EPIPANYA SA GINOO

 EPIPANYA SA GINOO

A. Unang Basahon

Isaias 60:1-6

Ang pagbasa gikuha gikan sa basahon ni Propeta Isaias.

Bangon, Jerusalem, ug sidlak kay miabot na ang imong kahayag, ug ang himaya sa Ginoo misidlak na kanimo. Tabonan sa kangitnit ang kalibutan; ang katawhan tikyopan sa kangiob; apan ang Ginoo mosidlak kanimo, ug makita diha kanimo ang iyang himaya. Ang kanasuran moduol sa imong kahayag, ug ang mga hari moduol sa lamdag sa imong kahayag. Tan-awa ang imong palibot; makita mo nga nagtigom na sila ug moduol kanimo, gikan sa layong dapit mangabot ang imong mga anak nga lalaki ug kugoson ang imong mga anak nga babaye. Malipay ka gayud inigkakita mo niini; mokusog pagpitik ang imong kasingkasing tungod sa kahinam, tungod kay ang bahandi sa dagat mahianha man kanimo ang bahandi sa mga kanasuran maimo man. Malukop ka sa daghang mga kamelyo sa Midia ug Epa; ang tanan nga gikan sa Seba magdala'g bulawan ug insenso ug mag-awit sila'g mga pagdayeg alang sa Ginoo.

Mga igsoon, ang Pulong sa Ginoo.

B. Salmo Responsoryo

Salmo 72: 1-2,7-8, 10-11, 12-13

Tubag (R) - Ginoo, ang tanang nasud sa yuta magsimba kanimo.

O Dios, tugahi ang hari sa imong panghukom, ug sa imong katarung, ang anak sa hari; Magmando siya nga matarung sa imong lungsod ug hukman niya ang mga nag-antus. (R)

Ang katarung molambo sa iyang mga adlaw ug ang halawom nga kalinaw hangtud nga mawala nay bulan. Magmando unta siya gikan sa dagat ngadto sa dagat ug gikan sa suba ngadto sa kinatumyan sa yuta. (R)

Ang mga hari sa Tarsis ug sa Pulo magdala og mga gasa; ang mga hari sa Arabia ug Seba magdala og mga halad. Ang tanang mga hari magsimba kaniya, ang tanang mga nasud mag-alagad kaniya. (R)

Kay luwason niya ang mga kabus kun mosangpit kaniya, ug ang tanang mga nag-antus nga walay motabang. Malooy siya sa ubos ug sa kabus; luwason niya ang mga kinabuhi sa kabus. (R)

B. Ikaduhang basahon

Efeso 3:2-3,5-6

Ang pagbasa gikuha gikan sa sulat ni San Pablo ngadto sa taga-Efeso.

Sa walay duhaduha nakadungog kamo nga ang Dios, pinaagi sa iyang grasya, naghatag kanako niining buhata alang sa inyong kaayohan.

Gibutyag ug gipadayag sa Dios kanako ang iyang tinago nga plano sumala sa gisulat ko na kaninyo sa daklit. Kaniadto wala kini ibutyag ngadto sa mga tawo, apan karon ibutyag na kini sa Dios pinaagi sa Espiritu ngadto sa iyang balaang mga apostoles ug mga propeta. Ang tinago mao nga pinaagi sa ebanghelyo ang mga dili Judeo, sama sa mga Judeo, makadawat usab sa mga panalangin sa Dios. Mga bahin sila sa usa lamang ka lawas, ug makaambit sa saad sa Dios pinaagi kang Kristo Jesus.

Mga igsoon, ang Pulong sa Ginoo.

D. Ebanghelyo

Mateo 2: 1-12

Ang pagsangyaw sa Maayong Balita sumala ni San Mateo.

Si Jesus natawo sa lungsod sa Bethlehem, sa yuta sa Judea, sa panahon ni Hari Herodes. Unya may pipila ka mga tawo nga maalamon bahin sa mga bitoon nangabot sa Jerusalem gikan sa sidlakan ug nangutana: "Hain man ang bata nga natawo nga maoy mahimong hari sa mga Judeo? Nakita namo ang iyang bitoon sa pagsubang niini didto sa s idlakan, ug mianhi kami aron pagsimba kaniya." Sa pagkabalita ni Hari Herodes niini, wala siya mahimutang ingon man ang tibook Jerusalem. Gitigom niya ang mga pangulong pari ug ang mga magtutudlo sa balaod ug gipangutana niya sila," Asa man matawo ang Mesiyas?" Sila mitubag, "Sa lungsod sa Bethlehem, sa Judea. Mao kini ang gisulat sa propeta: 'Ikaw, Bethlehem, sa yuta sa Juda dili ka iwit sa dagkung mga lungsod sa Juda; Kay maggikan kanimo ang usa ka pangulo nga maoy magmando sa akong katawhan, ang Israel."

