PANGILIN SA SAGRADA PAMILYA

 PANGILIN SA SAGRADA PAMILYA

A. Unang Basahon 

Sirac 3:2-6,12-14

Ang pagbasa gikuha gikan sa basahon ni Sirac.

Mga kabataan, pamatia- ninyo ang inyong amahan, ug sa ingon mahilayo kamo sa kadautan. Ang Ginoo naghatag sa mga amahan sa gahum ibabaw sa ilang mga anak ug gihatagan ang mga anak sa katungdanan sa pagtahud sa ilang mga inahan. Kun tahuron ninyo ang inyong amahan, makabayad kamo sa inyong mga sala, ug kun inyong pasidunggan ang inyong inahan, nagtigom kamo og dakung bahandi. Kun tahuron ninyo ang inyong amahan, usa ka adlaw niana ang inyong kaugalingong mga anak maglipay kaninyo; ang Ginoo mamati sa inyong mga pag-ampo. Kun tahuron ninyo ang Ginoo pinaagi sa pagpasidungog sa inyong amahan ug sa paglipay sa inyong inahan, magpuyo kamo og taas nga kinabuhi.

Anak, atimana ang inyong amahan inigkatigulang na niya; ayaw siya hatagi'g kaguol samtang buhi pa siya. Kaloy-i şiya bisan kun ango-angohon na siya; ayaw siya tamaya tungod lang kay ikaw lig-on pa ug maayo pa'g lawas. Ang Ginoo dili malimot sa mga kaayo nga imong gipakita ngadto sa imong amahan; magtabang kini kanimo aron imong mabayran ang imong mga kasal-anan.

Mga igsoon, ang Pulong sa Ginoo.

B. Salmo Responsoryo

Salmo 128:1-2,3,4-5

Tubag (R) - Bulahan sila nga mahadlokon sa Ginoo, ug nagalakaw sa iyang kadalanan.

Bulahan ikaw mahadlokon sa Ginoo, nga nagalakaw sa iyang kadalanan. Kay magakaon sa bunga sa imong binuhatan; mabulahan gayud ikaw ug mapanalanginan. (R)

Ang imong asawa mahisama sa usa ka mabungahon nga kahoy nga anaa sa tugkaran sa imong balay; Ang imong mga anak sama sa mga tanum nga olibo libot diha sa imong talad. (R)

Aßnia, ingon niini pagpanalangin ang tawo nga mahadlokon sa Ginoo. Ang Ginoo manalangin kanimo gikan sa Sion; makakita unta ikaw sa kausbawan sa Jerusalem sa tanang mga adlaw sa imong kinabuhi. (R)

C. Ikaduhang Basahon

Colosas 3:12-21

Ang pagbasa gikuha gikan sa sulat ni San Pablo ngadto sa taga-Colosas.

Kamo ang katawhan sa Dios; gihigugma kamo niya ug gipili aron maiya. Busa kinahanglan nga magmaloloy-on kamo, magmahigugmaon, magmapaubsanon, magmaaghop ug magmapailubon. Pagtinabangay ug pagpinasayloay kamo kun duna kamoy mulo batok kang bisan kinsa kaninyo. Pagpinasayloay kamo ingon nga gipasaylo kamo sa Ginoo.

Ug idugang niining tanan ang paghiguma nga maoy magbugkos sa tanan ngadto sa hingpit nga panaghiusa. Paharia sa inyong kasingkasing ang kalinaw nga gikan kang Kristo, kay alang niining kalinawa gitawag kamo sa Dios aron mahiusa kamo diha sa usa ka lawas, ug magmapasalam aton kamo. Papuy-a sa inyong kasingkasing ang mensahe ni Kristo uban sa tanang kabahandianon niini. Pagtinudloay ug pagpahimangnoay kamo uban sa tanang kaalam. Pag -awit kamo'g mga salmo ug mga balaang alawiton; awiti ninyo ang Dios uban sa pasalamat diha sa inyong mga kasingkasing. Busa bisa'g unsa ang inyong buhaton o isulti, himoa kini sa ngalan sa Ginoong Jesus, uban sa pagpasalamat sa Dios nga Amahan pinaagi kaniya.

