UNANG DOMINGGO SA KWARESMA

 UNANG DOMINGGO SA KWARESMA

A. Unang Basahon

Genesis 9:8-15

Ang pagbasa gikuha gikan sa basahon sa Genesis.

Unya ang Dios miingon kang Noe ug sa iyang mga anak, "Himoon ko na karon ang akong kasabutan tali kaninyo ug kanako ug sa inyong mga kaliwat, ingon man sa tanang binuhat nga buhi uban kaninyo ang mga langgam, mga kahayopan, ug mga ihalas nga mananap - tanan gayud nga nanggawas sa arka. Himoon ko ang akong kasabotan tali kaninyo ug kanako: isaad ko nga dili na gayud puohon ang yuta pinaagi sa lunop."

Mga igsoon, ang Pulong sa Ginoo.

B. Salmo Responsoryo

Salmo 25:4-5, 6-7,8-9

Tubag (R) Ang imong mga dalan, O Ginoo, gugma ug kamatuoran, alang kanila nga nagasunod sa imong kasabutan.

Ipaila kanako, O Ginoo, ang imong kadalanan; tudlo-i ako sa imong mga agianan, Agaka ako diha sa imong kamatuoran ug tudlo-i ako, kay ikaw man ang Dios nga akong manluluwas. (R)

Hinumdumi nga ang imong kalooy, O Ginoo, ug ang imong kaayo sukad pa kaniadto. Sa imong kalooy hinumdumi ako, tungod sa imong kaayo, O Ginoo. (R)

Maayo ug matarong ang Ginoo; sa ingon niini iyang gitudloan ang makasasala sa dalan. lyang giagak ang mapaubsanon sa iyang dalan. (R)

C. Ikaduhang Basahon

1 Pedro 3:18-22

Ang pagbasa gikuha gikan sa unang sulat ni Pedro.

Kay si Kristo mismo namatay sa makausa lamang tungod sa atong mga sala, ang matarong alang sa mga dili matarong, aron pagdala kanato ngadto sa Dios. Gipatay siya ingon nga tawo, apan gibanhaw ingon nga espritu, ug sa iyang espirituhanong kahimtang miadto siya ug nagwali sa mga espiritu nga nabilanggo. Mao kini ang mga espiritu sa mga tawo nga misupak sa Dios samtang siya mapailubon nga naghulat kanila sa diha nga si Noe naghimo sa arka. Walo lamang ka tawo ang misulod sa arka ug naluwas sa tubig nga naghulagway sa bunyag nga karon nagluwas kaninyo, dili pinaagi sa paghugas sa buling sa inyong lawas, kondili pinaagi sa saad nga gihimo ngadto sa Dios gikan sa usa ka maayong konsensya. Ang bunyag nagluwas kaninyo pinaagi sa pagkabanhaw ni Jesukristo nga miadto sa langit ug atua na sa tuo sa Dios, naghari sa mga anghel ug sa mga langitnong gahom.

Mga igsoon, ang Pulong sa Ginoo.

D. Ebanghelyo

Marcos 1:12-15

Ang pagsangyaw sa Maayong Balita sumala ni San Marcos

Dihadiha gipaadto si Jesus sa Espiritu Santo ngadto sa kamingawan. Nagpabilin siya didto sulod sa kwarenta ka adlaw, ug gitintal siya ni Satanas. Didto may mga ihalas nga mananap, apan may mga anghel nga miatiman kaniya.

Sa dihang nabilanggo na si Juan, miadto si Jesus sa Galilea ug nagsangyaw sa Maayong Balita sa Dios. Miingon siya, "Miabot na gayod ang panahon nga maghari na ang Dios! Busa hinulsoli ug biyai ang inyong mga sala ug tuohi ninyo ang Maayong Balita!"

Mga igsoon, ang Maayong Balita sa atong Ginoo.

E. Komentaryo

Tema: Ang gugma ug kaayo sa Ginoo naghatag og paglaum sa kalibutan.

Usa sa mga reyalidad sa kinabuhi sa tawo mao ang mga pagsulay. Dunay uban nga nakalingkawas, apan ang uban nahulog sa pagsulay. Kadaghanan kanato naghunahuna nga ang pagsulay usa ka negatibong butang. Apan ang pangutana, giunsa nato pag-atubang ang mga pagsulay nga moabot sa atong kinabuhi?

Karon mao ang unang Dominggo sa Kwaresma, ang Dominggo sa atong pagpangandam sa dakong kapistahan, ang Piyesta sa Pagkabanhaw sa atong Ginoo. Mao kini ang panahon sa pagpangandam sa atong kaugalingon. Atong andamon ang atong kaugalingon diha sa paghatag og panahon sa pagpamalandong kung giunsa nato pagpuyo ang atong kinabuhi. Diha sa atong mga pagbasa, kita gipahinumduman sa gugma ug kaayo sa Ginoo nga Iyang gipakita sa kalibutan.

