ANG KASAYSAYAN SA KINABUHI NI SANTA MARIE RIVIER

ANG KASAYSAYAN SA KINABUHI NI SANTA MARIE RIVIER

(Foundress of the Sisters of the Presentation of Mary)

Gikan sa Balatian ngadto sa Kabalaan (From Infirmity to Sanctity)

Si Santa Marie Rivier, natawo didto sa Montpezat, Ardeche, France niadtong Disyembre 19, 1768, diha sa usa ka pamilya nga may lig-ong tradisyon nga Kristohanon. Sa gamay pa siyang bata gitawag siya ug Marinette. Si Marie Anne Combe ang iyang inahan, usa ka babaye nga may dakong pagtoo sa Dios. Jean Baptiste Rivier mao ang pangalan sa iyang amahan diin aduna usab dakong pagtoo sa Ginoo ug mihatag ug panahon sa pag-ampo bisan pa man sa kadaghan niyang gi-atiman ilabina sa iyang pagkamagpapatigayon, Louise ang iyang igsoong lalaki ug sila Cecille ug Anne ang iyang mga igsoong babaye. Sa katapusan sa bulan sa Abril, 1770, si Marinette nga nagpanuigon pa lang ug napulog-unom (16) ka bulan nahulog sa taas nga katre ug nabali ang bukog sa taas nga bahin sa iyang paa. Gikan sa pagka himsog nga bata nabakol siya ug masakiton pa gyod. Bisan pa man sa pag-atiman ug sa pagpatambal kaniya sa bantugang doktor, ug paghatag kaniya ug saklay/sungkod aron siya dili mamahimong inutil pag-ayo, wala kini makatabang kaniya. Sa walay pagduhaduha ang iyang inahan midangop sa atong Langitnong Inahan nga gituohan niyang makaayo sa iyang anak. Sulod sa upat (4) ka tuig, si Marinette naga-ampo nga masaligon sa Pieta - ang Mahal nga Birhen nga nagsapnay sa patay'ng lawas ni Hesus.

Uban sa dakong pagsalig siya misaad sa Mahal nga Birhen nga nagkanayon: "O Mahal nga Birhen, ayoha intawon ako Kon imo akong ayohon, ako mosaad nga tapukon ko ang mga kabataan ug tudloan ko sila sa paghigugma kanimo." Si Marie Rivier nisaysay usa niana ka adlaw nga: "Sa dihang gidala ako sa akong inahan sa Simbahan, sa unang higayon akong nakita ang rebolto sa Notre-Dame de Pitie (Pieta). Wala ako mahibalo kon kinsa siya, Giisip ko siyang usa ka ordinaryong babaye. Ug sa samang higayon akong nabati nga dunay magsulti kanako nga kining babayhana mas gamhanan kay sa ubang mga babaye ug nga iya akong paga-ayohon." Ang atong inahan nakadungog sa iyang masaligong pag-ampo ngadto kaniya. Mao nga atol sa kapistahan sa adlawng natawhan sa Mahal nga Birhen Maria- Septiembre 8, 1774, gidungog ang iyang pag-ampo ug nakalakaw siya nga ginamit ang saklay/sungkod.

