IKATULONG DOMINGGO SA KWARESMA

IKATULONG DOMINGGO SA KWARESMA

A. Unang Basahon

Exodo 20:1-17

Ang pagbasa gikuha gikan sa basahon sa Exodus.

Ang Dios miingon, "Ako ang Ginoo nga inyong Dios nga nagkuha kaninyo gikan sa Ehipto diin kamo naulipon. "Ayaw pagbaton og laing dios gawas kanako."

"Ayaw pagbuhat og diosdios o larawan sa bisan unsa didto sa langit o dinhi sa yuta, o diha sa tubig nga anaa ilalom sa yuta. Ayaw pagyukbo sa bisan unsang diosdios ni magsimba niini, kay ako ang Ginoo nga inyong Dios, ug seloso ako. Silotan ko kadtong nagsalikway kanako lakip ang ilang mga kaliwat hangtud sa ikatulo ug ikaupat nga kaliwatan. Apan ang nahigugma kanako ug nagtuman sa akong mga sugo, higugmaon ko hangtud sa linibo ka mga kaliwatan.

"Ayaw gamita ang akong ngalan sa dautang tuyo; silotan ko si bisan kinsa nga magpasipala sa akong ngalan.

"Hinumdomi ang Adlaw nga Igpahulay ug balaana kini. Makatrabaho kamo sulod sa unom ka adlaw, apan ang ikapitong adlaw, Adlaw'ng Igpapahulay nga gigahin alang kanako. Ayaw kamo pagtrabaho nianang adlawa, ni ang inyong mga anak, mga ulipon, mga kahayopan, ug ang mga langyaw nga nagpuyo sa inyong mga lungsod. Sulod sa unom ka adlaw gibuhat ko ang langit, ang yuta, ang kadagatan ug ang tanan nga anaa kanila, apan mipahulay ako sa ikapitong adlaw. Busa gipanalanginan ko ang Adlaw'ng Igpapahulay ug gibalaan kini.

"Tahora ang inyong amahan ug inahan aron motaas ang inyong kinabuhi diha sa yuta nga gihatag kaninyo sa Ginoo nga inyong Dios."

"Ayaw kamo pagpatay. Ayaw panapaw. Ayaw pangawat."

"Ayaw kamo pagbutangbutang sa inyong isigkatawo."

"Ayaw kamo kaibog sa balay sa laing tawo, ni sa iyang asawa, ni sa iyang mga ulipon, ni sa iyang kahayopan o bisan unsa nga iyaha."

Mga igsoon, ang Pulong sa Ginoo.

B. Salmo Responsoryo

Salmo 19:8,9,10,11

Tubag (R) - O Ginoo, anaa kanimo ang mga pulong sa kinabuhing dayon.

Ang balaod sa Ginoo hingpit, nagahupay sa kalag; Ang kasugoan sa Ginoo kasaligan, nagahatag og kinaadman sa mga yano. (R)

Ang mga sugo sa Ginoo matarong, nagalipay sa kasingkasing; ang sugo sa Ginoo matin-aw, nagahayag sa mata. (R)

Ang kahadlok sa Ginoo putli, nagalungtad sa kahangturan; ang mga kasugoan sa Ginoo matuod; silang tanan mga matarong. (R)

Labaw sila kabililhon kay sa bulawan, labaw sa usa ka pudyot sa lunsay nga bulawan; Mas matam-is usab kay sa anibal, O sa dugos nga gikan sa kawa. (R)

C. Ikaduhang Basahon

1 Corinto 1:22-25

Ang pagbasa gikuha gikan sa sulat ni San Pablo ngadto sa taga-Corinto.

Ang mga Judio nagkinahanglan og mga milagro aron motuo sila, ug ang mga Griego nangita og kaalam. Apan alang kanamo, nagsangyaw kami kang Kristo nga gilansang sa krus, ug kining mensahi-a wala kahimut-i sa mga Judio ug giilang binuang sa mga dili Judio. Apan alang niadtong gitawag sa Dios, Judio man siya o dili, si Kristo mao ang gahum ug ang kaalam sa Dios. Kay ang giisip nila nga binuang sa Dios, mas maalamon pa kay sa kinaadman sa tawo, ug ang ilang giisip nga kahuyang sa Dios mas lig-on pa kay sa kusog sa tawo.

