IKATULONG DOMINGGO SA ADBIYENTO

IKATULONG DOMINGGO SA ADBIYENTO

I. KASAULOGAN SA PULONG

(Magamit sa tanang panahon)

Kining maong porma mahimong gamiton sulod sa tanang semana sa Liturhiyanhong tuig, Solemnidad ug Kapistahan.

1. RITO SA PAGSUGOD

1. Pasiuna

Pangulo: Mga igsoon ko diha kang Kristo, maayong kanatong tanan.

Ania na usab kita karon aron sa pagsaulog niining balaang takna nga atong gigahin alang sa atong Ginoo ug alang sa usa'g-usa.

Angayan lamang nga atong andamon ang atong kaugalingon alang sa mas makahuluganon ug madasigon nga pagsaulog niining hiniusang pag-ampo sa katilingban.

Sa ngalan sa atong halangdong Arsobispo sa Davao, Romulo G. Valles, inubanan sa pagtudlo sa atong Kura Paroko, si Reberendo Padre Johnny A. Autida. ako, inyong Pangulo sa Liturhiya (PSL) gipadala ug gitahasan sa pagdumala niining senemanang pag-ampo.

(Magpaila ang PSL sa iyang pangalan kon ugaling magsaulog sa laing katilingban apan kon anaa mismo sa katilingban, dili na kinahanglan nga magpaila pa. Timbayaon ang mga bisita kon aduna. Kon wala, ang pangulo mopadayon)

Manindog kita ug atong awiton ang pasiunang awit.

(Mahimong magpili og awit nga haum sa tema sa kasaulogan)

2. Pasiunang Awit

3. Pagpangandam sa Kasaulogan

Pangulo: Sa ngalan sa Amahan, sa Anak ug sa Espiritu Santo.

Tanan : Amen.

Pangulo: Ang matag usa kanato gibuhat sa Dios tungod sa gugma ug sumala sa iyang dagway ug kasamahan. Sa atong pagpakasala sa kaugalingon ug sa atong isigkatawo, nahimulag kita sa mga mata sa Dios ug sa tawo. Ug agi'g pagpangandam ning atong kasaulogan, diha sa tumang kahilom atong hinulsolan ang mga kalapasan nga atong nabuhat batok sa Dios ug sa isigkatawo ug pangayoon ta ang pasaylo sa atong langitnong Amahan.

(Hilom sa makadiyot)

Pangulo: Duyog sa hiniusang pagdayeg sa Dios, atong awiton ang Ginoo, kaloy-i kami.

Tanan : Ginoo, kaloy-i kami (awiton)

4. Awit sa Himaya

(Awiton lamang panahon sa dagkong solemnidad o kapistahan sa atong simbahan.)

5. Pasiunang Pag-ampo

(Pangadyeon ang Pasiunang Pag-ampo nga anaa Appendix X, pahina 88-115)

Pangulo: Amahan, pagkamatinud-anon sa imong mga saad ug pagkasuod sa imong Simbahan, nagmaya ang kalibutan sa paglaum nga moabut ang Manluluwas ug naglantaw sa pangandoy sa iyang pagbalik sa katapusang adlaw.

Andam kanunay ang among kasingkasing ug papahawa ang kasubo nga nagpugong kanamo gikan sa gibati nga kalipay ug paglaum, kay Siya Dios hangtud sa kahangturan.

Kini among gipangayo pinaagi sa among Ginoong Jesukristo imong Anak, nga buhi ug hari uban kanimo ug sa Espiritu Santo, Dios nga usa hangtud sa kahangturan.

