IKAKATOA'G TULO NGA DOMINGGO

Ikakatloag-tulo nga Domingo Sulod sa Tuig

PASIUNA

Nobyembre 19, 2023

Mga kaigsuonan ko diha ni Cristo, maayong buntag kaninyong tanan!

Karon mao ang Ikakatloan ug tulo nga Dominggo sa Ordinaryong Panahon.

Diha sa unang pagbasa nga gikuha gikan sa Basahon sa Panultihon, atong madungog nga si Solomon miingon, "Apan dalaygon ang babayeng nagpasidungog sa Ginoo."

Diha sa ikaduhang pagbasa nga gikuha gikan sa Unang Sulat ni San Pablo ngadto sa taga Tesalonica, atong madungog nga si Pablo nagpahinumdum kanila nga "ang pagbalik sa Ginoo sama sa usa ka kawatan nga moabot sa gabii."

Ang Ebanghelyo kinutlo gikan sa Balaan nga Ebanghelyo sumala ni Mateo, dinhi atong madungog ang pagsaysay ni Mateo sa sambingay mahitungod sa Talento.

Palihug manindog alang sa pagsugod sa Santos nga Eyukaristiya.

Salmo Responsoryo:

Bulahan sila nga mahadlokon sa Ginoo.

Katilingbanong Pag-ampo:

Ginoo, Patalinghugi kami.

BASAHON I

Prv. 31:10-13, 19-20, 30-31

KINUTLO GIKAN SA BASAHON SA PANULTIHON

Ang buotang asawa mas bililhon pa kay sa mga alahas, apan pagkalisod nga pangitaon!

Kasaligan siya sa iyang bana ug magmauswagon gayod ang iyang bana.

Dili siya mobuhat sa bisan unsa nga makadaot sa iyang bana.

Kugihan siya nga mohabol sa delana ug sa lino.

Siya ray magkalinyas sa hilo nga iyang gamiton paghabol.

Mahinatagon siya sa mga kabus.

Ang kaanyag sa babaye malimbongon ug dili molungtad, apan dalaygon ang babayeng nagpasidungog sa GINOO.

Dayga siya sa tanan niyang gibuhat. Angay siyang tahoron sa tanan.

ANG PULONG SA GINOO.

SALMO RESPONSORYO

Ps. 128: 1-2, 3, 4-5

R. Bulahan sila nga mahadlokon sa Ginoo. 

Bulahan ikaw nga mahadlokon sa Ginoo, nga nagalakaw sa iyang kadalanan!

Kay nagakaon ka sa bunga sa imong binuhatan; mabulahan gayod ikaw ug mapanalanginan.

R. Bulahan sila nga mahadlokon sa Ginoo.

Ang imong asawa mahisama sa usa ka mabungahon nga bagon nga anaa sa tugkaran sa imong balay;

Ang imong mga anak sama sa mga tanom nga olibo libot sa imong talad.

R. Bulahan sila nga mahadlokon sa Ginoo.

Ania, ingnon niini pagpanalangin ang tawo nga mahadlokon sa Ginoo.

Ang Ginoo manalangin kanimo gikan sa Sion: makakita unta ikaw sa kausbawan sa Jerusalem, sa tanang mga adlaw sa imong kinabuhi.

R. Bulahan sila nga mahadlokon sa Ginoo.

BASAHON II

1 Thes. 5:1-6

KINUTLO GIKAN SA UNANG SULAT NI SAN PABLO NGADTO SA TAGA-TESALONICA

Mga igsuon, wala nay kinahanglan nga ako magsulat pa kaninyo kon kanus- a mahitabo kining mga butanga, kay kamo mismo nasayod kaayo nga ang pagbalik sa Ginoo sama sa usa ka kawatan nga moabot sa gabii. Inig-ingon sa mga tawo, "Malinawon ang tanan ug walay kabilinggan," sa kalit moabot kanila ang kalaglagan. Dili sila makalikay niini, kay ingon kini sa kasakit nga moabot sa babaye nga nagbati. Apan kamo, mga igsuon, wala na magpuyo diha sa kangitngit, busa dili kamo hikalitan sa maong Adlaw nga moabot ingon sa usa ka kawatan. Kamong tanan iya sa kahayag ug iya sa adlaw. Dili kita iya sa gabii ni iya sa kangitngit. Busa dili kita mangatulog sama sa uban kondili magtukaw ug magmaugdang kita.

ANG PULONG SA GINOO.

