IKAKAWHAA'G PITO NGA DOMINGGO

IKAKAWHAA'G PITO NGA DOMINGGO

a. BASAHON I

Is. 5:1-7

Kinutlo gikan sa basahon ni Propeta Isaias.

Tugoti nga awitan ko ang akong minahal, usa ka awit sa gugma bahin sa iyang kaparasan: ang akong hinigugma may parasan kaniadto didto sa tabunok kaayo nga bungtod. Gibugwal niya kini ug gihawanan sa mga bato ug gitamnan niyag labing maayong paras; ug gitukorag tore nga bantayan diha sa taliwala niini, ug gibutangan pa gayud niya kinig pug-anan sa ubas ug nagpaabot siya nga mamunga kinig ubas, apan namunga hinuog ihalas nga ubas. Ug karon, O molupyo sa Jerusalem, ug katawhan sa Juda, hukmi ako ninyo ug ang akong parasan. Unsa pa man diay ang angay kong buhaton alang sa akong parasan, nga wala pa nako mahimo? Sa dihang nagpaabot ako inay mamunga kinig ubas, namunga hinoon kinig ihalas nga ubas. Karon sultihan ko kamo kon unsay buhaton ko sa akong parasan. Kuhaon ko ang koral niini ug himoong sibsibanan; lumpagon ko ang paril niini ug tamaktamakan kini. Laglagon ko kini; dili na pul-ongan ang iyang mga sanga ni habukan ang punoan niini, ug manubo niini ang kadyapa ug sampinit; ug mandoan ko ang panganod nga dili na kini paulanan. Ang parasan sa Ginoo nga Labing Gamhanan mao ang balay sa Israel ug ang katawhan sa Juda mao ang iyang pinalanggang tanum; nangita siyag hustisya; apan ang nakaplagan niya mao ang pinatyanay. Nangita siyag katarung apan ang nakaplagan niya, paghilak!

Ang Pulong sa Ginoo.

b. SALMO RESPONSORYO

Salmo 80:9,12,13-14,15-16,19-20

Tubag (R) Ang parasan sa Ginoo mao ang balay sa Israel.

Gikan sa Ehipto gilalin Mo ang usa ka bagon; giabog Mo ang kanasuran ug gitanum Mo kini. Mikatay ang iyang kadahonan hangtud sa Dagat, ang iyang mga subol miabot hangtud sa suba. (R)

Nganong Imong gitumba ang iyang mga paril, aron ang tanang mangagi mangutlo sa iyang bunga. Giyatakyatakan siya sa baboyng ihalas gikan sa lasang, ug gikaon siya sa mga mananap sa kaumahan. (R)

O Ginoo sa kagahuman, balika pag-usab ang pagsud-ong gikan sa langit, ug tan-awa: Bantayi kining parasan, ug panalipdi ang gitanum sa imong tuong kamot (ang anak sa tawo nga imong gihimong malig-on). (R) 

Unya dili na kami mapahilayo kanimo; tagai kamig bag-ong kinabuhi, ug magsangpit kami sa imong ngalan. O Ginoo sa kagahuman, pabalika kami; kon ang imong nawong modan-ag kanamo, unya wala na kamiy kahadlokan. (R)

c. BASAHON II

Fil. 4: 6-9

Kinutlo gikan sa sulat ni San Pablo ngadto sa taga Filipos.

Ayaw kamo kabalaka sa bisan unsa, kondili pangayoa sa Dios ang inyong gikinahanglan uban ang pagpasalamat sa tanan ninyong pag-ampo. Ug ang kalinaw sa Dios nga dili matugkad sa tawo, manalipod sa inyong mga kasingkasing ug mga hunahuna sa inyong pagkahiusa kang Kristo Jesus.

Sa katapusan, mga igsoon, pun-a ang inyong mga hunahuna sa mga butang nga maayo ug angayng daygon: sa mga butang nga matuod, hamili, matarung, putli, matahom, ug halangdon. Ipakita sa buhat ang inyong nakat-onan ug nadawat gikan kanako pinaagi sa mga pulong ug sa mga buhat. Ug ang Dios nga naghatag kanato sa kalinaw mag-uban kaninyo.

Ang Pulong sa Ginoo.

d. EBANGHELYO

Mt. 21: 33-43

Ang Santos nga Ebanghelyo sumala ni San Mateo.

