IKAKAWHAA'G TULO NGA DOMINGGO

IKAKAWHAA'G TULO NGA DOMINGGO

a. BASAHON I

Ez. 33:7-9

Kinutlo gikan sa basahon ni Propeta Ezequiel.

Ikaw, anak sa tawo, akong gitudlo nga bantay alang sa balay ni Israel; kon makadungog ka Kanako nga magsulti bisag unsa, imo sila nga pasidan-an alang Kanako. Kon ingnon ko ang tawong dautan nga mamatay gayud siya, ug dili ikaw mosulti aron motipas ang dautang tawo sa iyang dalan, siya (ang tawong dautan) mamatay tungod sa iyang kalapasan, apan himoon ko ikaw nga responsable tungod sa iyang kamatayon. Apan kon imong pasidan-an ang tawong dautan, maningkamot ka sa pagpatipas niya sa iyang dalan. ug unya magdumili siya sa pagtipas sa iyang agianan, mamatay siya tungod sa iyang kalapasan, apan magluwas ka sa imong kaugalingon.

Ang Pulong sa Ginoo.

b. SALMO RESPONSORYO

Salmo 95: 1-2,6-7,8-9

Tubag (R) Kon karon makadungog kamo sa Iyang tingog, ayaw patig-aha ang inyong mga kasingkasing.

Umari kamo, awitan ta nga malipayon ang Ginoo; ilhon ta ang Bato sa atong kaluwasan. Yukboan ta Siya uban sa pasalamat. awitan ta Siya nga malipayon og mga salmo. (R)

Umari kamo, moduko kita aron pagsimba; mangluhod kita atubangan sa Ginoo nga nagbuhat kanato. Kay Siya man ang atong Dios, ug kita ang katawhan nga Iyang gidumala ang panon nga Iyang gitultolan. (R)

Hinaut unta nga karon mamati kamo sa Iyang tingog, ayaw patig-aha ang inyong mga kasingkasing sama didto sa Meribah, sama sa adlaw ni Massah didto sa kamingawan, diin gisulayan Ako sa inyong mga katigulangan; ila Akong gisuta bisan nakakita sila sa Akong mga buhat. (R)

c. BASAHON II

Rom. 13: 8-10

Kinutlo gikan sa sulat ni San Pablo ngadto sa taga Roma.

Ayaw pagapos sa utang gawas sa utang sa paghigugmaay. Ang nahigugma sa iyang isigkatawo nakatuman sa Balaod. Ang kasugoan nga nag-ingon, "Ayaw panapaw, ayaw pagpatay, ayaw pangawat, ayaw kaibog," kining tanan ug uban pa, nalangkob sa usa ka sugo, "Higugmaa ang imong isigkatawo sama sa imong kaugalingon." Ang nahigugma sa iyang isigkatawo dili gayud makaako paghimog dautan sa iyang isigkatawo. Busa ang paghigugma mao ang katumanan sa Balaod.

Ang Pulong sa Ginoo.

d. EBANGHELYO

Mt. 18:15-20

Ang Santos nga Ebanghelyo sumala ni San Mateo.

Si Jesus miingon sa Iyang mga tinun-an: "Kon ang imong igsoon makasala kanimo, adtoa siya ug pakit-a siya sa iyang sayop. Apan himoa kini nga kamo rang duha. Kon mamati siya kanimo, magkauli ang inyong maayong kabubut-on. Apan kon siya dili mamati kanimo, pagdalag usa o duha ka tawo, aron 'ang matag sumbong kapamatud-an sa duha o tulo ka saksi', sumala sa giingon sa Kasulatan. Ug kon dili gayud siya mamati kanila, isulti ang tanan ngadto sa iglesia. Ug kon dili siya mamati sa iglesia, isipa siya nga usa ka langyaw o kobrador sa buhis."

Ang Ebanghelyo sa Ginoo.

e. KOMENTARYO

Tema: Paghupot sa Malumo nga Kasingkasing.

Dili ikalimod aduna gayud kitay mga kasinatian nga nakiglalis o nakig-away sa atong mga kaigsoonan. Kasagaran mahitabo kini diha sa atong pamilya ug katilingban o di ba kaha sa atong gitrabahoan. Usahay nagsukad kini sa gamay nga butang nga maoy hinungdan sa pagkabungkag sa atong nindot nga pagtagad ug panaghinigalaay.