Mga asawa, sunda ug tahura ninyo ang inyong bana kay mao kini ang angay ninyong buhaton ingon nga mga kristohanon. Mga bana, higugmaa ang inyong asawa ug ayaw sila'g daugdauga. Mga anak, pagmasinugtanon kamo kanunay sa inyong mga ginikanan kay mao kanay makapahimuot sa Dios. Mga ginikanan, ayaw palaguta ang inyong mga anak kay tingali unya'g mawad-an sila'g kadasig.

Mga igsoon, ang Pulong sa Ginoo.

D. Ebanghelyo

Lucas 2:22-40, 2: 22, 39-40

Ang pagsangyaw sa Maayong Balita sumala ni San Lucas

Miabot ang panahon nga si Jose ug si Maria magtuman sa seremonyas sa paghinlo s umala sa gisugo sa balaod ni Moises. Busa gidala nila ang bata ngadto sa Jerusalem aron ihalad nila sa Ginoo. Mao kini ang nasulat sa balaod sa Ginoo: "Ang tanang panganay nga lalaki kinahanglang ihalad ngadto sa Ginoo. "Miadto usab sila aron paghalad sumala sa gisugo sa balaod sa Ginoo: usa ka paris nga tukmo o duha ka gagmay'ng salampati. Niining panahona may tawo nga nagpuyo sa Jerusalem ginganlag Simeon. Maayo siyang tawo ug mahadlokon sa Dios, ug nagpaabot sa kaluwasan sa Israel. Nag-uban kaniya ang Espiritu Santo, ug gipasaligan siya sa Espiritu Santo nga dili siya mamatay hangtod makita niya ang Mesiyas nga gisaad sa Ginoo. Minandoan sa Espiritu, misulod si Simeon sa Templo. Sa gidala na si Jesus sa iyang mga ginikanan ngadto sa Templo aron didto ilang himoon kaniya ang gisugo sa Balaod, gikugos ni Simeon ang bata ug nagpasalamat siya sa Dios: "Karon, Ginoo, kay imo na mang gituman ang imong saad, itugot na nga ang imong sulogoon mohalin nga malinawon. Kay sa kaugalingon kong mga mata nakita ko ang imong kaluwasan, nga imong giandam atubangan sa tanang katawhan: Usa ka kahayag nga magpadayag sa imong dalan ngadto sa mga dili Judio. Ug maghatag sa himaya ngadto sa imong katawhan, ang Israel."

Nahibulong ang amahan ug ang inahan sa bata sa pagkadungog nila sa mga butang nga gisulti ni Simeon bahin kaniya. Unya nanalangin si Simeon kanila ug miingon kang Maria nga inahan sa bata, "Kining bataa gipili sa Dios alang sa kalaglagan ug kaluwasan sa daghang mga tawo sa Israel; mahimo siyang ilhanan gikan sa Dios nga supakon sa daghang mga tawo, tungod niini madayag ang ilang mga tinagoang hunahuna. Ug ang kaguol, sama sa usa ka hait nga espada, molagbas sa imong kaugalingong kasingkasing."

Didtoy usa ka babaye nga propeta nga ginganlag Ana, anak ni Panuel, sa banay ni Aser. Usa siya ka babayeng tigulang na nga minyo sulod sa pito ka tuig, ug unya nabalo sulod sa 84 na ka tuig. Wala gayod siya mobiya sa Templo; adlaw ug gabii nagsimba siya sa Dios, nagpuasa ug nag-ampo. Niadto gayong taknaa miabot siya ug nagpasalamat sa Dios, ug misulti bahin sa bata ngadto sa tanan nga nagpaabot nga ang Dios motubos sa Jerusalem.

Tapos matuman ni Jose ug Maria ang tanan nga gisugo sa balaod sa Ginoo, mipauli sila sa Galilea, ngadto sa Nazaret, ang ilang lungsod nga gipuy-an. Ug mitubo ang bata ug nahimong kusgan; napuno siya sa kinaadman, ug ang panalangin sa Dios diha kaniya.

