Ikaduhang Dominggo sa Adbiyento

IKADUHA NGA DOMINGGO SA ADBIYENTO 

[Porma III pahina 43] 

PASIUNA

[Gikuha sa LITURHIYA sa ALC] 

Mga kaigsuonan ko diha ni Cristo, maayong adlaw kaninyong tanan!

Niining Ikaduha nga Domingo sa Adbiyento kita gitawag sa pag-andam sa atong kasingkasing pinaagi sa paghinulsol ug pagbag-o. Atong bag-ohon ang atong kaugalingon pinaagi sa pagbiya sa atong mga dautan nga mga binuhatan nga maoy makapadaut sa atong maayong relasyon sa atong isigkatawo ug ilabina gayod sa Dios.

Busa aron mahimo kitang angayan ug andam sa atong pagpaabot sa atong Ginoo, ato kanunayng hatagan og pagtamod ang kabililhon sa Pulong sa Dios sa atong tagsatagsa ka mga kinabuhi pinaagi sa pagpuyo niini.

Manindog ang tanan.

III. KASAULOGAN SA KATILINGBANONG PAGHINULSOL ATOL SA ADBIYENTO

(Kining maong rito gamiton alang sa Ikaduhang Semana sa Adbiyento. Alang sa ikatulo ug ikaupat nga semana sa adbiyento mahimong gamiton ang porma I pahina 7.)

A. PANAHON SA ADBΙΥΕΝΤΟ

I. RITO SA PAGSUGOD

Pangulo: Mga igsoon ko diha kang Kristo, maayong ________ kanatong tanan.

Ania na usab kita karon aron sa pagsaulog niining balaang takna nga atong gigahin alang sa atong Ginoo ug alang sa usa'g usa.

Angayan lamang nga atong andamon ang atong kaugalingon alang sa mas makahuluganon ug madasigon nga pagsaulog niining hiniusang pag- ampo sa katilingban.

Sa ngalan sa atong halangdong Arsobispo sa Davao, Rumolo G. Valles, inubanan sa pagtudlo sa atong Kura Paroko, si Reberendo Padre Johnny A. Autida, ako, inyong Pangulo sa Liturhiya (PSL) gipadala ug gitahasan sa pagdumala niining senemanang pag-ampo.

(Magpaila ang PSL sa iyang pangalan kon ugaling magsaulog sa laing katilingban apan kon anaa mismo sa katilingban, dili na kinahanglan nga magpaila pa.)

(Timbayaon ang mga bisita kon aduna. Kon wala, ang pangulo mopadayon)

1. Pagtimbaya

Pangulo: Manindog kita. Hiniusa kitang nagkatigom karon sa ngalan sa Amahan, sa Anak ug sa Espiritu Santo.

Tanan : Amen.

2. Pasiunang Awit

Pangulo: Atong awiton ang pasiunang awit.

3. Pasiunang Pag-ampo

Pangulo: Mga igsoon, ang Adbiyento usa ka panahon sa pagpangandam sa higayon nga kita magsaulog sa misteryo sa pag-abot sa atong Ginoo ingon nga tawo, ang sinugdanan sa atong kaluwasan. Ang Adbiyento usab magtandog kanato sa pagpaabot uban ang bag-ong paglaum sa ikaduhang pagbalik ni Kristo sa diha nga ang plano sa kaluwasan sa Ginoo magdala ngadto sa katumanan. Gipahinumduman usab ang matag usa sa pagpaabot sa atong Ginoo sa takna sa atong kamatayon.

Atong sigurohon nga makaplagan kita niya nga nangandam sa iyang pag-abot ingon nga ang Balaang Kasulatan nag-ingon: "Bulahan kadtong mga sulugoon nga makaplagan sa ilang agalon nga nagtukaw ug nag-andam" (Lukas 12: 37). Kining tulumanon sa paghinulsol nagkahulugan sa atong pagpangandam sa hunahuna ug kasing- kasing sa pag-abot ni Kristo, nga sa dili madugay atong saulogon sa Santos nga Misa ang Pasko sa Pagkatawo sa atong Ginoo.

