IKAKAWHAA'G USA NGA DOMINGGO

IKAKAWHAA'G USA NGA DOMINGGO

a. BASAHON I

Is. 22:15,19-23

Kinutlo gikan sa basahon ni Propeta Isaias.

Mao kini ang giingon sa Ginoo nga Labing Gamhanan, "Adtoa kining tinugyanan nga atua sa Sobna, nga maoy nagdumala sa banay ug ingna siya: Palagputon Ko ikaw sa imong katungdanan, ug gikan sa imong nahimutangan. Niadtong adlawa paanhion Ko ang Akong sulugoon nga si Eliacim anak ni Helcias, ug sul-oban Ko siya sa imong bisti, ug baksan Ko siya sa imong bakos, ug itugyan ko kaniya ang imong gahum; ug mahimo siyang pangulo sa mga molupyo sa Jerusalem ug sa panimalay sa Juda. Ug isangon Ko sa iyang abaga ang katungod sa pag-abli sa balay ni David; siyay moabli niini ug walay makasira; mosira siya niini ug walay makaabli. Ug igaid Ko siya sa usa ka dapit nga dili niya kabiyaan, ug mahimo siyang dungganang trono sa balay sa iyang amahan."

Ang Pulong sa Ginoo.

b. SALMO RESPONSORYO

Salmo 138:1-2,2-3,6,8

Tubag (R) Ginoo, ang Imong gugma way katapusan; ayaw pagbiyai ang buhat sa Imong mga kamot.

Pasalamatan ko Ikaw, O Ginoo, sa tibuok kong kasingkasing, (kay Imong gidungog ang mga pulong sa akong ba-ba); sa atubangan sa mga anghel awiton ko ang Imong kadayeganan; Nagasimba ako didto sa Imong balaan nga templo. (R)

Pasalamatan ko ang Imong ngalan, tungod sa Imong kalooy ug Imong kamatuoran. Sa akong pagsangpit, gipatalinghogan Mo ako: Imo akong gilig-on sulod sa akong kaugalingon. (R)

Ang Ginoo hataas, apan nagatan-aw Siya sa mapaubsanon, ug nakaila Siya sa mapahitas-on gikan sa halayo; Ang Imong kaayo, O Ginoo, nagalungtad sa kahangturan; ayaw pagbiyai ang buhat sa Imong mga kamot. (R)

c. BASAHON II

Rom. 11: 33-36

Kinutlo gikan sa sulat ni San Pablo ngadto sa taga Roma.

Pagkabahandianon gayud sa Dios ug pagkatulugkaron sa Iyang kaalam ug kahibalo! Kinsay makasaysay sa Iyang hukom? Kinsay makasabot sa Iyang mga paagi? Sumala sa giingon sa Kasulatan: "Kinsay nasayud sa hunahuna sa Ginoo? Kinsay nakatambag Kaniya? Kinsay nakahatag Kaniyag bisan unsa, aron Iyang baslan?"

Kay Siyay nagbuhat sa tanang butang, ug nahimong mao karon ang tanang butang pinaagi Kaniya ug alang Kaniya. Iya sa Dios ang himaya sa walay katapusan! Amen.

Ang Pulong sa Ginoo.

d. EBANGHELYO

Mt. 16:13-20

Ang Santos nga Ebanghelyo sumala ni San Mateo.

Unya miadto si Jesus sa kayutaan duol sa lungsod sa Cesaria Felipo, ug didto nangutana Siya sa Iyang mga tinun-an, "Sumala sa mga tawo, kinsa man ang Anak sa Tawo?" Sila mitubag: "May nag-ingon nga Siya mao si Juan nga Magbubunyag; ang uban nag- ingon nga Siya mao si Elias; samtang ang uban nag-ingon nga Siya mao si Jeremias o laing propeta." Si Jesus nangutana kanila, "Apan kamo, unsa may inyong ikasulti? Kinsa man Ako?" Ug mitubag si Simon Pedro, "Ikaw mao ang Mesiyas, ang Anak sa Dios nga buhi." Giingnan siya ni Jesus, "Simon, anak ni Juan, bulahan ka gayud kay kining maong kamatuoran wala moabot kanimo gikan sa bisan kinsang tawo, kondili gihatag kanimo sa Akong Amahan nga atua sa langit. Ug busa sultihan Ko ikaw: Pedro, ikaw usa ka bato ug niining batong sukaranan tukoron Ko ang Akong iglesia, ug bisan gani ang kamatayon dili gayud makabuntog niini. Ihatag Ko kanimo ang mga yawe sa Gingharian sa langit: ang imong idili dinhi sa yuta, idili usab didto sa langit; ug ang imong itugot dinhi sa yuta, itugot usab didto sa langit." Unya gipinahan ni Jesus ang Iyang mga tinun-an nga dili sila manugilon kang bisan kinsa nga Siya mao ang Mesiyas.