Mga igsoon, ang Maayong Balita sa atong Ginoo.

-O-

Lucas 2: 22, 39-40

Ang pagsangyaw sa Maayong Balita sumala ni San Lucas

Miabot ang panahon nga si Jose ug si Maria magtuman sa seremonyas sa paghinlo sumala sa gisugo sa Balaod ni Moises. Busa gidala nila ang bata ngadto sa Jerusalem aron ihalad nila sa Ginoo.

Tapos matuman ni Jose ug Maria ang tanan nga gisugo sa balaod sa Ginoo, mipauli sila sa Galilea, ngadto sa Nazaret, ang ilang lungsod nga gipuy-an. Ug mitubo ang bata ug nahimong kusgan; napuno siya sa kinaadman, ug panalangin sa Dios diha kaniya.

Mga igsoon, ang Maayong Balita sa atong Ginoo.

E. Komentaryo

Tema: Ang Pamilya mao ang Salag sa Pagtoo.

Mga upat na ka tuig ang milabay nagkasakit ang usa ka amahan sa pamilya. Tungod sa kalisod sa panahon, nagproblema ang mga igsoon pagpangita og salapi aron magamit alang sa tambal ug uban pang mga bayronon sa hospital. Ug tungod kay dili man sayon, ug dili man mahimo sa usa lamang ka anak, nagtinabangay sila bisan unsa ka gamay nga anaa kanila. Ug dili lang salapi ang ilang gihatag, kundili ang ilang panahon sa pagbisita sa ilang amahan. Bisan unsa kadaghan ang ilang trabaho, ila gayong gipaningkamutan nga magpuli-puli sila pagbantay sa hospital, kay kini ang ilang konkreto nga pagpadayag sa ilang pagmahal ug kinasingkasing nga pagpasalamat sa gugma nga dili kabayran. Ug samtang gihimo nila kining tanan, namatikdan nila nga daghan kaayo ang kausaban. Nahimo silang mas suod sa usag- usa. Nadugangan ang ilang kaikag sa pagtinabangay. Ug milambo ang gugma ug pagsinabtanay sa usag usa bisan pa man sa mga kalisdanan nga ilang natagamtaman.

Mga igsoon, atong gisaulog karon ang pangilin sa Sagrada Pamilya ni Jesus, Jose ug Maria. Ang ilang banay, gitawag nga balaan, sagrada tungod kay sa ilang kinabuhi isip usa ka pamilya, ang gugma sa Dios maoy naghari ug dili ang kaugalingon ug hinakog nga panglantaw. Kining balaanon nga kinabuhi sa ilang pamilya gipadayag dili diha lamang kutob sa mga espirituhanong mga kaakuhan kundili diha usab sa konkreto nga mga panghitabo sa ilang kinabuhi.