-0-

Mao na kini ang panahon nga angay kitang magmata. Kay mas duol na karon ang atong kaluwasan kay sa pagsugod ta sa pagtoo. Hapit nga matapos ang kagabhion ug duol na ang kabuntagon. Busa isalikway ta ang mga buhat nga iya sa kangitngit ug isul-ob ta ang armadura ingon nga mga sundalo nga iya sa kahayag. Magbinuotan kita sa atong pagkinabuhi ingon nga mga tawo nga anaa sa kahayag - dili sa hilabihang paghudyaka ug paghubog-hubog, ni sa pakighilawas o sa kalaw-ayan, ni sa pagpakig- away o sa pagkamasinahon.

Hinonoa, isul-ob ang Ginoong Jesukristo ingon nga armadura ug ayaw kamo padaug sa inyong lawasnong kaibog. (Roma 13: 11-14)

Mga igsoon, nagpaabot kita sa pagsaulog sa misteryo ni Kristo diha sa pangilin sa Pasko sa Pagkatawo. Mag-ampo kita nga sa higayon nga siya moabot, makaplagan kita niya nga nagmata ug andam sa pagdawat kaniya.

Pangulo: Ginoo among Dios, magbubuhat sa kalangitan, nagalaum kami sa pagpaabot sa among Manluluwas. Itugot nga imo kaming pasayloon sa among sala.

Kini among gipangayo pinaagi ni Kristo among Ginoo.

-0-

O way-katapusang Anak sa Dios, magbubuhat sa tawhanong pamilya ug among Manluluwas, moabut ka sa dili madugay dinhi kanamo ingon nga anak sa putling Birhen ug luwasa ang kalibutan.

Ipakita kanamo ang imong mahigugmaong presensiya kinsa ikaw milingkawas kanamo gikan sa sala ug nahimong sama kanato sa tanang butang hawang sa sala, kay ikaw buhi ug hari hangtud sa kahangturan.

Tanan : Amen.

II. KASAULOGAN SA PULONG SA DIOS

(Ang PSL o pangulo moadto sa atubangan sa altar ug moyukbo [bow] niini. Hagkan niya ang leksyonaryo, dayon kuhaon ug ibayaw atubangan sa katawhan ug kuhaon kini sa unang magbabasa diha sa atubangan. Pagkahuman, mobalik ang PSL sa iyang lingkoranan samtang ang unang magbabasa moadto sa Ambo. Sa dili pa ang pagbasa, dapiton sa pangulo ang katawhan sa pag-ingon:)

Pangulo: Mga kaigsoonan, paminawon nato karon ang Pulong sa Dios nga nagpadayag sa gugma sa Amahan nganhi kanato. Sa atong pagpaminaw, atong sination kining maong gugma nga maoy nagpalawom sa atong paglaum ug pagtoo sa Ginoo.

Palihug manglingkod.

1. Unang Pagbasa

Is. 40: 1-5, 9-11

Ang pagbasa gikuha gikan sa basahon ni Propeta Isaias.

Ayaw kamo kabalaka, katawhan ko, nag-ingon ang Dios. Dasiga ang Jerusalem ug ingna siya nga wala nay gubat, nga gipasaylo na ang iyang mga sala ug nga siya nakadawat na'g dobling silot alang sa tanan niyang kalapasan. May usa ka tingog nga nagsinggit, "Pag-andam og dalan alang sa Ginoo didto sa kamingawan; himoa ninyo ang usa ka tul-id ug lapad nga dalan didto sa disyerto alang sa atong Dios! Abunohi ang tanang walog; pataga ang tanang bukid. Ang kabungtoran mahimong patag, ug ang dapit nga dagha'g buslot mahimong hapsay. Unya ipadayag ang himaya sa Ginoo ug makakita niini ang tanang tawo, kay ang Ginoo maoy nagsulti niini."

