IKAKAWHAA'G UNOM NGA DOMINGGO

IKAKAWHAA'G UNOM NGA DOMINGGO

a. BASAHON I

Ez. 18: 25-28

Kinutlo gikan sa basahon ni Propeta Ezequiel.

Miingon kamo: "Ang paagi sa Ginoo dili husto! Pamati karon, balay ni Israel: Ang ako bang paagi maoy dili husto, o dili ba hinoon, ang inyong paagi maoy dili husto? Kon ang usa ka tawo nga buotan mobiya sa pagbinuotan aron pagbuhat sa dautan, ug mamatay. kini tungod sa dautan nga iyang nabuhat kinahanglan siya mamatay. Apan kon ang usa ka tawo nga dautan, mobiya sa kadautan nga iyang nahimo, magbuhat sa husto ug sa matarung, mag-amping siya sa iyang kinabuhi; sanglit mibiya man siya sa tanang mga sala nga iyang nahimo, mabuhi gayud siya, ug dili siya mamatay.

Ang Pulong sa Ginoo.

SALMO RESPONSORYO

Salmo 25:4-5,6-7,8-9

Tubag (R) Hinumdomi ang Imong mga kalooy, O Ginoo.

O Ginoo, ipahibalo kanako ang Imong mga dalan; tudloi ako sa Imong mga agianan, tultoli ako diha sa Imong kamatuoran ug tudloi ako, kay Ikaw ang Dios nga akong manluluwas. (R)

Hinumdomi nga ang Imong kalooy, O Ginoo, ug ang Imong kaayo sukad pa sa karaan. Ang mga sala sa akong kabatan-on ug ang akong mga kahuyang ayaw hinumdomi; sa Imong kalooy hinumdomi ako, tungod sa Imong kaayo. O Ginoo. (R)

Maayo ug matarung ang Ginoo; sa ingon niini Iyang gitudloan ang makasasala sa dalan. Iyang gitultolan ang mapaubsanon ngadto sa katarung. Iyang gitudloan ang mapaubsanon sa Iyang dalan. (R)

c. BASAHON II

Fil. 2: 1-11 o 2: 1-5

Kinutlo gikan sa sulat ni San Pablo ngadto sa taga Filipos.

(Tinaas)

Nakapalig-on ba kaninyo ang inyong kinabuhi diha kang Kristo? Gilipay ba kamo sa Iyang gugma? May pakighiusa ba kamo sa Espiritu? May gugma ba kamo ug kalooy sa usag-usa? Kon mao kana, awhagon ko kamo nga lipayon ako ninyo sa hingpit pinaagi sa pagbaton sa samang katuyoan ug hunahuna ug sa samang gugma. Ayaw kamo pagbuhat bisag unsa gumikan sa hinakog nga tuyo o sa walay hinungdan nga tinguha sa pagpanghambog: hinonoa, pagpaubos kamo sa wala gayoy paghunahuna nga kamo mas maayo kay sa uban. Pagtinabangay kamo ug dili kay mao ray inyong atimanon ang tagsatagsa ninyo ka kaayohan. Angayng batonan ninyo ang hunahuna nga gibatonan ni Kristo Jesus nga mao kini: Diha Niya kanunay ang kinaiya gayud sa Dios, apan wala Siya maghunahuna pagpakigtupong sa Dios pinaagi sa kusog. Kondili sa Iyang kaugalingong kabubut-on Iya kining gibiyaan. Ug gisul- ob Niya ang kinaiya sa usa ka sulugoon. Natawo Siya sama kanato ug nakita Siya ingon nga tawo; nagpaubos Siya ug nagmasinugtanon hangtud sa kamatayon ang Iyang kamatayon sa krus. Tungod niini gibayaw siya sa Dios ngadto sa kinatas-ang dapit sa kalangitan. ug gihatagan Siyag ngalan nga labaw sa tanang ngalan. Busa mangluhod ang tanang binuhat nga atua sa langit, sa yuta ug sa ilalom sa yuta; sa pagpasidungog sa ngalan ni Jesus ug ang tanan magsangyaw nga si Jesukristo mao ang Ginoo, alang sa himaya sa Dios nga Amahan.

Ang Pulong sa Ginoo

(Minubo)

Nakapalig-on ba kaninyo ang inyong kinabuhi diha kang Kristo? Gilipay ba kamo sa Iyang gugma? May pakighiusa ba kamo sa Espiritu? May gugma ba kamo ug kalooy sa usag-usa? Kon mao kana, awhagon ko kamo nga lipayon ako ninyo sa hingpit pinaagi sa pagbaton sa samang katuyoan ug hunahuna ug sa samang gugma. Ayaw kamo pagbuhat bisag unsa gumikan sa hinakog nga tuyo o sa walay hinungdan nga tinguha sa pagpanghambog: hinonoa, pagpaubos kamo sa wala gayoy paghunahuna nga kamo mas maayo kay sa uban. Pagtinabangay kamo ug dili kay mao ray inyong atimanon ang tagsatagsa ninyo ka kaayohan.

