IKADUHANG DOMINGGO SA ORDINARYONG PANAHON

 IKADUHANG DOMINGGO SA ORDINARYONG PANAHON

A. Unang Basahon
1 Samuel 3:3-10,19

Ang pagbasa gikuha gikan sa unang basahon ni Samuel.

Natulog si Samuel didto sa Templo, sa dapit nga gibutangan sa Sudlanan sa Kasabotan. Sa wala pa mokaadlawon, samtang nagsiga pa ang suga mitawag ang Ginoo kang Samuel sa pag-ingon, "Samuel! Samuel!" Ug mitubag siya, "Dia ra ko!" Ug miadto siya kang Eli, ug miingon, "Nganong gitawag mo man ako, sir?"
Apan si Eli miingon, "Wala ako magtawag. Balik pagtulog. "Busa miadto siya sa iyang lawak ug mihigda.
Apan ang Ginoo mitawag pag-usab, "Samuel! Samuel!" Ug si Samuel mibangon ug miadto kang Eli, ug miingon, "Unsa may ikaalagad ko kanimo, sir?"
Apan miingon si Eli, "Wala ako magtawag kanimo, anak; katulog pag- usab."
Niining tungora si Samuel wala pa makaila sa Ginoo, ug wala pa ikapadayag kaniya ang pulong sa Ginoo. Ug ang Ginoo mitawag kang Samuel sa ikatulong higayon. Mibangon siya ug miadto kang Eli, ug miingon, "Nganong gitawag mo man ako, sir?"

Unya nakasabot si Eli nga ang Ginoo maoy nagtawag sa bata, busa giingnan niya si Samuel, "Balik paghigda ug kon tawgon ka pag-usab, tubaga siya, Sulti, Ginoo, kay mamati ang imong sulugoon." Busa mibalik paghigda si Samuel.

Unya mitungha ug mibarog ang Ginoo nga nagtawag sama sa ubang higayon, "Samuel! Samuel!" Ug si Samuel mitubag, "Sulti, Ginoo, kay mamati ako kanimo."

Midako si Samuel, ug ang Ginoo nag-uban kaniya ug walay nakawang sa tanan nga iyang gisulti.

Mga igsoon, ang Pulong sa Ginoo.

B. Salmo Responsoryo

Salmo 40:2,4,7-8,8-9,10

Tubag (R) - Ania ako, Ginoo; mianhi ako aron pagtuman sa imong kabubut-on.

Nagahulat ako, nagahulat ako sa Ginoo ug nagpakaubos siya ngari kanako ug namati sa akong pagsangpit. Ug usa ka bag-ong awit iyang gibutang sa akong baba usa ka imno ngadto sa atong Dios. (R)

Sakripisyo ug halad wala ka mahimuot. Apan mga dalunggan nga inablihan alang sa pagsugot imong gihatag kanako. Mga sinunog nga mga halad bayad sa sala wala ka mangita; ug miingon ako, "Ania mianhi ako." (R)

Diha sa basahon gibut-an alang kanako ang pagbuhat sa imong kabubut- on, O Dios ko, maoy akong kalipay ug ang imong balaod ania sulod sa akong kasingkasing. (R)

Gisangyaw ko ang imong katarong diha sa bagang katawhan, wala ko pugngi ang akong mga ngabil ingon sa imong hibaw-an, O Ginoo. (R)

C. Ikaduhang Basahon

1 Corinto 6:13-15,17-20

Ang pagbasa gikuha gikan sa sulat ni San Pablo ngadto sa taga- Corinto.

Ang uban moingon, "Ang pagkaon alang man sa tiyan ug ang tiyan alang man sa pagkaon." Tinuod kana; apan taposon sa Dios kining duha. Ang lawas sa tawo dili alang sa kalaw-ayan, kondili alang sa Ginoo ug ang Ginoo alang sa lawas. Ang Dios nagbanhaw sa Ginoo, ug siya magbanhaw usab kanato pinaagi sa iyang gahum.

Nasayud kamo nga ang inyong lawas bahin sa lawas ni Kristo. Mahimo ba diay nga kuhaon ko ang usa ka bahin sa lawas ni Kristo ug himoon nga bahin sa lawas sa usa ka babayeng daotan? Dili kini mahimo! Apan siya nga nahiusa sa Ginoo, nahiusa kaniya diha sa espiritu.

