TRANSPIGURASYON

TRANSPIGURASYON

Pagka-usab sa Panagway ni Jesus (Agosto 6)

a. BASAHON I

Dan. 7:9-10,13,14

Kinutlo gikan sa basahon ni Propeta Daniel.

Samtang nagtan-aw si Daniel may gibutang nga trono ug milingkod niini ang tigulang kaayo ingon sa niebe ang kaputi sa iyang bisti ug sama ang iyang buhok sa kaputi sa de lana nga puti kaayo ang iyang trono kalayo nga nagdilaab; may ligid kini nga kalayo. May suba nga kalayo nga nagbaha gikan sa iyang atubangan; libo ka libo nag-alagad kaniya ug nagbarog atubangan niya andam ang hukmanan sa paghukom ug gibuksan ang mga basahon. May mga panan-awon pa gayud nga akong nakita panahon sa bagyo.

Ug nakita ko uban sa mga panganod sa langit ang daw usa ka tawo ug miduol siya sa tigulang kaayo ug gipaila siya kaniya. Ug kaniya gihatag ang gahum ug ang himaya ug ang gingharian, aron alagaron siya sa tanang katawhan, walay pagkatapos ang Iyang gahum, kay dili man malaglag ang Iyang gingharian.

Ang Pulong sa Ginoo.

b. SALMO RESPONSORYO

Salmo 97:1-2,5-6,9

Tubag (R) - Ang Ginoo hari, ang labing halangdon labaw sa tibuok kalibutan.

Ang Ginoo hari; pasadyaa ang yuta; palipaya ang daghang mga pulo. Ang mga panganod ug kangitngitan nagalibot Kaniya, ang katarung ug hukom mao ang gibarogan sa Iyang trono. (R)

Ang mga bukid milanay ingo'g talo atubangan sa Ginoo, atubangan sa Ginoo sa tibuok kalibutan. Ang mga langit nagasangyaw sa Iyang katarung ug ang tanang katawhan nakakita sa Iyang himaya. (R)

Tungod kay Ikaw, O Ginoo, ang Labing Halangdon labaw sa tibuok kalibutan. Gibayaw labaw kaayo sa tanang mga Dios. (R)

c. BASAHON II

2 Pedro 1:16-19

Kinutlo gikan sa ikaduhang sulat ni San Pedro.

Wala namo ipasikad sa tinumotumong mga sugilanon ang among pagsangyaw kaninyo mahitungod sa gamhanang pag-anhi sa atong Ginoong Jesukristo. Kami mismo nakakita sa Iyang pagkahalangdon. Didto gayud kami sa dihang gipasidunggan ug gihimaya Siya sa Dios nga Amahan ug may tingog gikan sa kahitas- an, nga nag-ingon, "Kini ang hinigugma Kong Anak nga Akong nahimut-an!" Kami mismo nakabati sa maong tingog gikan sa langit, samtang kami uban Kaniya didto sa balaan nga bukid.

Busa midugang ang among pagsalig sa mensahe nga gisangyaw sa mga propeta. Angay kini nga inyong tagdon pag-ayo, kay kini sama man sa suga nga nagdan-ag diha sa kangitngit, hangtud nga mobanagbanag ang Adlaw sa Ginoo ug ang kahayag sa kabugason modan-ag sa inyong mga kasingkasing.

Ang Pulong sa Ginoo.

d. EBANGHELYO

Mt. 17: 1-9

Ang Santos nga Ebanghelyo sumala ni San Mateo.

Unya tapos sa unom ka adlaw, gidala ni Jesus si Pedro, ug ang mga managsoon nga si Santiago, ug si Juan ngadto sa usa ka taas nga bukid nga sila ra. Samtang nagtan-aw sila Kaniya, nausab ang Iyang panagway; ang Iyang nawong misanag sama sa adlaw, ug nagputi ang Iyang bisti sama sa kahayag. Unya nakita sa tulo ka tinun-an si Moises ug si Elias nga nakigsulti ni Jesus. Si Pedro miingon kang Jesus: "Ginoo, maayo nga ania kita dinhi; kon gusto Ka, magbuhat ako dinhi og tulo ka payag, usa alang Kanimo, usa alang kang Moises ug ang usa alang kang Elias." Samtang nagsulti siya niini, usa ka masanag nga panganod mitabon kanila, ug unya usa ka tingog gikan sa panganod miingon: "Kini ang pinangga Kong Anak nga Akong gikahimut-an. Pamati kamo Kaniya!" Sa pagkadungog sa mga tinun-an sa tingog, nangahadlok sila pag-ayo ug tungod niini, nanghapa sila. Miduol si Jesus ug gihikap sila. "Tindog kamo ug ayaw kahadlok" miingon Siya. Sa paghangad nila, wala na silay laing nakita gawas kang Jesus.

