Ikakatloa'g duha nga domingo

IKAKATLOA'G DUHA NGA DOMINGGO

PASIUNANG PAG-AMPO:

Makagagahum nga Amahan, pagkadako sa imong kalooy ug pagkalig-on sa imong katarung.

Tabangi kami sa mga palas-anon ug hagit sa kinabuhi. Hinloi ang among mga hunahuna sa mga ngil-ad nga garbo ug dawata ang mga nindot nga pangandoy sa kamatuoran ug tinguha sa paghigugma aron sa dakong kahimuot mahimo kaming magmanggihatagon moalagad sa tanan.

Kini among gipangayo pinaagi sa among Ginoong Jesukristo imong Anak, nga buhi ug hari uban kanimo ug sa Espiritu Santo, Dios nga usa hangtud sa kahangturan.

a. BASAHON I

Kin. 6: 12-16

Kinutlo gikan sa basahon sa Kinaadman.

Masanag ug dili molubad ang Kinaadman, ug sayon siyang hikat-onan kanila nga nahigugma kaniya, ug hikaplagan nila nga mangita kaniya. Ang Kinaadman dali nga mopaila sa iyang kaugalingon bisan sa dili pa tinguhaon sa mga tawo; ang maghulat kaniya sa kaadlawon dili mahigawad, kay makaplagan nila siya nga nagalingkod diha sa ilang pultahan. Kay ang paghunahuna mahitungod kaniya maoy kahingpitan sa puangod, ug siya nga tungod sa Kinaadman magatukaw dali ra nga malingkawas sa kabalaka; kay nagalibot siya, nangita kanila nga takus kaniya, ug mahigugmaon siya nga magpakita kanila diha sa mga dalan, ug mosugat kanila sa tanan nga kakugi.

Ang Pulong sa Ginoo.

b. SALMO RESPONSORYO

Salmo 63: 2,3-4,5-6,7-8

Tubag (R) Ang akong kalag giuhaw Kanimo, O Ginoo, akong Dios.

O Dios, Ikaw ang akong Dios nga akong gipangita: Kanimo nangandoy ang akong unod ug giuhaw ang akong kalag; Sama sa yuta nga uhaw, walay kinabuhi ug walay tubig. (R)

Sa ingon nagatutok ako Kanimo diha sa santuwaryo aron pagtan-aw sa Imong gahum ug sa Imong himaya. Kay ang Imong kalooy mas maayo kay sa kinabuhi; ang akong mga ngabil maghimaya Kanimo. (R)

Sa ingon niini dayegon ko Ikaw samtang buhi pa ako; sa pagbayaw ko sa akong mga kamot sangpiton ko ang Imong ngalan. Ingon sa kabuhong sa usa ka bangkite mabusog ang akong kalag. ug sa masadya nga mga ngabil magdayeg Kanimo ang akong baba. (R)

Hinumdoman ko Ikaw sa akong higdaanan, ug latas sa pagbantay sa kagabhion magpalandong ako Kanimo: Ikaw ang akong hinabang ug diha sa landong sa Imong mga pako nagasinggit ako sa kasadya. (R).

c. BASAHON II

1 Tes. 4: 13-18

Kinutlo gikan sa unang sulat ni San Pablo ngadto sa taga Tesalonica.

Mga igsoon, buot kami nga masayud kamo sa kamatuoran mahitungod niadtong nangamatay na, aron dili kamo maguol ingon sa mga tawo nga walay paglaum. Kay kita nagtuo man nga si Jesus namatay ug nabanhaw; busa nagatuo kita nga banhawon sa Dios kadtong nangamatay nga nagtuo kang Jesus aron paubanon Kaniya.

Ang pagtulun-an sa Ginoo nga gitudlo namo kaninyo mao kini: kita nga buhi pa inigbalik sa Ginoo, dili mag-una niadtong nangamatay na. Unya mabati ang singgit sa pagmando ug ang tingog sa arkanghel ingon man ang lanog sa trumpeta sa Dios ug mokunsad ang Ginoo gikan sa langit. Maoy unang mabanhaw kadtong nangamatay nga nagtuo kang Kristo. Unya kita nga buhi pa niadtong adlawa, bayawon uban kanila didto sa mga panganod aron pagsugat sa Ginoo. Ug kita unya uban na kanunay sa Ginoo. Busa pagdasigay kamo tungod niining paglauma.

Ang Pulong sa Ginoo.

d. EBANGHELYO

Mt. 25:1-13

Ang Santos nga Ebanghelyo sumala ni San Mateo.

Niadtong adlawa ang Gingharian sa langit mahisama sa napulo ka dalaga nga nagdala sa ilang mga suga ug nanglakaw aron pagsugat sa pamanhonon. Danghag ang lima kanila, ug mabinantayon ang laing lima. Ang mga danghag nagdala sa ilang mga suga apan wala sila magtagana pagdalag lana nga igdudugang, samtang ang mga mabinantayon nagdalag mga sudlanan nga punog lana uban sa ilang mga suga. Ang pamanhonon nalangan pag-abot, busa nagduka ug nakatulog ang mga dalaga.