Busa likayi ang pakighilawas. Ang ubang sala nga himoon sa tawo walay kalabutan sa iyang lawas, apan ang tawo nga makighilawas makasala batok sa iyang kaugalingong lawas. Wala ba kamo masayod nga ang inyong lawas mao ang templo sa Espiritu Santo ug nga nagpuyo diha kaninyo ang Espiritu nga gihatag sa Dios kaninyo? Dili na kamo ang tag-iya sa inyong kaugalingon kondili iya na kamo sa Dios, kay mahal ang pagpalit niya kaninyo. Busa gamita ang inyong lawas alang sa himaya sa Dios.

Mga igsoon, ang Pulong sa Ginoo.

D. Ebanghelyo

Juan 1:35-42

Ang pagsangyaw sa Maayong Balita sumala ni San Juan.

Sa pagkasunod adlaw didto na usab si Juan uban sa duha niya ka tinun- an. Ug sa pagkakita niya kang Jesus nga milabay, miingon siya, "Anaa ang nating Karnero sa Dios!"

Ang duha ka tinun-an nakadungog sa pagsulti niya niini ug minunot sila

kang Jesus. Milingi si Jesus, ug sa pagkakita niya nga nagsunod sila

kaniya, gipangutana niya sila, "Unsa bay inyong gipangita?" Sila mitubag,

"Rabi," nga sa ato pa, "Magtutudlo", "hain ka man magpuyo?"

"Ngari kamo ug tan-awa ninyo," mitubag siya. Busa mikuyog sila kaniya ug nakita nila ang iyang gipuy-an, ug nagpabilin sila uban kaniya niadtong adlawa. Mga alas kuwatro kadto sa hapon.

Usa niadtong duha nga nakadungog kang Juan ug mikuyog kang Jesus mao si Andres nga igsoon ni Simon Pedro. Gipangita dayon ni Andres ang iyang igsoon nga si Simon ug giingnan, "Nakaplagan namo ang Mesiyas", nga sa ato pa, "Kristo". Unya gidala niya si Simon ngadto kang Jesus.

Si Jesus mitutok kaniya ug miingon, "Ikaw si Simon nga anak ni Juan, apan sukad karon hinganlan ka na'g Cefas", nga sa ato pa, Pedro.

Mga igsoon, ang Maayong Balita sa atong Ginoo.

E. Komentaryo

Tema: Halad Ko Kanimo, Kinabuhi Ko, O Ginoo.

Sa atong kapanahonan karon, kasagaran makita nato nga ang kalibutan napuno na sa kalingawan ug kasaba tungod sa impluwensya sa mga bag-ong teknolohiya karon. Nahimo usab kitang mga ulipon niining mga butanga. Sa laktod nga pagkasulti dili na nato mabati ang tingog sa Dios nga nagtawag kanato diha sa atong kahiladman.

Ang atong mga pagbasa naghisgot mahitungod sa TAWAG sa Dios ngadto sa tawo nga Iyang buot pilion aron mamahimong Iyang mga alagad. Ang unang pagbasa nagsaysay sa tawag sa Dios kang Samuel. Sa kaulahian, gihalad gayod ni Samuel ang iyang kaugalingon aron mag-alagad sa Ginoo. Nahimo siyang espirituhanong pangulo, propeta ug nagabansay sa mga buhat sa mga Israelita. Sa laing bahin, sa atong ikaduhang pagbasa, si San Pablo naghisgot sa kamatuoran mahitungod sa dignidad sa atong pagkatawo. Siya miingon nga ang atong pagkatawo usa ka gasa gikan sa Dios. Ug tungod niini ato usab nga ibalik ngadto sa Dios ang atong kaugalingon isip usa ka gasa ngadto sa Dios pinaagi sa paghimo sa mga buhat nga makapahimuot sa Dios. Ug dugang pa, ang atong lawas usa ka templo diin nagpuyo ang Balaang Espiritu. Angayan lamang nga amomahon nato ang atong kaugalingon pinaagi sa mga pagsunod sa buhat nga langitnon ug dili ang yutan-on. Sa atong Ebanghelyo, nabati usab nato ang imbitasyon ni Kristo ngadto sa duha ka tawo nga si Andres ug Pedro, ug sa kaulahian nahimo silang mga apostoles ni Kristo.

