IKAKATLOA'G USA NGA DOMINGGO

IKAKATLOA'G USA NGA DOMINGGO

Pasiunang Pag-ampo:

O Amahan nga makagagahum ug maloloy-on, nadawat namo ang kabuhong sa kinabuhi.

Giyahi matag adlaw ang among mga lakang sa pagpanlimbasog aron dili unta kami mabuta diha kanimo, O Dios among tinubdan sa tanang kaayo.

Palingkawasa kami sa pagkamaakohon diin maoy nagbuling sa among pagtoo.

Kini among gipangayo pinaagi sa among Ginoong Jesukristo imong Anak, nga buhi ug hari uban kanimo ug sa Espiritu Santo, Dios nga usa hangtud sa kahangturan. Amen. 

a. BASAHON I

Malaquias 1: 14-2: 2,8-11

Kinutlo gikan sa basahon ni Malaquias.

"Tinunglo ang tawong limbongan nga nagsakripisyo Kanakog walay pulos nga mananap nga may maayo man unta siyang mananap sa iyang toril nga iyang gisaad nga ihalad Kanako. Kay Ako usa ka gamhanang hari ug ang katawhan sa tanang kanasuran may kahadlok Kanako", matud sa Ginoo nga gamhanan sa ngatanan."

Karon aniay sugo alang kaninyong mga pari: kinahanglan inyo. Akong pasidunggan, nagaingon ang Ginoo nga labing gamhanan. "Kon dili kamo magpatalinghug Kanako, tunglohon Ko kamo. Gani gitunglo Ko na man kamo, tungod niini."

Apan kamo nga mga pari mitipas gikan sa kamatuoran. Ang gitudlo ninyo nagtukmod hinoon sa kadaghanan sa pagbuhat og sayop. Gilapas ninyo ang kasabutan nga Akong gibuhat uban kaninyo, nag-ingon ang Ginoo nga labing gamhanan. Busa pakaulawan kamo sa katawhan sa Israel, tungod kay wala ninyo tumana ang Akong kabubut-on, ug may pinalabi kamo sa inyong pagpanudlo.

Dili kitang tanan usa ray Amahan, ang usa ka Dios nga nagbuhat kanato? Nan, nganong gilapasan man nato ang atong saad sa usag-usa, ug nganong gisalikway man nato ang kasabutan nga gihimo sa Dios uban sa atong mga katigulangan? Gilapas sa katawhan sa Juda ang ilang gisaad sa Dios ug nagbuhat silag ngil-ad nga butang sa Israel ug sa Jerusalem. Gipasipalahan nila ang Templo nga gihigugma sa Dios. Ang ilang kalakin-an nangasawa sa mga babaye nga nagsimbag langyaw nga mga dios.

Ang Pulong sa Ginoo.no

b. SALMO RESPONSORYO

Salmo 131: 1, 2, 3

Tubag (R) Diha Kanimo, Ginoo, hikaplagan ko ang akong kalinaw.

O Ginoo, ang akong kasingkasing wala magpataas, ni ang akong mga mata nagginarboso; Wala ako magkalingaw sa dagkung mga butang, ni sa mga butang nga taas ra kaayo kanako. (R)

Hinoon, akong gihupay ug gipahilom ang akong kalag ingog bata nga gilutas. Samag bata nga gilutas diha sa sabakan sa iyang inahan, sa ingon mao ang akong kasingkasing sulod kanako. (R)

O Israel, paglaum sa Ginoo, karon ug hangtud sa kahangturan. (R)

c. BASAHON II

1 Tes. 2: 7-9, 13

Kinutlo gikan sa unang sulat ni San Pablo ngadto sa taga Tesalonica.

