IKAKAWHAA'G UPAT NGA DOMINGGO

IKAKAWHAA'G UPAT NGA DOMINGGO SA ORDINARYONG PANAHON

a. BASAHON I

Sirach 27: 33-28:9

Kinutlo gikan sa basahon ni Sirach.

Ang kapungot ug kasuko mga butang nga dulomtanan, apan gigakos kini pag-ayo sa makasasala. Ang mapanimaslon mag-antus sa panimalos sa Ginoo, kay mahinumdum siya sa ilang mga sala sa tinagsatagsa. Pasayloa ang panglupig sa imong isigkatawo; aron unya inig-ampo nimo, ang imong kaugalingon nga mga sala pasayloon.

Kon ang usa ka tawo maghaling og kasuko batok sa iyang isigkaingon makapaabot ba siyag kaayohan gikan sa Ginoo? Kon ang usa ka tawo dili malooy sa iyang isigkaingon, angay ba siyang mangayog pasaylo sa iyang kaugalingong mga sala? Kon siya nga tawo lamang mag-amping sa kapungot, kinsay mopasaylo sa iyang mga sala? Hinumdomi ang imong katapusang mga adlaw, biyai ang panag-away: hinumdomi ang kamatayon ug ang kadunot, ug hunong na sa pagpakasala. Hunahunaa ang kasugoan, ayaw pagdumot sa imong isigkatawo; hinumdomi ang kasabutan sa Labing Hataas, ug ayaw tagda ang mga kasaypanan.

Ang Pulong sa Ginoo.

b. SALMO RESPONSORYO

Salmo 103:1-2,3-4,9-10,11-12

Tubag (R) Ang Ginoo maayo ug maloloy-on; dugay nga masuko, ug bahandianon sa pagbati.

Dayega ang Ginoo, kalag ko; tibuok kong kaugalingon, dayega ang Iyang balaan nga ngalan. Dayega ang Ginoo, kalag ko, ug ayaw hikalimti ang tanan Niyang mga kaayohan. (R)

Gipasaylo Niya ang tanan mong kadautan, giayo Niya ang tanan mong mga sakit. Giluwas Niya ang imong kinabuhi sa kalaglagan. gipurongpurongan ikaw Niya sa kaayo ug kalooy. (R)

Dili Siya kanunay mangasaba, ni magtipig sa Iyang kapungot kanunay. Wala Siya magbuhat kanato sumala sa atong kasal-anan ni nagbalos Siya kanato sumala sa atong mga kalapasan. (R)

Kay ingon nga ang mga langit hataas labaw sa yuta sa ingon labaw ang Iyang kalooy kanila nga mahadlokon Kaniya. Maingon nga ang silangan halayo sa kasadpan, sa ingon Iyang gipalayo kanato ang atong mga kalapasan. (R)

c. BASAHON II

Rom. 14: 7-9

Kinutlo gikan sa sulat ni San Pablo ngadto sa taga Roma..

Walay usa kanato nga magkinabuhi ug mamatay alang lamang sa kaugalingon: kon buhi kita, ang atong pagkabuhi alang sa Ginoo: ug kon mamatay, alang usab kita sa Ginoo. Busa buhi kon patay Iya kita sa Ginoo. Kay si Kristo namatay ug nabanhaw aron mahimo Siyang Ginoo sa mga buhi ug sa mga patay.

Ang Pulong sa Ginoo.

d. EBANGHELYO

Mt. 18: 21-35

Ang Santos nga Ebanghelyo sumala ni San Mateo.

Miduol si Pedro kang Jesus ug nangutana, "Ginoo, makapila ba makasala kanako ang akong isigkatawo ug ako gihapon siyang pasayloon? Makapito ba?" Si Jesus mitubag. "Dili kay makapito ra, kondili kapitoan ka pito. Kay ang Gingharian sa langit sama man sa usa ka hari nga nakighusay sa mga utang sa iyang mga sulugoon. Sa diha nga nagsugod siya paghusay, gidala ngadto kaniya ang usa ka sulugoon nga nakautang kaniyag milyon ka pesos. Ug tungod kay wala man siyay igong ikabayad sa iyang utang, misugo ang iyang agalon nga ibaligya siya ingon nga usa ka ulipon, lakip ang iyang asawa ug ang iyang mga anak ug ang tanan nga iyaha, aron makabayad siya sa utang. Miluhod ang sulugoon atubangan sa iyang agalon, ug nagpakilooy nga nag- ingon, 'Sir, ayaw intawon ako apikiha, kay bayran ko ra ikaw sa tanan!' Nalooy kaniya ang agalon, ug busa gipapas niya ang utang sa sulugoon ug iyang gipalakaw.

