IKAKATLOAG UPAT NGA DOMINGGO

IKAKATLOA'G UPAT NGA DOMINGGO

(Solemnidad ni Kristo, Hari sa Kalibutan)

PASIUNANG PAG-AMPO:

O Ginoo, dungagi ang among kadasig sa pagbuhat sa imong kabubut-on ug tabangi kami sa pagkasayud sa makaluluwas nga gahum sa imong gugma.

Kini among gipangayo pinaagi sa among Ginoong Jesukristo imong Anak, nga buhi ug hari uban kanimo ug sa Espiritu Santo, Dios nga usa hangtud sa kahangturan.

a. BASAHON I

Ez. 34:11-12,15-17

Kinutlo gikan sa basahon ni Propeta Ezequiel.

Mao kini ang giingon sa Ginoong Dios: Ako gayud maoy mag-atiman ug magdumala sa Akong mga karnero. Maingon nga ang usa ka magbalantay magdumala sa iyang panon diha nga anaa siya taliwala sa iyang nagkatibulaag nga mga karnero, sa ingon Akong dumalaon ang Akong mga karnero. Luwason Ko sila sa tanang mga dapit diin nagkatibulaag sila sa panahon nga gabonon ug mangitngit. Ako gayud ang magbantay pagdumala sa Akong mga karnero; Ako gayud ang magpapahulay kanila, nag-ingon ang Ginoong Dios. Pangitaon Ko ang nawala, dad-on Ko pagbalik ang nanghisalaag, bugkosan Ko ang napiang, tambalan Ko ang nasakit, (apan ang malig-on ug kusgan Akong laglagon), diha sa matarung Kong pagbantay sa Akong mga karnero.

Mahitungod kanimo mga karnero Ko, nag-ingon ang Ginoong Dios, hukman Ko ang matag usa ka karnero, ang mga karnero ug mga kanding.

Ang Pulong sa Ginoo.

b. SALMO RESPONSORYO

Salmo 23: 1-2,2-3,5-6

Tubag (R)

Magbalantay kanako ang Ginoo, wala nay magmakulang pa kanako.

Magbalantay kanako ang Ginoo, wala nay magmakulang pa kanako. Sa lunhaw nga sibsibanan Iya ako nga gipapahulay; (R)

Sa daplin sa malinawon nga tubig Iya akong gidala; Iyang gihupay ang akong kalag. Iya ako nga gitultolan sa matarung nga mga agianan tungod sa Iya nga ngalan. (R)

Gihikyaran Mo ako og lamesa sa akong atubangan samtang nagtan-aw ang akong mga kaaway; Gidihogan Mo ang akong ulo og lana; nagaawas gayud ang akong kopa. (R)

Ang kaayo lamang ug kalooy maoy nagsunod kanako, sa tanang mga adlaw sa akong kinabuhi; ug magpuyo ako sa balay sa Ginoo sa mga tuig sa katuigan. (R)

c. BASAHON II

1 Cor. 15: 20-26,28

Kinutlo gikan sa unang sulat ni San Pablo ngadto sa taga Corinto.

Ang tinuod mao nga gibanhaw si Kristo, ingon nga pasalig nga kadtong nangamatay banhawon usab. Kay ingon nga miabot ang kamatayon pinaagi sa usa ka tawo, moabot usab ang pagkabanhaw pinaagi sa usa ka tawo. Kay ingon nga nangamatay ang tanang mga tawo tungod sa ilang pagkahiusa kang Adan, banhawon usab ang tanan tungod sa ilang pagkahiusa kang Kristo. Apan ang matag usa anaa sa iyang husto nga dapit: si Kristo maoy una sa tanan, unya mosunod kadtong iya ni Kristo inig-abot na niya. Unya moabot ang katapusan ug buntogon ni Kristo ang tanang pangulo nga espirituhanon, mga awtoridad, mga kagamhanan, ug itugyan ang Gingharian ngadto sa Dios nga Amahan. Kay kinahanglan maghari si Kristo hangtud mabuntog sa Dios ang tanan Niyang mga kaaway ug himoon sila nga tumbanan sa Iyang mga tiil. Ang katapusang kaaway nga buntogon mao ang kamatayon.

Apan kon ang tanang butang ipailalom na sa pagmando ni Kristo, ang Anak mismo harian sa Dios nga maoy nagtugyan sa tanan ubos sa iyang pagmando, ug maghari ang Dios sa tanan sa hingpit gayud.

Ang Pulong sa Ginoo.

d. EBANGHELYO

Mateo 25: 31-46

Ang Santos nga Ebanghelyo sumala ni San Mateo.