May katungod kami nga inyong daygon kay kami mga apostoles man ni Kristo. Apan sa diha pa kami uban kaninyo, nagmalumo kami kaninyo sama sa usa ka inahan nga nagmatutu sa iyang mga anak. Tungod sa among gugma kaninyo among giwali kaninyo, ang Maayong Balita sa Dios. Gitahan usab namo ang among kaugalingong kinabuhi, kay kamo gimahal man namo pag-ayo. Mga igsoon, sa walay duhaduha nahinumdoman pa ninyo giunsa namo paghago! Nagtrabaho kami adlaw ug gabii aron dili kami makahasol kaninyo sa among pagwali kaninyo sa Maayong Balita sa Dios.

Ug among gipasalamatan usab ang Dios kanunay, kay sa among pagwali kaninyo sa Iyang mensahe namati kamo ug gidawat ninyo kini dili ingon nga iya sa tawo kondili Iya gayud sa Dios: kay ang Dios nagbuhat diha kaninyong mga magtutuo.

Ang Pulong sa Ginoo.

d. EBANGHELYO

Mt. 23:1-12

Ang Santos nga Ebanghelyo sumala ni San Mateo.

Unya miingon si Jesus sa mga tawo ug sa Iyang mga tinun-an. "Ang mga magtutudlo sa Balaod ug ang mga Pariseo mao ang may katungod sa paghubad sa Balaod ni Moises. Busa kinahanglan tumanon ninyo ug sundon ang tanan nga ilang isugo kaninyo; apan ayaw ninyog sunda ang ilang mga buhat, kay wala man sila magtuman sa ilang giwali. Nagbugkos sila og bug-at nga mga karga ug gipapas-an nila sa mga tawo, apan dili gani sila mogamit bisag usa na lang ka tudlo aron pagtabang pagpas-an sa maong karga. Himoon nila ang tanan aron lamang ipasigarbo ngadto sa mga tawo. Tan-awag unsa kadagko sa gisudlan nila sa mga sinulat nga mga bersikulo sa Kasulatan, nga ilang gibutang sa ilang mga agtang ug gibaligtos sa ilang mga bukton! Ug tan-awag unsa ka taas ang sidsid sa ilang mga sapot! Gusto sila sa labing maayong mga dapit sa mga kombira ug sa mga linaing lingkoranan sa mga sinagoga; gusto silang yukboan ug tahoron didto sa mga merkado, ug nga ang mga tawo motawag kanilag 'Magtutudlo'. Ayaw kamo pagpahingalag 'Magtutudlo', kay kamong tanan managsoon man ug usa ra ang inyong Magtutudlo. Ug dinhi sa kalibutan ayaw tawga si bisan kinsa nga 'Amahan', kay usa ra ang inyong Amahan nga atua sa langit. Ayaw usab kamo pagpatawag og 'Pangulo', kay usa ra ang inyong pangulo nga mao ang Mesiyas. Ang labing daku kaninyo kinahanglan mahimo nga inyong sulugoon. Ug ipaubos ang magpataas sa iyang kaugalingon, ug ang magpaubos, ipataas."

Ang Ebanghelyo sa Ginoo.

e. KOMENTARYO

Tema: Ang Mapaubsanon, Ipataas sa Dios.

Usahay duna kitay kinaiya nga kon dapiton kita sa usa ka selebrasyon o kombira, gusto kita nga mahimong sikat o inila. Gusto kita nga molingkod sa nag-unang mga lingkuranan.

Buot kita nga mailhan sa ubang mga bisita o mga dinapit. Dayag ang kalipay nga atong bation kon ang mga tawo makaila kanato base sa estado sa atong kinabuhi ug kahimtang diha sa katilingban.

Ang Kristohanong pagtulon-an dili lamang diha kutob nga atong madungog pinaagi sa pulong kun dili mahinungdanon kaayo nga makita usab kini diha sa husto nga buhat. Ang pulong dili igong basehanan sa usa ka tawo nga maayong manulti apan makita sa iyang mga lihok kon giunsa nato pagpakighiusa sa atong mga kaigsoonan.