Mga igsoon, ang Pulong sa Ginoo.

D. Ebanghelyo

Juan 2:13-25

Ang pagsangyaw sa Maayong Balita sumala ni San Juan

Sa hapit na ang Pangilin sa Pagsaylo sa mga Judeyo, si Jesus miadto sa Jerusalem. Didto sa Templo nakita niya ang mga tawo nga namaligya og mga baka, mga karnero, ug mga salampati. Nakita usab niya ang mga tig- ilis og kuwarta. Unya si Jesus naghimo'g latigo nga linubid ug giabog niya ang tanang mananap ang mga karnero ug mga baka-ngadto sa gawas sa templo. Gipangtuwad usab niya ang mga lamesa sa mga tig-ilis og kuwarta, ug gisalibay ang ilang mga sinsilyo. Ug iyang gimandoan ang mga tawo nga namaligya'g mga salampati, "Dad-a kini sa gawas! Ayaw ninyo himoang daw palingki ang balay sa akong Amahan." Unya nahinumdom ang iyang mga tinun-an nga ang Kasulatan nag-ingon, "Ang akong pagmahal sa imong balay, O Dios, nagdilaab sulod kanako sama sa kalayo."

Unya nangutana kaniya ang kadagkoan sa mga Judio, "Unsay ilhanan nga ikapakita nimo aron pagmatuod nga may katungod ka pagbuhat niini?"

Si Jesus mitubag, "Gub-a ninyo kining Templo ug tukoron ko kini pag-usab sulod sa tulo ka adlaw."

Sila miingon kaniya, "Kwarenta y sais ka tuig ang pagbuhat niining Templo, unya tukoron mo kini pag-usab sulod lamang sa tulo ka adlaw?"

Apan ang templo nga gihisgotan ni Jesus mao ang iyang lawas. Busa sa dihang nabanhaw na siya, nahinumdom ang iyang mga tinun-an nga gisulti niya kini; ug mituo sila sa Kasulatan ug sa gisulti ni Jesus.

Samtang si Jesus didto sa Jerusalem panahon sa Pangilin sa Pagsaylo, daghan ang nanuo kaniya sa pagkakita nila sa mga milagro nga iyang gihimo. Apan si Jesus wala mosalig kanila, tungod kay nasayod man siya sa tanang tawo. Walay kinahanglan nga sultihan siya ni bisan kinsa mahitungod sa mga tawo, kay nasayod na man siya kun unsa ang anaa sa ilang kasingkasing.

Mga igsoon, ang Maayong Balita sa atong Ginoo.

E. Komentaryo

Tema: Pagbarog diha sa Kamatuoran.

Sa atong Ebangelyo karon ang Ginoong Jesukristo nasuko sa mga tawo kay gihimo ang templo nga usa ka merkado o palengke. Nasuko siya tungod kay nawala na man ang pagkasagrado sa maong lugar. Nahiubos gayod siya kay wala man gitagaan og pagtahud ang maong balaang dapit. Kay alang kaniya balay sa Amahan ang templo.

Sama usab sa bukid sa Sinai ga girespeto isip usa ka balaang bukid. Kay didto man gipadayag ni Yahweh kang Moises ang Napulo ka mga Sugo. Ug hangtud karon ang maong bukid gidugok sa daghang mga deboto sa tibuok kalibutan aron sination ang pagkabalaan niini.

Sa Ebangelyo, nagsaysay kini kanato nga si Jesus nasuko. Karon ang pangutana: Angayan bang masuko si Jesus nga usa man siya ka Dios? Tataw ug dayag nga gihimo ni Jesus ang angayan nga buhaton kay alang man kini sa tanan. Mituman siya sa kabubut-on sa Amahan. Mao kini ang hagit karon nga mahisama unta kita ni Jesus diha sa iyang pagkamadasigon sa pagbarog ug pagpakigbatok sa mga sukwahi nga panghunahuna sa katilingban.