Sumala sa atong nadunggan diha sa pagbasa, ilabi na sa ebanghelyo, duha ang kahulugan niining pangilin:
una, kabahin sa hingpit nga pakighiusa kanatong mga tawo sa Ginoong Jesus nga nagsugod pa sa
pagpanamkon kaniya, ug ikaduha, gihalad siya sa Templo isip panganay nga lalaki nila Maria ug Jose, kay
mao man kini ang sugo sa Balaod ni Moises. Sumala usab sa maong lagda, kinahanglan nga dungan sa paghalad sa bata, mahinloan ang iyang inahan kay maoy pagtuo sa mga Judeyo nga ang pagpakatawo sa bata makapahugaw sa inahan. Dinhi niining higayona, gitan-aw sa Simbahan ang paghalad sa Batang Jesus isip pag-ila kaniya nga Mesiyas kansang kahayag misidlak alang sa kaluwasan sa tibuok kalibutan (Lk.
2:32). Mao kini ang awit nga gilitok sa tigulang nga si Simeon sa dihang gikugos niya ang Diosnong Bata.
Atong hinumduman nga ang pamilya mahinungdanon kaayo nga bahin sa atong katilingbang Kristohanon. Sumala sa Ikaduhang Konselyo Batikano, ang pamilya mao ang usa ka gamay nga simbahan. Sa ato pa, nga sa panahon nga gidawat sa magtiayon ang sakramento sa kaminyoon, ila usab nga gidawat ang usa ka sagrado ug balaan nga misyon nga mao ang pagtukod sa usa ka gamay nga simbahan nga mao ang pamilya. Sa atong pagtukod niining gamay nga simbahan dili nato sundon kadtong sayop nga gihimo sa tawo sa ebanghelyo nga nagtukod sa iyang balay ibabaw sa balas. Sa dihang mibundak ang ulan ug mibaha ang mga suba, ug ang hangin mihapak ug mikusokuso sa iyang balay, natumba kini ug nagun- ob. Busa, ayaw gayod pagtukod ibabaw sa balas; ibabaw sa balas sa garbo ug kahakog, ibabaw sa balas sa pagkamapahitas-on ug pagkamadudahon. Hinoon, sunda kadtong maalamon nga nagtukod sa iyang balay ibabaw sa bato. Sa dihang mibundak ang ulan ug mibaha ang mga suba, ug ang hangin mihapak ug mikusokuso niadtong balaya, nagpabiling lig-on nga nagbarog ug wala gayod matumba. Busa, tukura gayod ang inyong balay ibabaw sa bato; ibabaw sa bato sa gugma ug pagpasaylo, ibabaw sa bato sa pagsalig ug sa tumang pagkamapaubsanon. Sa laktod nga pagkasulti, ibabaw sa pundasyon ni Kristo. Akong usbon mga igsoon, ang kalig-on sa pamilya nagsukad diha sa pagtuman sa kabubut-on sa Dios.

Giya alang sa pamalandong:

1. Naghari ba ang gugma ug pagsinabtanay diha sa atong tagsa tagsa ka pamilya?

2. Ang Sagrada Pamilya ba ang nahimo natong sumbanan diha sa pagmugna nato og gamay nga katilingban nga mao ang pamilya?

F. Pangaliya

Pangulo: Mag-ampo kita nga niining pagsaulog nato karon sa Pangilin sa Sagrada Pamilya, dunggon unta sa atong Langitnong Amahan ang mga pag- ampo nga atong ihalad karon. Sa matag pangamuyo kita motubag: 

AMAHAN, DUNGGA KAMI.

1. Alang sa mga pangulo sa Simbahan nga lig-onon unta sila sa Dios diha sa ilang makanunayon nga pagsangyaw uban sa ilang matinud-anon nga pagsaksi sa ehemplo nga gipadayag ni Kristo. Mag- ampo kita.

2. Alang sa mga nagdumala sa atong

panggamhanan nga mahiusa ug mohaum unta sa kabubut-on sa Dios ang ilang mga gimbuhaton alang sa kabulahanan sa tanang katawhan. Mag-ampo kita.

3. Alang sa matag Kristohanong pamilya nga ang kahiusahan, gugma ug pagtahud sa usag usa maoy maghari sa inadlaw adlaw nilang pagkinabuhi alang sa lig-on nga pundasyon sa katukuran sa Kristohanon nga katilingban. Mag-ampo kita.

4. Alang sa atong mga igsoon nga nag-antus sa mga nagkalainlaing kalisdanan sa kinabuhi nga magpabilin unta ang ilang pagtoo ug pagsalig nga ang Dios mao ray bugtong makahupay sa ilang kasamtangan nga kahimtang. Mag-ampo kita.

5. Alang sa mga kabatan-onan nga hatagan unta nila og dakung bili ang paghupot sa mga Kristohanong hiyas nga maoy magdala kanila sa kahiusahan sa atong Langitnong Amahan. Mag-ampo kita.

6. Alang sa atong kaugalingon nga katuyuan, ato kining ihalad diha sa kahilum.

Pangulo: Amahan sa gugma, hiusaha ang tanan namong mga pag-ampo ug itugot nga amo na kining maangkon pinaagi ni Kristo Imong Bugtong Anak uban sa kahiusahan sa Espiritu Santo, Dios hangtud sa kahangturan. Amen.