"Tungas sa habog nga bukid, O Sion, ug imantala ang maayong balita; O Jerusalem, tigmantala sa mga maayong balita; hala singgit ug ayaw kahadlok. Ingna ang mga siyudad sa Juda, "Ania na ang imong Diyos! Ania na ang Ginoong Dios maghari na gayod siya; ania siya dala ang katawhan nga iyang giluwas. Sama sa usa ka magbalantay sa karnero pasibsibon niya ang iyang kahayopan; ang mga nati iyang kugoson, ug agakon ang ilang inahan."

Mga igsoon, ang Pulong sa Ginoo.

2. Salmo Responsoryo

Ps. 85: 9-10, 11-12, 13-14

Tubag (R) - Ginoo pakitaa kami sa imong kaayo, ug ihatag kanamo ang imong kaluwasan.

Pamation nako ang gisangyaw sa Dios; kay nagasangyaw siya sa kalinaw ngadto sa iyang katawhan. Haduol ang iyang kaluwasan kanila nga mahadlok kaniya; ang himaya nagapuyo sa atong yuta. (R)

Ang kalooy ug ang kamatuoran magtagbo; ang katarong ug kalinaw maghagkanay. Ang kamatuoran mogitib gikan sa yuta; ug ang katarong molantaw gikan sa langit. (R)

Ang Ginoo mohatag sa iyang mga kaayohan; ug ang atong yuta mohatag sa iyang abot; ang katarong maglakaw sa iyang atubangan, ug ang kaluwasan, diha sa iyang agi-anan. (R)

3. Ikaduhang Pagbasa

2 Pt. 3: 8-14

Ang pagbasa gikuha gikan sa ikaduhang sulat ni San Pedro.

Mga higala, ayaw ninyo hikalimti nga alang sa Ginoo ang usa ka adlaw ingon sa usa ka libo ka tuig ug usa ka libo ka tuig ingon lamang sa usa ka adlaw. Ang Ginoo dili maglangan pagtuman sa iyang gisaad sumala sa gihunahuna sa uban. Apan siya nagpailob kaninyo, kay dili siya buot nga may usa nga malaglag, kondili nga ang tanan maghinulsol ug mobiya sa ilang mga sala.

Apan ang Adlaw sa Ginoo moabot sama sa usa ka kawatan. Niadtong adlawa ang kalangitan mahanaw sa kusog nga dinagouk, ug ang mga planeta ug mga bituon sa kalangitan mosilaob ug maut-ot ug mahanaw ang yuta uban sa tanan nga anaa niini. Ug sanglit kining tanan laglagon man niining paagiha, unsa may angay ninyong buhaton? Kinahanglan nga magkinabuhi kamo nga balaan ug ihalad ang inyong kinabuhi ngadto sa Dios, samtang maghulat kamo sa Adlaw sa Dios, ug buhata ninyo kutob sa inyong mahimo aron moabot pagdali ang Adlaw nga ang mga langit mosilaob ug maut-ot, ug ang mga planeta ug ang mga bituon sa kalangitan mangatunaw tungod sa kainit. Apan nagpaabot kita sa gisaad sa Dios nga mao ang bag-ong kalangitan ug ang bag-ong yuta diin maghari ang katarong.

Busa mga higala, samtang nagpaabot kamo niadtong Adlawa, paningkamot kamo pag-ayo nga mahimo kamong putli ug dili masaway sa Dios, ug may pakigdait kaniya.

Mga igsoon, ang Pulong sa Dios.

4. Pagpasidungog sa Ebanghelyo

(Ang pangulo mobow sa may altar agig pagtahod ug moadto sa may ambo alang sa pagbasa sa Ebanghelyo ug dapiton ang katawhan sa pagtindog pinaagi sa pag-ingon:)

Pangulo: Manindog kita ug atong pasidunggan ang Ginoo diha sa atong pag-awit sa aleluya.

