Ikakawhaag-upat nga Domingo Sulod sa Tuig

Ikakawhaag-upat nga Domingo Sulod sa Tuig

PASIUNA

Septiyembre 17, 2023

Maayong buntag/hapon mga igsuon diha ni Cristo.

Ania na kita karon sa ikakawhaan ug upat nga Domingo sa Ordinaryong Panahon, ug karong Domingoha usab ang Simbahan nagsaulog og Catechist's Day. Niining Santos nga Misa atong ilakip sa pag-ampo ang tanang mga Katekista.

Ang unang pagbasa gikuha gikan sa Basahon ni Sirach. Siya nakanayon "Apan kon pasayluon mo ang usa ka tawo nga makasala kanimo, ang imong mga sala pasayluon kon mag ampo ikaw"

Ang ikaduhang pagbasa gikuha gikan sa sulat ni San Pablo ngadto sa taga-Roma. Siya nagpahinumdum nga kon buhi kita ug kon mamatay kita alang kita sa Ginoo.

Ang ebanghelyo gikuha sa Ebanghelyo sumala ni San Mateo. Kini nagsaysay mahitungod sa walay kaluoy nga mangungutang.

Palihug manindog alang sa pagsugod sa Santos nga Eyukaristiya.

BASAHON I

Sir. 27:30 - 28:7

KINUTLO GIKAN SA BASAHON NI SIRAC

Ang kasuko ug ang mainitong buot maoy mga makalilisang nga butang, apan ang mga makasasala naghupot niining duha. Ang Ginoo nagtimaan sa imong mga sala, ug kon manimalos ikaw sa usa ka tawo, ang Ginoo manimalos usab kanimo. Apan kon pasayluon mo ang usa ka tawo nga nakasala kanimo, ang imong mga sala pasayluon kon mag-ampo ikaw. Dili ikaw makapaabot nga ang Ginoo magpasaylo kanimo samtang maghupot ikaw ug kaligotgot batok sa laing tawo. Ikaw mismo usa ka makasasala, ug kon dili ikaw mopasaylo sa laing tawo, wala ikay katungod sa pag-ampo nga ang Ginoo mopasaylo kanimo sa imong mga sala. Kon dili ikaw makawagtang sa imong kasuko, dili ikaw makalaom nga pasayluon-ikaw tawo lamang. Huna-hunaa kini! Moabot ang adlaw nga mamatay ikaw ug ang imong lawas madunot. Busa hunong na sa pagdumot ug pagpuyo na subay sa mga sugo sa Ginoo, kay ang mga sugo anaa sa kasabutan sa Labing Halangdon. Inay maguol ka tungod sa mga kasaypanan sa imong isigkatawo, ayaw na lang kini pagtagda.

ANG PULONG SA GINOO.

SALMO RESPONSORYO

Ps. 103:1-2, 3-4, 9-10, 11-12

R. Ang Ginoo maayo ug maluluy-on, dugay nga masuko, ug bahandianon sa pagbati.

Dayga ang Ginoo, kalag ko; ug ang tibuok kong kaugalingon, dayga ang iyang balaang ngalan. Dayga ang Ginoo, kalag ko, ug ayaw hikalimti ang tanang mga kaayohan niya.

R. Ang Ginoo maayo ug maluluy-on, dugay nga masuko, ug bahandianon sa pagbati.

Gipasaylo niya ang tanan mong kadautan,  gibulong niya ang tanan mong kasakitan.

Giluwas niya ang imong kinabuhi sa kalaglagan, gilibutan ka niya sa kaayo ug kaluoy.

R. Ang Ginoo maayo ug maluluy-on, dugay nga masuko, ug bahandianon sa pagbati.

Dili siya kanunay mangasaba, ni magtipig sa iyang kapungot kanunay.

Iya kitang gidumala dili sumala sa atong kasal-anan, ni mibalos siya kanato sumala sa atong mga kalapasan.

R. Ang Ginoo maayo ug maluluy-on, dugay nga masuko, ug bahandianon sa pagbati.

Kay ingon nga ang mga langit hataas labaw sa yuta, sa ingon labaw ang iyang kaluoy kanila nga mahadlokon kaniya.

Maingon nga ang silangan halayo sa

kasadpan, sa ingon iyang gipahilayo kanato ang atong mga kalapasan.

R. Ang Ginoo maayo ug maluluy-on, dugay nga masuko, ug bahandianon sa pagbati.

BASAHON II

Rom. 14:7-9

KINUTLO GIKAN SA SULAT NI SAN PABLO NGADTO SA TAGA-ROMA

Kay walay usa kanato nga mag- kinabuhi ug mamatay alang lamang sa kaugalingon; kon buhi kita, ang atong pagkabuhi alang sa Ginoo; ug kon mamatay, alang usab kita sa Ginoo. Busa buhi kon patay iya kita sa Ginoo. Kay si Cristo namatay ug nabanhaw aron mahimo siyang Ginoo sa mga buhi ug sa mga patay.

ANG PULONG SA GINOO.

