IKAKAWHAAG SIYAM

Ikakawhaag-siyam nga Domingo Sulod sa Tuig

PASIUNA

Oktubre 22, 2023

Maayong buntag mga igsuon diha ni Cristo. Ania na kita sa Ikakawhaan ug siyam nga Domingo sa Ordinaryong Panahon. Karong Domingoha usab mao ang World Mission Sunday.

Ang unang pagbasa gikuha gikan sa Basahon ni Propeta Isaias. Dinhi atong madungog ang Ginoo nga nagpaila ngadto kang Ciro.

Ang ikaduhang pagbasa gikuha gikan sa Unang Sulat ni San Pablo ngadto sa tag-Tesalonica. Dinhi atong madungog nga si San Pablo miingon, "kay nagwali kami sa Maayong Balita dili sa pulong lamang kon dili sa gahom sa Espiritu Santo."

Ang Ebanghelyo gikuha gikan sa Balaan nga Ebanghelyo sumala ni San Mateo. Dinhi atong madungog nga si Jesus miingon, "Nan, ihatag sa Cesar ang iya sa Cesar ug ngadto sa Dios ang iya sa Dios."

Palihug manindog alang sa pagsugod sa Santos nga Eyukaristiya.

BASAHON I

Is. 45:1, 4-6

KINUTLO GIKAN SA BASAHON NI PROPETA ISAIAS

Mao kini ang giingon sa GINOO kang Ciro nga iyang pinili ug iyang gipadala aron pagbuntog sa kanasuran ug pagpukan sa mga hari, pag-abli sa mga ganghaan ug dili na kini sirhan.

Tungod sa akong alagad nga si Jacob, ug kang Israel na akong pinili gihatagan ko ikaw og dakong dungog, bisan pag wala ka makaila kanako.

"Ako mao ang GINOO, wala nay lain, walay Dios gawas kanako; gilig-on ko ikaw, bisan pag wala ka makaila kanako, aron ang katawhan, sukad sa sidlakan hangtod sa kasadpan, masayod nga walay laing gawas kanako; ako mao ang GINOO, ug wala nay lain.

ANG PULONG SA GINOO.

SALMO RESPONSORYO

Ps. 96:1, 3, 4-5, 7-8, 9-10

R. Tagaig himaya ug dungog ang Ginoo.

Awiti ang Ginoo og usa ka bag-ong awit; awiti ang Ginoo, kamong tanang kayutaan.

Isangyaw ang iyang himaya diha sa kanasuran; diha sa tanang katawhan, ang iyang katingalahang mga buhat.

R. Tagaig himaya ug dungog ang Ginoo.

Kay dako ang Ginoo ug angay gayod nga daygon; makataha siya, labaw sa tanang mga dios.

Kay ang tanang mga dios sa kanasuran kawang, apan ang Ginoo nagbuhat sa kalangitan.

R. Tagaig himaya ug dungog ang Ginoo.

Hatagi ang Ginoo, kamong mga banay sa kanasuran, hatagi ang Ginoo sa himaya ug pagdayeg; hatagi ang Ginoo og himaya angay sa iyang ngalan.

Pagdalag mga gasa, ug sulod sa iyang kahawanan.

R. Tagaig himaya ug dungog ang Ginoo.

Simbaha ang Ginoo diha sa balaan nga saput; pangurog kamo sa iyang atubangan, kamong tanang kayutaan;

Ingna diha sa kanasuran: Ang Ginoo Hari, nagamando siya nga matarong sa katawhan.

R. Tagaig himaya ug dungog ang Ginoo.

BASAHON II

1 Thes 1:1-5

KINUTLO GIKAN SA UNANG SULAT NI SAN PABLO NGADTO SA TAGA-TESALONICA

gikan ni Pablo, ni Silas ug ni Timoteo- Alang sa simbahan sa Tesalonica nga iya sa Dios nga Amahan ug sa Ginoong Jesucristo: Mabatonan unta ninyo ang grasya ug ang kalinaw sa Dios.

Sa kanunay nag-ampo kami alang kaninyo ug nagpasalamat sa Dios tungod kaninyong tanan. Sa among pag-ampo sa atong Dios ug Amahan wala namo hikalimti paghisgot ang inyong pagtuo nga gipakita ninyo, ug ang inyong kakugi nga dinasig sa gugma, ingon man ang inyong lig-ong paglaum sa atong Ginoong Jesucristo. Mga igsuon, nasayod kami nga ang Dios nahigugma kaninyo ug gipili kamo niya aron maiya. Kay nagwali kami sa Maayong Balita dili sa pulong lamang kondili sa gahom sa Espiritu Santo. Hugot ang among pagtuo nga kini matuod gayod. Nasayod kamo giunsa namo pagkinabuhi samtang kami uban pa kaninyo tungod lamang sa inyong kaayohan.

ANG PULONG SA GINOO.

