IKALIMANG DOMINGGO SA ORDINARYONG PANAHON

IKALIMANG DOMINGGO SA ORDINARYONG PANAHON

A. Unang Basahon

Job 7:1-4,6-7

Ang pagbasa gikuha gikan sa basahon ni Job.

Si Job misulti sa pag-ingon, "Ang kinabuhi sama sa pinugos nga pag- alagad sa sundalo, sama sa mabug-at nga trabaho, sama sa ulipon nga nangandoy nga mosilong sa landong, ug sama sa mamumuo nga nangandoy sa iyang suhol. Gipahatan ako sa mga bulan sa kaalaot; ang matag gabii naghatag kanako'g kaguol. Kon mohigda ako aron matulog, mag-aginod ang oras; maglimbaglimbag ako sa tibook gabii ug mangandoy sa kaadlawon. Nanglabay ang akong mga adlaw nga walay paglaom; mas tulin pa kini sa lansadera. Hinumdumi, O Ginoo, nga ang kinabuhi ko sama lamang sa usa ka panghupaw; natapos na ang akong kalipay.

Mga igsoon, ang Pulong sa Ginoo.

B. Salmo Responsoryo
Salmo 147:1-2,3-4,5-6

Tubag (R) - Dayega ang Ginoo nga nagaayo sa mga masulob-on.

Dayega ang Ginoo kay siya maayo, awiti'g pagdayeg ang atong Dios, kay siya mahigugmaon; angay gayud ang pagdayeg kaniya, ang Ginoo nagabag-o pagtukod sa Jerusalem; iyang gipundok ang nagkatibulaag sa Israel. (R)

lyang giayo ang mga masulob-on, iyang gibulong ang ilang mga samad. Siya ang naga-ihap sa kabitoonan. Iyang gitawag ang tagsatagsa sa ilang ngalan. (R)

Dako gayud ang atong Ginoo ug makusganon diha sa gahum; sa iyang kinaadman walay kinutuban. Ang Ginoo nagapabangon sa mapaubsanon; ang mga dautan iyang gisalikway aron mapukan. (R)

C. Ikaduhang Basahon
1 Corinto 9:16-19,22-23

Ang pagbasa gikuha gikan sa unang sulat ni San Pablo ngadto sa taga-Corinto.

Wala akoy katungod sa pagpasigarbo tungod lamang kay nagwali ako sa ebanghelyo, sanglit gisugo man ako pagbuhat niini. Alaot ako kon wala ako magwali sa ebanghelyo! Kon kinabubut-on pa ang pagtuman ko sa akong buluhaton, makapaabot unta ako nga gantihan; apan sanglit nagbuhat man ako niini. Busa unsa may suhol nga mapaabotko? Ang pribilihiyo sa pagwali sa Maayong Balita sa walay pagpabayad niini, sa walay pagpahimulos sa akong mga katungod sa akong paghago alang sa ebanghelyo.
Dili ako ulipon ni bisan kinsa; apan nagpaulipon ako sa tanan aron madani ko ang labing daghan. Diha sa mga huyang sa pagtoo nahimo akong

huyang sama kanila aron madani ko sila. Busa nagpahiuyon ako sa tanang tawo aron maluwas ko ang pipila kanila, sa bisan unsang paagi. Gihimo ko ang tanan tungod sa Maayong Balita aron makaambit ako sa panalangin niini.

Mga igsoon, ang Pulong sa Ginoo.

D. Ebanghelyo

Marcos 1:29-39

Ang pagsangyaw sa Maayong Balita sumala ni San Marcos.

Gikan sa sinagoga miadto sila sa pinuy-anan ni Simon ug ni Andres, ug kuyog nila si Santiago ug si Juan. Niining higayona, ang ugangang babaye ni Simon gihilantan ug naghigda. Sa pag-abot gayud ni Jesus didto, gisuginlan siya mahitungod sa masakiton. Giduol ni Jesus ang masakiton, gikuptan ang kamot ug gipabangon. Dihadiha gihuwasan sa hilanat ang masakiton ug unya misilbi siya kanila.

Sa pagsalop na sa adlaw, gidala sa mga tawo ngadto kang Jesus ang tanang masakiton ug ang mga giyawaan. Ang tanang tawo sa lungsod didto magpundok sa atubangan sa balay. Unya giayo ni Jesus ang daghang mga tawo nga nag-antus sa nagkalainlaing mga sakit, ug iyang gipagula ang daghang mga yawa gikan sa mga giyawaan. Wala niya tugoti ang mga yawa sa pagsulti kay nakaila man sila kaniya.

Kaadlawon pa gani, mibangon na si Jesus ug milakaw. Migawas siya sa lungsod ug miadto sa usa ka dapit nga awaaw ug nag-ampo didto. Apan si Simon ug ang iyang mga higala nangita kaniya, ug sa dihang nakit-an nila siya, miingon sila, "Ang tanan nangita kanimo."

Apan mitubag si Jesus, "Mangadto kita sa kasikbit nga mga balangay. Kinahanglan walihan ko usab sila, kay mao kini ang tuyo sa akong pag- anhi." Busa misuroy si Jesus sa tibuok Galilea, nagwali sulod sa mga sinagoga, ug gipagula niya ang mga yawa gikan sa mga giyawaan.

Mga igsoon, ang Maayong Balita sa atong Ginoo. 

E. Komentaryo

Tema: Alagari ang Dios ug Isangyaw ang Maayong Balita.