II. PAGSANGYAW SA PULONG SA DIOS

(Ang PSL o pangulo moadto sa atubangan sa altar ug moyukbo [bow] niini. Hagkan niya ang leksyonaryo, dayon kuhaon ug ibayaw atubangan sa katawhan ug kuhaon kini sa unang magbabasa diha sa atubangan. Pagkahuman, mobalik ang PSL sa iyang lingkoranan samtang ang unang magbabasa moadto sa Ambo. Sa dili pa ang pagbasa, dapiton sa pangulo ang katawhan sa pag-ingon:)

Pangulo: Mga kaigsoonan, paminawon nato karon ang Pulong sa Dios nga nagpadayag sa gugma sa Amahan nganhi kanato. Sa atong pagpaminaw, atong sination kining maong gugma nga maoy nagpalawom sa atong paglaum ug pagtoo sa Ginoo.

Palihug manglingkod.

1. Unang Pagbasa

Is. 61:1-2, 10-11

Ang pagbasa gikuha gikan sa basahon ni Propeta Isaias.

Ania kanako ang espiritu sa Ginoong Dios kay gipili ug gipadala man ako niya aron pagsangyaw og maayong balita ngadto sa mga kabos; gipadala ako niya aron paglipay sa mga masulob-on ug pagpagawas sa mga binilanggo ug mga binihag. Gipadala niya ako aron pagmantala nga miabot na ang panahon nga luwason sa Ginoo ang iyang katawhan ug panimaslan ang ilang kaaway. Gipadala niya ako aron paghupay niadtong nagsubo. Magmalipayon ako pag-ayo tungod sa nahimo sa Ginoo, ang kalag ko magmaya tungod sa akong Dios; kay gibistihan niya ako sa bisti sa kaluwasan, gikupoan niya ako sa kupo sa pagkamatarong, sama sa pamanhonon nga nagkwintas og mga bulak, ug sama sa pangasaw-onon nga nagdayandayan sa iyang kaugalingon sa mga alahas. Kay ingon nga ang mga yuta mopaturok ug ingon nga ang tanaman mopaturok sa gipugas diha usab niini, paturokon usa sa Ginoong Dios ang katarong ug pagdayeg sa atubangan sa gipugas diha niini, paturokon usab sa sa Ginoong Dios ang katarong ug pagdayeg atubangan sa kanasoran.

Mga igsoon, ang Pulong sa Ginoo.

2. Salmo Responsoryo

Lukas 1:46-48,50,53-54

Tubag (R) - Ang akong kalag nagmalipayon diha sa Dios nga akong Ginoo.

Nagdayeg ang akong kasingkasing sa Ginoo. Ug magmalipayon ang akong Espiritu tungod sa Dios nga akong Manluluwas. Kay nahinumdum siya kanako nga iyang ubos nga binuhat. Ug sukad karon ang tanang tawo motawag kanako'g bulahan. (R)

Nagpakita siya'g kalooy sa tanang may kahadlok kaniya. Gikan sa usa ka kaliwatan ngadto sa laing kaliwatan. (R)

Gibusog niya sa mga maayong butang ang mga gigutom, ug gipapahawa nga walay dala ang mga dato. Gituman niya ang iyang gisaad sa atong mga katigulangan. Mitabang siya kang Israel nga iyang sulugoon, ug nahinumdum siya pagpakita'g kalooy kang Abraham ug sa tanan niyang mga kaliwat hangtud sa kahangturan. (R)

3. Ikaduhang Pagbasa

1 Tesalonika 5:16-24

Ang pagbasa gikuha gikan sa Unang Sulat ni San Pablo ngadto sa taga-Tesalonika.

Pagmalipayon kamo kanunay, pag-ampo sa tanang panahon, ug pagpasalamat kamo bisa'g unsay modangat kaninyo. Kini mao ang kabubut-on sa Dios nga buhaton ninyo sa ngalan ni Kristo Jesus.

Ayaw ninyo babagi ang lihok sa Espiritu Santo, ug ayaw tamaya ang mga mensahe gikan sa Dios. Suta-a ninyo ang tanan; ampingi ang maayo, ug isalikway ang dautan. Hinaut unta nga ang Dios kinsa naghatag kanato'g kalinaw, magbalaan kaninyo sa hingpit ug manalipod kaninyo sa inyong espiritu, kalag ug lawas ug magputli gayod kaninyo hangtod sa pag-abot sa atong Ginoong Jesukristo. Sanglit matinud-anon man ang nagtawag kaninyo, buhaton gayod niya kini.