Tungang gabii na kadto sa dihang milanog ang usa ka singgit, 'Ania na ang pamanhonon! Dali kamo ug sugata siya!' Nangmata ang mga dalaga ug giandam nila ang ilang mga suga. Unya ang mga danghag miingon sa mga mabinantayon, 'Bahini kamig diyotay sa inyong lana, kay hapit na mangapalong ang among mga suga." Apan ang mga mabinantayon mitubag, 'Ayaw, kay dili na kaigo ang lana alang kaninyo ug kanamo. Lakat hinoon kamo sa tindahan ug palit kamo og inyong magamit.' Busa ang mga danghag nga dalaga milakaw aron pagpalit og lana, ug sa wala na sila didto, miabot ang pamanhonon. Ang lima ka dalaga nga nakapangandam mikuyog kaniya pagsulod ngadto sa kombira sa kasal ug gisirhan ang pultahan Unya miabot ang ubang mga dalaga ug misangpit sila, 'Sir, pasudla kami!' Apan ang pamanhonon mitubag, 'Wala ako makaila kaninyo. Ug gitapos ni Jesus ang sambingay sa pag-ingon, “Busa pagtukaw kamo kay wala kamo mahibalo sa adlaw o sa takna."

Ang Ebanghelyo sa Ginoo.

e. KOMENTARYO

Tema: Pagpangandam Kanunay.

Makadaghan sa atongkinabuhi, nakadungog na kita og nagkalainlaing mga sambingay. Ang sambingay kanunay maghatag kanato og lalum nga kahulugan nga mahimo natong sumbanan sa inadlaw-adlaw nato nga kinabuhi. Ang Ebanghelyo karon naghisgot mahitungod sa sambingay sa Napulo ka mga Dalaga. Kini naghisgot mahitungod sa pagpangandam. Ang tawo nga walay pagpangandam, walay panglantaw sa kaugmaon. Sama pananglitan sa mga batan-on nga gusto na magminyo apan wala pay mga panginabuhi. Lisod kaayo mosulod niining kinabuhi sa kaminyoon kung wala kini naapil sa pagplano. Moabot gayud ang adlaw nga magbasol kini ug ulahi na ang tanan. Ilabi na gayud kung ang usa ka tawo mamatay lang sa kalit nga wala makapangandam sa pag-abot sa kamatuoran sa kamatayon. Wala nay higayon sa paghinulsol ug pagpangayo og pasaylo.

Niining sambingay nga atong nadungog karon, ang maalamon nga mga dalaga nagdala og lana uban sa ilang lampara. Kita usab adunay lampara nga mao ang atong Kristohanong pagtuo. Ayaw tuguti nga mapalong kini! Aron dili mapalong, angay kitang mamalandong kanunay sa Pulong sa Dios.

Kon atong sundon ang pulong sa Dios, molakaw kita sa dalan sa gugmang mainantuson aron nga sa tanang takna andam kita sa pag- atubang sa atong Diosnong maghuhukom. Niining paagiha, maandam kita sa pagsulod sa kumbira nga walay katapusan.

Matud ni San Pablo: "Mituo kita nga si Jesus namatay ug nabanhaw. Sa ingon usab ang mga nangamatay diha kang Kristo pagadad-on sa Dios uban kaniya." (1 Tes, 4:14)

Ang hagit kanato karon mao ang pagtukaw kanunay diha sa atong mga pag-ampo kay wala kita masayud kanus-a moabot ang atong Ginoo diha sa atong tagsatagsa ka kinabuhi.

Giya alang sa pamalandong:

1. Unsa man ang kinahanglan nakong andamon sa akong kinabuhi?

2. Andam na ba ako nga moatubang sa Ginoo diha sa iyang pag-abot?

f. PANGALIYA SA KATILINGBAN

Pangulo: Makagagahum nga Amahan, kami misalig sa Imong walay puas nga panabang alang sa Imong katawhan. Busa sa hugot nga pagtoo among ihalad karon ang among mga pag- ampo. Sa matag pangamuyo kita motubag: GINOO, PATALINGHUGI ANG AMONG PANGAMUYO.

1. Alang sa nagdumala sa atong Simbahan, ang Santo Papa, mga Obispo, kaparian ug relihiyoso nga unta sa kanunay ilang mapaambit ang buhing Pulong sa Dios nga maoy lig-on nga gabayan sa atong kahiusahan. Mag-ampo kita.

2. Alang sa atong mga lideres sa nasud, nga unta sa kanunay sila maglantaw sa kaayohan sa tanang katawhan nga diin ang gugma, kalinaw ug kahiusahan maoy maghari sa atong katilingban. Mag-ampo kita.

3. Alang sa tanang katawhan ilabina dinhi sa atong katilingban, nga unta atong makit- an ug mabati ang kamahinungdanon sa Pulong sa Dios dinhi sa atong kinabuhi aron sa kanunay kita maandam ug mahiusa Kaniya sa Iyang pagbalik dinhi. Mag-ampo kita.

4. Alang sa atong mga kaigsoonan nga nawad-an na og paglaum sa pagpakabuhi tungod sa nagkalainlaing kalisdanan nga ilang nasinati, unta sa kanunay ilang maila ang Dios nga maoy tinubdan sa mga gasa ilabina sa gasa sa kinabuhi. Mag- ampo kita.

5. Alang kanatong tanan nga nangandoy sa pagbalik sa atong Ginoo, nga unta atong mapuy-an ang mga hiyas nga Diosnon aron atong maangkon ang atong pagkabalaan. Mag-ampo kita.

6. Alang sa atong kaugalingon nga katuyuan, ato kining i-ampo diha sa kahilum.

Pangulo: Langitnon namong Amahan, Ikaw kanunay ang among gisaligan ug gilauman. Busa nagtoo ug naglaum kami nga Imong dunggon ang mga pag-ampo nga among gihalad karon pinaagi sa Imong maayong kabubut-on ug paagi. Kini among gipangayo pinaagi ni Kristo uban sa Espiritu Santo Dios nga usa hangtud sa kahangturan. Amen.