Ang Pulong sa Ginoo.

d. EBANGHELYO

Mt. 21:28-32

Ang Santos nga Ebanghelyo sumala ni San Mateo.

Si Jesus miingon sa punoang mga pari ug sa mga kadagkoan sa lungsod: "Unsa may inyong hunahuna? Dihay tawo nga may duha ka anak nga lalaki. Miadto siya sa magulang ug iyang giingnan: "Dong, pagtrabaho karong adlawa didto sa parasan." Siya mitubag. 'Dili ko motrabaho, apan nausab ang iyang hunahuna ug miadto siya sa parasan. Unya ang amahan miadto sa manghod ug mao gihapon ang iyang giingon kaniya. "Oo, moadto ako. mitubag siya, apan wala siya moadto. Kinsa man sa duha ang mituman sa buot ipabuhat sa amahan?" Sila mitubag, "Ang magulang." Unya si Jesus miingon: "Sultihan Ko kamo nga ang mga kobrador sa buhis ug ang mga dautang babaye mag-una pa kaninyo pagsulod sa Gingharian sa Dios. Kay mianhi kaninyo si Juan nga Magbubunyag aron pagtudlo sa matarung nga pagkinabuhi, ug wala kamo motuo kaniya; apan ang mga kobrador sa buhis ug ang mga dautang babaye mituo kaniya. Bisan gani kamo, sa human ninyo makita kini, wala gihapon maghinulsol ni motuo kaniya."

Ang Ebanghelyo sa Ginoo.

e. KOMENTARYO

Tema: Ang Matinud-anong Pagtubag sa Tawag sa Dios.

Dunay programa ang atong panggamhanan pilakatuigna ang milabay nga naghatag og dakung bili sa mga magtutudlo sa tema nga nagkanayon: "Do you still remember your elementary school teacher?" Ug kon atong hubaron sa atong pinulongan: "Imo pa bang nahinumduman ang imong magtutudlo sa elementarya?" Usa kini ka programa nga naghatag og dakung bili ug pasalamat sa mga magtutudlo ilabina diha sa elementarya diin sila nahimong kabahin sa atong kalampusan kay kita adunay daghang mga nakat-onan sa tanang aspeto sa atong kinabuhi. Nagpasidungog kita sa atong mga magtutudlo kinsa migahin og panahon, talento ug bisan bahandi sa pag-umol kanato aron atong makab-ot ang gihandum natong kalampusan sa atong kinabuhi. Dako kaayo ang ilang sakripisyo kay bisan ang ilang kaugalingong kalipay gibalewala man tungod ug alang sa kalampusan sa ilang mga tinun-an. Ikaw imo pa bang nahinumduman ang imong magtutudlo sa elementarya?

Sa unang pagbasa karon gipamugos ni Propeta Ezekiel nga diha sa atong mga kaakuhan ato kining buhaton sa ngalan sa Ginoo. Kay Siya mismo nangandoy nga kita mapasaylo sa atong mga kasal-anan ug magpuyo kita sa Iyang gugma. Ug sa ikaduhang pagbasa sa sulat ni San Pablo ngadto sa taga Felipos nga iya kitang gipahinumduman nga magsukad kanunay kang Kristo ang atong disposasyon nga mao ang pagkamapaubsanon ug matinud-anon sa Dios ug sa Iyang katawhan. Ug labaw sa tanan diha sa Ebanghelyo nagpahinumdum kanato nga ang mga matarung nga mga pangulo nagsalikway kang Jesus samtang ang mga makasasala nagbag-o ug maoy nag-abi-abi kang Kristo. Ug makapangutana kita kinsa man diay ang nagbuhat sa kabubut-on sa Dios?