Ang unang pagbasa naghisgot sa dakong gugma ug kaayo sa Dios sa mga tawo ug tanang butang nga naa sa Arka. Usa ka dakong pagsulay ang naagian sa pamilya ni Noe mao ang pagbugalbugal sa mga tawo kanila samtang sila nagbuhat og Arka. Apan sila nagmakanunayon sa ilang pagsalig sa Dios ug kini wala gayod gipakyas sa Dios. Sa ingon, ang Dios mihimo'g kasabutan tali kaniya ug sa mga tawo gikan sa Arka. Kini nagpasabot nga ang Dios interesado sa tanang gihimo sa katawhan; ang ilang kultura, gipangmugna, ug ang ilang mga pangandoy. Bisan pa man nga anaa kita sa kahimtang sa sala, ang Dios kanunay nga nagpadala sa mga timaan sa Iyang kaayo ug gugma diha sa mga panghitabo sa atong kinabuhi. Pinaagi sa bangaw, Siya nagpahinumdom sa katawhan sa Iyang kasabutan tali kanila.

Sa atong ikaduhang pagbasa, si Pedro naghisgot mahitungod sa mga makasasala sa panahon ni Noe. Apan apil sila sa mga giluwas ni Kristo tungod kay si Kristo mianhi man alang sa tanan. Namatay Siya alang kanatong tanan tungod sa Iyang dakong gugma ug aron kita mahiuli sa Dios. Diha sa Ebanghelyo, gipamulong mismo ni Kristo kung unsa ang angayan natong buhaton alang sa pagpangandam sa atong kaugalingon aron kita mahiusa sa Dios. Diha sa pagsulay nga giagian ni Kristo sa disyerto, Siya nagmadaugon pinaagi sa panabang sa Espiritu Santo. Ang kadaugan ni Kristo batok sa gahum sa yawa naghatag usab og paglaum kanato nga kita usab makalingkawas sa mga pagsulay nga atong maagian sa atong kinabuhi. Pinaagi sa pagsulay nga giagian ni Kristo, kita gitudloan Niya unsaon nato pagdaug sa mga pagsulay nga moabot sa atong kinabuhi. Ang Iyang kadaugan sa pagsulay naghatag og kalig-on sa Iyang misyon. Kining misyon mao ang pag-andam sa kalibutan sa pag-abot sa gingharian sa Dios.

Ang mga pagsulay sa kinabuhi usahay mamahimong babag alang kanato sa pagtuman usab sa atong misyon isip mga binunyagan. Sa atong tawhanong kahuyang, usahay magpadala kita sa mga pagsulay nga mamahimong hinungdan nga kita makasala batok sa Dios ug sa atong isigkatawo. Diha sa atong kahuyang ug kalibog kasagaran sulayan ang atong pagtuo sa Dios. Apan gipahinumduman kita sa Ginoo nga diha sa atong kahuyang ug kalibog diha molihok ang Espiritu Santo aron kita tabangan ug giyahan sa atong angayan nga buhaton. Si Kristo mismo naghatag og paglaum ug kasigurohan nga makalingkawas kita sa tanang pagsulay nga atong maagian basta hingpit kitang mosalig sa Iyang gugma ug kaayo. Apan ang pangutana, makita ba sa atong kinabuhi ang atong pagsalig ug paglaum sa gugma sa Ginoo? Panahon sa mga pagsulay milahutay ba kita sa atong pagpakigsuod sa Ginoo diha sa atong mga pag-ampo? Pamalandungan nato kini mga igsoon.

F. Katilingbanong Pag-ampo

Pangulo: Sa hiniusang tingog ato karong ihalad sa Maloloy-on nga Amahan ang atong mga pag-ampo ug panginahanglan. Sa matag pangaliyupo kita motubag: 

GINOO, DUNGGA KAMI.

1. Alang sa mga nangulo sa Simbahan nga sa kanunay magauban unta kanila ang Balaang Espiritu Santo aron magiyahan sila sa ilang matinud-anong pag-atiman sa tanang katawhan. Mag-ampo kita.

2. Alang sa nagdumala sa atong nasud, nga pinaagi sa lamdag sa Espiritu Santo madasigon unta silang moalagad sa tanang katawhan ilabina niadtong nabiktima sa mga nagkadaiyang mga katalagman. Mag- ampo kita.

3. Alang sa matag Kristohanong katilingban nga sa kanunay makabaton unta sila sa hiyas sa pagkamapailubon, pagkamanggihatagon ug pagkamaayong sumusunod sa kabubut-on sa Dios aron motunhay ang kahiusahan sa tanan. Mag- ampo kita.

4. Alang sa atong mga kaigsoonan nga nagpangita pa sa kamatuoran nga pinaagi sa lamdag sa Espiritu Santo, malig-on unta sila sa ilang pagtoo ug pagsalig sa gamhanan nga Ginoo. Mag-ampo kita.

5. Alang sa tanan nga nag-antus sa nagkadaiyang kasakitan sa kinabuhi, nga ang Espiritu Santo maghatag kanila og igong kusog nga makalabang sa mga pagsulay nga ilang nahiaguman. Mag- ampo kita.

6. Alang sa atong kaugalingon nga katuyuan, ato kining ihalad diha sa kahilum.

Pangulo: Mahigugmaong Amahan, bisan sa among pagkamasalaypon nagpadayon Ka sa paghigugma kanamo. Itugot nga amo nang madawat ang tubag sa among mga panginahanglan nga among gihalad karon. Malaumon kami nga dili Nimo ihikaw kanamo ang grasya nga Imong gitagana kanamo pinaagi ni Kristo Imong Bugtong Anak ug among Ginoo. Amen.