IKALIMA NGA DOMINGO SA KWARESMA

IKALIMANG DOMINGGO SA KWARESMA

A. Unang Basahon

Jeremias 31:31-34

Ang pagbasa gikuha gikan sa basahon ni Jeremias.

Nag-ingon ang Ginoo, "Umaabot na ang panahon nga maghimo ako'g bag-ong kasabutan uban sa katawhan sa Israel ug sa Juda. Dili kini sama sa kasabutan nga gihimo ko uban sa ilang mga katigulangan sa dihang gikuha ko sila gikan sa Ehipto. Wala nila tumana ang maong kasabutan bisan ako ang ilang Ginoo. Ako, ang Ginoo, ang nagsulti niini. Inig-abot niadtong panahona, mao kini ang kasabutan nga himoon ko uban sa katawhan sa Israel; ibutang ko ang akong sugo sa ilang kaisipan ug isulat ko sa ilang kasingkasing. Ug mahimo ako nga ilang Dios ug sila akong katawhan. Ako, ang Ginoo, ang nagsulti niini. Dili na kinahanglan nga tudloan ang usa ka tawo sa iyang katagilungsod bahin sa pag-ila sa Ginoo. Kay silang tanan makaila na man kanako, gikan sa labing timawa ngadto sa labing inila. Pasayloon ko ang ilang mga kasaypanan. Ako, ang Ginoo, maoy nagsulti niini."

Mga igsoon, ang Pulong sa Ginoo.

B. Salmo responsoryo

Salmo 51:3-4,12-13,14-15

Tubag (R) - Linisi ang akong kasingkasing, O Ginoo.

Kaloy-i ako, O Dios, diha sa imong kaayo; sa kadako sa imong kalooy papasa ang akong kalapasan. Hugasi ako'g maayo sa akong kasaypanan ug linisi ako sa akong kasal-anan. (R)

Usa ka malinis nga kasingkasing himoa dinhi kanako, O Dios, ug usa ka makanunayong espiritu bag-oha sulod kanako. Ayaw ako isalikway sa imong atubangan, ayaw kuhaa kanako ang imong balaang espiritu. (R)

Ibalik kanako ang kasadya sa imong kaluwasan, ug padayona dinhi kanako ang maayong espiritu. Tudloan ko ang malapason sa imong mga dalan, ug ang mga makasasala mamalik kanimo. (R)

C. Ikaduhang Basahon

Hebreo 5:7-9

Ang pagbasa gikuha gikan sa sulat ngadto sa mga Hebreo.

Sa dinhi pa siya sa kalibutan, nag-ampo ug nangaliyupo si Jesus uban sa makusog nga pagtuwaw ug mga luha ngadto sa Dios nga may gahum sa pagluwas kaniya gikan sa kamatayon. Tungod kay mapaubsanon ug buotan man siya, gidungog siya sa Dios. Apan bisan siya mao ang Anak sa Dios nakakat-on siya sa pagkamasinugtanon pinaagi sa iyang mga pag-antos. Sanglit nahingpit man siya, nahimo siyang tinubdan sa kaluwasan nga walay katapusan alang sa tanan nga masinugtanon kaniya.

Mga igsoon, ang Pulong sa Ginoo.

D. Ebanghelyo

Juan 12:20-33

Ang pagsangyaw sa Maayong Balita sumala ni San Juan.

Pipila ka mga Griyego nahiuban niadtong mitungas sa Jerusalem aron pagsimba sa panahon sa pangilin. Miduol sila kang Felipe nga taga-Betsaida sa Galilea ug miingon, "Sir, buot kaming makigkita kang Jesus."

Busa miadto si Felipe ug misulti kang Andres, ug silang duha nangadto kang Jesus ug ilang gipahibalo siya. Si Jesus mitubag kanila, "Ang takna miabot na nga ang Anak sa Tawo pasidunggan pag-ayo. Sultihan ko kamo: ang usa ka lugas nga trigo magpabilin nga usa ra gayud ka lugas gawas kun kini ipugas sa yuta ug mamatay. Kun kini mamatay, mamunga kini'g daghan. Ang magmahal sa iyang kaugalingong kinabuhi mawad-an hinoon niini, apan ang dili masayangan sa iyang kinabuhi niining kalibutana, magpatunhay niini alang sa kinabuhing dayon. Ang buot mag-alagad kanako kinahanglan mosunod kanako aron kun hain ako, atua usab ang akong alagad. Ang akong Amahan magpasidungog kaniya nga nag-alagad kanako."

"Nabalaka ako, ug unsa may akong isulti? Moingon ba ako, 'Amahan, ayaw ipadangat kanako kining taknaa?' Dili! kay ang hinungdan sa akong pag-anhi mao ang pagdawat niining takna sa pag-antus. Amahan, pasidunggi ang imong ngalan!"

Unya may tingog gikan sa langit nga nag-ingon: "Gipasidunggan ko na kini. Apan pasidunggan ko pa kini pag-usab."

Ang mga tawo nga nagtindog didto nakadungog sa tingog ug miingon sila, "Midalugdog man!" Ang uban miingon, "May anghel nga misulti kaniya!"

