LENTEN RECOLLECTION

Ikaduhang Domingo sa Kwaresma

PASIUNA

Pebrero 25, 2024

Maayong buntag/hapon mga igsuon diha ni Cristo.

Ania na kita sa Ikaduhang Domingo sa Kwaresma. Kining adlawa usab gitawag usab nga St. Peter the Apostle Sunday.

Ang unang Pagbasa nga gikuha gikan sa Basahon sa Genesis, naghisgot mahitungod sa paghalad ni Abraham sa iyang anak nga si Isaac ngadto sa Dios.

Ang Ikaduhang Pagbasa gikuha gikan sa sulat ni San Pablo ngadto sa Taga-Roma. Dinhi atong madungog si San Pablo nga miingon kanila, “Si Cristo Jesus mao ang nagpakamatay ug gibanhaw; atua siya sa tuo sa Dios ug nangaliyupo alang kanato.”

Ang Ebanghelyo nga gikuha gikan sa Balaan nga Ebanghelyo sumala ni San Marcos, nagsaysay mahitungod sa pagka-usab sa panagway ni Jesus.

Palihug manindog alang sa pagsugod sa Santos nga Eyukaristiya. 

Salmo Responsoryo:

Molakaw ako sa atubangan sa Ginoo diha sa yuta sa mga buhi. 

Katilingbanong Pag-ampo:

Ginoo, ipadan-ag kanamo ang imong kahayag.

BASAHON I

Gn. 22:1-2, 9, 10-13, 15-18

KINUTLO GIKAN SA BASAHON SA GENESIS

Si Abraham gisulayan sa Dios. Gitawag siya sa Dios nga nag-ingon, "Abraham!" Ug siya mitubag, "Ania ako."

Miingon ang Dios, "Dad-a si Isaac, ang bugtong mong anak nga imong gihigugma, ug lakaw ngadto sa yuta sa Moria. Ihalad siya pinaagi sa pagsunog didto sa bukid nga itudlo ko kanimo."

Sa pag-abot nila sa dapit nga gitudlo kaniya sa Dios, gipatindog didto ni Abraham ang usa ka halaran, ug ibabaw niini gibutang niya ang sugnod. Unya gigapos niya ang iyang anak ug gipa- hiluna sa halaran ibabaw sa sugnod. Unya gikuha niya ang kutsilyo aron patyon niya si Isaac. Apan mitawag kaniya gikan sa langit ang anghel sa GINOO, "Abraham, Abraham!" Mitubag siya, "Ania ako."

"Ayaw unsaa ang bata," miingon ang anghel. "Nasayod na ako nga andam ka gayod pagsugot sa GINOO, kay wala mo man ihikaw kanako ang imong bugtong anak."

Miyahat si Abraham ug nakita niya ang usa ka laking karnero kansang sungay nasangit didto sa usa ka kupong- kupong. Gikuha niya kini ug gihalad pinaagi sa pagsunog ilis sa iyang anak.

Gikan sa langit ang anghel sa GINOO mitawag pag-usab kang Abraham. Miingon siya, "Ang GINOO nag-ingon, 'Ipanumpa ko kanimo sa akong ngalan nga panalanginan ko ikaw pag-ayo, kay gihimo mo man kini ug wala mo ihikaw kanako ang imong bugtong anak. Isaad ko usab kanimo nga hatagan ko ikawg mga kaliwat nga sama kadaghan sa bitoon sa langit ug sa balas sa baybayon. Bun- togon sa imong kaliwat ang ilang mga kaaway, ug mohangyo kanako ang tanang mga nasod nga panalanginan sila ingon nga akong gipanalanginan ang imong mga kaliwat kay imo mang gituman ang gisugo ko kanimo.'"

ANG PULONG SA GINOO.

SALMO RESPONSORYO

Ps. 116:10, 15, 16-17, 18-19

R. Molakaw ako sa atubangan sa Ginoo, diha sa yuta sa mga buhi.

Mituo ako, bisan sa akong pag-ingon, "Gisakit ako."

Bililhon atubangan sa mga mata sa Ginoo ang kamatayon sa iyang buotan nga mga sulugoon.

R. Molakaw ako sa atubangan sa Ginoo, diha sa yuta sa mga buhi.

O Ginoo, imo ako nga alagad; imo ako nga alagad, ang anak sa imong sulugoong babaye; imong gilugti ang akong mga talikala.

Kanimo akong ihalad ang sakripisyo sa ug pasalamat, sangpiton ko ang ngalan sa Ginoo

R. Molakaw ako sa atubangan sa Ginoo, diha sa yuta sa mga buhi.

Tumanon ko ang akong mga panaad ngadto sa Ginoo sa atubangan sa tibuok niyang lungsod, Diha sa mga hawanan sa balay sa Ginoo, sa imong taliwala, O Jerusalem.