Ang Ebanghelyo sa Ginoo.

e. KOMENTARYO

Tema: Ikaw mao ang Mesiyas, ang Anak sa Dios nga Hari.

Matag usa kanato adunay gitawag og higala o mga higala ug gani aduna usab giisip nato nga usa ka suod nga higala. Mahimo nga kini usa ka tawo o usa ba ka hayop hinuon. Kasagaran mas suod pa sa tawo ang mga hayop sama sa iro kay sa usa ka tawo.

Ang mga pagbasa karon niining ikakawhaag duha nga Dominggo sa Ordinaryong Panahon ilabina sa Ebanghelyo naghisgot sa pagkatawo ni Jesus. Nadungog nato nga nangutana si Jesus sa iyang mga tinun-an kung kinsa man ang Anak sa tawo. Ang uban mitubag kaniya nga siya si Juan magbubunyag. Ang laing tinun-an miingon nga siya si Elias samtang ang uban miingon nga siya mao si Jeremias. Apan wala siya makontento sa ilang mga tubag. Ug diha-diha nangutana siya kang Pedro sa mao ra gihapon nga pangutana ug si Pedro mitubag "Ikaw mao ang Mesiyas, ang Anak sa Dios nga Buhi!"

Mga igsoon, adunay duha ka punto nga angay natong pamalandungan sulod sa atong mga pagbasa karon. Una, mao angpagkamapaubsanon. Ang atong Ginoo nagpadala sa iyang bugtong Anak dinhi sa kalibutan aron kita maluwas. Ang iyang gibuhat mao ang pagpaubos. Ngano man? Tungod kay bisan siya usa ka Ginoo, usa ka gamhanan ug makagagahum, apan siya mipuyo uban kanato dinhi sa kalibutan, nagpakatawo aron kita makasinati sa iyang paghigugma kanatong tanan. Siya usa ka matuod nga Dios ug sa samang paagi usab siya usa ka matuod nga tawo. Sama siya kanato sa tanan gawas sa sala. Nagpakatawo siya aron atong mabati ug masabtan nga dili siya halayo kanato ug atong mabati ang iyang dakung gugma ug pag- atiman kanato. Ang dakung hagit kanato mao ang pagkamapaubsanon. Dili nato ikalimod nga kitang tanan adunay mga nagkadaiyang garbo nga atong gihuptan sa kaugalingon. Apan kon atong hunahunaon pag-ayo ug bation nato sa kinasingkasing nga ang mga grasya nga atong nadawat gikan sa Ginoo nga labing gamhanan, wala kitay angay nga ikapasigarbo sa atong kaugalingon. Atong hinumduman kanunay nga kinsa kita ug unsay atong nahuptan kining tanan iya sa Dios. Ang atoa mao lamang ang atong pagkamakasasala atubangan sa Ginoo ug wala kitay ikapanghambog.