Si Jesus miingon sa punoang mga pari ug sa mga kadagkoan sa lungsod: "Pamati kamo og laing sambingay. May usa ka tawo nga yutaan nga nagatanum og mga paras. Gikoral niya kini ug gikalotag lungag nga kasudlan sa giniok nga ubas, ug nagtukod siyag bantayan. Unya gipasaopan niya ang iyang parasan ug milangyaw siya. Sa tingpamupo na sa ubas, gipadala niya ang iyang mga ulipon ngadto sa mga saop aron pagkuha sa iyang bahin. Apan gidakop sa mga saop ang mga ulipon; gibunalan nila ang usa, ug ang usa ilang gipatay, ug ang lain pa gayud ilang gibato. Unya gipadala pa gayud niya ang laing mga ulipon nga labaw pa kadaghan kay sa unang gipadala, ug mao gihapon ang gibuhat sa mga saop kanila. Sa katapusan gipadala niya ang iyang anak. Miingon siya, 'Sa walay duhaduha tahoron gayud nila ang akong anak.' Apan sa dihang nakita sa mga saop ang anak, nag-ingnanay sila, 'Kini siya ang anak sa tag-iya. Tana, patyon ta siya, ug maato na ang parasan!' Busa siya ilang gidakop, gitaral ngadto sa gawas sa parasan, ug gipatay.

"Karon, inig-abot sa tag-iya, unsa may iyang buhaton sa mga saop?" nangutana si Jesus. Sila mitubag, "Sa walay duhaduha patyon niya kadtong mga tawong dautan, ug pasaopan niya ang parasan og laing mga tawo nga makahatag kaniya sa iyang bahin sa abot sa hustong panahon." Si Jesus miingon kanila, "Wala ba kamo makabasa sa giingon sa Kasulatan?

'Ang bato nga gisalikway sa mga magtutukod kay walay kapuslanan, nahimo hinoong bato nga labing importante. Buhat kini sa Ginoo ug pagkakahibulongan gayud niini!'

Ug midugang si Jesus, "Busa sultihan Ko kamo nga ang Gingharian sa Dios kuhaon gikan kaninyo ug ihatag ngadto sa mga tawo nga makahatag og maayong mga bunga."

Ang Ebanghelyo sa Ginoo.

e. KOMENTARYO

Tema: Pagpuyo nga Puno sa Pagsalig ug Paghigugma sa Ginoo.

Usahay dunay mga panghitabo sa atong kinabuhi nga modangat kanato nga wala nato handuma nga moabot. Adunay kasinatian nga maghatag og kaguol, kalipay, kahingawa, kasuko, kaligutgot ug uban pa. Bisan unsang klase sa mga panghitabo nga atong masinati, dili gayod nato hikalimtan nga adunay nagpaluyong kahulugan o mensahe nga angay natong pamalandungan. Ug pangutan-on nato ang atong kaugalingon kon unsa man ang kalambigitan niini sa akong kinabuhi.

Sa atong mga pagbasa karon, ang kinatibuk-ang mensahe sa Dios nagpunting kanatong tanan, nga mao ang atong misyon diha sa pagpangalagad nga puno sa katarung inubanan sa hugot nga pagsalig ug paghigugma diha kaniya. Gihatag sa Dios ang tanang butang kanato aron atong mahimong giya ug gabayan sa atong pagpakabuhi dinhi niining kalibutan nga iyang gipiyal kanato. Nagpadayag kini nga ang parasan nga gihisgutan ni Jesus sa sambingay mao ang Gingharian sa Iyang Amahan diin kitang tanang katawhan maoy gipiyalan sa Dios aron atong atimanon ug ampingan. Nagpamatuod kini kon giunsa kita paghigugma sa Dios. Gihatag Niya ang tanan ug gisalig kanato uban sa iyang presensya aron malig-on ug mahingpit ang atong pagdumala sa tanan Niyang kabuhatan. Ang dakung hagit mao: kung unsaon nato kini pag- amuma ug pag-atiman aron kita makaangkon og maanindot ug mga matam-is nga bunga.

Sa atong paglatas sa atong tagsa-tagsa ka kinabuhi isip mga anak sa Dios, aduna kitay dakong kaakuhan. Mao nga pagtawag kanato diha sa misyon sa pagpangalagad: Ang bokasyon sa pagka-Pari, Madre ug mga layko, o yano nga mga tawo. Matuod nga adunay nagkadaiyang misyon nga gitagana kanato ang Dios, apan adunay duha lamang nga mas labing mahinungdanon: ang Pagsangyaw sa Maayong Balita sa Ginoo ug ang pagtabang ngadto sa nanginahanglan ilabina sa mga kabus ug mga tawo nga nahilayo sa Dios. Mao kini ang dakong hagit alang kanatong tanan. Kining maong misyon sa pagpangalagad ang naggiya kanato sa pag-ila, pagsalig, ug paghigugma sa Dios.