Mga igsoon, ang Pulong sa Ginoo.

4. Pagpasidungog sa Ebanghelyo

(Ang pangulo mobow sa may altar agig pagtahod ug moadto sa may ambo alang sa pagbasa sa Ebanghelyo ug dapiton ang katawhan sa pagtindog pinaagi sa pag-ingon:)

Pangulo Manindog kita ug atong pasidunggan ang Ginoo diha sa atong pag-awit sa aleluya.

5. Ebanghelyo

Jn. 1:6-8, 19-28

Ang pagsangyaw sa Maayong Balita sumala ni San Juan.

May tawo nga gihinganla'g Juan nga gipadala s a Dios aron pagsaksi ngadto sa mga tawo mahitungod sa kahayag, aron ang tanan makadungog sa mensahe ug mutuo. Si Juan dili mao ang kahayag, apan mianhi siya aron pagsaksi mahitungod sa kahayag.

Kini mao ang gisulti ni Juan sa diha nga ang mga kadagkoan sa mga Judio sa Jerusalem nagpadala'g mga pari ug mga Levita aron pagpangutana kon kinsa siya. Wala magdumili si Juan pagtubag kanila; mitug-an siya sa walay lipodlipod nga dili siya mao ang Mesiyas. "Kinsa ka man diay?" nangutana sila. "Si Elias ka ba?" "Dili," mitubag siya. "Ikaw ba ang Propeta nga among gipaabot?" nangutana sila. "Dili," mitubag siya. Ug sila miingon, "Nan, sultihi kami kon kinsa ka aron may ikatubag kami sa mga nagsugo kanamo. Unsa may ikasulti mo mahitungod sa imong kaugalingon?" Si Juan mitubag, "Ako mao ang tingog nga nagsinggit sa kamingawan: Hawani ang dalan nga agian sa Ginoo!" Kini ang gisulti ni Propeta Isaias: "Ang mga sinugo pinadala sa mga Pariseo. "Gipangutana na usab nila si Juan, "Kon ikaw dili mao ang Mesiyas, ni si Elias, ni ang mga Propeta, nganong namunyag ka man?" Si Juan mitubag, "Ako nagbunyag pinaagi sa tubig, apan may usa diha kaninyo nga wala ninyo mailhi. Moabot siya sunod kanako, apan ako dili takos bisan gani pagtangtang sa higot sa iyang sandalyas. "Kining tanan nahitabo didto s a Betania, sa tabok sa Suba sa Jordan diin namunyag si Juan.

Mga igsoon, ang Maayong Balita sa atong Ginoo.

6. KOMENTARYO

Pangulo: Manglingkod kita ug paminawon ang Komentaryo nga makatabang kanato sa pagsabot sa pulong sa Dios nga atong nadungog.

Tema: Kalipay nga matuod diha sa Ginoo.

"Paglipay diha sa Ginoo! Paglipay uban kaniya!” Mga igsoon, karong Dominggoha ang ikatulo nga Dominggo sa Adbiyento. Kini mao ang gitawag nato nga "Gaudete Sunday". Gikan kini sa pinulungan nga Latin nga nagkahulugan og "paglipay", "pagsadya”, o "pagmaya".

Kini nagpasabut nga karon mao ang Dominggo sa pagmaya. Mao gani nga kung inyong nabantayan, ang kolor sa mga gisuot sa mga pari karon pink or rose tungod kay kini mao nga kolor nga nagsimbolo sa kalipay ug pagmaya. Unya nganong masulub-on man lagi ang inyong mga panagway? Pahiyum pud mo bi!

