IKAKAWHAA'G LIMA NGA DOMINGGO

IKAKAWHAA'G LIMA NGA DOMINGGO

a. BASAHON I

Is. 55: 6-9

Kinutlo gikan sa basahon ni Propeta Isaias.

"Pangitaa ninyo ang Ginoo samtang Siya hikaplagan pa, sangpita ninyo Siya, samtang Siya duol pa; pabiyaa ang dautan sa iyang sala ug ipasalikway sa mga makasasala ang ilang dautang hunahuna. Pabalika siya Ginoo aron kaloy-an siya, pabalika sa atong Dios, kay andam Siya sa pagpasaylo. Kay ang Akong hunahuna dili inyong hunahuna, ni ang Akong mga laraw inyong mga laraw, nag-ingon ang Ginoo. Kay ingon nga ang kalangitan habog kay sa yuta, ang Akong mga laraw habog kay sa inyong mga laraw, ug ang Akong hunahuna kay sa inyong hunahuna.

Ang Pulong sa Ginoo.

b. SALMO RESPONSORYO

Salmo 145:2-3,8-9,17-18

Tubag (R) Haduol ang Ginoo sa tanan nga nagasangpit Kaniya.

Himayaon ko Ikaw adlaw-adlaw ug dayegon ko ang Imong ngalan hangtud sa kahangturan. Daku ang Ginoo ug angay gayud Siyang dayegon, ang Iyang kadaku dili matukib. (R)

Ang Ginoo maayo ug maloloy-on dugay nga masuko ug daku sa kalooy. Ang Ginoo maayo alang sa tanan ug maloloy-on sa tanan Niyang mga binuhat. (R)

Ang Ginoo matarung diha sa tanan Niyang mga paagi ug balaan diha sa tanan Niyang mga buhat. Ang Ginoo haduol sa tanan nga nagsangpit Kaniya, sa tanan nga nagasangpit Kaniya diha sa kamatuoran. (R)

c. BASAHON II

Fil. 1:20-24,27

Kinutlo gikan sa sulat ni San Pablo ngadto sa taga Filipos.

Ang daku kong tinguha ug paglaum mao nga dili ko gayud pakyason pagtuman ang akong katungdanan, kondili magmaisog ako sa tanang panahon, labi na gayud ning panahona aron makapasidungog ako kang Kristo, buhi ako o patay. Kay alang kanako ang kinabuhi mao si Kristo, ug ang kamatayon maghatag kanakog dugang kaayohan. Apan kon buhi ako, makahimo akog mas mapuslanon nga buhat, busa wala ako masayud hain niini. ang akong pilion. Naglibog gayud ako kon unsay akong pilion.

Buot ako mobiya ning kinabuhia ug makig-uban kang Kristo, nga mas maayo alang kanako; apan labi pang maayo alang kaninyo nga buhi ako.

Nan karon, ang hinungdanon mao nga magkinabuhi kamo sumala sa Ebanghelyo ni Kristo, aron bisag dili ako makaanha kaninyo, madungog ko nga nagpabilin kamo nga malig-on diha sa usa ka tuyo, ug maghiusa kamo pagpalambo sa Ebanghelyo.

Ang Pulong sa Ginoo.

d. EBANGHELYO

Mt. 20: 1-16

Ang Santos nga Ebanghelyo sumala ni San Mateo.

Si Jesus misugilon sa Iyang mga tinun-an niining sambingay: "Ang Gingharian sa langit sama sa tag-iya sa usa ka parasan nga sayo sa buntag milakaw aron pagpangitag mga tawo nga iyang patrabahoon. Miuyon siya paghatag kanila sa naandang suhol nga usa ka denario ang adlaw, ug gipadala sila ngadto sa iyang parasan. Sa pagka-alas nuybe, miadto na usab siya sa merkado ug didto nakita niya ang pipila ka tawo nga nagtindog nga walay buhat: busa miingon Siya kanila, trabaho usab kamo sa akong parasan, ug hatagan ko kamog hustong suhol. Ug nangadto sila. Unya sa pagka-alas dose, ug sa pagka-alas tres mao gihapon ang iyang gihimo. Hapit na kadto mo-alas singko nga miadto siya sa merkado ug didto nakakita siyag laing pipila ka tawo nga nagbarog. Siya nangutana kanila, nganong giusikan man ninyo ang tibuok adlaw? Sila nanubag. 'Kay wala may mipatrabaho kanamo." Ug miingon siya kanila, 'Kon mao kana. trabaho usab kamo didto sa akong parasan.