Unsa man ang angay natong buhaton aron mahimo kitang angayan ug epektibo nga mga misyonero bisan sa ginagmay nga paagi diha sa atong pamilya ug katilingban? Dili tanan naka- angkon sa kahibalo sa pagkamagsasangyaw. Usa kini ka gasa nga gihatag sa Dios kanato. Kay ang pagkamagsasangyaw wala lamang magpasabot sa pulong kondili labaw sa tanan sa mga maayo natong binuhatan diin magsukad ang pagpuyo nato sa mga mensahe sa Ebanghelo aron mahimo kitang epektibo nga sumbanan. Adunay mga kongkreto nga mga pamaagi aron maka-angkon kita sa husto ug yano nga paagi aron magiyahan kita sa atong pagpangalagad. Una, kinahanglan abli ang atong mga kasingkasing sa pag-umol sa atong kaugalingon sa pagtuon ug pagpuyo sa pulong sa Ginoo. Ikaduha, anaa kanunay ang mapadayonon nga pagtuon ug pag-apil sa mga pormasyon aron molambo ang atong kahibalo aron atong ikapaambit sa uban. Kining maong mga pamaagi matuod ug yano lamang apan kini nagkinahanglan sa kinasingkasing nga pagtahan sa kaugalingon ug lig-on nga baruganan aron makalahutay kita bisan pa moabot ang mga pagsulay sa kinabuhi. Sa laing bahin ang pagtabang ngadto sa nanginahanglan ilabina sa mga kabus ug mga tawo nga nahilayo sa Dios.

Kining maong misyon maoy lintunghanay sa tanan. Ang pagsangyaw walay kapuslanan kung walay kongkreto nga buhat o lihok ngadto sa nanginahanglan. Sumala pa ni San Pablo sa iyang sulat ngadto sa taga Filipos "Ipakita sa buhat ang inyong nakat-onan, nadawat, nadungog ug ang Dios nga naghatag kanato sa kalinaw mag-uban kaninyo."

Ako, ikaw, kitang tanan mga tinawag sa Dios aron mangalagad sa iyang parasan. Tubagon unta nato kini sa dakong pagsalig ug paghigugma kaniya aron kita makapamupo kita og mga matam-is nga mga bunga, nga diin mao kini ang dakong gasa nga atong ihatag pagbalik sa Dios sa iyang dakung paghigugma kanatong tanan.

Giya alang sa pamalandong:

1. Isip piniyalan sa Dios, unsa man ang akong gibuhat sa iyang mga kabuhatan?

2. Aduna ba akoy pagpakabana sa mga panginahanglan sa akong isigkaingon?

3. Sa unsang paagi nga ako makabalus sa dakung paghigugma sa Dios kanako?

f. PANGALIYA

Pangulo: Ang Ginoo padayon nga nagpadayag sa Iyang kaugalingon nganhi kanato diha sa Iyang kalooy ug grasya nga atong nadawat. Busa sa tumang pagsalig atong ihalad karon ang atong mga panginahanglan ug sa matag pag-ampo kita motubag: 

GINOO, PAMATIA KAMI.

1. Alang sa atong Simbahan ilabi na ang nagdumala niini ang Santo Papa, mga Obispo ug mga pari nga matinud-anon nilang isangyaw ug puy-an ang mga mensahe nga gipadayag sa Ebanghelyo ngadto sa tanang katawhan. Mag-ampo kita.

2. Alang sa atong nasud nga maghari unta ang matuod nga kalinaw ug panagdait pinaagi sa pagpatuman sa balaod subay sa Diosnong diwa ug kabubut-on. Mag- ampo kita.

3. Alang sa mga nagmasakiton natong mga igsoon nga hupayon ang ilang mga balatian ug ang paglaum sa Diosnong kahupayan ila na untang mahuptan. Mag-ampo kita.

4. Alang kanatong tanan nga mosunod Saya unta kita sa panig-ingnan ni Kristo sa bian dalan sa gugma, kalinaw ug pakigdait ug pagsinabtanay padulong sa kahingpitan sa kinabuhing tunhay. Mag-ampo kita.

5. Alang sa atong mga mahal sa kinabuhi nga mipanaw na nga unta makadangat na sila sa langitnong pinuy-anan nga gitagana sa Dios kanila. Mag-ampo kita.

6. Alang sa atong personal nga panginahanglan atong i-ampo diha sa hilum.

Pangulo: Amahang Langitnon wala ka mohunong sa pagtubag sa mga pag- ampo ug mga panginahanglan sa Imong katawhan. Itugot nga amo nang maangkon ang mga pag-ampo nga among gihalad karon pinaagi ni Kristo Imong Bugtong Anak, uban sa kahiusahan sa Espiritu Santo hangtud sa kahangturan. Amen.