EBANGHELYO

TINAAS

Mt. 25:14-30

Kinutlo gikan sa Balaan nga Ebanghelyo sumala ni Mateo

Misulti si Jesus niining sambingay ngadto sa iyang mga tinun-an: "Susama ang gingharian sa langit sa usa ka tawo nga molangyaw nga mitawag sa iyang mga kaugalingong ulipon ug mitugyan ngadto kanila sa iyang mga katigayonan, ug ngadto sa usà mihatag siya og lima ka talento, ug sa lain duha, ug sa lain pa gayod, usà, sa matag usà binasi sa ilang katakos, ug dihadiha milangyaw siya. Ang tawo nga nakadawat og lima ka talento milakaw ug mipatigayon niini ug nakaginansya siya og lain pang lima. Sa samang paagi, ang nakadawat og duha nakaginansya og lain pang duha. Apan ang nakadawat og usà milakaw ug mikalot sa yuta ug gitagoan ang kuwarta sa iyang agalon.

"Ug human sa taas nga panahon, miabòt ang agalon niadtong mga ulipon ug nakighusay kanila. Ug miadto ang tawo nga nakadawat og lima ka talento ug nagdala og lain pang lima ka talento ug miingon, 'Agalon, gihatagan mo akò og lima ka talento; tan-awa, nakaginansya akò og lain pang lima ka talento. Miingon kaniya ang iyang agalon, 'Maayo, buotan ug masaligan nga ulipon, masaligan ka sa gamay, itugyan ko kanimo ang daghan; sulòd ngari sa kalipay sa imong agalon.'

"Ug miadto ang tawo nga nakadawat og duha ka talento ug miingon, Agalon, gihatagan mo akò og duha ka talento; tan-awa, nakaginansya akò og lain pang duha ka talento. Miingon kaniya ang iyang agalon, 'Maayo, buotan ug masaligan nga ulipon, masaligan ka sa gamay, itugyan ko kanimo ang daghan; sulòd ngari sa kalipay sa imong agalon.

"Ug miadto usab ang tawo nga midawat og usa ka talento ug miingon, Agalon, nasayod akò nga ikaw lisod nga tawo, nagaani ka diin walâ ikaw magpugas ug nagatapok ka diin walâ ikaw magsabwag. Ug sa kahadlok, milakaw akò ug gitagoan ang imong talento diha sa yuta; tan-awa, maimo ang imoha.

"Apan mitubag ang iyang agalon ug miingon ngadto kaniya, 'Daotan ug tapolan nga ulipon! Nahibalo ka nga nagaani akò diin walâ akò magpugas ug nagatapok diin wala akò magsabwag. Nan, angay unta nga gitugyan mo ang akong salapi ngadto sa mga tigpatigayon sa salapi, ug inigbalik nako madawat dayon nako ang akong salapi uban sa túbô. Busa kuhaa gikan kaniya ang talento ug ihatag ngadto kaniya nga adunay lima ka talento. Kay ang tanan nga aduna, pagahatagan pa ug pakapinan pa gayod, apan ang walay iya, bisan gani ang anaa kaniya pagakuhaon gikan kaniya. Ug ang walay pulos nga ulipon, ilabog ninyo ngadto sa kangitngit sa gawas; didto aduna unyay pagdangoyngoy ug pagkagot sa mga ngipon."

Ang Ebanghelyo sa Ginoo.

MINUBO

Mt. 25:14-15, 19-21

Kinutlo gikan sa Balaan nga Ebanghelyo sumala ni Mateo

Misulti si Jesus niining sambingay ngadto sa iyang mga tinun-an:

"Susama ang gingharian sa langit sa usa ka tawo nga molangyaw nga mitawag sa iyang mga kaugalingong ulipon ug mitugyan ngadto kanila sa iyang mga katigayonan, ug ngadto sa usà mihatag siya og lima ka talento, ug sa lain duha, ug sa lain pa gayod, usà, sa matag usà binasi sa ilang katakos, ug dihadiha milangyaw siya.

"Ug human sa taas nga panahon, miabòt ang agalon niadtong mga ulipon ug nakighusay kanila.

"Ug miadto ang tawo nga nakadawat og lima ka talento ug nagdala og lain pang lima ka talento ug miingon, 'Agalon, gihatagan mo akò og lima ka talento; tan-awa, nakaginansya akò og lain pang lima ka talento.