"Sa pagkasawomsom na, ang tag-iya miingon sa iyang kapatas, Tawga ang mga mamumoo ug hatagi sila sa ilang suhol; unaha pagsuhol kadtong ulahing gipatrabaho ug ipaulahi kadtong unang gipatrabaho. Ang mga tawo nga misugod pagtrabaho sa alas singko sa hapon, gisuholan og usa ka denario ang matag usa kanila. Busa sa pagduol na sa mga tawo nga unang gipatrabaho, nagtoo sila nga labaw pa ang ilang madawat; apan ang usag-usa kanila gihatagan usab og tagsa ka denario. Gidawat nila ang ilang suhol ug nagbagutbot sila batok sa agalon. Miingon sila, 'Kining mga tawhana nga ulahi mong gipatrabaho nagtrabaho lamang sulod sa usa ka oras, samtang kami nagtrabaho sa tibuok adlaw ug napagbaw sa kainit. Apan bisan pa niini imo silang gihatagag samang suhol nga imong gihatag kanamo. Ang agalon mitubag sa usa kanila: 'Migo, pamati. Wala ako maglimbong kanimo, kay miuyon ka man sa suhol nga usa ka denario ang adlaw. Karon, dawata ang imong suhol ug pauli sa inyo. Maoy akong gusto nga kining tawhana nga ulahing gipatrabaho hatagan sa samang suhol nga akong gihatag kanimo. Wala ba diay akoy katungod sa paggamit sa akong kuwarta sumala sa akong gusto? O nasina ka ba hinoon kay ako manggihatagon man?" Ug gitapos ni Jesus ang sambingay sa pag- ingon: "Busa kadtong naulahi mahiuna, ug kadtong nahiuna maulahi."

Ang Ebanghelyo sa Ginoo.

e. KOMENTARYO

Tema: Ang Husto nga Suhol

Kadaghanan kanato atong nabatasan nga kon aduna kita isugo sa miyembro sa atong pamilya ilabina sa mga kabataan, dili gayod nato kalimtan nga mohatag og pahalipay niini. Pananglitan sugoon nato ang bata papalit og mantika o sabon ba hinuon sa tindahan, kasagaran ang hatagan nato og suhol ang bata. Dili na nato kuhaon ang sukli kay aron usab malipay ang bata aron kon sugoon pag-usab mosugot dayon ang bata. Ginagmay ra kining mga butanga apan wala kita makamatngon niini nga kini mao ang sinugdanan sa mga dinagko nga suhol sa nagkalainlaing paagi sa atong pagkinabuhi matag adlaw.

Mga kaigsoonan, ang mga pagbasa karon ilabina sa Ebanghelyo, nagpadayag kon unsa kamanggihatagon ang Dios. Wala siyay pinalabi. Ang tanan managsama ang iyang pagtan-aw ug pagtagad. Anaa siya kanunay nagpahiluna kanato sa matag gutlo sa atong kinabuhi. Kon miila kita sa Dios nga maoy atong magbubuhat ug tag-iya kanatong tanan, nan angay lamang nga mosalig kita kaniya sa hingpit kay kon unsa man ang atong mga panginahanglan iya kining ihatag kanato. Matud pa sa Salmo: "Haduol ang Ginoo sa tanan nga nagasangpit kaniya". Apan kasagaran kanato mahikalimot sa pagsangpit sa Ginoo ilabina sa panahon sa kaharuhay. Usahay daku na kaayo ang pagtan-aw nato sa atong kaugalingon nga dili na kita nanginahanglan sa panabang sa Dios. Angkonon nato ang tanan nga ang tanan natong kalampusan naggikan sa kaugalingon natong paningkamot. Apan kon moabut na ang kalisod sa atong kinabuhi diha pa kita makamatngon nga aduna diay Dios nga labaw pa kay kanato. Diha pa kita mangayo sa iyang tabang ug kalooy.