R. Molakaw ako sa atubangan sa Ginoo, diha sa yuta sa mga buhi.

BASAHON II

Rom. 8:31-34

KINUTLO GIKAN SA SULAT NI SAN PABLO NGADTO SA TAGA-ROMA

Karon nga ato nang nasayran kini, unsa may atong ikaingon? Kon dapig kanato ang Dios, kinsay makigbatok kanato? Kon wala magdumili ang Dios pagtugyan sa iyang Anak ngadto sa kamatayon tungod kanatong tanan, dili ba hatagan kita niya sa tanang butang nga atong pangayoon kaniya? Kinsay mangahas pagsumbong sa mga piniling katawhan sa Dios? Ang Dios mismo nag- ila kanila nga walay sala. May maka- hukom ba kanila nga sila sad-an? Si Cristo Jesus mao ang nagpakamatay ug gibanhaw; atua siya sa tuo sa Dios ug nangaliyupo alang kanato!

ANG PULONG SA GINOO.

EBANGHELYO

Mk. 9:2-10

Kinutlo gikan sa Balaan nga Ebanghelyo sumala ni Marcos

Ug paglabày sa unom ka adlaw, gidala ni Jesus si Pedro ug si Santiago ug si Juan ug mingtungas sila ngadto sa usa ka taas nga bukid nga sila lamang. Ug nausab ang iyang panagway sa ilang atubangan, ag ang iyang sapòt nahimong masidlakon sa hilabihang kaputi nga walay manlabahay dinhi sa kalibotan nga makahimo pagpaputi sama niini.

Ug mingtungha kanila si Elias ubàn ni Moises og nakigsulti sila kang Jesus.

Ug mitubag si Pedro ug miingon kang Jesus, "Magtutudlo, maayo nga ania kità dinhi! Magbuhat kitag tulò ka tolda: usa alang kanimo, usà alang kang Moises, ug usà alang kang Elias." Kay wala siya mahibalo kon unsay iyang itubag, sanglit nangalisang man sila.

Ug mitungha ang usa ka panganod ug milandong kanila; ug gikan sa panganod adunay usa ka tingog nga milanog, "Kini mao ang akong pinalanggang Anak. Pamati kamo kaniya."

Ug dihadiha, sa ilang pagtan-aw sa palibot, wala na silay laing nakita gawas lamang kang Jesus nga uban kanila.

Ug sa nanglugsong na sila gikan sa bukid, gipahimangnoan niya sila sa dili pagsugilon kang bisan kinsa sa ilang nakita hangtod nga ang Anak sa Tawo mabanhaw gikan sa mga patày. Ug gitipigan nila ang (maong) butang sa ilang kaugalingon, nagpangutan-anay kon unsa ang kahulogan sa pagkabanhaw gikan sa mga patay.

Ang Ebanghelyo sa Ginoo.

Katilingbanong Pag-ampo 

Pebrero 25, 2024

Pari: Niining atong paghandum sa pagkausab sa panagway ni Jesus, uban sa mapaubsanong kasingkasing ug hugot nga pagtoo ngadto Kaniya, atong ihalad ngadto sa Dios ang atong mga pangamuyo diha sa pag-ingon: 

GINOO, IPADAN-AG KANAMO ANG IMONG KAHAYAG.

1. Alang sa mga lideres sa atong Simbahan ilabina kang Papa Francisco, mga Obispo ug Kaparian, mamahimo unta silang mga maayong ihemplo sa katawhan sa Dios diha sa pagsangyaw sa Maayong Balita sa Ginoo ug ngadto sa pagbag-o sa ilang mga kasingkasing. Mag-ampo kita. 

2. Alang sa mga lideres sa panggamhanan, ang Dios manalangin unta kanila og dugang kaalam, kaluoy ug gugma nga ilang mapaambit ngadto sa katawhan nga ilang giserbisyohan. Mag-ampo kita. 

3. Alang sa matag pamilya, niining bulan sa Pro-Life ug sa umaabot pa, makasinati sa nausab nga panagway ni Jesus ug mamahimong dayag diha sa ilang pulong ug buhat. Mag-ampo kita. 

4. Alang sa mga biktima sa lain-laing inhustisya ug pang-abuso, masinati unta nila ang presensya sa nausab nga panagway ni Jesus pinaagi sa mga tawo nga mibulig kanila. Mag-ampo kita. 

5. Alang sa mga nagadayeg ug nagapasalamat sa Dios ilabina sila ___, makaangkon unta sila og kasingkasing nga mapadayonong mopaambit sa grasya sa Dios ngadto sa mga kabus. Mag-ampo kita. 

6. Alang sa mga nagtaliwan na ilabina nila ____, maangkon na unta nila ang saad sa Dios, ang kinabuhing walay katapusan. Mag-ampo kita. 

Pari: Ginoong Dios, among Amahan, tabangi kami nga makapaminaw sa imong Anak ug makadungog sa iyang pag-ampo alang kanamo, kay misalig kami kanimo, among Dios hangtod sa kahangturan. Amen.