Miingon kaniya ang iyang agalon, 'Maayo buotan ug masaligan nga ulipon, masaligan ka sa gamay, itugyan ko kanimo ang daghan; sulod ngari sa kalipay sa imong agalon."

Ang Ebanghelyo sa Ginoo.

Katilingbanong Pag-ampo:

Nobyembre 19, 2023

Pari: Mag-ampo kita sa atong Amahan, ang tag-iya sa tanan natong gihuptan, nga tudloan kita niya sa hustong paggamit sa mga gasa nga iyang gihatag kanato. Sa matag pag-ampo kita motubag:

GINOO, PATALINGHUGI KAMI.

1. Nga ang tibuok Simbahan uban sa mga pangulo niini, magpadayon silang mopaambit sa gasa sa talento ug kahibalo pinaagi sa walay puas nga pagpangalagad. Mag-ampo kita.

2. Nga ang namunuan sa atong nasud giyahan unta ug lamdagan sa Espiritu Santo aron mahatagan og maayong kasulbaran ang ilang plano ug mga buluhaton. Mag-ampo kita.

3. Nga ang mga batan-on nga gitawag sa Dios ngadto sa bokasyon sa pagkapari o pagkarelihiyoso, nga makapaambit sila sa mga talento nga ilang nadawat pinaagi sa pagpangalagad uban sa Espiritu Santo ug pangama ni Santa Maria. Mag-ampo kita.

4. Nga ang mga nag-antus sa nagkalainlaing kalisud, biktima sa kalamidad, biktima sa gubat, mga masakiton nga makadawat sila og sa paglaum, pagsalig ug pagtuo sa Dios. Mag-ampo kita.

5. Nga ang mga nagadayeg ug nagapasalamat sa gugma sa Dios ilabina nila ______ makabaton silag kalaam og makapaambit sailang mga talento ngadto sa uban. Mag-ampo kita.

6. Nga ang mga minahal natong mga minatay ilabina nila ______ sila nga makadawat sa kapahulayang dayon. Mag-ampo kita. 

Pari: 0 Ginoong Dios namo, itugot nga ang mga gasa nga among gihalad magdugang sa among gugma kanimo ug magdala kanamo nganha sa kinabuhing tunhay. Kini among gipangayo pinaagi ni Cristo among Ginoo. Amen

PAHIBALO

Nobyembre 19, 2023

1. Karong umaabot nga Nobyembre 30, 2023, adlaw'ng huwebes, mao ang adlaw sa atong "Confirmation", kini magsugod sa alas 2:00 sa hapon. Ang atong pre-Confirmation Catechesis Seminar ipahigayon karong Nobyembre 27, 2023 adlaw'ng lunes, kini magsugod sa alas 8:00 sa buntag hangtud sa alas 4:00 sa hapon. Giawhag ang mga kompermahanan sa pagdala ug pagkaon alang sa ilang paniudto ug merienda.

2. Ang parokya sa San Pedro Cathedral, nagpahigayon ug usa ka Raffle for a Cause, alang sa pag repair sa Cathedral. Dagkong premyo ang naghulat alang sa mga mananaog. Ang mga ticket mamahimong mapalit sa opisina sa atong parokya sa kantidad nga 100pesos kada ticket. Ang Grand Raffle Draw pagahimoon karong umaabot nga Desyembre 23, 2023.

3. Ang atong mga kabatan-onan dinhi sa parokya naglusad ug usa ka IGP o income generating project aron makatabang sa mga proyekto sa atong simbahan, kini mao ang "Light a star on Christmas, Season 2. "Maging liwanag sa dilim". Mamahimo kitang mo palit ug Parol sa kantidad nga 300 pesos ug kini ibitay sa palibot sa atong simbahan. Alang sa dugang detalye niini, mamahimong mo duol sa mga batan-on nga nag pwesto sa gawas sa atong simbahan o moadto sa opisina sa atong parokya.

4. Ang atong parokya sa Immaculada Conception magsaulog sa ika 64 nga kapistahan karong umaabot nga Desyembre 8, 2023. Ang atong Novena magsugod na karong Nobyembre 29, 2023, sa alas 5:45 sa buntag ug pagasundan kini sa Santos nga Misa pagka alas 6:00 sa buntag. Giawhag ang tanan sa pagtambong niini. Alang sa mga dugang detalye mahitungod sa atong "Fiesta Activities" palihug pagbasa sa mga pahibalo nga gipaskil sa gawas sa atong simbahan.

Daghang Salamat.