Ang sambingay nga gipadayag ni Jesus nagbutyag usab sa usa ka kamatuoran sa atong kinabuhi. Sa atong tawhanon nga pagsabot dili gayod kita mouyon sa paagi nga gihimo sa tag- iya sa parasan kay sa tan-aw nato dili husto ang pagtagad sa tag-iya ngadto sa mga trabahante kay parehas ra ang suhol sa unang misugod pagtrabaho hasta sa ulahi nga nagsugod. Atong makita nga usa kini ka walay kaangayan, walay hustisya. Lisod kini dawaton kay anaa sa atong kaugalingon nga dili kita gusto nga malabwan. Usa ka pagbati nga hinakog. Dili kita gusto nga aduna pay molabaw kanato. Makita nato kining maong mga kinaiya diha mismo sa atong tagsa tagsa ka pamilya. Dili magkasinabot sa usa lamang ka gamay nga butang nga maoy hinungdan. Mag-away ang mga igsoon, magkabingkil-bingkil tungod sa kabilin sa ginikanan o sa usa gamay nga luna sa yuta. Kusog usab kini diha sa atong tagsa tagsa ka katilingban. Ang kasina sa usag-usa kon kinsay mas inila diha sa atong pagpangalagad ug pagserbisyo. Ug daghan pa kaayong mga hitabo diin mohari kanato ang kasina ug garbo.

Apan mga igsoon sa makausa pa gipahinumduman kita sa pagpa-ubos ug pakig- angay. Ang Dios naghatag kanato og hingpit nga ehemplo o sumbanan sa pagpakigdait. Ang Dios naghatag kanato og hustong suhol sa atong pagpangalagad. Dili nato kini makita ug mahuptan diha-diha, apan inig-abot na sa husay, andam unta kita sa pagpakig-atubang sa tag-iya sa parasan ug modawat sa suhol nga angay natong pagadawaton base sa atong mga binuhatan dinhi sa kalibutan panahon sa atong pagpanaw paingon sa iyang gingharian. Hinaut pa unta.

Giya alang sa pamalandong:

1. Andam ba ako pagdawat sa suhol nga gitagana kanako sa Ginoo?

2. Aduna ba akoy ikapasigarbo sa Dios inig- atubang nako kaniya?

3. Unsa man ang garantiya nga akong ikapakita sa Dios nga ako angay sa iyang gugma ug kalooy?

f. PANGALIYA

Pangulo: Ang Ginoo kanunay naghatag kanato og grasya tungod sa Iyang kamanggihatagon. Busa karon atong ipadayag Kaniya ang atong mga pag- ampo. Ug sa matag pangamuyo kita motubag: GINOO, PATALINGHUGI KAMI.

1. Alang sa atong Santo Papa, mga Obispo, kaparian ug mga relihiyoso, magmakugihon unta silang moalagad ug motugyan sa ilang kinabuhi isip piniyalan sa pagkamanggihatagon ug pagkamahigugmaon sa atong Ginoo. Mag- ampo kita.

2. Alang sa mga pangulo sa atong nasud nga unta sila andam nga motabang ilabi na sa mga kabus ug mga nag-antus natong mga kaigsoonan. Mag-ampo kita.

3. Alang sa atong tagsa tagsa ka pamilya nga unta ang gugma sa Dios maoy maghari aron adunay kalinaw, pagsinabtanay ug panaghiusa. Mag-ampo kita.

4. Alang sa atong matag katilingban nga unta mamahimo kining usa ka katilingban nga puno sa gugma ug pakigdait. Mag-ampo kita.

5. Alang sa atong mga mahal sa kinabuhi nga mipanaw na nga ila na untang madawat ang kalipay'ng dayon isip ganti sa ilang pagkinabuhi dinhi sa kalibutan nga nagsubay sa kabubut-on sa Dios. Mag-ampo kita.

6. Alang sa atong kaugalingon nga katuyuan atong i-ampo sa hilum.

Pangulo: Langitnong Amahan sa kanunay nakasinati kami sa Imong gugma ug kamanggihatagon. Itugot nga amo nang maangkon ang mga panginahanglan nga among gihalad Kanimo karon diha sa Imong maayong kabubut-on pinaagi ni Kristo uban sa kahiusahan sa Espiritu Santo Dios hangtud sa kahangturan. Amen.