Ikaduha, mao ang pagka-misteryo sa atong Ginoo. Ang ikaduhang pagbasa nag-ingon nga walay nasayod kung kinsa gayod ang Ginoo. Apan sa atong Ebanghelyo, si Jesus gipadayag ang iyang pagka-Dios ug pagkatawo. Ug gani nadungog nato ang tubag ni Simon Pedro nga nag-ingon "Ikaw mao ang Mesiyas, Ang Anak sa Dios nga buhi". Dinhi nga punto mga igsoon makapangutana kita kung kinsa man ang Ginoo alang kanato? Unsa man kalawom ang atong pag-ila kaniya? Sama ba sa usa ka suod nga higala ang atong pag-ila kaniya? O unsa may panglantaw nato sa Ginoo? Apan sayod kitang tanan nga nagkadaiya ang atong pag-ila sa Ginoo. Siguro ato kining nabati sa atong tagsatagsa ka kasinatian sa Ginoo. Ug makita usab nato ang lihok sa Ginoo diha sa atong kinabuhi. Mao nga ang ikaduhang hagit mao ang pag-ila nato kon si kinsa ang Ginoo alang sa atong kaugalingon nga kinabuhi. Dayag ba ang atong pagpakigrelasyon ngadto sa Ginoo diha sa atong makanunayon nga pag-ampo ug mga maayong buhat?

Ang atong tema nagpadayag nga kita adunay Mesiyas o Manluluwas. Apan isip mga Kristiyanos, aduna usab kitay kaakuhan sa Ginoo aron maangkon nato ang kaluwasan. Sa unsang paagi? Ang husto nga paagi mao ang pagsunod sa iyang mga kasuguan, kabubut-on ug paagi. Ang Dios atong giila nga buhi ug ang iyang presensya anaa kanunay naggiya ug naglamdag sa atong inadlaw-adlaw nga pagkinabuhi. Hinaut pa unta!

Giya alang sa pamalandong:

1. Alang kanako kinsa man ang Ginoo?

2. Unsa man ang akong mga kaakuhan isip binuhat sa Dios?

3. Unsa man usab ang akong mga kaakuhan ngadto sa akong isigkatawo?

f. PANGALIYA

Pangulo: Mga igsoon ato karong ihalad ang atong mga pag-ampo sa atong Makagagahum nga Dios diin ang Iyang walay puas nga kaayo ug kalooy kanunay Niyang gibubu kanato. Sa matag pag-ampo kita motubag: 

GINOO, DUNGGA ANG IMONG KATAWHAN.

1. Imong gitawag si Pedro aron sa pagpanagat og mga tawo. Itugot nga ang mga ministro sa atong Simbahan magsabwag kanunay sa Maayong Balita sa tanang katawhan. Mag-ampo kita.

2. Imong gipakita kang Tomas ang marka sa samad sa imong mga kamot aron siya motoo. Hatagi og hingpit nga pagtoo ang Imong katawhan ilabi na sa nagdumala sa Imong Simbahan ang Santo Papa mga Obispo ug kaparian aron molahutay sila sa ilang pagpangalagad Kanimo. Mag-ampo kita.

3. Imong gihiusa ang mga nahisalaag nga mga katawhan uban sa pagtugyan Nimo kang Pedro isip timaan sa kahiusahan, dad-a ang tanang katawhan diha sa Imong Gingharian. Mag-ampo kita.

4. Imong gipabati kanunay ang Imong dakung gugma sa tanan namong mga kaigsoonan nga nag-antus sa kalisod sa kinabuhi, ibubu kanila ang grasya pinaagi sa mga tawo nga gihimo Nimong instrumento aron makabaton sila og kahupayan sa ilang mga kalisdanan. Mag-ampo kita.

5. Imong gitagana ang yawe sa Imong Gingharian diha sa Imong balaang katawhan. Ablihi ang pultahan sa Imong Gingharian alang sa among mga kaigsoonan nga mihalin na ning maong kalibutan aron makatagamtam na sila sa ganti nga mao ang kalipay'ng dayon. Mag-ampo kita.

6. Imo kaming gitawag nga mahiduol Kanimo kanunay busa sa hilum nga paagi among ihalad karon ang personal namo nga katuyuan.

Pangulo: Amahan namong Langitnon masaligon kami nga sa kanunay dili Nimo ihikaw kanamo ang Imong kalooy ug grasya alang sa nanginahanglan Nimong katawhan.

Tabangi kami nga sa kanunay magmatinud-anon kami sa among pagtoo ug pagsalig Kanimo. Kini among gipangayo pinaagi ni Kristo among Ginoo. Amen.