Tulo ka tuig ang milabay, August 15, 1777 kadto, nakadawat siya ug milagro kay nakalakaw na siya sa hingpit nga dili na maggamit ug saklay/sungkod. Nahibalik kang Marinette ang kadasig sa paglakaw pag-usab. Siya nagmatinud-anon sa iyang saad, busa nagsugod siya sa pagtapok ug mga kabataan sa ilang dapit didto sa ilang tugkaran, gitudloan niya sila sa mga katesismo, gisaysayan ug mga nagkalain-laing mga estorya ug gitudloan sa mga pag-ampo nga iyang nahibaloan gikan sa iyang inahan. Taliwala sa kagubot tungod sa dakong giyera didto sa France, sa dihang ang mga simbahan ug mga kombento gisirad-an, ug ang mga kaparian, mga kamadrehan nanago sa kahadlok, si Marie Rivier maisugong nagtukod sa iyang Kongregasyon ang Sisters of the Presentation of Mary. Nahitabo kini niadtong Nobyem- bre 21, 1796, sa kapistahan sa Paghalad sa batang Maria didto sa templo. Siya ug ang iyang unang upat ka mga kauban mikunsagrar/mi- halad sa ilang kaugalingon ngadto sa Dios ug sa pagtudlo sa mga kabataan. Determinado gayud siya nga iyang ihalad ang iyang kaugal ingon diha sa pag-alagad sa Dios alang sa maong trabaho nga iyang gipangandoy nga pagahimoon pinaagi kaniya ug uban kaniya, diha sa pagsunod sa giya sa Espiritu Santo. Gihalad gayud niya ang iyang kauga-lingon sa way pagdumili ngadto sa Diosnon nga pagkinabuhi. Ang Ginoo nitugot kaniya sa pagdani ug sa pagdawat sa mga batan-ong babaye nga nag inambitay sa samang grasya sa bokasyon ug gitawag sa pagpuyo sa samang Espirituhanong kasinatian sa pagtrabaho uban sa mainitong pag-alagad alang sa kahimayaan sa Dios ug sa kaluwasan sa mga kalag. Gugma gayud ang sekreto sa iyang kinabuhi nga maoy nag-aghat kaniya sa paghatag sa iyang kaugalingon ngadto sa Ginoo. Dako kaayo ang iyang kasibot sa pagsangyaw mahitungod kang Jesus ug naningkamot nga mailhan ug higugmaon sa tanan mao nga nakamugna siyag usa ka gatus ug kap-atan ug usa (141) ka mga tulunghaan sa iyang panahon. Ang pagtudlo sa mga ka- bataan ug batan-on diha sa eskwelahan mao ang pinaka-nindot nga paagi nga ilang gihimo aron masangyaw si Jesus uban sa pagdawat bisan sa mga kabus. Gawas niini, nag-alagad usab sila sa mga masakiton, kabus ug mga ilo. Ang panagna ni Santa Marie Rivier nga nag- kanayon: "Moabot ang panahon nga ang akong mga kamadrehan molatas sa kadagatan!" natuman gayod.

Ug latas sa kadagatan gikan sa Europa nahitabo gayod nga ang Kongregasyon mikaylap sa Kontinente sa America, Africa ug Asya. Upat ka mga madre nga gikan sa Estados Unidos ang niabot sa Pilipinas. Aduna silay usa ka misyon nga mao ang pagsugod sa pundasyon sa Kongregasyon sa Presentation of Mary, ug tuod man kini nahitabo niadtong Oktubre 26, 1950. Sa pagka karon adunay mga eskwelahan nga namugna ug mga lain pang apostolado sama sa Campus Ministry, Adoration ug Orphanage. Ang espirituhanong pamilya ni Marie Rivier uban sa mga kamadrehan - ang Sisters of the Presentation of Mary nitubo uban ang mga Layko. Ang lainlaing grupo nga nahisakop sa espirituhanong pamilya ni Marie Rivier mao kini: Marie Rivier Associates, Consecrated Lay, PM Collaborators ug Friends of Marie Rivier.

Niadtong Mayo 23, 1982, si Mother Rivier gihimong Beata ni San Juan Pablo II. Sa tuig 2015 sa bulan sa Marso nahitabo ang milagro didto sa Clarin, Bohol pinaagi sa panabang ni Beata Marie Rivier. Ang Diocese sa Tagbilaran adunay gihimo nga pag usisa sa maong milagro niadtong tuig 2018 ug kini giaprobahan ni Papa Francisco niadtong Deciembre 13, 2021. Tungod sa milagro, si Beata Marie Rivier gideklarar ni Papa Francisco nga usa ka Santa sa Simbahan. Kini nahitabo niadtong Mayo 15, 2022 sa Saint Peter's Square, Rome.

Santa Marie Rivier- naghatag ka ug dakong kalipay tungod kay aduna na usab kami'y usa ka Santo nga tigpataliwala didto sa langit. Viva Santa Marie Rivier!

Sponsored by: HCMalita Batch'86