Ang atong mga pagbasa karong Dominggoha nakapunting ug nakasentro sa pulong kalipay. Atong nadungog sa unang pagbasa gikan kang Propeta Isaias ang pahatag og paglaum nga luwason ang nasod sa Israel gikan sa mga pagpanglutos. Gani nadungog nato ang mga timailhan ug mga panghitabo ngano nga adunay elemento sa paglipay: ang pagtudlo sa maayong balita, ang pagkahimong gawasnon sa mga binilanggo, ang paglingkawas gikan sa kangitngit, ang pagkakaplag og kahupayan sa mga nagsubo ug mga nagbangutan, ug labaw sa tanan ang pagpahibalo nga miabut na ang panahon aron luwason sa Ginoo ang iyang katawhan. Kining tanan nagpadayag lamang og dakung kalipay tungod sa maayong mensahe sa Ginoo ngadto sa iyang katawhan.

Ang atong ikaduhang pagbasa naghisgot usab og kalipay. Gani sa sulat ni San Pablo ngadto sa mga taga Tesalonica, siya miingon, "Paglipay kamo kanunay. Pag-ampo sa tanang panahon ug pagpasalamat kamo bisag unsay modangat kaninyo. Kini mao ang kabubut-on sa Dios nga buhaton ninyo sa ngalan ni Kristo Jesus." Dinhi gidasig ug gipadayag ni Pablo nga magmalig-on ug magmalipayon unta ang mga magtotoo sa Tesalonica bisan pa man sa mga pagpanglutos ug kalisud nga ilang nahiaguman gikan sa mga kamut sa mga Judio ug mga pagano.

Sama sa atong una ug ikaduhang pagbasa, ang atong ebanghelyo usab nagpadayag ug nakasentro sa pagkamalipayon. Sa unsang paagi nato kini makita ug mabati? Adunay duha ka mga rason. Una, angayan nga magmalipayon kita tungod kay gipadala sa atong langitnong Amahan ang iyang bugtong Anak dinhi kanato gumikan sa iyang dakung gugma alang kanato. Ug ikaduha, magmalipayon gayod kita tungod kay sa pagpadala sa atong Amahan kang Jesukristo, kita nakaangkon ug gihatagan og grasya sa kaluwasan. Si Jesus mao ang atong manluluwas. Siya mao ang kahayag nga gisaksihan ni Juan sa atong ebanghelyo. Siya ang kahayag nga nagdala og kaluwasan, kaluwasan gikan sa atong mga kagul-anan, mga kasubo, mga problema ug mga pagbangotan. Busa angay lamang nga atong ihalad ang atong kinabuhi diha kang Kristo. Himoon unta nato siya nga giya sa atong tagsatagsa ka mga pagpaningkamot tungod kay siya ang kahayag nga maoy modan-ag kanato ngadto sa dalan sa kaluwasan.

Tinuod nga sa atong kinabuhi, adunay daghang kahigayonan diin mas gipili pa nato ang pagpuyo sa kangitngit. Ang pagpuyo pananglitan sa kasal-anan, ang pagpangdaut nato sa atong isigkatawo, ang paghimo nato og dili maayo ug dili subay sa katarong. Gani adunay higayon sa atong kinabuhi diin kining pagpuyo nato sa kangitngit nahimo nang kahayag alang kanato. Busa mga igsoon karong Dominggoha kita gi-awhag ug gipahinumduman sa pagpangita sa tinuod nga kahayag, sa tinuod nga kalipay ug sa tinuod nga bahandi sa atong kinabuhi. Ug walay lain nga makahatag kanato niini gawas sa atong Ginoo. Sa atong Ginoo nga maoy tinubdan sa kalipay nga walay katapusan. Kini mao ang hinungdan nga angayan kita nga maglipay, magsadya ug magmaya karong panahona.

Giya alang sa Pamalandong:

1. Unsa man ang matuod nga sukdanan sa kalipay sa tawo? Bahandi ba? Gahum? Kalampusan ba?

2. Naghatag ba kini og tinuoray nga kalipay kanato?

(Pagkahuman, maggahin og hamubong kahilom alang sa pagpamalandong sa mensahe nga gipadayag. Human sa hamubong kahilom. mopadayon ang PSL sa pag-ingon:)

Manindog ang tanan.