Ang atong Ebanghelyo karon nagsaysay kon giunsa ni Jesus pag-ayo ang ugangang babaye ni Simon nga gihilantan. Kung atong susihon, adunay duha ka panghitabo nga atong masabtan niining pag- ayo ni Jesus sa masakiton. Ang una mao ang paggunit ni Jesus sa kamot sa masakiton ug gipabangon. Kining maong panghitabo atong makita giunsa ni Jesus pag-ayo ang masakiton. Pinaagi sa paggunit sa kamot ug pagpabangon, ang masakiton naayo. Kini nagpamatuod gayod nga gi-ayo ni Jesus ang masakiton sa kinatibuk-an niyang sakit. Ang ikaduha nga atong makita mao ang pag-alagad sa masakiton ngadto kang Jesus human siya naayo sa iyang balatian. Kini maoy usa ka kongkreto nga pagpadayag sa mga milagrosong kinaiya diha sa pagpanambal ni Jesus. Kay kasagaran sa kinaiya sa tawo, ang pagbalos o ang gitawag nato nga utang kabubut-on mao ang kasagaran natong mabati kong kita makadawat og grasya o tabang gikan sa uban. Mao usab ang gibuhat sa masakiton kay siya nakadawat man og kaayohan sa iyang sakit pinaagi kang Jesus.

Karon, unsa may mensahe niini alang sa atong kinabuhi? Kung atong tan-awon, ang grasya sa Ginoo anaa kanunay sa atong inadlaw-adlaw nga kinabuhi ug gimbuhaton. Usahay dili lang nato mabantayan. Pananglitan, inig mata nato sa buntag. Usa kini ka grasya kay kita gihatagan sa Dios og bag-ong kinabuhi. Kung kita nakadawat man sa mga grasya sa Dios, nan sama pod kita sa ugangang babaye ni Simon. Apan nakapangutana ba kita sa atong kaugalingon kung gialagaran ba nato ang Dios isip balos sa mga grasya nga atong nadawat sa matag-adlaw? Kung ang atong tubag "usahay lang" o "wala", nan ang atong Ebanghelyo karon naghagit kanato sa pagpangalagad.

Sa unsang paagi nga kita makabalos 0 makaalagad kang Jesus? Adunay daghang klase o pamaagi sa pagpangalagad. Apan si Jesus, sa katapusang bahin sa atong Ebanghelyo karon, nagtudlo kanato unsa ang nindot nga pamaagi sa pagpangalagad - ang pagsangyaw sa Maayong Balita. Usa kini ka misyon alang kanato isip Kristiyano nga gisugdan ni Kristo. Bisan gani si San Pablo sa atong ikaduhang pagbasa naghisgot sa iyang katungod o katungdanan isip apostol ang pagsangyaw sa Maayong Balita sa tanan. Kon wala pa kita makabuhat niini, sugdan na unta nato kini samtang buhi pa kita. Dili pa ulahi ang tanan. Dili na nato hulaton ang ugma ug ang umaabot kay sama sa giingon ni Job sa atong unang pagbasa, "Ang akong kinabuhi lumalabay. Wala kita masayod kanus-a tapuson sa Ginoo ang atong kinabuhi dinhi sa kalibutan.

Busa sa katapusan, atong pangutan-on ang atong kaugalingon ug atong pamalandungan kanus-a ang katapusang higayon nga kita nakaalagad ug nagsangyaw sa Maayong Balita. Hunahunaon nato kini pag-ayo samtang aduna pa kitay higayon nga makabuhat og maayo samtang buhi pa kita. Kay sa maong paagi lamang kita makabalos sa dakung gugma sa Dios alang kanato. Hinaut nga sugdan na nato kini karong adlawa!

Giya alang sa Pamalandong:

1. Isip binunyagan gituman ba nato ang atong misyon sa pagsangyaw sa Maayong Balita?

2. Unsa may gibalos nato sa Ginoo sa dakong gugma nga Iyang gihatag kanato?

F. Katilingbanong Pag-ampo

Pangulo: Mga igsoon, sa hiniusang tingog ato karong ihalad sa atong Langitnong Amahan ang atong niga pag- ampo ug panginahanglan uban sa kinasingkasing nga pagsalig sa Iyang gahum ug panabang. Sa matag pag-ampo kita motubag: GINOO, DUNGGA ANG AMONG PAG-AMPO.

1. Alang sa atong Santo Papa, mga Obispo ug kaparian sa kanunay sila madasig sa pagpaambit sa Pulong ug kinabuhi ni Kristo sa tanang katawhan. Mag-ampo kita.

2. Alang sa mga pangulo sa atong nasud, nga matinud-anon silang motuman sa ilang misyon isip sulugoon sa katawhan. Mag- ampo kita.

3. Alang sa mga nagkalisudlisod natong mga kaigsoonan nga sa gihapon malig- on ang ilang pagtoo nga ang Dios maoy makahatag og katumanan ug kahupayan sa ilang mga kalisdanan. Mag-ampo kita.

4. Alang sa mga lideres sa atong matag katilingban nga malig-on ug molahutay sila sa ilang pagpangalagad alang sa kalamboan sa tanan. Mag-ampo kita.

5. Alang sa atong mga igsoon nga nag-una na kanato sa laing kalibutan nga makasulod na sila sa lawak nga gitagana kanila sa Maloloy-ong Amahan. Mag-ampo kita.

6. Alang sa atong kaugalingon nga katuyuan, ato kining ihalad diha sa kahilum.

Pangulo: Langitnong Amahan, sa tibuok namong kasingkasing nangamuyo kami nga Imo nang dunggon ang mga pag-ampo nga among gihalad karon. Kami nagalaum sa grasya nga Imong gitagana kanamo pinaagi ni Kristo among Ginoo. Amen.