IKAKATLOAN NGA DOMINGGO

Ikakatloan nga Domingo Sulod sa Tuig

PASIUNA

Oktubre 29, 2023

Maayong buntag/hapon mga igsuon diha ni Cristo.

Ania na kita sa Ikakatloan nga Domingo sa Ordinaryong Panahon. Karong Domingoha usab mao ang Prison Awareness Sunday.

Ang unang pagbasa gikuha gikan sa Basahon sa Exodo. Dinhi atong madungog nga ang Ginoo miingon, "Ang maghalad ngadto sa laing dios gawas Kanako, ang Ginoo, kinahanglan patyon."

Ang ikaduhang pagbasa gikuha gikan sa Unang Sulat ni San Pablo ngadto sa taga-Tesalonica. Siya miingon kanila, "Kay nagwali kami sa Maayong Balita dili sa pulong lamang kondili sa gahom sa Espiritu Santo."

Ug ang Santos nga Ebanghelyo dumala ni Mateo naghisgot mahitungod sa duha ka labing dakong sugo sa Dios.

Palihug manindog alang sa pagsugod sa Santos nga Eyukaristiya.

Salmo Responsoryo: Gihigugma ko ikaw, Ginoo, akong kusog.

Katilingbanong Pag-ampo: Mahigugmaong Ginoo, dungga kami.

BASAHON I

Ex. 22:20-26

KINUTLO GIKAN SA BASAHON SA EXODO

"Ang maghalad ngadto sa laing dios gawas kanako, ang GINOO, kinahanglan patyon."

"Ayaw ninyo palabilabihi o daugdaoga ang usa ka langyaw, kay kamo usab mga langyaw man kaniadto didto sa Ehipto. Ayaw ninyo daugdaoga ang mga biyuda ug mga ilo. Kon daugdaogon ninyo sila, tabangan ko sila inigpakitabang nila kanako, ug masuko ako pag-ayo ug patyon ko kamo pinaagi sa gubat. Mabiyuda ang inyong mga asawa ug mailo ang inyong mga anak."

"Kon magpahulam kamog salapi sa akong katawhan nga mga kabus, ayaw kamo pagpangayog tubo sama sa gihimo sa uban. Kon kuhaon ninyo ang kupo sa usa ka tawo ingon nga garantiya nga mobayad siya kaninyo, kinahanglan nga iuli ninyo kini kaniya sa dili pa mosalop ang adlaw."

ANG PULONG SA GINOO.

SALMO RESPONSORYO

Ps. 18:2-3, 3-4, 47, 51

R. Gihigugma ko ikaw, Ginoo, akong kusog.

Gihigugma ko ikaw, O Ginoo, akong kusog, O Ginoo, akong bato, akong kota, akong manluluwas!

R. Gihigugma ko ikaw, Ginoo , akong kusog.

O Dios, ko, akong bato nga dalangpanan, akong taming, ang gahom sa akong kaluwasan, akong malig-on nga dalangpanan.

Dayegon ang Ginoo, mituwaw ako, ug siguro ako sa akong mga kaaway.

R. Gihigugma ko ikaw, Ginoo, akong kusog.

Mabuhi ang Ginoo! Ug dayegon ang akong Bato!

Bayawon unta ang Dios nga akong manluluwas.

Ikaw nga naghatag sa dagkong mga kadaugan sa imong hari ug nagpakitag kaluoy sa imong gidihogan.

R. Gihigugma ko ikaw, Ginoo, akong kusog.

BASAHON II

1 Thes. 1:5-10

KINUTLO GIKAN SA UNANG SULAT NI SAN PABLO NGADTO SA TAGA-TESALONICA

Kay nagwali kami sa Maayong Balita dili sa pulong lamang kondili sa gahom sa Espiritu Santo. Hugot ang among pagtuo nga kini matuod gayod. Nasayod kamo giunsa namo pagkinabuhi samtang kami uban pa kaninyo tungod lamang sa inyong kaayohan. Giawat ninyo kami ug ang Ginoo, ug bisag nag-antos kamo pag- ayo gumikan sa inyong pagdawat sa mensahe, nalipay lang gihapon kamo sa kalipay nga gikan sa Espiritu Santo. Tungod niini nahimo kamong panig- ingnan sa tanang magtutuo sa Macedonia ug sa Grecia. Kay pinaagi kaninyo ang mensahe mahitungod sa Ginoo mikaylap sa Macedonia ug sa Grecia. Mikaylap usab sa tanang dapit ang balita mahi- tungod sa inyong pagtuo sa Dios. Busa wala nay kinahanglan nga amo pa kining isulti, kay sila mismo nagbalita giunsa ninyo kami pagdawat sa among pagduaw kaninyo, ug nga mibiya kamo sa mga diosdios aron pag-alagad sa matuod ug buhi nga Dios. Nagbalita usab sila sa inyong pagpaabot sa iyang Anak nga si Jesus nga moanhi gikan sa langit. Gibanhaw siya sa Dios ug siya maoy magluwas kanato sa umaabot nga kasuko sa Dios.