5. Ebanghelyo

Marcos 1:1-8

Ang pagsangyaw sa Maayong Balita sumala ni San Marcos.

Mao kini ang Maayong Balita mahitungod kang Jesukristo, ang Anak sa Dios. Nagsugod kini sumala sa gisulat ni propeta Isaias: "Ania ang akong sinugo nga ipadala ko una kanimo aron andamon niya ang imong agi-an. May nagsinggit didto sa kamingawan, 'Andama ninyo ang dalan alang sa Ginoo, hawani ninyo ang ang iyang agi-an!' Busa namunyag si Juan sa mga tawo didto sa kamingawan ug nagwali, "Hinulsoli ug biyai ang inyong mga sala ug pabunyag kamo, ug pasayloon kamo sa Dios."

Ang tanang tawo sa lalawigan sa Judea ug sa siyudad sa Jerusalem nangadto kang Juan aron sa pagpamati kaniya. Gisulti nila ang ilang mga sala ug gibunyagan sila ni Juan didto sa Suba sa Jordan.

Mga igsoon, ang Maayong Balita sa atong Ginoo.

6. Komentaryo

Tema: Paghinulsol na ug Pagbag-o: Kasingkasing andama

Ato nang nabatasan isip mga Pilipino nga mangandam gayud kita kung aduna kitay bisita. Gani kung atong maobserbahan sa panahon nga sama niini, maningkamot gayud kita sa pagpangandam. Ang uban kanato manglimpyo sa balay, siguro lampasohan nato ang atong salog o dili ba trapohan nato ang mga abog- abog. Manilhig pa gani kita sa atong tugkaran. Ang uban pod mamotang og bag-ong kurtina ug unya ipagawas na ang mga plato, kutsara ug tinidor nga dugay nang gitaguan sa aparador. Ang uban pa gani siguro pangtagoan na lang ang mga labahunon kay dili na makaya og laba kay moabot na ang gipangandaman nga bisita. Usa lamang kini sa mga maayo natong hiyas isip mga Pilipino, ang mangandam gayud.

Sa atong unang pagbasa, si Propeta Isaias nagsulti nga tul-iron ang dalan, ug ang mao gihapong pulonga mao usab ang gisulat ni San Markos sa Ebanghelyo. "Andama ninyo ang dalan alang sa Ginoo; ug himoa ninyong tul-id ang iyang agian!" Unsa may kahulogan niini? Nagpasabot lamang kini nga kinahanglan gayud wagtangon ang mga butang nga nakaali o nakababag sa pagsulod sa Ginoo sa tagsa- tagsa nato ka kasingkasing, sama sa mga sala, garbo ug walay pagpasaylo. Mao nga si San Juan mianhi aron pagsangyaw sa paghinulsol sa sala ug pagbag-o sa kaugalingon alang sa kapasayloan sa mga sala. Iyang gitawag ug gisangyawan ang mga tawo sa Jerusalem ug Judea sa pagbasol ug pagbag-o sa kaugalingon aron inig-abot sa Ginoo makasulod Siya sa ilang kinabuhi ug magdala kanila balik sa Amahan. Gani gikan sa kamingawan misangyaw siya nga andamon ang dalan alang sa Ginoo. Iya usab gipunting kung unsa ang angayang lakang nga himoon. Ang dalan nga andamon dili lamang kadtong dalan sa kamingawan sama sa atong nadungog gikan sa unang pagbasa, kun dili ang dalan sa tagsa-tagsa nato ka kasingkasing, kun kining dalana andam na ba sa pag-abot sa Ginoo.