Mga kaigsoonan, diha sa atong pagtubag sa tawag sa Dios nagpaluyo sa nagkalain-laing pamaagi. Diha sa atong pagpangalagad sa atong katilingban usahay misanong kita tungod kay gikinahanglan. Sa laktod nga pagkasulti napugos kita sa pagtubag sa tawag sa Dios tungod sa kahadlok ug kabalaka nga dunay nilugdangan niini. apan sa laing bahin kon matinud-anon kitang motubag sa tawag sa Dios dili kita magpanuko sa pagsalikway sa mga butang nga maoy mahimong babag sa atong kinasingkasing nga pagtubag. Atong pamalandungan pag-ayo nga kusog kaayo ang hulga sa mga kalibutanong haylo diha sa atong pagtubag ug pagpangalagad sa Dios. Tungod kay midagsang na ang moderno ug hataas nga mga teknolohiya nga maoy nagpasulabi sa atong panghunahuna. Dili na kita ganahan nga mag-ampo kay mas dako pa ang gihatag nato nga higayon sa pag-atubang sa mga kalingawan sa atong mga telebisyon. Bisan gani panahon sa atong pagsimba dili pa man gani nato malikayan ang paggamit sa atong mga "cellphones" sa walay paghunahuna kon unsa ka sagrado ug ka balaan ang kasaulogan sa Santos nga Misa. Unsa pa kaha diha sa kaugalingon natong panimalay makagahin ba kita og panahon sa Ginoo nga bisan gani diha sa Simbahan dili man kita makahatag og husto nga disposasyon sa balaan nga bangkite diin si Kristo na mismo ang atong mahimamat?

Mga igsoon, mao kini ang dakung hagit alang kanatong tanan. Angay natong pamalandungan nga bisan unsa pa ka gamhanan sa kalibutan nga atong gipuy-an, wala ug wala gayuy makatupong ug makalabaw sa gahum sa Dios nga mao ang atong mahigugmaong Amahan. Dili nato angay hikalimtan nga kon wala ang Dios, wala gayud kitay mahimo. Busa mopatigbabaw unta sa atong galamhan nga ang Dios maoy labaw natong hatagan og pagtagad kay sa mga butang nga kalibutanon. Kay diha sa Dios anaa ang kahingpitan ug katagbawan sa atong kinabuhi. Matud pa sa usa ka awit: "Dios lang igo na". Hinaut pa unta.

Giya alang sa pamalandong:

1. Kon ako makadungog sa tingog sa Dios nga nagtawag kanako unsa man ang akong buhaton?

2. Unsang klaseng tubag ang akong pagahimuon? 

f. PANGALIYA

Pangulo: Mga igsoon pangayoon nato ang grasya sa Dios nga Iya untang tubagon ang mga pag-ampo nga atong ihalad karon. Sa matag pangumuyo kita motubag: GINOO, DUNGGA KAMI.

1. Alang sa atong Simbahan nga unta mamahimo Siyang matuod nga instrumento sa pagbag-o sa dagway sa kalibutan. Mag-ampo kita.

2. Alang sa atong Santo Papa, mga Obispo ug kaparian, nga unta mamahimo silang sumbanan sa kabag-ohan sa kinatibuk- ang Simbahan pinaagi sa ilang pagsaksi ug pagpuyo sa ilang gisangyaw. Mag-ampo kita.

3. Alang sa mga pangulo sa atong nasud nga matinud-anon silang moalagad subay sa panig-ingnan nga gihatag ni Kristo alang sa katunhayan sa tanan. Mag-ampo kita.

4. Alang sa atong matag pamilya nga unta maghari ang pagrespeto sa tagsa tagsa aron ang kalinaw ug gugma maoy maghari sa tibuok banay. Mag-ampo kita.

5. Alang niadtong nahisalaag sa pagsubay sa maayong dalan sa kinabuhi nga lamdagan sila sa Espiritu Santo aron mahibalik na sila sa kahiusahan sa atong Ginoo. Mag-ampo kita.

6. Alang sa atong personal nga katuyuan ato kining i-ampo sa hilum.

Pangulo: Maloloy-ong Amahan tuburan sa grasya ug kalooy. Nangaliyupo kami nga Imong tubagon ang mga pag- ampo ug panginahanglan nga among gihalad karon subay sa Imong kabubut-on pinaagi ni Kristo Imong Bugtong Anak uban sa kahiusahan sa Espiritu Santo hangtud kahangturan. Amen.

PAG-AMPO ALANG SA BOKASYON

GINOO sa ani,

Panalangini ang mga kabatan-onan sa gasa sa kaisog sa pagtubag sa imong tawag. Ablihi ang ilang mga kasingkasing ngadto sa dagkong mga mithi, sa dagkong mga butang.

Dasiga ang tanan mo'ng mga tinguha alang sa hiniusang paghigugma ug pagtahan - aron molambo ang mga bokasyon sa maayong yuta sa matinud-anong katawhan.

Isilsil ngadto sa mga nagpuyo sa kinabuhing relihiyoso, sa mga ministriya sa parokya, ug sa mga pamilya ang pagsalig ug grasya aron makadapit sila sa uban sa pagdawat sa halangdon nga dalan sa kinabuhi nga hinalad ngadto kanimo.

Hiusaha kami ngadto kang Hesus pinaagi sa pag-ampo ug sa sakramento aron makalambigit unta kami uban kanimo sa pagtukod sa imong gingharian sa kaluoy ug kamatuoran, sa kaangayan ug kalinaw. Amen.