Samtang nanglugsong sila sa bukid, gipinahan sila ni Jesus, "Ayaw ninyo isugilon kang bisan kinsa kining panan-awon nga inyong nakita hangtud nga mabanhaw na ang Anak sa Tawo."

Ang Ebanghelyo sa Ginoo.

e. KOMENTARYO

Tema: Kahimayaan Luyo sa Mga Kasakitan.

"Kini mao ang pinangga kong Anak nga akong gikahimut-an. Pamati kamo kaniya!" Mao kini ang mga pulong sa Dios Amahan diin iyang gipadayag ang haduol nga kamatayon ni Jesus.

Gisaysay sa Ebanghelyo karon ang

pagkausab sa panagway ni Jesus uban sa iyang tulo ka tinun-an ug sa duha ka binuhat nga nagkupot og halangdon nga papel sa pagkatawo ni Jesus. Adunay mga punto sa Ebanghelyo nga lisud sabton sa tawhanong pagsabot mao nga dili nato malikayan nga makapangutana kita mahitungod sa maong panghitabo. Tungod niini, atong tuhion sa hinayhinay ang nagpaluyo nga kahulugan sa mga panghitabo sa kinabuhi ni Jesus, aron pinaagi niini atong masabtan ang hinungdan niining maong panghitabo.

Una, unsa ang bili sa maong panghitabo sa kinabuhi ni Jesus ug sa atong diha kaluwasan? Matud pa sa usa ka komentaryo, ang pagkausab sa panagway ni Jesus nagpalig- on sa Iyang pagkatawo isip Mesiyas, apan kung buot hunahunaon dili na kinahanglan nga moagi pa Siya sa maong kabag-uhan aron ipamatuod kanato ang iyang pagka-anak sa Dios tungod kay ang iyang mga buhat lig-ong timailhan sa iyang pagkatawo. Sa kasamtangan, ang maong panghitabo nagpahinumdum sa iyang mga tinun-an nga ang kamatayon ni Jesus haduol na apan sa laing bahin, kini usab nagpakita kanato sa kahimayaan didto sa langit sa umaabot nga panahon. Tataw kaayo nga pinaagi sa pagkausab sa panagway ni Jesus, gi-awhag kita nga mosimba Kaniya isip atong Manluluwas. Kini usab nagpalig-on sa atong pagtoo sa atong Dios. Ug, isip mga tinun-an gipahimangnuan kita mahitungod sa kasakit nga atong masinati diha sa atong pagsunod sa iyang mga lakang sama sa nahiaguman sa iyang napulog-duha ka mga Apostoles.

Sa laing bahin usab, pinagi sa maong kasinatian si Jesus nangandam sa iyang kaugalingon  sa iyang kamatayon ug pagkabanhaw. Kini naghatag kaniya og paglaum nga bisan pa sa mga kasakit nga iyang nahiaguman, ilabi na diha sa iyang pagpas-an sa krus, sa katapusan maangkon gihapon niya ang kahimayaan uban sa mga Santos ug mga anghel didto sa langit. Kita isip mga sumusunod ni Kristo, gipahimangnuan nga makasinati usab kita og daghang mga kasakit sa atong kinabuhi apan aduna kitay paglaum nga sa katapusan atong masinati ang kalipay nga hingpit ug himaya didto sa langit uban sa mga aghel ug mga santos.

Ikaduha, nganong nagpakita man si Moises ug Elias sa maong panghitabo? Dili nato ikalimod nga si Moises nagsimbolo sa balaod diin gipili siya sa Amahan nga tigpataliwala sa mga tawo diha sa pagpahibalo sa Iyang plano ngadto sa katawhan. Si Elias usab nagsimbolo alang sa mga propeta nga maoy moandam sa pag-abot sa Ginoo. Kini gitagna nang daan sa karaang kasabutan ni Propeta Malaquias ug pinaagi ni San Juan nga magbubunyag, kining maong panagna nasugdan na sa pagtuman. Si Moises ug Elias nahimong lig-on nga mga saksi diha sa kinabuhi ni Jesus diin, pinaagi sa grasya sa Dios, ilang nasabtan ang gugma sa Amahan diha sa gasa sa Iyang Bugtong Anak.

