IKANAPULO'G SIYAM NGA DOMINGGO

IKANAPULO'G SIYAM NGA DOMINGGO

a. BASAHON I

1 Hari 19:9,11-13

Kinutlo gikan sa unang basahon sa mga Hari.

Si Elias miadto sa usa ka langub ug mipahulay didto (gikan sa bukid sa Dios, ang Horeb.)

Unya ang Ginoo miingon, "Lakaw sa gawas ug tindog sa ibabaw sa bukid sa atubangan sa Ginoo ug ang Ginoo molabay." Usa ka daku ug makusog nga hangin mibuak sa mga bukid, ug mipulpog sa ginagmay sa mga bato atubangan sa Ginoo; apan ang Ginoo wala didto sa hangin. Tapus sa hangin, may usa ka linog; apan ang Ginoo wala didto sa linog.

Tapus sa linog, may usa ka kalayo; apan ang Ginoo wala didto sa kalayo. Tapus sa kalayo, may usa ka gamayng hagawhaw.

Ug sa pagkadungog ni Elias niini, iyang giputos ang iyang nawong sa iyang kupo ug migula ug mitindog sa baba sa langub.

Ang Pulong sa Ginoo.

b. SALMO RESPONSORYO

Salmo 85:9,10,11-12,13-14

Tubag (R) Ginoo, patan-awa kami sa Imong kaayo, ug ihatag kanamo ang Imong kaluwasan.

Pamation ko ang gisangyaw sa Dios; sa Ginoo kay nagsangyaw Siya sa kalinaw. Haduol gayud ang Iyang kaluwasan kanila nga mahadlokon Kaniya, ang himaya nagapuyo sa atong yuta. (R)

Ang kalooy ug ang kamatuoran magatagbo; ang katarung ug kalinaw maghagkanay. Ang kamatuoran mogitib gikan sa yuta, ug ang katarung modung-aw gikan sa langit. (R)

Ang Ginoo mohatag sa Iyang mga kaayohan; ug ang atong yuta mohatag sa Iyang abut. Ang katarung maglakaw sa Iyang atubangan, ug ang kaluwasan diha sa Iyang pagaagian. (R)

c. BASAHON II

Roma 9:1-5

Kinutlo gikan sa sulat ni San Pablo ngadto sa taga Roma.

Satuod ang giingon ko nga Iya ako ni Kristo ug wala ako mamakak. Ang akong konsensiya nga gilamdagan sa Espiritu Santo maoy akong saksi nga wala ako magbakak. Gibati ko ang hilabihang kasuko ug kaguol nga walay hunong alang sa akong isigka Judio mga kabanay ug mga kadugo ko. Tungod kanila palabihon ko nga tunglohon ako sa Dios ug mahimulag kang Kristo. Sila mao ang piniling katawhan sa Dios; gisagop sila ingon nga mga anak sa Dios ug gipaambit sa Iyang himaya; ug naghimo Siyag mga kasabotan uban kanila ug gihatagan sila sa Balaod. Ila ang matuod nga pagsimba, ug nakadawat sila sa mga saad sa Dios. Kaliwat sila sa mga patriyarka, ug sa ilang kaliwatan natawo si Kristo. Ang Dios nga labaw sa tanan daygon unta hangtud sa kahangturan.

Ang Pulong sa Ginoo.

d. EBANGHELYO

Mt. 14: 22-33

Ang Santos nga Ebanghelyo sumala ni San Mateo.

Unya gipasakay ni Jesus ang mga tinun-an sa sakayan ug gipauna Niya ngadto sa tabok sa lanaw, ug Iyang gipalakaw ang mga tawo. Tapos Niya palakta ang mga tawo, mitungas Siya nga nag-inusara sa usa ka bungtod aron pag-ampo. Ug sa pagkagabii na, si Jesus nag-inusara didto. Niadtong tungora ang sakayan didto na sa lawod, gikusokuso sa mga balod, kay ang hangin sungsongon man. Sa may mga alas tres sa kaadlawon, si Jesus miadto kanila, nga naglakaw sa tubig. Sa pagkakita sa mga tinun- an Kaniya nga naglakaw sa tubig, nangahadlok sila pag-ayo, "Anaay multo!" miingon sila, ug naniyagit sila sa kalisang. Si Jesus miingon kanila, "Ayaw kamo kahadlok! Ako kini!" Unya si Pedro miingon, "Ginoo, kon Ikaw man, palakta ako sa tubig nganha Kanimo." "Dali ngari," mitubag si Jesus. Busa mikawas si Pedro sa sakayan ug milakaw sa tubig ngadto kang Jesus. Apan sa pagkamatikod niya sa hangin, nahadlok siya ug misugod pagkaunlod. "Ginoo, luwasa ako!" misinggit siya. Dihadiha gidawat siya ni Jesus ug gibira ug miingon si Jesus kaniya, "Pagkadiyotay sa imong pagtoo! Nganong nagduhaduha ka man?" Ug nanakay silang duha sa sakayan, ug milurang ang hangin. Ang mga tinun-an nga didto sa sakayan misimba kang Jesus, ug miingon, "Ikaw gayud ang Anak sa Dios!"

Ang Ebanghelyo sa Ginoo.

e. KOMENTARYO

Tema: Pagtoo sa Ginoo, Palambuon ug Lig-onon.