Si Jesus miingon sa Iyang mga tinun-an: "Inig-anhi sa Anak sa Tawo ingon nga Hari, uban sa tanang mga anghel, molingkod Siya sa Iyang harianong trono, ug ang tanang tawo sa kalibutan tigomon sa Iyang atubangan. Unya bahinon Niya sila sa duha ka pundok, sama sa usa ka magbalantay sa hayop nga maglain sa mga karnero gikan sa mga kanding: ibutang Niya ang mga karnero sa Iyang tuo ug ang mga kanding sa Iyang wala. Unya ang Hari moingon sa mga tawo sa Iyang tuo: 'Umari kamo nga gipanalanginan sa Akong Amahan ug dawata ninyo ang Gingharian nga giandam alang kaninyo sukad pa sa pagbuhat sa kalibutan. Gigutom Ako ug inyo Akong gipakaon; giuhaw Ako ug inyo Akong gipainom; dumuduong Ako ug inyo Akong gidawat sa inyong mga balay; hubo Ako ug inyo Akong gibistihan; nagmasakiton Ako ug inyo Akong gialimahan; nabilanggo Ako ug inyo Akong giduaw. Unya motubag Kaniya ang mga matarung: 'Ginoo, kanus-a man kami makakita Kanimo nga gigutom ug gipakaon Ka namo, o giuhaw ug gipainom? Kanus-a man kami makakita Kanimo nga dumuduong ug midawat kami Kanimo sa among mga balay, o hubo ug gibistihan Ka namo?

Kanus-a man kami makakita Kanimo nga nagmasakiton o gibilanggo, ug giduaw Ka namo? Unya ang Hari motubag kanila, 'Sultihan Ko kamo nga sa matag higayon nga maghimo kamo niini alang sa usa sa labing ubos niining Akong mga igsoon, gihimo ninyo kini alang Kanako!'

Unya moingon Siya ngadto sa mga tawo sa Iyang wala: 'Pahawa kamo Kanako, kamong gipanghimaraot sa Dios! Ngadto kamo sa kalayo nga walay pagkapalong nga giandam alang sa Yawa ug sa iyang mga anghel! Gigutom Ako, apan wala Ako ninyo pakan-a; giuhaw Ako, apan wala Ako ninyo paimna; dumuduong Ako, apan wala Ako ninyo dawata sa inyong mga balay; hubo Ako, apan wala Ako ninyo bistihi; nagmasakiton ako ug nabilanggo, apan wala Ako ninyo alimahi. Unya motubag sila Kaniya: 'Ginoo, kanus-a man kami nakakita Kanimo nga gigutom, o gisuhaw, o usa ka dumuduong, o hubo, o nagmasakiton, o nabilanggo, ug wala kami motabang Kanimo? Ang Hari motubag kanila, 'Sultihan Ko kamo nga sa matag higayon nga nagdumili kamo pagtabang sa usa niining labing ubos, nagdumili kamo sa pagtabang Kanako.' Busa kini sila ipadala ngadto sa walay katapusang silot; apan ang mga matarung moadto sa kinabuhing dayon."

Ang Ebanghelyo sa Ginoo.

e. KOMENTARYO

TEMA: ANG MAHIGUGMAON UG MAALAGARONG HARI

Kung moingon na gani kita og hari, ang una nga mosulod sa atong panghunahuna mao ang usa ka tawo nga adunay hataas og kaalam, adunay daghang mga magbalantay ug mga sulugoon, adunay dako nga palasyo, gamhanan, kwartahan ug daghan pa. Bisan gani kita mangandoy sa atong kinabuhi nga mamahimong hari kay ang hulagway sa hari anaa ang pagkasikat, gamhanan ug adunahan. Apan mao ba gayod kini ang matuod nga hulagway sa usa ka hari?

Karong adlawa atong gisaulog ang Solemnidad sa Pag-kahari ni Cristo. Diha sa atong mga pagbasa atong makita ang hulagway kung unsa ang klase nga hari si Cristo diin gihatagan og dakong punting ang mga hiyas sa usa ka hari nga sulundon ug modelo sa tanang katawhan.

Diha sa unang pagbasa adunay maayong paghulagway kung unsa ang kinaiya sa usa ka hari. Gipadayag ni Propeta Ezekiel ang usa ka hulagway sa usa ka magbalantay sa mga karnero. Usa ka magbalantay nga puno sa gugma alang sa iyang mga karnero. Ug tungod sa dakong gugma wala magpanuko ang maong mag- balantay nga ihatag niya ang iyang kaugalingon alang sa iyang mga karnero. Mao kini ang tunay nga paghigugma.

Sama usab diha sa ikaduhang pagbasa, gihulagway usab ni San Pablo diha sa iyang sulat ngadto sa taga Corinto, kung giunsa paglupig ni Cristo ang kamatayon. Sa iyang pagkahari, nakig-uban siya kanato ug gibuntog niya ang kangitngit sa kamatayon aron iya kitang luwason gikan sa kangitngitan sa sala, tungod kini sa iyang dakong gugma kanato.