Ang mga pagbasa nagpunting lamang sa duha ka tumong nga mao ang: "TAWAG SA DIOS NGANHI KANATO UG SA WALAY PAGDUHADUHA ANG ATO USAB NGA PAGHALAD SA ATONG KAUGALINGONG ARON SA PAGTUBAG SA TAWAG SA DIOS". Kita mitoo nga ang Dios kanunay nga nagtawag kanato diha sa nagkalainlaing paagi. Diha sa bokasyon sa pagka- relehiyoso o pagka-pari, diha sa kaminyoon ug diha sa pagka-ulay. Apan sa kinatibuk-an, gihagit kita sa usa lamang ka hagit nga mao ang paghigugma Kaniya ug paghigugma sa atong isigkatawo. Ug dugang pa niini, diha pinaagi sa bunyag kita nakadawat sa tulo ka misyon ni Kristo nga mao ang pagkahari, pagkapari ug pagkapropeta. Kining maong misyon nga gisangon kanato mahimo lamang kining kongkreto pinaagi diha sa atong pagpadayag sa atong gugma sa Dios pinaagi sa atong pagpakiglambigit sa usa ka yano nga tawo ingon man usab diha sa katilingban nga nagpalibot kanato. Angay lamang nga atong susihon ang atong kaugalingon pinaagi sa pangutana: sa unsang pamaagi nga nahimo kitang saksi ni Kristo ngadto sa mga yanong tawo sama sa atong mga ginikanan, igsoon ug mga silingan? Sa atong kaugalingon unsa man ang atong himoon ngadto sa mga kaigsoonan nato nga dili kita ganahan kanila sama sa buta, bungol, sa mga kabataan nga naglatagaw sa atong mga kadalanan ug sa atong mga kaaway?

Sa laing bahin, ato usab nga nasinati ang paghinayhinay og kawala ang mga maayong pamatasan sa mga bag-ong henerasyon karon ilabina diha sa mga miyembro sa atong pamilya ug diha sa atong katilingban. Ang Ginoo naghagit sa matag usa kanato nga maminaw kanunay sa Iyang mga Pulong ug pagbansay sa Iyang mga kasugoan. Gihagit kita Niya nga mamahimong buhing saksi sa Iyang mga kasugoan ngadto sa mga tawo nga nawad-an na og gana sa ilang pagtoo tungod sa mga panghitabo sa ilang palibot karon. Makapangutana kita sa atong kaugalingon, sa unsang paagi nga kita makapaminaw ug makaambit sa Pulong sa Dios? Kahibalo ba kitang motubag sa tawag sa Dios, ug andam ba kitang motahan sa atong kaugalingon alang sa Ginoo?

Ang atong kaugalingon usa ka gasa gikan sa Dios, ug busa angay lamang nga atong ihalad kini balik sa Dios isip atong pasalamat Kaniya.

Giya alang sa Pamalandong:

1. Gibansay ba nato ang atong misyon nga atong naambitan panahon sa atongbunyag?

2. Giunsa man nato kini pagbansay diha sa atong pamilya ug katilingban?

F. Katilingbanong Pag-ampo

Pangulo: Ang atong Langitnong Amahan tinubdan sa tanang grasya ug kalooy. Busa puno sa paglaum ipadangat nato Kaniya ang atong mga pag- ampo ug panginahanglan. Sa matag pag-ampo kita motubag:

GINOO, DUNGGA ΚΑΜΙ.

1. Nga ang Simbahan uban sa mga pangulo niini, molambo diha sa pagtuman sa kabubut-on sa Dios subay sa mensahe sa Ebanghelyo aron magmatinud-anon ug madasigon kanunay diha sa ilang pagpangalagad. Mag-ampo kita.

2. Nga ang mga lideres sa atong panggamhanan mohatag og dakung bili sa mga panginahanglan sa katawhan ilabina ang mga nanginahanglan. Mag-ampo kita.

3. Nga ang atong mga igsoon nga nag- antus sa mga nagkadaiyang pagsulay sa kinabuhi, pinaagi sa mga tabang materyal ug espirituwal mahaw-as sa ilang kalisod ug makabaton og kahupayan sa ilang kasamtangan nga mga pag-antus. Mag- ampo kita.

4. Nga ang atong panagtigum karon dili unta makawang diha sa atong pagpuyo sa mga mensahe nga atong nadungog aron magmatinud-anon kita sa pagsunod ug pagtuman kanunay sa gimbut-an sa atong Ginoo. Mag-ampo kita.

5. Nga ang atong mga kaigsoonan nga nangamatay na makadawat na unta sila sa kapasayloan sa ilang mga kalapasan sa buhi pa sila ug makasulod na sa lawak nga gitagana kanila sa atong Mahigugmaong Amahan. Mag-ampo kita.

6. Nga ang atong kaugalingon nga katuyuan, ato kining ihalad diha sa kahilum.

Pangulo: Amahan, paminawa ang mga pag- ampo sa Imong katawhan. Nasayud kami nga kon wala Ikaw wala usab kami mahimo. Malaumon kami nga Imong ipadangat kanamo ang grasya sumala sa among gikinahanglan. Kini among gipangayo pinaagi ni Kristo among Ginoo. Amen