Apan si Jesus miingon kanila, "Dili tungod kanako nga misulti kining tingoga, kun dili tungod kaninyo. Karon mao ang panahon nga hukman ang kalibutan; karon palagputon ang nagmando niining kalibutana. Ug kon ipataas na ako gikan sa yuta, kabigon ko ang tanang tawo dinhi kanako." Sa pagsulti niya niini, iyang gipasabot ang matang sa kamatayon nga modangat kaniya.

Mga igsoon, ang Maayong Balita sa atong Ginoo.

E. Komentaryo

Tema: Kinabuhi diha sa Kamatayon.

Ania na kita karon sa Ikalimang Dominggo sa Kwaresma ubansatema: "Kinabuhidihasakamatayon". Sa atong pagpangandam atong hinumduman ang mahimayaong kadaugan ni Kristo sa kamatayon ug pagtubos niya sa atong mga sala ug labaw pa niana ang iyang pagpakita sa walay kinutubang gugma sa iyang katawhan.

Sa Ebanghelyo ni San Juan atong nadungog diin si Jesus nagkanayon: "Ang usa ka lugas nga trigo magpabilin nga usa ra gayod ka lugas gawas kon kini ipugas sa yuta ug mamatay, kun kini mamatay mamunga kini og daghan".

Kini nga sambingay nagpunting sa kamatayon ni Kristo sa krus diin gihatag niya ang iyang kinabuhi ug nga pinaagi niini namunga kini og daghan. Ang iyang kamatayon ug pagkabanhaw nagdala kini sa tanang katawhan sa walay pagpihig ngadto kaniya diha sa pagtoo ug pinaagi sa maong pagtuo nakabaton kita og kinabuhi diha sa iyang ngalan.

Sa atong pamalandong karon, mangutana kita sa atong kaugalingon kon unsang klase nga binhi kita? Ang binhi ba nga nagpabilin lamang sa atong kaugalingon? O ang binhi nga gitanum, namatay ug namunga og daghan?

Ang pagpakamatay wala nagpasabot nga kamatayon sa atong lawas kon dili kamatayon sa atong mga dautang binuhatan, kamatayon sa atong mga sala, mga bisyo ug ang kamatayon sa atong tagsa tagsa ka mga panginahanglan.

Usa ka hagit kanatong tanan ilabi na sa atong pagpuyo sa atong katilingban. Pananglitan sa pag s alagad sa atong GKK. Mapadayag nato ang kamatayon sa atong mga gusto nga buhaton sa atong kaugalingon. Ang uban daghan og labhonon, daghan og buluhaton sa panimalay, ang uban gusto nga molaag. Apan ania kita karon dinhi naggahin sa atong panahon diha sa pag ampo.

Labaw pa niana sama nga si Kristo namatay sa krus alang sa pagtubos sa atong mga sala, kita usab angayan nga magpakamatay sa atong pagkamakasasala kay diha sa pagpakamatay sa atong dautang binuhatan makaangkon kita og kinabuhi diha kang Kristo ug mamunga kita og maayong binuhatan nga maoy magdala kanato sa pagtoo ug pagpakighiusa ngadto kang Kristo Jesus.

Giya alang sa Pamalandong:

1. Kinasingkasing ba natong gidawat ang hagit sa pagpangalagad diha sa atong tagsa tagsa ka katilingban?

2. Nagpakamatay ba kita sa atong mga dautang binuhatan aron makapamunga kitag daghan?

F. Katilingbanong Pag-ampo

Pangulo: Sa mapaubsanong kasingkasing ato karong ihalad sa Amahan ang atong mga pag-ampo ug panginahanglan uban sa dakung pagtoo ug paglaum. Sa matag pag-ampo kita motubag:

AMAHAN, DUNGGA ANG AMONG PAG-AMPO.

1. Alang sa nangulo sa Simbahan, makabaton unta sila og lig-ong kusog ug kadasig sa pagpadayon sa ilang matinud-anong pagsangyaw sa Pulong sa Dios alang sa tanang katawhan. Mag-ampo kita.

2. Alang sa nagdumala sa atong nasud nga kapanghingusgan unta nila ang pagpatunhay sa kaangayan ug panagdait sa tanang katawhan nga ilang gialagaran. Mag-ampo kita.

3. Alang sa atong katilingban, andam unta kitang mosunod sa mga pagtulun- an ni Kristo aron mahingpit ang atong pagpangalagad sa atong isigkatawo. Mag- ampo kita.

4. Alang sa atong mga kaigsoonan nga nagmasakiton, masinati unta nila ang gugma ug presensya sa Dios pinaagi sa atong mahigugmaong pag-amoma kanila. Mag-ampo kita.

5. Alang sa atong mga mahal sa kinabuhi nga nangamatay na, dawaton na unta sila sa paraiso nga gitagana kanila diin ila nang matagamtaman ang kalipay nga walay katapusan. Mag-ampo kita.

6. Alang sa atong kaugalingon nga katuyuan, ato kining ihalad diha sa kahilum.

Pangulo: Amahan nga maloloy-on, amo nang nahalad Kanimo ang among mga pag- ampo ug panginahanglan. Sa dakung pagtoo ug paglaum, malaumon kami nga Imo nang dunggon kining among pag-ampo nga maoy bugtong makahatag og katumanan sa among pagkinabuhi isip Imong mga anak. Kini among gipangayo pinaagi ni Kristo among Ginoo ug among Manluluwas. Amen.