Si San Juan nag-una aron pag-andam sa dalan alang sa unang pag-anhi ni Kristo, ang Manluluwas. Apan mobalik si Kristo sa ikaduhang higayon ug mao kini ang gihisgutan ni San Pedro diha sa atong ikaduhang pagbasa karong Dominggoha. Kining ikaduhang pagbalik sa atong Ginoo daw dugay moabot. Apan, si Pedro nagpahinumdum kanila nga ang Ginoo dili gayud maglangan sa iyang saad nga mobalik, apan mapailubon kaayo Siya ug dili Siya buot nga adunay usa nga mangalaglag kon dili nga ang tanan maghinulsol ug mobiya sa ilang mga sala. Si San Pedro nagsaysay usab nga matapos ang kalibutan pinaagi sa kalayo ug maugdaw gayud ang tanan. Kay mao man kini ang mahitabo sa katapusang adlaw. Nangutana dayon siya, "Unsa may angayang buhaton? Ug siya mitubag usab dayon: "Kinahanglan nga magkinabuhi kamo nga balaan ug ihalad ang inyong kinabuhi ngadto sa Dios samtang maghulat kamo sa Adlaw sa Dios nga ang mga butang mangatunaw tungod sa kainit" ug "paningkamot kamo pag-ayo nga mahimo kamong putli ug dili masaway sa Dios ug may pakigdait kaniya."

Sa ato pa, ang dugay nga pagbalik ni Kristo nganhi sa kalibutan alang lamang sa atong kaayohan. Kini naghatag kanato og kahigayonan sa pagkuha o pagwagtang sa mga bara nga nakababag kang Kristo sa pagpuyo sa atong kasingkasing ug kinabuhi. Ang pagsalikway sa mga sala, pagtahan sa kaugalingon diha sa pag-ampo ug ang pagbuhat og mga maayong butang sa atong isigkatawo, ug pagpuyo nga simple nga naghunahuna sa pagbalik sa Ginoo. Mao kini ang tinuod nga kahulugan sa pag-andam sa dalan sa Ginoo ug sa pagtul-id niini.

Karon unsa may kahulugan niini sa atong kinabuhi? Unsaon man nato pagpangandam sa pagbalik sa atong Ginoo? Siguro, atong balikan ang atong maayong hiyas isip mga Pilipino nga gisaysay sa unahan. Mangandam kita sa atong kaugalingon. Atong limpiyohan ang atong tagsa-tagsa ka kasingkasing ug kinabuhi. Kuhaon nato ang mga bara nga nakakababag niini aron makasulod si Kristo diha sa atong kasingkasing ug kinabuhi. Kun aduna kitay nakaaway sa atong silingan o sa atong mga higala ba mao na kini ang hustong higayon nga makig-uli kita kanila. Kay kining kasuko, kalagot ug garbo macy mobara ug mobabag sa Ginoo nga mopuyo kanato sulod sa atong kasingkasing ug kinabuhi.

Kun mangandam kita sa panahon nga aduna kitay bisita sa atong mga panimalay, wala na gayud kitay rason nga dili mangandam sa atong kaugalingon sa pag-abot sa Ginoo. Kay ang Ginoo dili lamang bisita diha sa atong kinabuhi ug kasingkasing kun dili nagapuyo gayod Siya diha uban kanato. Unya unsa pa man ang atong gihulat? Paghinulsol na ug pagbag-o na, aron andam na kita sa pagbalik Niya.

Giya alang sa Pamalandong:

1. Unsa man ang dakung babag sa atong kinabuhi nga maoy hinungdan nga dili makasulod si Kristo kanato?

2. Gipaningkamotan ba nato nga mabag-o kita o mobiya kita sa atong pagkamakasasala? Kon dili karon kanus-a pa man?

III. PAGSUSI SA KONSENSIYA

Pangulo: Palihug mangluhod.

Ato karong susihon ang atong konsensiya diha sa mga mosunod nga pangutana pinaagi sa pagtubag sa kinaugalingon ug sa kahilom.