Ug diha sa Ebanghelyo, adunay usa ka talagsaong paghulagway nga gipadayag ni San Mateo aron kahatagan og dakung punting kung unsang klase nga pagkahari si Jesus. Nagpadayag kini kanato og usa ka hulagway sa usa ka talagsaong hari nga diin iyang gihatag ang iyang kaugalingon alang sa mga ubos natong mga igsuon. Iya kining gipakita diha sa iyang pakig-uban kanila. Mao kini ang kongkreto nga sumbanan nga gipadayag ni Cristo nga ang matuod nga hari mao ang pag-alagad sa uban. Ang hingpit nga pagtahan sa kaugalingon sa walay pagpihig kon kinsa ang alagaran. Usa ka pag-alagad nga wala nagkinahanglan og balos. Usa ka pag-alagad nga gisalikway ang kaugalingong kaayohan tungod ug alang sa uban nga bisan pa gani nga mohantong kini sa pagbuhis sa kaugalingong kinabuhi tungod ug alang sa gialagaran. Ang iyang gingharian dinhi sa kalibutan dili

usa ka dako nga palasyo kon dili usa ka dako nga krus. Mga igsuon, mao kini ang angay natong pamalandongan base sa mga binasa karon. Isip mga binunyagan naka- angkon kita sa tulo ka gimbuhaton ni Cristo nga ang pagka-propeta, pari ug hari. Ang ato bang pagkahari nahisubay ba sa ehemplo nga gihatag kanato ni Cristo? Kung matuod kita nangalagad diha sa tagsatagsa nato ka katilingban nahisubay ba kini sa panig-ingnan nga gipadayag sa usa ka Kristohanong pagpangalagad? Wala ba kitay gitinguha nga sa kaulahian aduna kitay maangkon nga gahum ug katanyagan? Sayod kita nga dili lalim ang pagpangalagad kon atong lantawon ang tawhanong bahin niini. Apan molahutay lamang kita kon kini atong isalig sa panabang sa atong labaw'ng Hari nga mao si Jesucristo. Hinaut pa unta!

Giya alang sa Pamalandong:

1. Naghatag ba ako og panahon sa pag-alagad sa akong isigkatawo?

2. Giunsa man nako pagpuyo ang mga nahibiling panahon sa akong kinabuhi?

3. Migahin ba ako og panahon alang sa Ginoo?

ALC [Komentaryo Tuig A] Third Edition

f. PANGALIYA SA KATILINGBAN

Pangulo: Mga igsoon ang pagkamaalagaron ni Kristo maoy buhing timaan sa Iyang pagkahari. Busa atol sa pagsaulog nato niining maong Solemnidad, sa tumang pagsalig atong ihalad ang atong mga pag-ampo ug mga panginahanglan. Sa matag pangamuyo kita motubag: 

GINOO, DUNGGA ANG IMONG KATAWHAN.

1. Nga ang tibuok Simbahan magpadayon sa iyang gimbuhaton sa pagpakaylap sa tibuok kalibutan ang paghari sa Dios diha kang Kristo pinaagi sa pagpadayag sa matuod nga hiyas sa pagkamaalagaron alang sa tanang katawhan. Mag-ampo kita.

2. Nga ang mga lideres sa tanang mga nasud ilabina dinhi sa atong nasud, giyahan unta nila ang katawhan subay sa panig-ingnan ni Kristo diha sa matinud-anong pag- alagad alang sa tanang nanginahanglan. Mag-ampo kita.

3. Nga ang atong mga kaigsoonan nga nag-antus sa kalisod sa kinabuhi, mga nabiktima sa nagkalainlaing kalamidad makasinati unta sila og kahupayan pinaagi sa atong makanunayong pagpakabana ug pag-amoma kanila. Mag-ampo kita.

4. Nga kitang tanan nga sakop niining maong katilingban magmakanunayon unta ang atong pagpa-ambit sa pagkahari ni Kristo diha sa atong matinud-anong pagpakiglambigit sa mga kalihokan sa atong katilingban isip mga maayong piniyalan. Mag-ampo kita.

5. Nga ang tanang lideres ning maong katilingban, magmakugihon untang mopaambit sa ilang panahon alang sa kalamboan ug katukuran sa paghari ni Kristo dinhi sa kalibutan. Mag-ampo kita.

6. Nga ang atong personal nga katuyuan atong ihalad sa Dios diha sa kahilum.

Pangulo: Langitnong Amahan nasayud kami nga dili Nimo ihikaw kanamo ang among mga gikinahanglan kon kini makaayo ug makahatag kanamo og kalamboan ilabina diha sa among makanunayon nga pagpakiglambigit Kanimo pinaagi ni Kristo nga among Hari hangtud sa kahangturan. Amen.