ANG PULONG SA GINOO.

EBANGHELYO

Mt. 22:34-40

Kinutlo gikan sa Balaan nga Ebanghelyo sumala ni Mateo

Pagkadungog sa mga Pariseo nga gipahilom niya ang mga Saduceo, nagkatigom sila, ug nangutana ang usa kanila [usà ka Batid sa Balaod] pagsulay kaniya, "Magtutudlo, unsang kasugoan diha sa Balaod ang labing dako?"

Ug miingon si Jesus kaniya, "Higugmaa ang Ginoo nga imong Dios sa tibuok mong kasingkasing ug sa tibuok mong kalag ug sa tibuok mong hunahuna.

Kini mao ang dako ug úna nga kasugoan. Ug ang ikaduha sama niini, 'Higugmaa ang imong isigkatawo sama sa imong kaugalingon. Niining duha ka kasugoan nag-agad lang ang Balaod ug ang mga Propeta."

Ang Ebanghelyo sa Ginoo.

KATILINGBANONG PAG-AMPO

Oktubre 29, 2023

Pari: Mga igsuon, atong Ginoo naghatag kanatog sugo nga mao ang gugma isip atong giya sa tanan natong buhaton. Uban sa mapaubsanong kasingkasing ug dakong pagtuo sa Diyos. Mangamuyo kita sa iyang tabang ug sa atong Ginoong Jesucristo. Sa matag pag-ampo kita moingon:

MAHIGUGMAONG GINOO, DUNGGA KAMI.

1. Nga ang mga lideres sa Simbahan ilabina si Papa Francisco, mga Obispo, mga pari ug mga diyakono, uban sa giya sa Espiritu Santo, mamahimong mga instrumento sa gugma sa Diyos ug aron pinaagi niining maong gugma, magpadayon sila sa pagdani sa mga makasasala ang mga binilanggo ug ang ilang mga biktima, ug ang mga nahisalaag nga motawag sa Dios nga amahan. Mag-ampo kita.

2. Nga ang mga lideres sa gobiyerno ug ang ilang mga kaubanan, malamdagan sa Espiritu Santo ug makakita kang Jesus ingon nga usa ka modelo sa paggiya sa mga tawo nga adunay hustisya ug katuyoan alang sa kaayohan sa tanan. Mag ampo kita.

3. Nga ang atong mga igsuon nga gihikawan sa gugma pinaagi sa kapintasan o kaluoy sa kaugalingon mamahimong matandog ug mabag-o sa grasya sa Dios ug tawhanon nga kaayo. Mag ampo kita.

4. Nga kadtong aktibong nalambigit sa ministriya sa bilanggoan: ang mga nangulo ug mga boluntaryo sa pag-alagad sa bilanggoan sa tibuok nasud mamahimo nga mga instrumento sa Dios sa paghatag ug paglaum sa mga binilanggo ug sa ilang mga biktima pinaagi sa ilang pagkinabuhi sa gugma ug pag-alagad. Mag ampo kita.

5. Nga ang mga ginikanan ug mga pamilya mamahimong mga dangpanan sa gugma, ug amumahon ang matag miyembro uban sa tiunay nga gugma ug ipaambit kini nga gugma sa uban. Mag ampo kita.

6. Nga ang mga mihalad sa ilang pagdayeg ug pasalamat ilabina nila ________ makadawat sa grasya sa Diyos matag adlaw. Mag ampo kita. 

7. Nga ang mga m

agtutuong nangamatay ilabina sila ________ makaangkon na sa kinabuhing dayon. Mag ampo kita. 

Pari: Langitnong Amahan, gihatagan mo kami og kinabuhi ug kaluwasan. Tabangi kami sa pagsunod sa imong sugo ang paghigugma kanimo labaw sa tanang butang ug ang paghigugma sa among isig-katawo. Kini among gipangayo pinaagi ni Cristo among Ginoo. Amen.

PAHIBALO

Oktobre 29, 2023

1. Karong umaabot nga Nobyembre 1, 2023, adlaw sa mga Santos ug Nobyembre 2, 2023, adlaw sa mga Minatay, ang atong mga Santos nga Misa mao ang mga musunod: Ala 6:00 sa buntag, alas 12:00 sa udto ug alas 5:00 sa hapon ang misa dinhi sa simbahan ug adunay alas 9:00 sa buntag nga Misa didto sa Mintal ug Tugbok nga mga Sementeryo. Giawhag ang tanan sa pagtambong.

Daghang Salamat.