EBANGHELYO

Mt. 18:21-35

Kinutlo gikan sa Balaan nga Ebanghelyo sumala ni Mateo

Unya midúol si Pedro ug miingon kang Jesus, "Ginoo, makapila ba makasalâ batok kanako ang akong igsoon ug pasayloon nako siya, hangtod makapitò?"

Miingon kaniya si Jesus,

"Wala akò maga-ingon kanimo hangtod makapitò apan hangtod sa kapitòan ka pitò.

"Busa ang gingharian sa mga langit mahisama sa usa ka hari nga buòt maghusay sa iyang mga sulugoon.

Pagsugod niya og husay, gidala ngadto kaniya ang usà nga nakautang og napulo ka libo nga talento. Sanglit walâ man kini siyay ikabayad, nagmando ang agalon nga ibaligya siya ug ang iyang asawa ug mga anak, ug tanan niyang kabtangan, ug ibayad sa utang.

Busa ang sulugoon mihapa, nagpakiluoy kaniya ug miingon, 'Tagai intawon akò og lugway ug bayran ko ikaw sa tanan. Ug naluoy pag-ayo ang agalon niadtong sulugoon ug gibuhian niya siya ug gipasaylo kaniya ang utang.

"Ug sa paggawas niadtong sulugoon,

nakit-an niya ang usà sa iyang isigkasulugoon, nga nakautang kaniya og usa ka gatos ka denaryu.

Ug iya siyang gidakop ug gituok ug giingnan, 'Bayri unsay imong giutang.

Busa mihapa ang iyang isigkasulugoon, nagpakiluoy kaniya sa pag-ingon, 'Tagai intawon akò og lugway ug bayran ko ikaw.

Apan walâ siya mosugot, ug gilábay niya siya sa bilanggoan hangtod nga mabayran niya ang utang.

"Busa, pagkakita sa iyang isigkasulugoon sa mga nahitabo, natugob sila sa kasubo, miadto sila sa ilang agalon ug gisuginlan nila siya sa tanan nga nahitabo.

Unya gipatawag siya sa iyang agalon ug miingon kaniya, 'Daotan nga sulugoon, gipasaylo ko kanimo kadtong tanan nimong utang tungod kay nagpakiluoy ka kanako. Dili ba kinahanglan usab nga maluoy ka sa imong isigkasulugoon, sama nga akò usab naluoy kanimo?'

Ug ang iyang agalon naglagot, ug gitugyan siya ngadto sa tigkastigo, hangtod nga mabayran niya ang tanang utang.

"Mao usab ang pagabuhaton kaninyo sa akong langitnong Amahan kondili kamo magpinasayloay gikan sa inyong kasingkasing."

Ang Ebanghelyo sa Ginoo.

KATILINGBANONG PAG-AMPO

Septiyembre 17, 2023

Pari: Mga igsuon, mag-ampo kita karon ngadto sa atong Langitnong Amahan nga maoy tinubdan sa tanang grasya ilabina diha sa pagka-maluluy-on ug pagka-mapasayloon. Sa matag pag-ampo kita moingon:

MALULUY-ONG AMAHAN, DUNGGA KAMI.

1. Alang sa mga nagdumala sa Simbahan ilabina ang atong Santo Papa Francisco, Arsobispo Romulo, mga Pari ug mga relihiyoso, pinaagi sa inspirasyon ug lamdag sa Espiritu, mamahimo silang instrumento sa kalinaw, panaghiusa, pagpasaylo ug paghigugma. Mag- ampo kita sa Ginoo.

2. Alang sa atong mga lideres sa gobiyerno, mamahimo unta silang maayong sumbanan sa pagpuyo sa pagpakighiusa diha sa pamilya ug katilingban alang sa kaayohan sa tanan. Mag-ampo kita sa Ginoo.

3. Alang sa tanang katekista makadawat unta sa grasya sa kaisog, pagkapaubsanon, ug pagkamatinud-anon aron makapadayon sila sa misyon ni Cristo dinhi sa kalibutan. Mag-ampo kita sa Ginoo.

4. Alang sa mga biktima sa pagdaug-daug, inhustisya ug nagkadaiyang kalamidad, makaangkon unta og igong kusog sa pag-atubang sa mga kalisdanan uban, sa panabang sa Dios. Mag-ampo kita sa Ginoo.

5. Alang sa mga tigulang ug mga masakiton, makadwat unta og kalig-on sa panglawas ug masinati unta nila ang kaayohan nga ilang gihandum pinaagi sa mga nag-amoma kanila. Mag-ampo kita sa Ginoo.

6. Alang sa mga mihalad sa ilang pagdayeg ug pasalamat sa Ginoo ilabina nila___________ agakon unta sila sa Ginoo ngadto sa maayong dalan ug bendisyonan sa matag adlaw sa ilang kinabuhi. Mag ampo kita sa Ginoo.

7. Nga ang mga magtutuong nangamatay ilabina sila_________ dalhon sila ngadto sa Gingharin sa Langit. Mag ampo kita sa Ginoo.

Pari: Mahigugmaon ug maluluy-on namong Amahan, amo nang ihalad kanimo ang tanan namong mga kinahanglan itugot nga amo kining madawat uban sa imong kaluoy ug grasya, pinaagi ni Cristo nga atong Ginoo. Amen.