niining panahon sa Kwaresma, atong balikon paglantaw kon unsa kadako ang paghigugma sa Dios kanato aron nga sa umaabot nga Dominggo sa Pagkabanhaw atong mapadayag sa usag-usa ang nabanhaw'ng Jesus. Ato kining mapadayag sa atong mga igsoon nga nagkinahanglan sa atong presensiya ug tabang. Ug kita mamahimong presensiya sa gugma ug kahayag sa Dios alang sa tanan.

Kon makadungog kita sa pulong nga Kwaresma ato dayong mahunahunaan ang kahulugan niini nga kwarenta ka adlaw. Kon ato kining palaluman, kini nagkahulugan sa dakong pagpangandam sa pag-ani.

Pananglitan, kinahanglan gayod pangandaman sa mga mag-uuma ang pag-ani sa abot sa ilang pananom.

Hapit na gayod matapos ang Kwaresma ug mopadulong na kita sa pagsaulog sa pagpakasakit, pagkamatay ug pagkabanhaw sa atong Ginoong Jesukristo. Ang Simbahan nag-awhag kanato sa pag-andam sa atong kaugalingon alang sa umaabot nga "Easter Triduum" o tulo ka adlaw nga Kasaulogan alang sa Pasko sa Pagkabanhaw sa atong Ginoo. Kita mangandam pinaagi sa atong pagpangumpisal, pagpuasa ug pagtabang sa mga nanginahanglan. Pinaagi niining mga pagpangandam, mapadayag nato ang atong paghigugma sa kahayag nga mao si Jesukristo. Kay Siya miingon nga kon unsa ang atong gihimo sa atong isigkaingon gihimo usab nato kini Kaniya. Kon ang tanan kanato mamahimong kahayag, ang atong katilingban mamahimo gayod nga malamboon, dili lamang sa materyal nga butang apan sa espirituhanon usab.

Giya alang sa Pamalandong:

1. Giunsa man nato pagpadan-ag sa kahayag ni Kristo sa atong kaugalingon ug sa uban?

2. Niining panahon sa Kwaresma ato bang naandam ang atong kaugalingon sa pagdawat sa kahayag ni Kristo?

F. Pangaliya sa Katilingban

Pangulo: Inubanan sa dakung pagsalig ug pagtoo, ato karong ihalad sa Amahan ang atong mga pag-ampo ug panginahanglan nga anaa sa matag usa kanato. Sa matag pag ampo kita motubag: DIOS SA GUGMA, DUNGGA KAMI.

1. Nga ang Santo Papa, mga Obispo ug kaparian sa kanunay mapuy-an unta nila ang hiyas sa pagkamahigugmaon ilabina sa ilang pagpakaylap sa Ebanghelyo ni Kristo sa tibuok kalibutan. Mag-ampo kita.

2. Nga ang nagdumala sa atong nasud, mahimamat unta nila ang mahigugmaong Dios diha sa ilang pag-alagad ug pagmugna og mga proyekto nga maoy makahatag og kasulbaran sa nag-unang panginahanglan sa tanang katawhan. Mag-ampo kita.

3. Nga ang atong mga kaigsoonan nga nag- antus sa tumang kawad-on, makaplagan ug mabati unta nila ang presensya sa mahigugmaon nga Dios diha sa mga tawo nga migahin sa ilang panahon ug bahandi sa pagsuporta kanila. Mag-ampo kita.

4. Nga ang matag katilingban kanunay unta kining mosubay sa mga kalagdaan sa kinatibuk-ang simbahan ilabina sa pag- umol sa Kristohanong pagtoo ngadto sa tanang katawhan. Mag-ampo kita.

5. Nga ang matag usa kanato sa kinasingkasing magpuyo unta sa mga

mensahe ni Kristo nga atong nadawat nga maoy buhing saksi sa atong pagsunod ug pagpakighiusa Kaniya. Mag-ampo kita.

6. Nga ang personal nato nga katuyuan ato kining ihalad diha sa kahilum.

Pangulo: Amahan sa gugma, malaumon kami nga Imong dunggon ug hatagan og katumanan ang among mga pangamuyo nga among gihalad karon pinaagi sa Imong Bugtong anak si Jesukristo among Ginoo ug Manluluwas. Amen.