EBANGHELYO

Mt. 22:15-21

Kinutlo gikan sa Balaan nga Ebanghelyo sumala ni Mateo

Unya ang ang mga Pariseo milakaw ug naghimo og laraw unsaon pagbitik kang Jesus pinaagi sa pulong. Ug mipadala sila kaniya sa ilang mga tinun-an uban sa mga dumadapig ni Herodes nga nag-ingon, "Magtutudlo, nasayod kami nga matuod ka ug nagatudlo sa dalan sa Dios diha sa kamatuoran, ug walâ magpihig kang bisan kinsa; tungod kay wala ka magtan-aw sumala sa panagway sa mga tawo. Nan, sultihi kami unsay imong hunahuna, subay ba sa balaod ang pagbayad og buhis sa Cesar o dili?"

Apan si Jesus nga nasayod sa ilang daotang tinguha miingon, "Nganong inyo man akong gisulayan, mga tigpakaaron-ingnon? Ipakita kanako ang salaping igbabayad sa buhis."

Ug gidad-an nila siya og usa ka denaryu. Ug miingon siya kanila, "Kang kinsa man kining larawan ug ngalan?"

Mitubag sila kaniya, "Sa Cesar."

Unya miingon siya kanila, "Nan, ihatag sa Cesar ang iya sa Cesar ug ngadto sa Dios ang iya sa Dios."

Ang Ebanghelyo sa Ginoo.

KATILINGBANONG PAG-AMPO

Oktubre 22, 2023

Pari: Ang atong Ginoo nagpadayag sa iyang pagkamatinud-anon ngadto sa iyang katawhan. Busa moduol kita kaniya karon ug atong ihalad ang atong panginahanglan diha sa pag-ingon:

MALULUY-ONG GINOO, DUNGGA KAMI.

1. Alang sa atong Santo Papa Francisco, mga obispo, kaparian, mga diyakono ug mga relihiyoso, mamahimo unta silang matuod nga instrumento sa pagpalawom sa pagtuo sa tanang binunyagan. Mag-ampo kita sa Ginoo.

2. Alang sa mga lideres sa atong nasud, makabaton unta og kasingkasing nga mohatag og tinuoray nga pagserbisyo sa katawhan aron makab-ot ang kauswagan ug kaangayan nga maoy mithi ug damgo sa katawhan. Mag-ampo kita sa Ginoo.

3. Alang sa tanang misyonero, makadawat unta sila og dugang grasya sa kaalam, ug hugot nga pagtuo sa Ginoo aron mapadayunon nilang ipaambit ang Maayong Balita ngadto sa katawhan. Mag-ampo kita sa Ginoo.

4. Alang sa mga masakiton, tigulang, himalatyon ug biktima sa giyera, makaangkon unta sila sa kaayohan nga ilang gihandum, ug mamahimong masaligon sa grasya sa Dios alang kanila. Mag-ampo kita sa Ginoo.

5. Alang sa mga mihalad sa ilang pagdayeg ug pasalamat sa Dios ilabina nila ______ mamahimong magmalig-on diha sa ilang pagsalig ug pagtuo sa Ginoo sa tanang panahon. Mag-ampo kita sa Ginoo.

6. Alang sa atong mga kaigsuonan nga nangamatay ilabina sila ______ dawaton unta sila sa gingharian nga gitagana alang kanila. Mag-ampo kita sa Ginoo.

Pari: Amahan, sayod kami sa imong walay sukod nga gugma kanamo. Busa masaligon kaming mipadangat sa among pangamuyo nganha kanimo, pinaagi ni Cristo among Ginoo. Amen.

PAHIBALO

Oktobre 22, 2023

1. Adunay pagahimoon nga Confirmation karong umaabot nga bulan sa Nobyembre 2023. Giawhag kadtong mga interisadong magpakompirma sa pagparehistro ngadto sa ilang mga tagsa-tagsa ka mga Gkk, ug paghatag sa gikinahanglang mga requirements sama sa IDS alang sa Kompirma ug Baptismal Certificate. Ang deadline para sa pag-submit karong Oktobre 28, 2023.

2. Karong umaabot nga Nobyembre 1, 2023, adlaw sa mga Santos ug Nobyembre 2, 2023, adlaw sa mga Minatay, ang atong mga Santos nga Misa mao ang mga musunod: Ala 6:00 sa buntag, alas 12:00 sa udto ug alas 5:00 sa hapon ang misa dinhi sa simbahan ug adunay alas 9:00 sa buntag nga Misa didto sa Mintal ug Tugbok nga mga Sementeryo. Giawhag ang tanan sa pagtambong.

3. Ang mga sobre alang sa mga pamisa sa kalag pwede nang makuha didto sa inyong mga tagsa-tagsa ka mga Gkk o diha sa opisina sa atong parokya. Kining mga sobre mamahimong ibalik sa simbahan sa dili pa moabot ang Nobyembre 1, 2023.

Daghang Salamat.