III. PAGPADAYAG SA PAGTOO

1. Kredo

Pangulo: Karon atong ipadayag ang atong pagtoo.

Nagatuo kami sa usa ka, Dios, ang Amahan, ang makagagahum sa tanan, magbubuhat sa langit ug sa yuta, ug sa tanang mga makita ug dili makita. Nagatuo kami sa usa ka Ginoo, si Jesucristo, ang Bugtong Anak sa Dios, gianak sa Amahan sa wala pay katuigan, Dios gikan sa Dios, kahayag gikan sa kahayag, matuod nga Dios gikan sa Dios nga matuod, gianak, dili binuhat, usag kinaiya sa Amahan. Pinaagi kaniya nangahimo ang tanan. Tungod kanatong mga tawo. ug alang sa atong kaluwasan mikanaog siya gikan sa langit. Sa lalang sa Espiritu Santo nahimo siya nga may lawas gikan ni Maria nga ulay ug nahimong tawo. Tungod kanato gilansang siya sa krus sa sugo ni Poncio Pilato; nag-antos siya, namatay ug gilubong. Sa ikatulong adlaw nabanhaw siya aron matuman ang Kasulatan. Misaka siya sa langit ug nagalingkod sa tuo sa Amahan. Mobalik siya nga mahimayaon aron paghukom sa mga buhi ug sa mga minatay, ug ang iyang gingharian walay katapusan. Nagatoo kami sa Espirito Santo, ang Ginoo ug ang Maghahatag sa kinabuhi. Nagagikan siya sa Amahan ug sa Anak. Dungan sa Amahan ug sa anak gisimba siya ug gihimaya, misulti pinaagi sa mga propeta. Nagatoo kami sa usa, Santos, Katoliko ug Apostoliko nga Simbahan. Nagaila kami sa usa ka bunyag alang sa kapasayloan sa mga sala. Nagapaabot kami sa pagkabanhaw sa mga minatay, ug sa kinabuhi sa umaabot nga kalibutan. Amen.

2. Pangaliya Alang sa Tanan

(Ang pangaliya nga inandam sa parokya ang maoy gamiton, kun duna, apan kon wala, gamiton ang mga Pangaliya nga gihikay sa ALC).

Pangulo: Mga igsoon diha sa atong pagpangandam sa pag-abot sa atong Manunubos, ato karong ihalad sa atong Mahigugmaong Amahan ang atong mga pag-ampo ug panginahanglan. Sa matag pag-ampo kita motubag:

GINOO, DUNGGA ANG IMONG KATAWHAN.

1. Alang sa atong Santo Papa, mga Obispo ug kaparian, magmakanunayon unta sila sa ilang misyon sa pagmantala sa matuod nga kayahag nga maoy maghatag og lamdag sa espirituhanong kinabuhi sa tanang katawhan. Mag-ampo kita.

2. Alang sa mga pangulo sa atong nasud, ila untang hatagan og dakung bili ang pagsulbad sa mga nag-unang suliran sa katawhan ilabina ang mga biktima sa nagkalainlaing katalagman. Mag-ampo kita.

3. Alang sa tanang pamilya sa matag katilingban nga unta si Kristo maoy himoon nilang sentro sa ilang inadlaw- adlaw nga pagkinabuhi aron maghari ang kalinaw ug pagsinabtanay sa usa'g usa. Mag-ampo kita

4. Alang sa matag usa kanato nga mapuy- an unta nato ang mga mensahe nga atong nadungog aron mahimo kitang buhing sumbanan ug saksi sa walay kinutubang paghigugma sa Dios. Mag-ampo kita.

5. Alang sa atong mga mahal sa kinabuhi nga mihalin na ngadto sa laing kalibutan nga makadangat na sila sa Gingharian ug ila nang matagamtaman ang kalipay nga walay katapusan. Mag-ampo kita.