Usahay, karon nga mga panahona, aduna kitay mga kasinatian nga mga nagkalain-laing problema sa atong kinabuhi. Ilabina gayud sa atong kaugalingong kinabuhi, sa atong kaugalingong pamilya o dili ba kaha sa atong katilingban. Kon diin makasinati kita og kasuko o walay kalinaw diha sa atong hunahuna ug kasingkasing. Resulta kini sa atong mga nagkadaiya nga mga problema sa pamilya, problema sa kwarta, relasyon sa atong isigkatawo nga maoy hinungdan nga wala kita nakabaton og kalinaw. Sama ra usab kita sa mga apostoles nga atong nadungog karon sa Ebanghelyo. Mibati sila og kahadlok, kabalaka sa ilang nasinati nga ang sakayan nga ilang gisakyan gikusokuso sa mga balod, busa si Jesus miadto kanila nga naglakaw sa tubig. Apan sa pagkakita sa mga tinun-an Kaniya nga naglakaw sa tubig, nangahadlok sila pag-ayo, si Jesus miingon "Ayaw kamo kahadlok ako kini." Naghulagway kini sa atong pagtuo diha sa Ginoo. Dali ra kitang malisang kon moabut na sa atong kinabuhi ang mga pagsulay. Si Jesus miingon kang Pedro "Pagkadiyotay sa imong pagtuo! Nganong nagduha-duha ka man? Kini nga pulong sa Dios makahatag unta kini og luna diha sa atong tagsatagsa ka mga kasingkasing kon aduna ba gayud kitay lig-on nga pagtuo Kaniya. Sama ba kita kang Pedro nga nagduha- duha sa pagtuo diha sa atong Ginoo?

Nagpasabot kini nga kita isip mga anak sa Dios nanginahanglan og lig-ong pagtuo Kaniya aron kita maluwas. Ang atong mga kasinatian nga usahay magduha-duha kita sa atong pagtuo. Ang Ginoo anaa lamang sa atong kiliran, andam motabang sa atong mga suliran. Kay kasagaran man gud kita ang mopahilayo sa Dios. Ilabina kon naa ang kabug-at sa atong mga problema. Usahay ato pang basulon ngano ako pa man ang gihatagan niining maong suliran? Wala kini magpasabot nga kining mga pagsulay nga midangat sa atong kinabuhi, maoy hinungdan nga kita mawad-an og pagtoo sa Dios kon dili mao unta kini ang higayon nga mahiduol kita Kaniya kay siya ra ang nasayud sa tanan natong mga kasinatian.

Busa, kita mga anak sa Dios gi-awhag sa pagpalambo ug paglig-on sa atong pagtoo Kaniya aron kita kanunay ubanan sa atong pang-adlaw- adlaw nga kinabuhi pinaagi sa iyang Balaang Espiritu Santo nga maoy mogiya kanato. Ilabina niining kasamtangang panahon kon diin nasinati nato ang mga kabag-ohan nga maoy magdala kanato nga mopahilayo sa Dios. Pananglitan, mga modernong kagamitan sama sa computers, cellphones ug uban pa. Mga bag-ong pamalaod nga maghatag og kadaut sa dignidad sa tawo ug sa kabuhatan sa Ginoo ug uban pang mga butang nga usahay nagtuo kita nga nakahatag kini kanato og kasulbaran sa atong mga problema. Busa magmalig-on kita sa atong pagtuo aron kita kanunay ubanan sa atong Ginong Jesukristo. Amen.

Giya alang sa pamalandong:

1. Aduna bay mga higayon sa atong kinabuhi nga mibati kita og kahadlok ug kahingawa?

2. Gihulga ba ang akong kinabuhi sa mga bug- at nga mga suliran?

3. Giunsa man nako pagpahiduol sa Ginoo?

f. PANGALIYA

Pangulo: Mag-ampo kita sa atong Langitnong Amahan nga makaambit unta kita sa mga grasya nga Iyang gitagana kanato. Ug sa matag pag-ampo kita motubag:

GINOO, DUNGGA KAMI.

1. Alang sa mga pangulo sa Simbahan ang Santo Papa, mga Obispo ug kaparian nga ilang maagak ug maatiman ang tanang katawhan sa espirituhanon nilang mga panginahanglan. Mag-ampo kita.

2. Alang sa mga nangulo sa tanang kanasuran nga unta ilang hatagan og bili ang kaayohan sa tanang katawhan. Mag- ampo kita.

3. Alang sa mga lideres sa atong parokya ug dinhi sa atong katilingban nga lamdagan sila sa Espiritu Santo ug hatagan sila og kalig-on sa pagpadayon sa ilang pagpangalagad bisan pa man sa pagsulay nga ilang mahiaguman. Mag-ampo kita.

4. Alang sa atong mga kaigsoonan nga nag- antus sa mga nagkadaiyang balatian sa lawas nga ang Ginoo maglig-on, magdasig ug maghupay kanila sa ilang kasakitan. Mag-ampo kita.

5. Alang kanatong tanan nga nagkatigom karon nga ang Dios manalangin kanato sa kanunay aron makapadayon kita sa atong gimbuhaton sa pagmantala sa Iyang gingharian. Mag-ampo kita.

6. Alang sa atong kaugalingon nga katuyuan atong i-ampo sa hilum.

Pangulo: Amahan, nasayod Ka sa nagkalainlain nga mga panginahanglan sa Imong katawhan. Itugot nga Imong dunggon ug tubagon ang mga pag-ampo nga among gihalad karon pinaagi sa Imong Anak si Jesukristo among Ginoo. Amen.