Sa kahimtang sa atong nasud karon, lisod kaayo. Adunay panagbingkil ang gobyerno ug ang simbahan kung maghisgot na og kinabuhi. Ang panagbingkil namugna tungod sa mga dili husto nga panglantaw sa ubang mga tawo diha sa gobyerno. Alang kanila ang simbahan nagpabiling tradisyonal, dili praktikal. Nagpasabot nga ang simbahan alang sa uban. Nagpadayon og barog sa mga prinsipyo nga kaniadto pa. Diha sa isyu sa "birth control", ang gobyerno nagpadayon sa pagduso sa paggamit og mga "contraceptions" sama sa condom, pills ug uban pa. Apan ang simbahan lig-on kaayo sa pagpadayon sa pagbarog nga ang paggamit niining mga butanga dili makatabang ug hinuon makadala sa tawo ngadto sa sala. Nagpaubos lamang kini sa dignidad sa tawo.

Nanghitabo kining tanan tungod lamang sa kinaugalingong interes sa pipila. Tataw kaayo nga ang lintunganay niini mao ang pagpugong sa kinabuhi nga gasa sa Dios. Ang kamatuoran nga ang Dios maoy nagbuhat sa tawo ug wala kitay katungod sa pagpugong niini. Mao kini ang kamatuoran pinasubay sa Diosnong balaod ug dili ang tawhanong balaod maoy atong sundon.

Busa gihagit kita niining Ikatulong Dominggo sa Kwaresma sa pagbarog sa kamatuoran. Ipakita nato nga kita binunyagan. Ipakita nato nga kita nakaila kang Jesus ug nasayod sa iyang tumong nganong gipangtikwang niya ang mga lamesa sa naninda gawas sa templo. Pangayoon nato ang grasya sa Ginoo nga makapadayon kita niining maong dakung misyon.

Giya alang sa Pamalandong:

1. Isip binunyagan, mibarog ba kita sa kamatuoran batok niining mga hiwi nga gituohan karon?

2. Kon usa ka sa migamit niining mga “contraceptives" unsa man ang imong buhaton karon?

F. Katilingbanong Pag-ampo

Pangulo: Mag-ampo kita sa atong mahigugma- ong Amahan kinsa nasayud kon unsay anaa sa atong hunahuna ug kasingkasing. Busa atong ihalad Kaniya karon ang atong pag-ampo ug panginahanglan Sa matag pangamuyo kita motubag: GINOO, DUNGGA ANG AMONG PAG-AMPO.

1. Nga ang kinatibuk-ang Simbahan ilabina ang Santo Papa, mga Obispo ug kaparian matinud-anong mosaksi sa mga pagtulon- an diha sa Ebanghelyo aron mahimong kongkreto nga sumbanan sa tanang katawhan. Mag-ampo kita.

 2. Nga ang mga nagdumala sa nasud makasunod unta sa mga pagtulon-an ni Kristo aron ang ilang pagpangalagad magsubay sa kaangayan, kahiusahan ug kalinaw sa tanan. Mag-ampo kita.

3. Nga ang matag katilingban maningkamot sa pagkinabuhi sa sumbanan ni Kristo diha sa pagtinabangay, pagsinabtanay aron makab-ot ang kalinaw ug kahiusahan sa tanan. Mag-ampo kita.

4. Nga ang mga nagmasakiton makabaton na og kahupayan diha sa ilang lig-on ug hingpit nga pagsalig sa gugma sa Dios. Mag-ampo kita.

5. Nga ang atong mga mahal sa kinabuhi nga nangamatay na makasulod na unta sa lawak nga gitagana sa Dios kanila isip ilang langitnong pinuy-anan diin magpuyo sila sa walay katapusang kalipay. Mag- ampo kita.

6. Nga ang atong personal nga katuyuan ato kining ihalad diha sa kahilum.

Pangulo: Mahigugmaong Amahan, mahiusa unta kami Kanimo diha sa Imong kamanggihatagon. Itugot nga amo nang madawat ang tubag sa among mga pag-ampo diin kami nagasalig Kanimo sa among inadlaw adlaw nga kinabuhi. Kini among gipangayo pinaagi ni Kristo among Ginoo ug Manluluwas. Amen.