Unsa man ang akong batasan o kinaiya ngadto sa sakramento sa Pagkumpisal? Kinasingkasing ba gayud nga malingkawas ako gikan sa sala; pagbalik ngadto sa Dios, pagbag-o sa kinabuhi ug pagsulod ngadto sa lawom nga pakiglambigit sa Ginoo?  (Hilom sa makadiyot)

O Ako bang gilantaw kini ingon nga usa ka alantuson nga mahimong akong sagubangon ingon nga talagsaon lamang kini? (Hilom sa makadiyot)

Nahikalimtan ba nako pagsugilon o hinay-hinay nga paglimud ang bisan unsang mabug-at nga mga sala sa miaging mga pagkumpisal? (Hilom sa makadiyot)

Nabuhat ko ba ang pagkumpisal nga gihatag kanako? Nahimo ko ba ang pakig-uli sa bisan unsang kadaut ngadto sa uban? Naningkamot ba ako sa pagbansay-bansay sa dakung tinguha sa pag-agak sa usa ka maayong kinabuhi subay sa Maayong Balita? (Hilom sa makadiyot)

(Human niining tanang mga pangutana, maggahin gihapon og pipila ka gutlo alang sa pamalandong)

IV. RITO SA PAKIG-ULI

1. Katilingbanong Pagpangayo og Pasaylo

Pangulo: Palihug tindog. Mga igsoon, palandungon nato unsa ka daku ang gugma sa Dios alang kanatong tanan. Ato karon basolan ang atong mga sala ug pangayoon ta ang iyang pasaylo.

Tanan: Nagakompisal ako sa Dios nga makagagahum sa tanan, ug kaninyo mga igsoon, kay nakalapas ako ug daku uyamot, sa hunahuna, sa pulong ug sa buhat, ug sa wala pagbuhat sa angayang buhaton. Kay akong sala, akong sala, akong dakung sala. Busa nangamuyo ako kang Santa Maria, kanunay Birhen, sa tanang mga anghel ug mga santos, ug kaninyo mga igsoon, aron inyo akong iampo sa Ginoo nga atong Dios.

Pangulo: O Dios nga among Amahan, kinasingkasing namong giangkon ang among mga sala. Apan sa makadaghan kami napakyas. Nakasala kami sa hunahuna, sa pulong, sa buhat, ug labi na gayud sa wala pagbuhat sa gikinahanglang buhaton. Gikan sa kahiladman sa among kasingkasing, nangayo kami karon og pasaylo ngadto sa tanan namong nasad-an, ngadto sa tanang nakasala gumikan sa among pagpakasala, ug ngadto sa tanan nga wala namo katabangi. Apan labaw sa tanan, nangayo kami'g pasaylo Kanimo, O Dios. Pasayloa kami ug luwasa kami pinaagi ni Kristo, among Ginoo.

Tanan: Amen.

2. Pangaliya Alang sa Tanan

Pangulo: Niining atong pagpangandam sa pag-abot sa atong Manluluwas, atong ihalad sa Mahigugmaong Amahan ang atong mga pag-ampo ug mga panginahanglan. Sa matag pangamuyo kita motubag: 

GINOO PATALINGHUGI ANG AMONG PAG- AMPO.

1. Nga ang Santo Papa, mga Obispo ug kaparian madasigon unta silang moandam sa dalan sa Dios diha sa ilang matinud- anong pagpadayag sa ilang pagkamaayong saksi sa mga buhat ni Kristo. Mag-ampo kita.

2. Nga ang mga pangulo sa nasud andam mopahigayon og mga balaod nga magdala ngadto sa kalinaw ug kahiusahan sa tanang katawhan. Mag-ampo kita.

3. Nga ang mga lideres sa matag GKK andam moalagad ug motubag sa mga panginahanglan sa tanang miyembro sa katilingban. Mag-ampo kita.

4. Nga ang atong mga kaigsoonan nga nag- antus sa mga nagkalainlaing kalisdanan sa kinabuhi pinaagi sa presensya sa Ginoo makasagubang, makalahutay ug dili sila kawad-an sa paglaum nga moabot diha kanila ang kahupayan sa ilang kahimtang. Mag-ampo kita.