Busa gipatawag ni Herodes ang mga bisita nga gikan sa sidlakan alang sa usa tigom nga tinago ug iyang nasayran gikan kanila ang husto nga takna sa pagsubang sa bitoon. Unya iyang gipaadto sila sa Bethlehem ug giingnan, "Lakaw kamo ug pangitaa ninyo pag-ayo ang bata, ug kun makit-an na ninyo siya, pahibaloa ako aron moadto ako ug mosimba usab kaniya." Unya nanglakaw sila. Samtang nagpanaw sila, nakita nila ang bitoon - ang mao gihapong bitoon nga nakita nila didto sa sidlakan - ug nag-una kini kanila hangtud miabot kini ug mihunong tungod gayud sa nahimutangan sa bata. Nalipay sila pag-ayo sa pagkakita nila sa bitoon! Unya misulod sila sa balay ug ilang nakita ang bata uban sa iyang inahan nga si Maria. Nangluhod sila ug misimba kaniya; unya giablihan nila ang ilang gisudlan sa ilang mga gasa ug mihalad sila kaniya'g bulawan, insenso, ug mira. Pinaagi sa damgo gipahimatngonan sila sa Dios sa dili pagbalik ngadto kang Herodes; busa namauli sila agi sa laing agianan.

Mga igsoon, ang Maayong Balita sa atong Ginoo.

E. Komentaryo

Tema: Bitoon!

Unsa man kamahinungdanon ang bitoon? Ingon pa sa mga katigulangan, kon mawala gani sila sa lasang panahon sa gabii, ang ilang sundon mao ang mga pormasyon sa mga bitoon tungod kay gawas nga kini naghatag og kahayag sa kagabhion, mao usab kini ang giya aron sila makatultol sa ilang lugar nga adtoan.

Sa atong Ebanghelyo karon, naghisgot usab og bitoon nga maoy naghatag og kahayag ug giya sa mga tawo nga maalamon aron madumduman o matultulan nila kung asa dapita natawo ang bata nga hari sa mga Judeyo. Ug sa dihang ilang nakita ang batang Jesus uban sa iyang inahan nga si Maria, nangluhod sila, misimba kaniya, ug mihalad og bulawan, insenso, ug mira.

Si Kristo sama usab sa usa ka bitoon. Siya mao ang kahayag ug giya sa katawhan. Pinaagi sa iyang kahayag, ang tanan nahayagan, Judeyo o mga dili Judeyo nga nakadawat sa samang panalangin sa Dios pinaagi kaniya. Siya usab ang giya sa katawhan nga nagatultol ngadto sa Amahan. Ug kita, nga iyang katawhan kinahanglan kanunay makighiusa kaniya.

Nga sa atong pagpakighiusa kaniya kita, sama sa mga tawo nga maalamon mangluhod, mosimba ug mohalad kaniya.

Usahay, aduna usab Herodes nga moabot sa atong kinabuhi aron palongon ang bitoon aron mawala ang kahayag ug giya sa atong kinabuhi. Kini mao ang mga tentasyon ug pagsulay sa atong kinabuhi. Ang uban kanato napalungan na tungod sa sala nga nabuhat. Apan ang imbitasyon sa Ginoo kanunay, nga ato nga pasigaon ang bitoon sa atong kinabuhi nga mao si Kristo, ang atong kahayag ug giya pinaagi sa pagbag-o sa atong mga binuhatan. Niining atong Kasaulogan sa Pulong karon, atong pangutan-on ang atong kaugalingon, Anaa pa kaha ang kahayag ug giya ni Kristo karon sa atong kinabuhi? Makanunayon ba kini nga nagsiga o basin og napalong na kini ug lain na nga giya ang atong gisunod? Pamalandungan nato kini pag-ayo mga igsoon.

F. Katilingbanong Pag-ampo

Pangulo: Ang Dios nagpakatawo aron atong masinati ang Iyang hingpit nga gugma alang kanato. Sa hiniusang tingog ato karong ipadayag ang atong mga pag- ampo ug panginahanglan uban sa hingpit nga pagsalig ug paglaum. Sa matag pangaliyupo kita motubag: 

O DIOS SA KALOOY, DUNGGA KAMI.

1. Nga ang kahayag ni Kristo modan-ag sa mga pangulo sa Simbahan, ang Santo Papa, mga Obispo ug kaparian nga magmadasigon silang mosangyaw sa Ebanghelyo uban sa kinasingkasing nga pagsaksi ug pagpuyo sa Iyang mga mensahe. Mag-ampo kita.

2. Nga ang kahayag ni Kristo molamdag sa mga lideres sa atong panggamhanan kansang katawhan nga ilang gialagaran makaangkon na sa matuod nga kaangayan, kalinaw ug kahiusahan. Mag-ampo kita.

3. Nga ang kahayag ni Kristo mogiya sa tanan nga mitugyan sa ilang kaugalingon sa pag-alagad sa matag katilingban diin sila nahisakop ug magpabilin unta silang lig- on sa pagbuhat sa ilang mga kaakuhan. Mag-ampo kita.

4. Nga ang kahayag ni Kristo mosidlak sa matag kasingkasing sa atong mga kaigsoonan nga nag-antus sa kawad-on aron dili sila kawad-an sa paglaum ug kadasig sa pagpakabuhi bisan pa sa mga pagsulay nga ilang nahiaguman. Mag- ampo kita.

5. Nga ang kahayag ni Kristo magsiga sa matag usa kanato aron kita sa kanunay magmainiton nga moalagad sa atong isigkatawo. Mag-ampo kita.

6. Nga ang kahayag ni Kristo mopadilaab sa atong kinahiladman diin ang atong mga personal nga katuyuan atong ikahalad diha sa kahilum.

Pangulo: Mahigugmaong Amahan, dungga ang mga pag-ampo sa Imong katawhan ug giyahi ang among panghunahuna nga sa kanunay magsunod kami sa Imong kabubut-on pinaagi ni Kristo among Manluluwas ug Ginoo sa kahangturan. Amen.