Ikatulo, nganong dili man gusto ni Jesus nga mahibaw-an ang maong panghitabo ni bisan kinsa? Nahadlok ba diay siya? Dili buot si Jesus nga mahibaw-an sa kadaghanan ang ilang nasaksihan tungod kay nasayod siya nga dili kini masabtan sa mga tawo ilabina ang mahitungod sa iyang umaabot nga kasakit didto sa Jerusalem. Nasayud na siyang daan nga dili kini madawat sa mga tawo tungod kay nagtuo sila nga ang Mesiyas mopadayag sa Iyang kaugalingon pinaagi sa usa ka hari nga adunay dakung gahum. Apan sa katapusan sa iyang gipamulong, si Jesus nag- ingon "hangtud nga mabanhaw na ang Anak sa tawo." Kini nagpasabot nga ang iyang mga tinun- an mamahimong mga saksi sa Iyang Diosnong himaya human sa iyang pagkabanhaw.

Sa katapusan, ang pagkausab sa panagway ni Jesus nagpalig-on sa iyang pagka-Dios diha sa pulong sa Iyang Amahan nga miawhag kanatong tanan sa pagpamati sa pulong sa iyang Bugtong Anak. Ug pinaagi sa maong panghitabo, kita gipahimangnuan diha sa kamatuoran sa atong kinabuhi nga human sa kasakit nga atong masinati, adunay himaya nga nagpaabot kanato didto sa langit. Mao nga ang dakung hagit kanato nga dili lang kita magpabilin o magpadala sa mga kasakitan nga atong maagian, hinonoa magpabilin unta kitang matinud-anon sa Ginoo, aron nga kining tanang mga kasakit magdala kanato paingon sa dakung himaya didto sa langit. Amen.

Giya alang sa pamalandong:

1. Aduna bay panghitabo sa akong kinabuhi nga naghatag kanako og kausaban sa akong kaugalingon?

2. Kinsa man ang nakapaaghat kanako nga mabag-o ako sa mga dautan nakong binuhatan?

3. Kon anaa pa ako nga sa kangitngit sa sala, naghunahuna ba ako makahaw-as niini aron makabaton ako sa sidlak sa kabag- ohan?

f. PANGALIYA

Pangulo: Ang Langitnong Amahan nagpamatuod sa Iyang tinuoray nga pagka-Dios ug gipadayag kini sa pagkausab sa panagway ni Jesus. Modangop kita Kaniya karon uban sa dakung pagsalig nga Iyang dunggon ang atong mga pag-ampo ug mga panginahanglan. Sa matag pangamuyo kita motubag: 

GINOO SA GUGMA DUNGGA KAMI.

1. Alang sa tibuok Simbahan ilabina sa mga pangulo niini, ang Santo Papa, mga Obispo ug kaparian, nga ang kahayag ni Kristo modan-ag sa ilang kasingkasing aron makapadayon sila sa pagpangalagad sa tanang katawhan. Mag-ampo kita.

2. Alang sa mga lideres sa atong nasud nga ang Espiritu sa Kristohanong pag-alagad maoy maglamdag sa ilang pagserbisyo alang sa kaayohan sa tanan. Mag-ampo kita.

3. Alang sa mga nag-antus nagkadaiyang balatian sa mga sa lawas nga ang pagkausab sa panagway ni Jesus maghatag og kausaban o kahupayan sa ilang kasamtangang gibati. Mag-ampo kita.

4. Alang kanatong tanan nga naningkamot paglawig padulong sa kabalaan, nga ang kahayag ni Kristo maoy maghatag kanato og paglaum ug maggiya sa atong paglakaw taliwala mga nagkadaiyang mga sa pagsulay sa kinabuhi. Mag-ampo kita.

5. Alang sa mga lideres sa atong GKK nga sa kanunay ang kahayag ni Kristo maghatag kanila og kadasig ug kaalam alang sa mapadayonon ug malahutayong pagpangalagad. Mag-ampo kita.

Alang sa atong personal nga panginahanglan atong ihalad sa Dios diha sa kahilum.

Pangulo: Ginoong Dios, padan-agi kami sa kasanag sa panagway sa Imong Anak aron motuhop kanamo ang among hingpit nga pagsalig ug pagtoo Kanimo nga Ikaw ra gayud ang tinubdan sa mga butang nga makahatag kanamo og kaayohan. Kini among gipangayo pinaagi ni Kristo Imong pinanggang Anak uban sa kahiusahan sa Espiritu Santo Dios hangtud sa kahangturan. Amen.