5. Nga kitang tanan nga nagkatigom karon makasinati sa mga mensahe sa Dios alang kanato ug mabag-o kita sa atong mga naandan nga gawi aron mahimo kitang takus ug angayan sa paghimamat sa pag-abot sa atong Manunubos. Mag- ampo kita.

6. Nga ang atong personal nga katuyuan ato kining ihalad diha sa kahilum.

Pangulo: Dios nga Mahigugmaon, Imo nang nadungog ang among mga panginahanglan. Itugot nga amo na kining madawat subay sa Imong kabubut-on pinaagi ni Kristo Imong Bugtong Anak ug among Manluluwas hangtud sa kahangturan. Amen.

(Pagkahuman sa Pangaliya Alang sa Tanan, ang PSL mobalik sa iyang lingkoranan dala ang leksyonaryo nga anaa sa Ambo ug ibutang kinig balik sa may altar.)

IV. PAGTIGOM SA GASA ALANG SA PAGHIGUGMA

1. Pagtigom sa mga Gasa

Pangulo: Manglingkod ang tanan.

Niining higayona human nato mapadayag ang atong pagtoo sa Ginoo, ato na usab ipadayag ang atong buhat sa gugma alang sa Simbahan ug panginahanglan sa atong katilingban pinaagi sa atong kinasingkasing nga paghalad sa mga gasa.

(Ipahigayon dinhi ang awit sa pagtigom sa mga gasa ug dawaton kini sa PSL.)

2. Amahan Namo

Pangulo: Magpasalamat kita sa Dios pinaagi sa iyang bugtong Anak, si Jesukristo, tungod sa gasa sa pasaylo nga atong nadawat. Isip mga anak sa Dios, maghiusa kita pag-ampo sa Amahan Namo.

Tanan: Amahan namo (awiton)

Pangulo:

Ang labing daku nga timaan nga kita gipasaylo na sa Dios, mao ang atong pagpasaylo usab sa atong isigkatawo. Kining duha dili gayud mahimong bulagon. Busa, ipaila nato ang atong matuod nga pag-inigsoonay.

(Magpakita sa pag-ingisoonay ang matag usa. Mahimong maglamanohay ug mahimong awiton usab ang "Oh! I Love With The Love of the Lord".)

VI. RITO SA PAGTAPOS

1. Katapusang Pag-ampo

Pangulo: Ginoo among Dios, sa unang adlaw sa kabuhatan, gibuhat mo ang kahayag nga misabwag sa tibuok kangitngitan. Itugot, O Kristo, ang kahayag sa mga kahayag, nga sinalipdan sa kahangturan, mag-iwag sa katapusan ngadto sa imong katawhan ug maglingkawas kanila gikan sa kangitngitan sa sala.

Pun-a ang among kinabuhi sa mga maayong buhat ingon sa paghimamat sa imong Anak aron mahinangpon kami motugyan kaniya. Kini among gipangayo pinaagi ni Kristo among Ginoo.

-0-

Makagagahum ug way-katapusang Dios, gipadala mo ang imong bugtong Anak sa pakig- uli sa kalibutan diha kanimo. Isaa gikan sa among kasingkasing ang mangitngit nga kabudlay 

sa sala aron makasaulog kami sa banagbanag nga pagkatawo ni Kristo uban sa angayang kalipay. Kini among gipangayo pinaagi ni Kristo among Ginoo.

Tanan : Amen.

3. Panalangin ug Panamilit

Pangulo: Ug manalangin kanato ang mahigugmaon ug mapasayloong Dios, sa ngalan sa Amahan, ug sa Anak ug sa Espiritu Santo.

Tanan : Amen.

4. Pahibalo

(Basahon sa Pangulo ang mga pahibalo nga inandam na daan.)

Pangulo: Palihug manglingkod alang sa mga pahibalo.

5. Katapusang Awit

Pangulo: Manindog kita alang sa katapusang awit.