Milakaw ang tawo ug gikasugat niya ang usa sa iyang mga kaubang sulugoon nga nakautang kaniyag pipila lamang ka pesos. Gilabni dayon niya ug gituok, ug giingnan, 'Bayri na ko sa imong utang!" Ang iyang kaubang sulugoon miluhod ug nagpakilooy kaniya sa pag-ingon, 'Ayaw intawon ako apikiha kay bayran ko ikaw. Apan wala siya mosugot; hinonoa, gipapriso niya hangtud nga makabayad sa utang. Sa pagkakita sa ubang sulugoon sa nahitabo, nasubo sila pag-ayo ug nangadto sila sa ilang agalon ug siya gisuginlan nila sa tanan. Busa gipatawag sa agalon ang sulugoon ug giingnan: 'Banyaga ka! Gipapas ko ang tanan mong utang kay nagpakilooy ka man kanako. Angay ka untang malooy sa imong isigkasulugoon, ingon nga ako nalooy kanimo.' Nasuko pag-ayo ang agalon ug gipapriso niya ang sulugoon aron silotan hangtud nga makabayad siya sa tanang utang." Ug gitapos ni Jesus ang sambingay sa pag-ingon, "Ingon usab niana ang buhaton kaninyo sa Akong Amahan nga atua sa langit kondili kamo mopasaylo sa inyong isigkatawo sa kinasingkasing gayud."

Ang Ebanghelyo sa Ginoo.

e. KOMENTARYO

Tema: Pagpasaylo: Grasya gikan sa Dios nga naghatag og Kinabuhi.

Dili malikayan nga sa atong pagpuyo aduna kitay napasakitan o nagpasakit kanato. Kining mga panghitaboa kabahin sa atong pagkatawhanon. Apan dili maayo kon anaa kitay pagdumot sa mga tawo nga nakasala kanato. Sa maong panghitabo, ang dili pagpasaylo sa atong isigkatawo maoy hinungdan sa usa ka pagdumot. Dili abri ang atong kasingkasing sa paghatag sa atong kapasayloan sa uban ilabina sa mga tawo nga nakasala kanato. Mao usab kini ang mahitabo kon kita ang makasala ngadto sa uban mahimo usab nga dili sila makapasaylo kanato. Atong makita nga dili maayo kon kini ang manghitabo kay magdinumtanay ang matag usa kanato ug walay kalinaw ang atong kaugalingon.

Ang atong unang pagbasa karon nagpahinumdom kanato nga ang Ginoo mopasaylo sa atong mga sala kon kita nagpasaylo usab sa atong isigkaingon. Busa kon kita nagtoo ug nagalum nga pasayloon sa Ginoo, ato unang pasayloon kadtong mga nakasala kanato. Dili kita makapaabot sa kalooy ug pasaylo sa Ginoo kon aduna kitay pagdumot sa uban. Pagkanindot paminawon kon ang matag-usa kanato nagpaambit og gugma ug dili ang kasuko ug pagdumot. Ang gugma maghatag og kahiusahan sa tanan. Diha usab sa gugma, atong masinati mismo ang atong Ginoo kay siya mismo gugma man. Busa dili gayod angay nga kita magbaton og pagdumot ngadto sa atong isigkatawo kay kita usa man ka Simbahan. Kita usa ka lawas kay kita nagtooo man kang Kristo nga mao ang atong ulo.

Si San Pablo, sa ikaduhang pagbasa nag-ingon nga "walay bisan usa kanato nga magkinabuhi ug mamatay alang lamang sa kaugalingon." Kita isip tawo, nagkinahanglan sa atong isigkaingon ug labi na gayod sa atong Ginoo. Dunay panultihon nga nagkanayon: "No man is an island" o walay tawo nga mabuhi nga mag-inusara. Kasagaran diha sa atong mga kasinatian, walay tawo nga nagpuyo nga nag- inusara, walay pamilya, walay mga higala ug mga silingan. Haw-ang ang atong kinabuhi kon nag-inusara kita sa atong pagpuyo. Busa ang kinabuhi magmalipayon ug mabungahon kon kita nahisakop sa usa ka pamilya ug katilingban nga si Kristo mao ang sentro ug modelo sa atong pagpuyo. Busa alang kanato nga anaa pa sa kasuko ug pagdumot, mipahilayo kita sa Simbahan diin ang Ginoo mismo ang nahimong sukaranan sa gugma ug kapasayloan.