Mga igsoon, ang mga pagbasa karong adlawa ilabina sa Ebanghelyo naghagit sa matag usa kanato sa pagbaton og malumo nga kasingkasing ug pagpugong sa kaugalingon sa pagpuyo sa katarung ug panaghiusa. Dili ikalimod sa atong kapanahunan karon gihulga kita sa mga kalibutanong mga haylo nga kon dili kita magmatngon niini sa hinay-hinay dili kita makamatikod nga mao na kini ang naghari sa atong kaugalingon. Sa kasamtangan, ania kita sa katilingban nga naghinubra ang kagawasan nga naghatag og dakung bili sa materyal nga panginahanglan. Nagkahinay na og kahanaw ang kinaiya sa pagkamaloloy-on ug mabination. Wala nay pagtagad sa mga kabus, mga langyaw ug mga dumuduong. Ang salapi walay luna diha sa kalooy. Kay nagpasulabi na sa atong galamhan ang pagkab-ot ug pagbaton sa mga pangandoy sa atong kinabuhi nga lumalabay lamang ug nahimong babag sa atong pagsubay sa dalan paingon sa kahingpitan nga gisaad kanato sa atong Langitnong Amahan.

Mga igsoon, karon gipahinumduman kita ni Kristo nga kitang tanan managsoon sa mata sa Dios. Ug kay managsoon man ania unta kanato ang pagminahalay, pagsinabtanay ug pagbinatiay sa matag usa. Nga ang atong igsoon makatagamtam og kalisod ug kapait sa kinabuhi bation sa matag usa kay usa ra man ang atong gigikanan. Apan unsa man ang kasagaran nga nanghitabo karon? Nag-iyahay ra kita og palusot sa atong kinabuhi. Kon kinsa kadtong makapabor mao ray mabulahan. Dakung sukwahi kini sa gipakita ni Kristo nga panig-ingnan. Nga diin Iyang gihatagan og dakung pagtagad ug dakung bili ang atong mga kaigsoonan nga mga walay luna sa hataas nga hut-ong sa atong katilingban. Walay sinalikway. Ang tanan gidapit sa pagpakighiusa ug pagpahiduol Kaniya bisan unsa pa ang atong kahimtang sa katilingban. Walay pinalabi. Ang tanan managsama kay managsama man ang atong dignidad isip mga anak sa Dios bisan pa sa atong pagkamakasasala. Mao kini ang dakung hinungdan ngano nag-antus ug namatay si Kristo tungod pa sa dakung gugma kanato sa Amahan. Dili ba igo ang nahiaguman ni Kristo?

Ang dakung hagit kanatong tanan sa kasamtangang panahon nga atong hatagan og dakung luna si Kristo sa atong matag kasingkasing aron sa kanunay Siya magpabilin sa atong kaugalingon aron dili kita madani sa mga haylo sa kalibutan nga maoy dakung babag nga atong makab-ot ang dakung tumong sa atong pagpakabuhi niining kalibutan nga makabaton sa kinabuhing dayon sa Gingharian sa atong Amahan. Hinaut pa unta.

Giya alang sa pamalandong:

1. Sa kasamtangan sa akong kinabuhi, unsa man ang gihatagan nako og dakung bili?

2. Aduna bay luna sa akong kasingkasing si Kristo?

f. PANGALIYA

Pangulo: Mag-ampo kita nga pinaagi sa grasya sa Dios Iyang tubagon ang mga pag- ampo nga atong ihalad karon. Sa matag pangamuyo kita motubag: 

GINOO, PATALINGHUGI KAMI.

1. Nga ang Simbahan sa tibuok kalibutan kanunay untang maglakaw diha sa kahiusahan. Mag-ampo kita. 

2. Nga ang mga pangulo sa mga nasud mohatag unta og dakung bili sa tawhanong katungod aron magpatigbabaw ang kaangayan, kalinaw ug gugma. Mag-ampo kita.

3. Nga mahiusa na unta ang atong mga kaigsoonan nga mipahilayo sa Dios tungod sa ilang mga kasaypanan. Mag-ampo kita.

4. Nga kitang nakadungog kanunay sa mga mensahe sa Dios magpuyo diha sa pagpakig-angay ug pagpakigdait ngadto sa atong mga kaigsoonan nga nagpangita pa sa kamatuoran. Mag-ampo kita.

5. Nga ang atong mga igsoon nga mihalin na, makabaton na unta sila sa kapasayloan sa ilang mga sala aron makadangat na sila sa kahiusahan uban sa atong mapinanggaong Amahan. Mag-ampo kita.

6. Nga ang atong kaugalingon nga katuyuan atong i-ampo diha sa kahilum.

Pangulo: Ginoong Dios, amo nang nahalad Kanimo ang tanan namong mga panginahanglan. Hiusaha kami diha sa Imong gugma ug tabangi kami nga magmakanunayon sa among pagtoo ug pagsalig sa Imong langitnong panabang ug grasya. Kini among gipangayo pinaagi ni Kristo Imong Bugtong Anak ug among Ginoo hangtud sa kahangturan. Amen.