Ang unang bahin sa Ebanghelyo nagsaysay kini sa pagsugilon ni Jesus sa mga tawo ug sa iyang mga tinun-an mahitungod sa mga magtutudlo sa balaod ug ang mga Pariseo nga sila maoy adunay dakong katungod sa paghubad sa balaod ni Moses. Apan kining maong mga tawhana wala magsunod sa kabubut-on sa Amahan kay wala man sila magtuman sa ilang giwali. Wala mituhop ang ilang gipangwali kay wala man nila kini buhata, diha lang sila kutob sa pagsulti. Diha sa Ebanghelyo nagkanayon si Jesus: "Ayaw kamo pagtawag og magtutudlo kay kamong tanan managsuon man ug usa ra ang inyong magtutudlo". Nag-ingon usab si Jesus nga "Ayaw tawga si bisan kinsa nga Amahan, kay usa ra ang inyong Amahan nga atua sa langit. Ayaw usab kamo pagtawag og agalon, kay usa ra ang inyong agalon nga mao ang Mesiyas".

Sa katapusang bahin sa Ebanghelyo mao ang dakong hagit alang kanatong tanan nga mao ang magpataas sa iyang kaugalingon ipaubos ug ang magpaubos ipataas.

Kon atong pamalandungan pag-ayo ang mga mensahe nga atong nadungog karon seguro makapangutana kita sa atong kaugalingon: Unsa man ang maayo, ang pagtoo nga walay buhat o ang adunay maayong buhat apan walay pagtoo sa Dios? Dili man kadtong mga tawhana nga nagatawag nga Amahan mao ang makasulod sa ganghaan sa langit. Daghan kanato nga nagpakaaron-ingnon nga mga maayong tawo.

Kanunay kitang mosimba ug nagadayeg sa Dios apan wala kitay mga maayong buhat diha sa uban. Nagmakuli kita pagtabang sa mga nanginahanglan ilabina sa mga kabus natong mga kaigsoonan. Maayo lamang kita sa mga tawo nga adunay ikabalus paghatag kanato kay andam kita sa pagtabang kanila kay nagpaabot man kita og balus. Adunay mga tawo usab nga walay pagtuo sa Dios apan nagabuhat og maayo alang sa uban ug natuman sa kabubut-on sa Dios. Wala kini magpasabot nga maayo nga walay pagtuo sa Dios kay kon dili ang hingpit nga pagtuo sa Dios maoy magdala kanato ngadto sa paghatag og katumanan sa mga mensahe nga atong nadungog. Mao kini ang mag-aghat kanato sa pagbuhat sa atong mga kaakuhan o gimbuhaton isip mga sumusunod ug nakaambit sa gugma sa Dios. Apan unsa man ang kasagaran natong mga kinaiya isip usa ka kristiyano? Unsa man ang atong mga pamatasan? Gi-unsa man nato pagpuyo ang atong pagka kristiyano sa atong panahon karon? Kini nga mga pangutana nga maghagit kanato sa pagbuhat ug paghatag og kinabuhi sa mga pulong nga atong nadungog. Gitawag kita sa pagkamaayo kay ang Dios maayo man. Ang tanan nga nanghitabo sa matag adlaw adunay kahulugan sa matag usa nato kinabuhi. Aduna kini dakong kalambigitan sa kaugalingon. Bisan nakasinati kita og mga kalisdanan, mga katalagman sa kinabuhi, ang Dios wala gayod mibiya kanato tungod kay siya nahigugma gayod kanato sa gugmang walay pagkatapos.