Angatong Ebanghelyo naghisgotmahitungod sa pagpasaylo. Si San Pedro nangutana kang Jesus kon "makapila ba makasala kanako ang akong isigkatawo ug ako gihapon siyang pasayloon? makapito ba?" Sumala sa gisulti ni Jesus ang pagpasaylo dili lamang sa makapito, kon dili sa kapitoan ka pito. Buot ipasabot nga ang pagpasaylo walay kinutuban ug walay sukod. Ang atong Ginoo naghisgot nga ang pagpasaylo walay limitasyon ug walay katapusan. Dili lamang sa makapito, kawalo ug kasiyaman kon dili hangtod sa hangtod. Matud pa ang pagpasaylo bulawanon. Sama ra nga ang mga kasuko ug mga pagdumot wala untay luna sa atong kaugalingon. Dili unta kita mahisama sa usa ka sulogoon nga gipapriso ang kaubanan niyang sulogoon kay wala kini makabayad sa utang, bisan pa man nga siya mismo gipasaylo sa iyang agalon. Ang atong kinabuhi sama usab sa sambingay sa Ebanghelyo. Ang Ginoo, tungod sa iyang dakong gugma, andam kanunay mopasaylo sa atong mga sala. Kitang tanan isip mga binuhat sa Dios, andam usab unta mohatag sa atong pasaylo sa mga tawo nga nakahatag og kasaypanan kanato. Dili nato hikalimtan nga andam kanunay sa paghatag sa iyang gugma ug ang Ginoo pasaylo, busa ingon usab niini ang atong himoon sa atong mga igsoon. Bation unta nato ang pag- ampo sa kinasingkasing ang "Amahan Namo" kay mao man kini ang sumbanan nga gihatag kanato sa Dios aron adunay katunhayan ang atong pagpuyo sa matag adlaw. Hinaut pa unta.

Giya alang sa pamalandong:

1. Naghupot ba ako og kasuko ug pagdumot ngadto sa akong isigkatawo ilabina sa diha sa kaugalingon nakong pamilya?

2. Nakahatag ba ako og pasaylo sa akong isigkaingon ilabina niadtong nakahimo og sayop kanako?

3. Nakabaton ba ako og kalinaw kasamtangan nakong pagpuyo karon?

f. PANGALIYA

Pangulo: Mga igsoon mag-ampo kita kanunay sa nga atong Langitnong Amahan Iya untang ibubo kanato ang grasya nga motubag sa atong mga panginahanglan. Sa matag pangamuyo kita moingon: GINOO, DUNGGA ANG AMONG PAG-AMPO.

1. Alang sa nagdumala sa Simbahan, mapatunhay unta kanunay ang hiyas sa pagkamaalagaron ug pagkamahigugmaon ilabi na niadtong mga tawo nga wala pa makaila kang Kristo ug sa Iyang mga pagtulun-an. Mag-ampo kita.

2. Alang sa mga pangulo sa atong panggamhanan, mabatunan unta nila ang kasingkasing nga mapasayloon ug makiangayon aron makamugna sila og bag- ong dagway ug pamaagi alang sa mauswagon nga katilingban. Mag-ampo kita.

3. Alang sa tanang mga lideres sa atong matag katilingban, nga sa kanunay ila untang puy-an ang hiyas sa pagkamaalagaron ni Kristo alang sa katukuran sa iyang Gingharian dinhi sa kalibutan. Mag-ampo kita.

4. Alang sa mga nag-antus sa kawad-on sa kinabuhi, nabiktima sa nagkalainlaing kalamidad, makabaton unta sila og igong kusog sa pag-atubang sa mga kalisdanan nga ilang nahiaguman ug mosalig sila sa Dios nga maoy tinubdan sa kahupayan ug grasya. Mag-ampo kita.

5. Alang kanatong tanan nga nagsaulog sa Pulong sa Dios karon, nga ang gugma ug pagsinabtanay maoy maghari sa matag usa kanato ug pagpuyo subay sa mensahe sa Ebanghelyo. Mag-ampo kita.

6. Alang sa atong kaugalingon nga katuyuan, atong i-ampo sa hilum.

Pangulo: Mahigugmaon ug maloloy-on namong Amahan, amo nang nahalad Kanimo ang tanan namong mga gikinahanglan. Itugot nga amo kining madawat uban sa imong kalooy ug grasya. Kini among gipangayo pinaagi ni Kristo among Ginoo. Amen.

PAG-AMPO ALANG SA BOKASYON

GINOO sa ani,

Panalangini ang mga kabatan-onan sa gasa sa kaisog sa pagtubag sa imong tawag. Ablihi ang ilang mga kasingkasing ngadto sa dagkong mga mithi, sa dagkong mga butang.

Dasiga ang tanan mo'ng mga tinguha alang sa hiniusang paghigugma ug pagtahan - aron molambo ang mga bokasyon sa maayong yuta sa matinud-anong katawhan.

Isilsil ngadto sa mga nagpuyo sa kinabuhing relihiyoso, sa mga ministriya sa parokya, ug sa mga pamilya ang pagsalig ug grasya aron makadapit sila sa uban sa pagdawat sa halangdon nga dalan sa kinabuhi nga hinalad ngadto kanimo.

Hiusaha kami ngadto kang Hesus pinaagi sa pag-ampo ug sa sakramento aron makalambigit unta kami uban kanimo sa pagtukod sa imong gingharian sa kaluoy ug kamatuoran, sa kaangayan ug kalinaw. Amen.