6. Alang sa atong personal nga katuyuan ato kining ihalad diha sa kahilum.

Pangulo: Langitnong Amahan, tinubdan sa tanang grasya ug kaayo, dungga ang among mga pag-ampo nga among gihalad karon ug himoa nga mahimo kaming angayan sa pagdawat niini pinaagi ni Kristo among Ginoo. Amen.

3. Awit sa Pagdayeg

a. Awit ni Zacarias (Benedictus)

(Kung ang kasaulogan himoon sa buntag)

Pangulo: Mga igsoon, tirſuod gayud nga atong Dios maloloy-on kanato. Siya mipadala sa iyang bugtong Anak, ang atong kahayag ug manlu- luwas. Busa, ato siyang daygon sa pag-ingon:

Pangulo: Atong daygon ang Ginoo, ang Dios sa Israel!

Tanar. : Atong daygon ang Ginoo, ang Dios sa Israel!

Pangulo: Daygon nato ang Ginoo, ang Dios sa Israel! Kay mianhi siya aron pagtabang sa iyang katawhan ug paghatag kanilag kagawasan.

Tanan : Atong daygon ang Ginoo, ang Dios sa Israel!

Pangulo: Gipaanhi niya kanato ang usa ka gamhanang Manluluwas, nga kaliwat sa iyang sulugoon nga si David.

Tanan : Atong daygon ang Ginoo, ang Dios sa Israel!

Pangulo: Kini maoy iyang giingon kaniadto pinaagi sa iyang mga balaang propeta: Misaad siya sa pagluwas kanato gikan sa atong mga kaaway, ug gikan sa gahum niadtong tanan nga nagdumot kanato.

Tanan : Atong daygon ang Ginoo, ang Dios sa Israel!

Pangulo: Miingon siya nga mopakita siyag kalooy sa atong mga katigulangan ug mahinumdom sa balaang kasabutan.

Tanan: Atong daygon ang Ginoo, ang Dios sa Israel!

Pangulo: Misaad siya sa atong amahan nga si Abraham. ug nanumpa nga iya kitang luwason gikan sa atong mga kaaway, ug mitugot kanato nga mag- alagad kaniya sa walay kahadlok, nga mahimong balaan ug matarung sa atubangan niya sa tibuok natong kinabuhi.

Tanan Atong daygon ang Ginoo, ang Dios sa Israel!

Pangulo: Ug ikaw, anak ko, tawgon ka nga propeta sa Dios nga Labing Halangdon; mag-una ka sa Ginoo aron pag-andam sa iyang dalan sa pagpahibalo sa iyang katawhan nga maluwas sila pinaagi sa pagpasaylo sa ilang mga sala.

Tanan: Atong daygon ang Ginoo, ang Dios sa Israel!

Pangulo: Kay ang atong Dios maloloy-on ug malumo; siya maoy mopadan-ag kanato sa banagbanag nga masanagon sa atong kaluwasan ug mobanwag gikan sa langit sa tanang nagpuyo sa mangitngit nga landong sa kamatayon, pag-agak sa atong mga lakang ngadto sa dalan sa kalinaw.

Tanan: Atong daygon ang Ginoo, ang Dios sa Israel!

Pangulo: Himaya sa Amahan, ug sa Anak, ug sa Espiritu Santo.

Tanan: Maingon sa sinugdan, karon ug sa gihapon ug sa mga katuigan nga tanan. Amen.

Tanan : Atong daygon ang Ginoo, ang Dios sa Israel!

b. Awit ni Maria sa Pagdayeg (Magnificat)

(Kung ang kasaulogan himoon sa hapon o gabii)

Pangulo: Mga igsoon, tinuod gayud nga atong Dios maloloy-on kanato. Siya mipadala sa iyang bugtong Anak, ang atong kahayag ug manluluwas. Busa, ato siyang daygon sa pag- ingon:

Pangulo: Magmalipayon unta ang atong mga kasing- kasing ug magdayeg kaniya sama kang Santa Maria nga miingon:

Pangulo: Nagdayeg ang akong kasingkasing sa Ginoo.