Ang mensahe sa Ebanghelyo mao ang pagpahinumdom sa matag usa kanato kung unsaon nato pagsunod kang Kristo. Motuhopunta kini sa atong tagsa-tagsa ka kaugalingon. Wala kini nagpasabot nga si Kristo nagpasalig kanato og kahayahay sa kinabuhi apan misaad siya kanato nga iya kitang ubanan kanunay hangtod sa katapusan sa kalibutan. Sa samang paagi gihagit kita sa pagpuyo nga mapaubsanon ug pagkamatarong. Ang pagpaubos nagkinahanglan og kinasingkasing ug hingpit nga pagsalig sa Dios aron sayon alang kanato sa pagtahan sa atong kaugalingon sa pag-alagad sa Dios diha sa atong mga kaigsoonan ilabina diha sa atong pamilya ug katilingban. Diha sa pagsunod kang Kristo ang pagpa-ubos mao ang pagtahan sa kaugalingon sa iyang kabubut-on. Mao kini ang dakong hagit sa matag usa kanato ang kinasing-kasing nga pagpaubos sa kaugalingon. Dili gayod sayon ang pagsunod kang Kristo apan diha sa pagsunod sa iyang kabubut-on atong napadayag ang matuod nga kahulugan sa kinabuhi isip mga Kristiyanos.

Sa katapusan, ang pulong nga inubanan og mga maayong buhat mao unta ang mamahimo natong sumbanan sa pagpuyo sa Kristohanong pagtulon-an. Atong kaakuhan ang pagpakaylap og pagsangyaw sa Maayong Balita. Ug isip magsasangyaw, sa kinasingkasing atong dawaton ang pulong, atong puy-an ug atong ipaambit sa uban. Mao kini ang hagit sa atong kapanahunan karon ilabina na kay nagpaulipon na kita sa mga kalibutanong haylo. Himoon nato kini sa paagi nga mapaubsanon kay ang Dios ra ang maantigo nga mopataas kanato kon gihimo nato kini nga wala mahisupak sa kabubut-on sa Dios. Hinaut pa unta.

Giya alang sa pamalandong:

1. Gipadayag ba nako sa uban kon unsa ang anaa sa akong kinahiladman?

2. Duna bay mga higayon sa akong kinabuhi nga nagpasulabi kanako ang garbo imbis pagpaubos?

3. Dayag ba sa Dios ang tanan nakong mga gibuhat?

f. KATILINGBANONG PAG-AMPO

Pangulo: Langitnong Amahan, tuburan sa kaayo ug gugma. Kaming Imong mga anak nangandoy kanunay sa Imong walay puas nga kalooy. Busa amo karong ihalad kanimo ang among mga pag-ampo ug panginahanglan. Sa matag pangamuyo kita motubag: GINOO PAMATIA KAMI.

1. Alang sa atong Santo Papa, nga unta sa kanunay siya magmadasigon sa pagsangyaw sa Pulong sa Dios sa tibuok kalibutan, aron ang pagtoo nga atong gihuptan karon ikapakaylap sa tanan. Mag-ampo kita.

2. Alang sa mga lideres sa atong nasud, nga unta ang pagtahan sa ilang kaugalingon alang sa pagserbisyo sa katawhan sa kanunay gibase sa pag-ila nga ang Dios maoy labaw natong gipasidunggan. Mag-ampo kita.

3. Alang sa atong mga kaigsoonan nga nakasinati og mga kalisdanan sa kinabuhi, unta dili sila mawad-an og paglaum nga ang Dios maoy ilang lig-on nga gabayan. Mag-ampo kita.

4. Alang sa mga tawo nga nagkaluya na sa ilang pagtoo, unta makabaton sila og kalig-on sa kasingkasing ug ilang mapamalandungan nga ang Dios mao ra gayud ang tinubdan sa tanang butang nga godania kanato. Mag-ampo kita.

5. Alang kanatong tanan nga nagkatigum kakaron nga unta sa kanunay atong mapuy- an ang atong Kristohanong pagtoo aron mahimo kitang sumbanan sa uban. Mag- ampo kita.

6. Alang sa atong personal nga katuyuan atong i-ampo diha sa kahilum.

Pangulo: Makagagahum nga Dios, nasayod Ka sa tanan namong panginahanglan. Masaligon kami nga among madawat ang among gipangayo Kanimo subay sa Imong kabubut-on pinaagi ni Kristo among Ginoo ug Manunubos. Amen.